Dios Su Bista Ta Riba Bo?

YEHOVA, e Kreadó Maestral, por mira? Klaru ku sí! I esei ta lógiko tambe pasobra manera Beibel ta bisa: “Esun ku a forma wowo, e no ta mira?” (Salmo 94:9) Yehova su bista ta muchu mas superior ku esun di hende. E ta mira no solamente nos aparensia, sino tambe ta “sondia kurason,” i e por “pisa kurason.” (Proverbionan 17:3; 21:2) Sí, e tin e kapasidat pa evaluá nos pensamentu, motivashon i deseonan di mas íntimo.

Yehova ta konsiente di e difikultatnan ku kisas nos ta topa den bida, i e ta kontestá nos súplikanan. E salmista a skirbi: “E wowonan di SEÑOR ta riba e hustunan, i su oreanan ta atento pa skucha nan sklamashon. SEÑOR ta serka di e hende di kurason kibrá, i ta salba esnan di spiritu abatí.” (Salmo 34:15, 18) Ta un konsuelo pa sa ku Yehova ta komprondé nos sirkunstansianan i ta kontestá nos súplikanan ku nos ta hasi di kurason!

Yehova Dios ta na haltura di loke hende ta hasi asta den sekreto. Sí, “tur kos ta habrí i bisto dilanti di wowo di esun ku nos tin di haber kuné.” (Hebreonan 4:13) Pues Dios ta mira tur nos akshonnan, sea nan ta bon òf malu. (Proverbionan 15:3) Por ehèmpel, Génesis 6:8 i 9 ta bisa ku “Noe a haña grasia den bista di SEÑOR” i ku el a “kana ku Dios.” Sí, Noe a haña e aprobashon i bendishon di Yehova pasobra e tabata obediente i el a sostené e prinsipionan hustu di Dios. (Génesis 6:22) Na kontraste ku esei, e hendenan den tempu di Noe tabata violento i masha inmoral. Dios no a sera wowo pa e situashon ei. El “a mira ku maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so.” Finalmente, Yehova a destruí e malbadonan pero a spar bida di Noe i su famia.—Génesis 6:5; 7:23.

Abo lo haña aprobashon den bista di Yehova? De echo, e wowonan di Yehova “ta move bai bin dor di henter tera, pa e por sostené fuertemente esnan ku nan kurason ta kompletamente di dje.” (2 Krónikanan 16:9) Pronto lo e bolbe eliminá tur malbado for di riba tera i salba hende humilde di kurason.—Salmo 37:10, 11.