Un Doló Profundo i Duradero

RESIENTEMENTE, un investigadó kier a haña sa kon hende deskonsolá debí na morto di un ser kerí ta sinti despues di tempu. El a manda un lista di pregunta pa algun mayor kende nan yu a muri vários aña pasá. No ta tur e mayornan a kontestá. Un tata ku yama Vladimir, kende su yu hòmber a muri sinku aña mas promé, a splika ku te ainda e tin hopi difikultat pa papia tokante su yu. *

Un tristesa ku ta dura largu asina no ta straño serka mayornan kende nan yu a muri. Dies aña pasa William su yu hòmber di 18 aña a muri hogá. William a skirbi: “Te ainda mi tin e doló di e pèrdida ei, i lo e keda tanten mi ta na bida.” Sinku aña despues ku Lucy su yu hòmber a muri di un malesa inesperá, Lucy a skirbi: “E promé dianan, mi tabata blo pensa: ‘E kos aki no por ta bèrdat.’ Mi tabata sinti komo si fuera mi tabatin un pesadia teribel i ku djis despues lo mi a lanta for di soño. Despues di poko tempu mi a kuminsá realisá ku di bèrdat el a muri i ku lo e no bin kas mas. Mi yu a muri sinku aña pasá, pero te ainda mi ta yora su morto, foral ora mi ta mi so.”

Dikon mayornan ku a pèrdè un yu, manera Vladimir, William i Lucy, ta sinti un doló asina profundo i duradero? Laga nos konsiderá algun motibu.

Dikon Asina Tantu Tristesa?

Ora un beibi nase den un famia, e mayornan ta eksperensiá emoshonnan ku bo no ta haña den ningun otro relashon humano. Djis karga nan yu chikí, wak e drumi òf mir’é smail ta duna nan un felisidat i satisfakshon profundo. Mayornan amoroso ta stima nan yunan i ta kuida nan bon. Nan ta entrená nan yunan pa komportá nan mes bon i pa nan tin bon manera. (1 Tesalonisensenan 2:7, 11) Segun ku e muchanan ta desaroyá komo resultado di e esfuersonan aki, e mayornan ta sinti nan orguyoso i ta kuminsá karga gran speransa pa nan.

Mayornan amoroso ta traha duru pa perkurá pa e nesesidatnan di nan yunan. Podisé ku regularidat nan ta spar sèn òf kosnan material pa asina den futuro nan por yuda nan yunan kuminsá ku nan propio famia. (2 Korintionan 12:14) E tremendo invershon di emoshon, tempu, esfuerso i plaka aki ku mayornan ta hinka den nan yunan ta indiká un solo kos: mayornan ta kria nan yunan pa biba, no pa muri. Ora un yu muri, e trabou di kri’é ta keda na mitar i e speransa ku e mayornan tabatin p’e ta kai na awa. Ta komo si fuera e muraya di morto a blòkia e  kaminda di amor i kariño ku tabata pasa di e mayornan pa e yu. E lugá ku nan yu hòmber òf yu muhé tabatin un tempu den nan kurason, awor ta bashí. E mayornan ta sinti un tristesa profundo ku no ta bai fásilmente.

Beibel ta konfirmá ku mayornan kende nan yu a muri ta karga un doló inmenso i persistente. Deskribiendo loke a pasa ora ku patriarka Jakòb a tende ku su yu hòmber Hosé a ser matá, Beibel ta bisa: “Jakòb a sker su pañanan i a pone paña-di-saku na su hep, i a tene rou hopi dia pa su yu [òf, “hopi tempu el a keda yora morto di su yu,” BPK]. E ora ei tur su yu hòmbernan i tur su yu muhénan a lanta pa konsol’é, ma el a nenga di wòrdu konsolá. I el a bisa: ‘Siguramente lo mi baha bai den Seol [òf, graf] na rou pa mi yu hòmber.’” Añanan despues, Jakòb ainda tabata pena pa su yu, ku el a asumí tabata morto. (Génesis 37:34, 35; 42:36-38) Un otro ehèmpel den Beibel ta di e muhé fiel Noemí ku a eksperensiá e morto di su dos yu hòmbernan. El a keda hopi tristu i tabata kier a kambia su nòmber di Noemí, ku a nifiká “Plasentero,” pa Mara, ku a nifiká “Marga.”—Ruth 1:3-5, 20, 21, nota na pia di página.

Sin embargo, Beibel ta bai mas leu ku djis konfirmá e tristesa ku mayornan ta sinti. E ta indiká tambe kon Yehova ta duna fortalesa na esnan ku ta deskonsolá. Den e siguiente artíkulo, nos lo konsiderá algun di e maneranan ku Dios ta duna konsuelo na hende ku ta pena pa morto di un ser kerí.

[Nota]