Pregunta di Lektor

E arka di aliansa tabatin solamente e dos tablanan di piedra den dje, òf tabatin otro artíkulonan tambe?

Ora ku a dediká e tèmpel di Salomon na aña 1026 promé ku nos era, “no tabatin nada den e arka sino solamente e dos tablanan ku Moisés a pone den dje na Horèb, kaminda SEÑOR a sera un aliansa ku e yunan di Israel, tempu ku nan a sali for di Egipto.” (2 Krónikanan 5:10) Sin embargo, esei no tabata semper asina.

“Den e di tres luna despues ku e yunan di Israel a sali for di tera di Egipto,” nan a drenta e desierto di Sinaí. (Eksodo 19:1, 2) Poko despues, Moisés a subi Seru Sinaí i a haña e dos tablanan di piedra di e Lei. El a konta: “E ora ei mi a bira i a baha for di e seru i a pone e tablanan den e arka ku mi a traha; i aya nan a keda, manera SEÑOR a ordená mi.” (Deuteronomio 10:5) Esaki tabata un arka òf kaha temporal ku Yehova a bisa Moisés traha pa karga e tablanan di e Lei. (Deuteronomio 10:1) Ta te na fin di aña 1513 promé ku nos era numa e arka di aliansa, òf arka di pakto, tabata kla pa ser usá.

Djis despues di e israelitanan su liberashon for di Egipto, nan a kuminsá murmurá tokante kuminda. Pues, Yehova a perkurá mana pa nan. (Eksodo 12:17, 18; 16:1-5) Na e okashon ei, Moisés a instruí Aaron: “Kohe un butishi i pone un omer di mana aden, i pone esaki dilanti di SEÑOR, pa e keda wardá durante di tur boso generashonnan.” E relato ta deklará: “Manera SEÑOR a ordená Moisés, asina Aaron a pon’é dilanti di e Testimonio [un archivo pa protehá dokumentonan importante], pa e keda wardá.” (Eksodo 16:33, 34) Ounke na e okashon ei Aaron sin duda a pone e mana den un butishi, nan mester a warda te ora Moisés a traha e Arka i pone e tablanan den dje pa nan por a pone e mana dilanti di e Testimonio.

Manera nos a menshoná kaba, e arka di aliansa a ser konstruí na final di aña 1513. Hopi mas despues, nan a pone e bara di Aaron den e Arka ei, despues di e rebelion di Koré i otronan. Apòstel Pablo ta menshoná “e arka di aliansa . . . , den kual tabatin un butishi di oro ku e mana aden, i Aaron su bara ku a floria i e tablanan di e aliansa.”—Hebreonan 9:4.

E mana tabata algu ku Dios a perkurá pa e israelitanan durante nan estadia di 40 aña den desierto. Dios no a proveé mana mas pa nan ora ku ‘nan a kuminsá kome di loke e tera primintí a produsí.’ (Josué 5:11, 12) A pone e bara di Aaron den e arka di aliansa pa un propósito, esta, p’e sirbi komo un señal òf un prueba kontra e generashon rebelde. Esaki ta indiká ku e bara a keda einan por lo ménos durante e tempu ku nan tabata den desierto. Pues anto, ta parse lógiko pa konkluí ku poko despues ku Israel a drenta e Tera Primintí i promé ku a dediká e tèmpel di Salomon, nan a saka e bara di Aaron i e butishi di oro ku mana aden for di e arka di aliansa.