“Nos Mester Obedesé Dios mas ku Hende”

Librá pa Medio di “Sanger Presioso”

YEHOVA su muestra mas grandi di amor tabata di manda su Yu unigénito pa ofresé su bida humano perfekto komo un reskate. Komo hende pekadó, nos tin gran nesesidat di e reskate ei pa libra nos for di piká, ya ku ningun hende imperfekto “por redimí su ruman, ni paga Dios plaka di reskate p’e . . . pa e por a sigui biba pa semper.” (Salmo 49:6-9) Nos ta masha gradisidu mes ku Dios “a duna su Yu unigénito, pa ken ku kere den dje no bai pèrdí, ma tin bida eterno”!—Juan 3:16.

Kon e reskate ta libra nos? Laga nos konsiderá kuater manera ku nos ta alkansá libertat debí na e muestra sobresaliente aki di amor di parti di Yehova Dios.

Liberashon via e Reskate

Na promé lugá, Hesus su sakrifisio por libra nos di piká heredá. Nos tur a nase den piká. Sí, nos ta pekadó asta promé ku nos por a violá e lei di Yehova. Kon asina? Romanonan 5:12 ta bisa: “Dor di ún hende [Adam] piká a drenta den mundu, i morto dor di piká.” Komo yunan di e pekadó Adam, nos a heredá su kondishon imperfekto. Sin embargo, pago di e reskate ta hasi posibel ku nos por ser librá for di e gara di piká heredá. (Romanonan 5:16) Hesus a “eksperensiá morto pa tur hende,” dor di karga e konsekuensianan di piká pa e desendientenan di Adam.—Hebreonan 2:9; 2 Korintionan 5:21; 1 Pedro 2:24.

Na di dos lugá, e reskate por libra nos for di e efektonan mortal di piká. “E pago di piká ta morto.” (Romanonan 6:23) E kastigu pa piká ta morto. Dor di entregá su bida komo un sakrifisio, e Yu di Dios a hasi posibel ku humanidat obediente por haña bida eterno. De echo, “esun ku kere den e Yu tin bida eterno; ma esun ku no obedesé e Yu lo no mira bida.”—Juan 3:36.

Tuma nota ku nos por ser librá for di e efektonan di piká solamente si nos kere òf ehersé fe den e Yu di Dios. Esaki ta enserá hasi kambionan den nos bida i pone nos bida na armonia ku e boluntat di Dios. Nos tin ku rechasá kualke mal kaminda ku kisas nos tabata sigui i dal paso pa hasi loke ta agradá Dios. Apòstel Pedro a bisa ku nos tin ku ‘repentí i kombertí, pa nos pikánan wòrdu kitá.’—Echonan 3:19.

Na di tres lugá, e sakrifisio ku Hesus a ofresé ta libra nos di un mal konsenshi. Tur persona ku hasi un dedikashon na Yehova i bira disipelnan batisá di su Yu ta haña un alivio. (Mateo 11:28-30) Apesar di nos imperfekshon, nos ta sinti un goso profundo den sirbi Dios ku un konsenshi limpi. (1 Timoteo 3:9; 1 Pedro 3:21) Ora nos konfesá nos pikánan i stòp ku nos práktikanan pekaminoso, Dios ta mustra miserikòrdia na nos i nos ta haña alivio di un konsenshi ku tabata molestiá nos.—Proverbionan 28:13.

E Reskate Ta Duna Yudansa i Speransa

Por último, dor di ehersé fe den e reskate, nos ta ser librá di miedu relashoná ku nos posishon dilanti di Dios. Apòstel Juan a skirbi: “Si un hende hasi piká, nos tin un abogado serka e Tata, Hesukristu.” (1 Juan 2:1) Relashoná ku Hesus su papel komo abogado òf ayudante, apòstel Pablo a skirbi: “Tambe e  por salba pa semper esnan ku ta hala serka Dios pa medio di dje, komo ku semper e ta biba pa intersedé pa nan.” (Hebreonan 7:25) Tanten ku nos tin kualke rastro di piká, nos lo tin mester di e servisionan di e Sumo Saserdote Hesukristu pa yuda nos haña un posishon rekto serka Dios. Kon Hesus a fungi komo un sumo saserdote pa nos?

Kuarenta dia despues ku Hesus a resusitá na aña 33 di nos era, el a subi na shelu, kaminda el a presentá e balor di su “sanger presioso” na Dios. Komo resultado, Hesus pronto lo libra humanidat obediente for di piká i morto. * (1 Pedro 1:18, 19) Pues anto, bo no ta haña ku Hesukristu meresé nos amor i obedensia?

Ademas, Yehova Dios tambe meresé nos amor i obedensia. Amorosamente el a hasi posibel ku nos por haña redenshon òf “liberashon via reskate.” (1 Korintionan 1:30; NW) Nos debe Yehova no solamente e bida ku nos tin awor sino tambe kualke speransa ku nos tin di disfrutá di bida eterno. Pues, nos tin tur motibu pa “obedesé Dios mas ku hende.”—Echonan 5:29.

[Nota]

[Kuadro/Plachinan na página 9]

BO TABATA SA?

• Hesus a subi na shelu for di Seru di Oleifi.—Echonan 1:9, 12.

• Ta Hesus su fiel apòstelnan so tabata testigu di su asunshon.—Echonan 1:2, 11-13.