Pregunta di Lektor

Dikon a permití hòmber israelita kasa ku muhé stranhero ku tabata den koutiverio siendo ku e Lei di Moisés a manda pa no sera aliansa matrimonial ku stranheronan?—Deuteronomio 7:1-3; 21:10, 11.

E motibu pakiko a permití esaki tin di haber ku sirkunstansianan spesial. Yehova a manda e israelitanan pa destruí e statnan di shete nashon na e tera di Kánaan, i mata tur nan habitantenan. (Deuteronomio 20:15-18) Den kaso di otro nashonnan, e úniko adulto ku probablemente a sobrebibí tabata bírgennan kapturá. (Numbernan 31:17, 18; Deuteronomio 20:14) Pero ta solamente si un muhé asina a dal sierto pasonan, un hòmber israelita lo por a kasa kuné.

Relashoná ku e pasonan ku un hende muhé asina mester a dal, Beibel ta bisa: “Lag’é feita su kabes i kòrta su uñanan, i kita e bistí di su koutiverio. I despues ku el a keda den bo kas i a yora su tata i su mama henter un luna, bo mag drumi kuné i bira su esposo, i e lo ta bo esposa.”—Deuteronomio 21:12, 13.

Si un israelita kier a kasa ku un bírgen ku nan a kapturá, e bírgen aki mester a feita su kabes. Feitamentu di kabes tabata un forma di ekspresá luto i tristesa. (Isaias 3:24) Por ehèmpel, ora e patriarka Jòb a pèrdè tur su yunan i tur su pertinensianan, el a feita su kabes pa reflehá su tristesa. (Jòb 1:20) Ademas un hende muhé stranhero mester a drecha su uñanan, kisas dor di “kòrta” nan di tal manera ku asta si nan tabata pintá mes, su mannan lo no a parse atraktivo. (Deuteronomio 21:12) Kiko tabata “e bistí di su koutiverio” ku e hende muhé kapturá mester a kita? E hende muhénan di statnan pagano, tabatin e kustumber di bisti nan mihó bisti ora enemigunan tabata a punto di kapturá nan stat. Nan tabata hasi esei ku e speransa di atraé esnan ku a kapturá nan. Ta e bistí ei e hende muhé den koutiverio ku tabata di luto mester a kita.

Un hende muhé kapturá ku tabata bai bira esposa di un hende hòmber israelita mester a tene luto pa su defuntunan pa un luna lunar. E destrukshon di e statnan derotá mester tabata asina total ku ningun di su famia- i kontaktonan sosial lo no por tabata na bida mas. Siendo ku e sòldánan israelita lo a destruí tur e imágennan di su diosnan, su ophetonan di adorashon lo no tabat’ei mas. Tambe e luna lunar a sirbi komo un periodo di purifikashon durante kua un hende muhé den koutiverio tabata kibra tur laso ku e tabatin ku su religion anterior.

Pero e situashon tabata diferente den kaso di hende muhé stranhero en general. Relashoná ku esaki, e siguiente prinsipio tabata apliká: “No emparentá [‘sera aliansa matrimonial,’ NW] ku nan; no duna bo yu muhé na nan yu hòmber, ni tuma nan yu muhé pa bo yu hòmber.” (Deuteronomio 7:3) Pa ki motibu nan a haña e restrikshon aki? Deuteronomio 7:4 ta bisa: “Pasobra nan lo kita bo yu hòmber di sigui mi pa sirbi otro diosnan.” Pues, e prohibishon tabata pa protehá e israelitanan di kontaminashon religioso. Sin embargo, un hende muhé den e sirkunstansianan deskribí na Deuteronomio 21:10-13 no tabata un menasa den e sentido ei. Tur su famianan tabata morto, i e imágennan ku ta representá su diosnan a wòrdu destruí. E no tabatin ningun kontakto ku praktikadónan di religion falsu. Bou di tal sirkunstansia a permití un hòmber israelita kasa ku un hende muhé stranhero.