E Derecho di Tin un Nòmber

TUR persona tin derecho di tin un nòmber. Na Tahiti, nan ta duna nòmber asta na un beibi resien nasí ku a ser bandoná i ku ningun hende no sa ta ken ta su tata òf su mama. Na ofisina di registro sivil nan ta duna e yu bandoná un nòmber i un fam.

Sin embargo, tin un persona ku den un sentido nan a nenga e derecho básiko aki, un derecho ku ta ser otorgá na kasi tur hende. Sorprendentemente, e persona aki ta “e Tata, di kende henter e famia den shelu i riba tera ta haña su nòmber”! (Efesionan 3:14, 15) E kos ta ku hopi hende ta nenga di usa nòmber di e Kreadó manera bo ta hañ’é den Beibel. Nan ta preferá di remplasá e nòmber ku títulonan manera “Dios” òf “Señor.” Pues anto, kon Dios su nòmber ta? E salmista ta kontestá e pregunta ei: “Abo, kende su nòmber ta Yehova, abo so ta e Haltísimo riba henter tera.”—Salmo 83:18, NW.

Na prinsipio di siglo 19, ora ku e misioneronan di Sosiedat Misionero di Lònden a yega Tahiti, e pueblo polinesio tabata adorá vários dios. Kada un dios tabatin su propio nòmber, i e diosnan prinsipal tabata Oro i Taaroa. Pa por a distinguí e Dios di Beibel for di e otro diosnan, e misioneronan ei sin vasilá a kuminsá usa e nòmber divino ekstensamente, ku di spèl na tahitiano ta Iehova.

E nòmber ei a bira bon konosí i hende tabata us’é gewon den kòmbersashon i korespondensia diario. Rei Pomare II di Tahiti, kende a reina na prinsipio di siglo 19, a us’é ku frekuensia den su kartanan personal. Prueba di esaki nos por mira den e karta kopiá riba e página aki. E ta skirbí na ingles i ta eksibí den e Museo di Tahiti i Su Islanan. E karta aki ta proba ku den e tempu ei e hendenan no tabatin problema pa usa e nòmber di Dios. Es mas, Dios su nòmber personal ta aparesé míles di biaha den e promé tradukshon di Beibel na tahitiano, ku a ser kompletá na aña 1835.

[Plachi na página 32]

Rei Pomare II

[Rekonosementu pa Potrèt na página 32]

Rei i karta: Collection du Musée de Tahiti et de ses Îles, Punaauia, Tahiti