Loke Realmente Nos Tin Mester pa Nos Ta Felis

YEHOVA, “e Dios felis,” i Hesukristu, “e felis i úniko Mandatario,” sa mihó ku kualke otro persona kiko nos tin mester pa nos ta felis. (1 Timoteo 1:11, NW; 6:15, NW) Pues, no ta un sorpresa ku nos ta haña e yabi pa felisidat den Dios su Palabra, Beibel.—Revelashon 1:3; 22:7.

Den su famoso Sermon Riba Seru, Hesus a deskribí kiko ta nesesario pa nos ta felis. El a deklará: “Felis ta esnan” (1) ku ta konsiente di nan nesesidat spiritual, (2) ku ta yora, (3) ku ta humilde (4) ku tin hamber i set pa hustisia, (5) ku ta miserikòrdioso, (6) ku tin kurason puru, (7) ku ta hasi pas, (8) ku ta ser persiguí pa kousa di hustisia i (9) ku ta ser insultá i persiguí pa kousa di Hesus.—Mateo 5:3-11. *

E Deklarashonnan di Hesus Ta Korekto?

E deklarashonnan di Hesus mester di un poko splikashon pa nos mira ku nan ta bèrdat. Ningun hende lo nenga ku un persona humilde, miserikòrdioso i ku ta hasi pas, motivá pa un kurason puru, lo ta mas felis ku un persona yen di rabia, buskadó di pleitu i sin miserikòrdia.

 Pero kisas nos ta puntra nos mes kon por ta posibel ku ta yama hende ku tin hamber i set pa hustisia òf ku ta yora, felis. E hendenan ei tin un punto di bista realístiko di e kondishonnan mundial. Nan ta “suspirá i keha pa motibu di tur e abominashonnan ku ta wòrdu hasí” den nos tempu. (Ezekiel 9:4) Esei riba su mes no ta hasi nan felis. Sin embargo, ora nan haña sa tokante Dios su propósito pa trese kondishonnan hustu riba tera i hustisia pa hende oprimí, nan goso no tin límite.—Isaias 11:4.

Amor pa hustisia tambe ta pone hende yora òf lamentá e echo ku nan mes frekuentemente ta faya di hasi loke ta bon. Pues nan ta pober di spiritu, es desir, konsiente di nan nesesidat spiritual. E tipo di hendenan ei ta dispuesto pa buska guia serka Dios pasobra nan ta realisá ku ta e so por yuda hende superá nan debilidatnan.—Proverbionan 16:3, 9; 20:24.

Hende ku ta yora, ku tin hamber i set pa hustisia i ku ta konsiente di nan nesesidat spiritual, ta rekonosé e importansia di tin un bon relashon ku e Kreadó. Un bon relashon ku hende mes ta kontribuí na felisidat, pues kuantu mas ainda un bon relashon ku Dios. Sí, berdaderamente nos por yama hende serio, amante di loke ta korekto, i ku ta dispuesto pa aseptá Dios su guia, felis.

Sin embargo, kisas ta difísil pa bo kere ku un persona ku ta ser persiguí i insultá por ta felis. Pero, si Hesus mes a bisa esei, lo e mester ta bèrdat. Pues anto, kon nos mester komprondé su palabranan?

Persiguí Pero Felis—Kon Por Ta?

Tuma nota ku Hesus no a bisa ku insulto i persekushon riba nan mes ta hiba na felisidat. El a stipulá: “[Felis] ta esnan ku ta wòrdu persiguí pa kousa di hustisia, . . . ora ku hende insultá boso i persiguí boso . . . pa mi kousa.” (Mateo 5:10, 11) Pues un hende ta resultá felis solamente ora e ta sufri insulto pasobra e ta un siguidó di Kristu i pasobra e ta hiba su bida segun e patronchi di prinsipionan hustu ku Hesus a siña.

Un ehèmpel di esaki nos ta mira den loke a sosodé ku e promé kristiannan. Miembronan di e Konsilio, òf korte supremo hudiu, “a yama e apòstelnan bin paden, nan a suta nan i a taha nan pa no papia mas den e nòmber di Hesus, i a pone nan den libertat.” Kon e apòstelnan a reakshoná? “Asina nan a bai for di presensia di e Konsilio, regosihando ku nan a wòrdu konsiderá digno pa sufri bèrgwensa pa su nòmber. I tur dia, den tèmpel i di kas pa kas, nan tabata sigui siña hende i prediká Hesus komo e Kristu.”—Echonan 5:40-42; 13:50-52.

Apòstel Pedro a yuda nos mira mas kla ainda e konekshon entre insulto òf reproche i felisidat. El a skirbi: “Si boso wòrdu reprochá pa e nòmber di Kristu, boso ta bendishoná [felis], pasobra e spiritu di gloria i di Dios ta riba boso.” (1 Pedro 4:14) Sí, sufri komo un kristian pasobra bo ta hasi loke ta korekto—maske tal sufrimentu ta desagradabel—ta duna bo e felisidat òf satisfakshon di sa ku bo ta risibí e spiritu santu di Dios. Kon Dios su spiritu ta konektá ku felisidat?

Obranan di Karni òf Fruta di e Spiritu?

Dios su spiritu santu ta solamente riba esnan ku ta obedesé Dios komo gobernante. (Echonan 5:32) Yehova no ta duna su spiritu na hende ku ta praktiká “e obranan di karni.” E obranan ei ta “inmoralidat, impuresa, sensualidat, idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu, envidia, buracheria, parandiamentu, i kosnan asin’aki.” (Galationan 5:19-21) Ta sierto ku den e mundu djawe “e obranan di karni” ta bisto tur kaminda. Sin embargo, e hendenan ku ta praktiká nan no ta gosa di felisidat berdadero i permanente. Mas bien, e obranan ei ta daña  un hende su bon relashon ku su famia-, amigu- i konosínan. Es mas, e Palabra di Dios ta deklará ku esnan ku ta “praktiká sorto di kosnan asina lo no heredá e reino di Dios.”

Na kontraste, Dios ta duna su spiritu na hende ku ta kultivá e “fruta di e spiritu.” E kualidatnan ku ta forma e fruta aki ta “amor, goso, pas, pasenshi, kariño, bondat, [“fe, suavedat,” NW], dominio propio.” (Galationan 5:22, 23) Ora nos ta desplegá e kualidatnan aki, nos ta krea e kondishonnan pa nos por tin relashonnan pasífiko ku otro hende i ku Dios, lokual ta resultá den berdadero felisidat. (Wak e kuadro.) Mas importante ainda, dor di demostrá amor, kariño, bondat i otro kualidatnan produsí pa Dios su spiritu, nos ta agradá Yehova i nos tin e speransa felis di haña bida eterno den Dios su mundu nobo di hustisia.

Felisidat Ta un Asuntu di Skohe

Ora Wolfgang ku Brigitte, un pareha ku ta biba na Alemania, a kuminsá studia Beibel seriamente, nan tabatin hopi di e kosnan material ku hende ta pensa ta nesesario pa nan ta felis. Nan tabata yòn i salú. Nan a bisti paña karu, nan tabata biba den un kas bunita drechá, i nan tabatin un negoshi eksitoso. Nan tabata dediká mayor parti di nan tempu na purba haña mas kos material, pero esei no a duna nan berdadero felisidat. Pero ku tempu, Wolfgang ku Brigitte a tuma un desishon krusial. Nan a skohe pa kuminsá dediká mas tempu i esfuerso pa alkansá balornan spiritual i a buska maneranan pa hala mas serka di Yehova. No a tarda hopi ku e rumbo ei ku nan a skohe a trese un kambio den nan aktitut, lokual na su turno, a motivá nan pa simplifiká nan bida i sirbi komo pionero, es desir, komo predikadónan di Reino di tempu kompletu. Awe, nan ta sirbi komo boluntario na e sukursal di Testigunan di Yehova na Alemania. Ademas, nan ta siñando un idioma asiátiko pa asina nan por yuda stranheronan siña e bèrdat ku tin den Dios su Palabra, Beibel.

E pareha aki a haña berdadero felisidat? Wolfgang a bisa: “For di tempu ku nos a kuminsá partisipá mas aktivamente den kosnan spiritual, nos ta mas felis i nos ta sinti mas satisfakshon. Sirbi Yehova di henter alma a fortalesé  nos matrimonio tambe. Nos tabatin un matrimonio felis kaba, pero nos obligashonnan i interesnan tabata hala nos kada un den un otro direkshon. Awor nos ta sigui unidamente e mesun meta.”

Kiko Nos Tin Mester pa Nos Ta Felis?

Den poko palabra: Evitá “e obranan di karni,” i kultivá e “fruta di [Dios su] spiritu.” Pa un hende ta felis, e mester anhelá di tin un relashon será ku Dios. Un persona ku ta hasi esfuerso pa logra esei ta pas ku e deskripshon ku Hesus a duna di un persona felis.

Pues anto, no konkluí eróneamente ku felisidat ta fuera di bo alkanse. Por ta masha bon ku aworakí kisas bo no tin bon salú òf bo por tin asta problema den bo matrimonio. Podisé ya bo no por haña yu mas, òf kisas bo ta luchando pa haña un karera eksitoso. Tal bes bo pòtmòni no ta yen mas manera ántes. No opstante, kobra ánimo; bo no tin nodi desesperá! Dios su gobernashon di Reino lo resolvé e problemanan aki i sientos mas. De echo, pronto Yehova Dios lo kumpli ku su promesa ekspresá dor di e salmista: “Bo reino ta un reino eterno . . . Bo ta habri bo man, i ta satisfasé e deseo di tur ser bibu.” (Salmo 145:13, 16) Manera miónes di sirbidó di Yehova rònt mundu por konfirmá, teniendo na mente e promesa alentador aki di Yehova lo kontribuí masha hopi na bo felisidat awe.—Revelashon 21:3.

[Nota]

[Kuadro/Plachi na página 6]

Faktornan Ku Ta Kontribuí na Felisidat

Amor ta motivá otro hende pa nan tambe stima bo.

Goso ta duna bo e fortalesa pa trata ku problema i prueba.

Pas ta yuda bo mantené relashonnan sin konflikto.

Pasenshi ta hasi posibel ku bo por keda felis asta ora bo ta bou di prueba.

Kariño ta atraé hende na bo.

Bondat di bo parti ta pone otro hende duna un man ora bo tin mester di yudansa.

Fe lo duna bo e siguransa ku lo bo risibí Dios su guia amoroso.

Suavedat lo duna bo trankilidat di kurason, mente i kurpa.

Dominio propio ta nifiká ku lo bo kometé ménos eror.

[Plachinan na página 7]

Pa logra felisidat, bo tin ku satisfasé bo nesesidatnan spiritual