Kamindanan Romano—Monumentonan di Ingenieria Antiguo

KUA ta e monumento romano di mas importante? Lo bo bisa ta e Coliseo, kua su ruinanan bo por mira na Roma? Si nos ke papia di e konstrukshonnan romano ku a dura mas tantu tempu òf ku a yuda influensiá historia, nos lo tin ku pensa riba nan kamindanan.

No ta merkansia i ehérsito so a pasa riba e kareteranan romano. Romolo A. Staccioli, un spesialista di inskripshonnan antiguo, a bisa ku e kamindanan tabata un medio ku a yuda “promové e plamamentu di ideanan, influensianan artístiko i doktrinanan filosófiko i religioso,” inkluso esnan di kristianismo.

Den tempu antiguo, hende a konsiderá e kareteranan romano komo monumento. Atraves di un periodo di vários siglo, e romanonan a konstruí un ret di karetera efisiente ku al final a ekstendé pa mas ku 80.000 kilometer i a abarká un área ku awor ta pertenesé na mas ku 30 pais.

E promé via publica importante, ku awe nos lo a yama un kaminda grandi, tabata Via Apia. Konosí komo e lareina di kamindanan, el a konektá Roma ku Brundisium (yamá awe Brindisi), un stat portuario for di kua hende tabata nabegá bai Oriente. E kaminda aki a haña su nòmber for di Apio Claudio Ceco, e ofisial romano ku a kuminsá konstruyé rònt di aña 312 promé ku nos era. Roma tabata konektá tambe ku Via Salaria i Via Flaminia. Ámbos kaminda a ekstendé den direkshon ost rumbo pa Laman Adriátiko, habriendo e ruta pa bai paisnan di Balkan i tambe pa e regionnan di Riu Rijn i Riu Danube. Via Aurelia a kue kabes pa nort den direkshon di Galia i e Península Ibériko, i Via Ostiensis a bai direkshon di Ostia ku tabata e haf preferí di Roma pa hasi biahenan ida i buèlta pa Afrika.

E Proyekto di Konstrukshon di Mas Grandi di Roma

Kaminda tabata importante pa Roma asta promé ku su habitantenan a kuminsá konstruí kaminda nobo. E stat a lanta na e sitio ku rutanan di antigwedat a topa otro, e úniko lugá ku hende por a krusa e parti final di Riu Tiber. Segun fuentenan di antigwedat, pa mehorá e kareteranan ku tabata den uso kaba, e romanonan a kopia e kartaginesnan. Pero e berdadero predesesornan di e romanonan den e arte di konstrukshon di karetera tabata probablemente e etruskonan. Te ainda bo por mira rastro di nan kareteranan. Ademas, promé ku e tempu romano ya tabata eksistí hopi kaminda òf patruli basta transitá den e área ei. Esakinan kisas a ser usá pa hiba bestianan di un sabana pa otro. Sin embargo, e kamindanan aki tabata difísil pa biaha ariba, ya ku nan tabata yen di stòf den temporada di sekura i yen di lodo den temporada di áwaseru. E romanonan hopi biaha a konstruí nan kareteranan riba e patrulinan ei.

Kareteranan romano a ser diseñá kuidadosamente i trahá pa nan ta sólido, práktiko i bunita. Den kasonan ideal, e kamindanan a konektá un punto di salida na un sierto destinashon pa medio di e ruta mas kòrtiku posibel. Esei ta splika dikon hopi kaminda a konsistí di sekshonnan largu i stret. Sin embargo, hopi biaha e kamindanan tabatin ku sigui e kurvanan natural di e tereno. Den áreanan di hopi seru, unda ku tabata posibel, ingenieronan romano a konstruí nan kamindanan te na mitar di e barika di seru, na e banda di e seru ku ta haña mas solo durante dia. Pa usadónan di kaminda, e posishon aki a redusí  na un mínimo e difikultatnan ku lo por a ser kousá dor di mal wer.

Kon presis e romanonan a traha nan kamindanan? Tabatin sierto variashon, pero básikamente lo siguiente ta loke kobamentunan arkeológiko a revelá.

Na promé lugá nan a plania e rumbo di e kaminda. E tarea aki a ser asigná na e mididónan di tereno di e époka ei. Kaba nan a laga e trabou pisá di kobamentu pa e sòldánan, peonnan òf katibunan. Nan a koba dos roi òf trinchera ku a kore paralelo. E distansia mínimo entre nan tabata rònt di 2,4 meter, pero e distansia normal tabata 4 meter, i den bògt nan tabata asta mas hanchu. Ora un karetera tabata tur kla su hanchura por a yega un total di 10 meter, i esei a inkluí kaminda pa peaton na ámbos banda. Despues di a koba e dos trincheranan, nan a saka e tera entre nan i asina a forma un buraku. Unabes nan a yega na un base sólido, nan a yena e buraku ku tres òf kuater kapa di diferente material. Promé nan lo a yen’é kisas ku un kapa di piedra grandi òf restunan di konstrukshon. Despues lo  a pone piedranan chikí rondó òf piedra plat, kisas mará ku semènt. Kaba a sigui greis primí òf piedra garná te ariba.

E superfisie di algun kaminda romano tabata simplemente greis bon primí i kompakto. Sin embargo, tabata e kamindanan furá ku piedra ku a akapará e atmirashon di e hendenan ku a biba den e tempu ei. E superfisie di e kamindanan ei a ser formá dor di pidanan grandi di piedra, por lo general baranka ku nan por a haña lokalmente. E kamindanan tabata subi un tiki meimei, pa yuda e awa di yobe kore bai den e roinan na kada banda di kaminda. E konstrukshon aki a kontribuí na e durabilidat di e monumentonan aki i a yuda ku algun a sobrebibí te den nos tempu.

Rònt di 900 aña despues ku nan a traha Via Apia, e historiadó bizantino Procopio a deskribié komo “maravioso.” Relashoná ku e pidanan grandi di piedra ku a forma su superfisie, el a skirbi: “Apesar di e gran kantidat di tempu ku a pasa i e kantidat di garoshinan ku a pasa riba nan dia aden dia afó, nan aparensia no a ser perturbá den ningun manera, ni nan no a pèrdè nan akabado fini.”

Kon e kamindanan aki por a krusa opstákulonan natural, manera por ehèmpel riu? Un faktor importante tabata uso di brùg, di kua algun ta pará te awe, konfirmando e abilidat tékniko sobresaliente di e romanonan di antigwedat. E tùnelnan den e sistema di kaminda romano kisas ta ménos konosí, pero nan konstrukshon tabata un reto asta mas grandi, si tuma na kuenta e téknika- i hèrmèntnan di e époka ei. Un obra di referensia ta bisa: “Ingenieria romano . . . a optené resultadonan ku tabata inigualabel pa siglonan largu.” Un ehèmpel ta e tùnel na e pasashi di Furlo riba Via Flaminia. Na aña 78 di nos era, despues ku e ingenieronan a plania tur kos kuidadosamente, nan a koba un tùnel di 40 meter largu, 5 meter hanchu i 5 meter haltu, atraves di baranka sólido. Esei tabata realmente un logro impreshonante, foral si tene kuenta ku e hèrmèntnan ku tabatin disponibel e tempu ei. Konstrukshon di un sistema di kaminda asina tabata un di e proyektonan humano di mas grandi i difísil.

Biaheronan i e Plamamentu di Ideanan

Sòldá i komersiante, predikadó i turista, aktor i gladiadó, tur a usa e kamindanan aki. Esnan ku a biaha na pia por a abarká un 25 pa 30 kilometer pa dia. Biaheronan por a haña informashon tokante distansia dor di konsultá e pilánan ku a marka mia. E pilánan aki di piedra di vários forma, por lo general den forma di silinder, a ser poné kada 1.480 meter, e distansia di un mia romano.  Tambe tabatin áreanan di deskanso, kaminda biaheronan por a kambia kabai, kumpra algu di kome òf, den algun kaso, pasa anochi. Algun di e áreanan di servisio aki a desaroyá bira statnan chikí.

Djis promé ku e nasementu di kristianismo, Cesar Ougusto a kuminsá ku un programa di mantenshon di karetera. El a apuntá ofisialnan pa kuida un òf mas kaminda. El a laga pone den e Foro Romano loke tabata konosí komo e miliarium aureum, e pilá di mia di oro. E pilá aki ku lèternan di bròns koló di oro tabata e punto final ideal di tur e kamindanan romano na Italia. Esei ta e base di e dicho: “Tur kaminda ta hiba na Roma.” Tambe Ougusto a laga eksibí mapa di e ret di karetera di e imperio. Parse ku e ret tabata den óptimo kondishon pa e nesesidatnan i normanan di e tempu ei.

Algun biahero di antigwedat asta a usa guianan skirbí, òf iterinario, pa fasilitá nan biahe. E guianan aki a duna informashon manera por ehèmpel e distansia entre vários parada i deskripshon di e servisionan ku tabatin disponibel na e sitionan ei. Sin embargo, e guianan aki tabata karu i p’esei no tabata disponibel pa tur hende.

Asina mes, predikadónan kristian a plania i hasi vários biahe di distansia largu. Apòstel Pablo, meskos ku su kontemporáneonan, normalmente tabata biaha via laman ora e tabata bai den direkshon ost, pa probechá di e bientunan ku a dominá. (Echonan 14:25, 26; 20:3; 21:1-3) Den Laman Mediteráneo, e bientunan aki a supla for di direkshon wèst durante lunanan di zomer. Sin embargo, ora ku Pablo tabata biaha den direkshon wèst, hopi biaha el a bai via tera, usando e ret di karetera romano. Siguiendo e patronchi aki, Pablo a organisá su di dos i di tres biahe di misionero. (Echonan 15:36-41; 16:6-8; 17:1, 10; 18:22, 23; 19:1) * Rònt di aña 59 di nos era, Pablo a biaha riba e Via Apia bai Roma i a topa rumannan den fe na e Foro di Apio, esta e Merkado di Apio, un lugá hopi drùk ku a keda un 74 kilometer zùitost di Roma. Tabatin otro ruman ta ward’é 14 kilometer mas serka di Roma na e área di deskanso di e Tres Posadanan. (Echonan 28:13-15) Rònt di aña 60, Pablo por a bisa ku e bon nobo a ser prediká “den henter mundu” ku tabata konosí e tempu ei. (Kolosensenan 1:6, 23) E ret di karetera a kontribuí pa un parti den esei.

Pues anto, kamindanan romano a resultá di ta monumentonan ekstraordinario i duradero. Ademas, nan a fasilitá e plamamentu di e bon notisia di e Reino di Dios.—Mateo 24:14.

[Nota]

[Plachi na página 14]

Un pilá romano di marka mia

[Plachi na página 15]

Via Apia na rant di Roma

[Plachi na página 15]

Un kaminda den antiguo Ostia, Italia

[Plachi na página 15]

Markanan ku garoshinan di antiguo a laga atras, Oustria

[Plachi na página 15]

Parti di un kaminda romano ku pilá di marka mia, Hordania

[Plachi na página 16]

Ruina di grafnan riba Via Apia pafó di Roma

[Plachi na página 16]

Tùnel di Furlo riba Via Flaminia, den e region di Marche

[Plachi na página 17]

Brùg di Tiberio riba Via Emilia na Rimini, Italia

[Plachi na página 17]

Pablo a topa rumannan den fe na e Foro òf Merkado di Apio, un lugá hopi drùk

[Rekonosementu pa Potrèt na página 15]

Man robes te na punta, Ostia: ©danilo donadoni/Marka/age fotostock; man drechi te na punta, kaminda ku pilá di marka mia: Pictorial Archive (Near Eastern History) Est.