Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko un kristian por hasi si e ta sintié emoshonalmente òf spiritualmente kansá?

Nos tin ku identifiká e kousa di nos kansansio. Kisas ta bon pa hasi un inventario di nos kustumbernan i poseshonnan, i pone un banda tur peso innesesario. Nos por pone metanan realístiko segun nos sirkunstansia. Ta importante pa nos kuida nos salú spiritual i esei ta enserá ku nos mester hasi orashon i meditá regularmente.—15/8, página 23-6.

• Pakiko Testigunan di Yehova ta mira e sifra 144.000 komo algu literal?

Despues ku apòstel Juan a tende tokante e 144.000, el a mira “un multitut grandi ku ningun hende no por a konta.” (Revelashon 7:4, 9) Si e sifra 144.000 tabata simbóliko, e efekto di e kontraste ei lo a bai pèrdí. Hesus a yama esnan ku lo reina kuné un “tou chikitu.” (Lukas 12:32)—1/9, página 30.

• Dikon un israelita tabatin mag di bende un bestia morto ku no a sangra ku un stranhero?

Un stranhero i un residente stranhero ku no a bira prosélito, no tabata bou di e Lei. P’esei un israelita tabatin mag di duna òf bende e bestianan ei ku nan. (Deuteronomio 14:21) Pero un prosélito sí tabata mará na e Lei i lo no a kome karni di bestia ku no a sangra. (Levítiko 17:10)—15/9, página 26.

• Kiko ta biomimétika, i dikon lo e por ta di interes pa kristiannan?

Esei ta e kampo di siensia ku ta purba imitá diseñonan ku tin den naturalesa. Por ehèmpel, e ruman hòmbernan Wright a diseñá un avion despues di a studia kon paranan grandi ta bula. Pues, biomimétika por motivá un kristian pa duna gloria na e Kreadó.—1/10, página 9.

• Ta ken ta e persona ku 2 Korintionan 12:2-4 ta bisa ku a wòrdu hibá den paradeis?

E pasashi ei ta bini djis despues di e versíkulonan den kua Pablo a defendé su posishon komo apòstel. Siendo ku Beibel no ta papia di niun otro persona ku tabatin un eksperensia asina, i ya ku ta Pablo ta esun ku ta konta nos di dje, probablemente ta e mes tabatin e vishon aki.—15/10, página 8.

• Kua ta algun karakterístika di Hesus ku ta kualifik’é komo Lider skohí dor di Dios?

Hesus a mantené integridat perfekto, siendo onesto i rekto den su kondukta. E tabata kompletamente dediká na Dios. Hesus tabatin interes profundo den hende i tabata dispuesto pa traha.—1/11, página 6-7.

• Unda e demoñonan lo ta durante e Mil Aña?

Nos por yega na e konklushon lógiko ku durante Kristu su Reinado di Mil Aña lo mara nan i tira nan huntu ku Satanas den e abismo. (Revelashon 20:1-3) Génesis 3:15 a predisí ku lo heridá e kolebra su kabes, i esaki ta enserá e seramentu di Satanas den abismo durante e Mil Aña. Su simia ta inkluí e angelnan malbado, esta, e demoñonan. E echo ku nan a mustra ku nan tin miedu di e abismo ta indiká ku nan ta konsiente di e binidero restrikshon aki. (Lukas 8:31)—15/11, página 30-1.

• Dikon un persona mester tene kuidou ku bebementu di alkohòl, asta si e ta evitá di yega te na e punto ku hende ta mira ku e ta burachi?

Tin persona ta duna masha tiki señal di ta burachi maske nan a dal vários drinks. Sin embargo, pokopoko pero sigur un persona por kuminsá dependé di alkohòl i bira “sklabisá na biña.” (Tito 2:3) Hesus a spièrta nos pa no bira kargá “pa kousa di paranda i buracheria [òf, “komementu di mas i bebementu di mas,” NW].” (Lukas 21:34, 35) Un hende no mester a bebe te bira burachi pa e kuminsá sinti su mes grògi i floho tantu den sentido físiko komo spiritual.—1/12, página 19-21.