Kapadosia—Kaminda Hende A Biba den Kasnan Formá pa Bientu i Awa

APÒSTEL Pedro a papia di Kapadosia. El a dirigí su promé karta inspirá entre otro na e hendenan ku a “biba komo stranhero, plamá tur rònt den . . . Kapadosia.” (1 Pedro 1:1) Ki tipo di lugá esei tabata? Pakiko su habitantenan tabata biba den lugánan kobá den piedra? Kon nan a bini den kontakto ku kristianismo?

“Diripiente nos a haña nos mes pèrdí den un mondi di baranka ku forma di papurèshi i pilar,” segun e biahero britániko W. F. Ainsworth, kende a bishitá Kapadosia den dékada di 1840. Ainda e paisahe úniko ta sorprendé hende ku awe ta bishitá e region aki di Turkia. Den e vayenan di Kapadosia tin “estatuanan” straño di piedra agrupá banda di otro manera sòldá muda. Algun ta parse skorsten enorme i ta mas ku 30 meter haltu. Otronan ta parse kaska di papurèshi, obelisko òf padestul gigantesko.

Segun ku solo ta dal den e estatuanan aki durante dia, nan ta reflehá vários koló masha bunita. Mainta trempan nan ta ros kla. Pa mèrdia nan ta haña un koló krèm, i ora solo ta baha nan ta reflehá un koló di oro. Kiko a krea e “mondi di baranka ku forma di papurèshi i pilar” aki? I pakiko e hendenan di e region a koba nan kasnan den nan?

Formá pa Bientu i Awa

Kapadosia ta situá den kurason di e Península di Anatolia, ku ta konektá Asia ku Europa. Si no tabata pa su dos volkannan e region aki lo tabata un plateau. Vários mil aña pasá, nan erupshonnan poderoso a kubri e área ku dos tipo di baranka: un tipo duru i pretu, i un tipo suave ku yama tufa, ku ta un baranka blanku formá pa shinishi volkániko ku a bira duru.

Segun ku riu, áwaseru i bientu a kuminsá koba den e tufa suave, nan a forma klof den e barankanan. Ku tempu, algun di e serunan ku ta keda pegá ku e klofnan aki gradualmente a kuminsá habri for di otro i forma yen di kolumna manera papurèshi, lokual a duna e tera un paisahe di eskultura ku bo no ta haña na niun otro parti di mundu. Algun di e papurèshinan aki a haña asina tantu buraku ku nan a kuminsá parse kas di abeha. E habitantenan tabata koba saka kuarto den e barankanan suave aki, i segun ku e famia tabata krese, nan tabata agregá mas kuarto. Nan a ripará tambe ku e kasnan aki tabata fresku den zomer i kayente den wenter.

Bibando na un Krusada di Sivilisashon

Si no ta pasobra e hendenan ku tabata biba den e kuebanan di Kapadosia tabata  biba na un krusada importante di sivilisashon, nan lo tabata hopi isolá. E famoso Kaminda di Seda, e ruta komersial di 6.500 kilometer ku a konektá e Imperio Romano ku China, tabata pasa dor di Kapadosia. Ademas di komersiantenan, e ehérsitonan di Pèrsia, Gresia i Roma tambe a usa e ruta aki pa bai di un lugá pa otro. E biaheronan aki a trese ideanan religioso nobo.

Pa siglo 2 promé ku nos era, tabatin komunidatnan hudiu na Kapadosia. I na aña 33 di nos era tabatin hudiunan di e region aki na Yerusalèm. Nan tabata einan pa selebrá e Fiesta di Pentekòste. Pues, apòstel Pedro a prediká n’e hudiunan di Kapadosia despues ku spiritu santu a baha riba nan. (Echonan 2:1-9) Aparentemente algun hende a reakshoná bon riba su mensahe i a bai kas bèk ku nan religion nobo. P’esei Pedro, den su promé karta, a dirigí su mes n’e kristiannan di Kapadosia.

Pero segun ku añanan a pasa, filosofia pagano a kuminsá influensiá e kristiannan na Kapadosia. A yega asta dje leu ei ku den siglo 4 tres lider importante di iglesia di Kapadosia a defendé e doktrina antibíbliko di Trinidat fuertemente. Nan tabata Gregorio di Nasianzo, Basilio e Grandi i su ruman Gregorio di Nisa.

Basilio e Grandi a boga tambe pa un bida sin luho i plaser, estilo di frater ku sùr. E kasnan humilde di Kapadosia kobá den baranka tabata hopi adekuá p’e bida di ousteridat ku el a rekomendá. Segun ku e komunidat ku a hiba un bida sin luho i plaser a oumentá, nan a traha iglesianan kompletu den algun di e ‘papurèshinan’ mas grandi. Pa siglo 13, nan a koba kasi treshen misa den baranka. Hopi di esakinan a keda konserbá te na dia djawe.

Ounke nan no ta usa e misa- i monasterionan mas, e estilo di bida di e hendenan sí no a kambia mashá atraves di siglonan. Ainda tin hende ta biba den hopi di e kuebanan aki. Kasi tur hende ku bishitá Kapadosia ta keda asombrá kon su habitantenan kreativo a kombertí formashonnan natural di baranka den kasnan práktiko.

[Mapa na página 24, 25]

(Pa e teksto den su formato kompleto, wak e publikashon)

KAPADOSIA

CHINA (Katay)