Yehova Ta Grandi den Amor Leal
Yehova Ta Grandi den Amor Leal
“SEÑOR ta . . . grandi den miserikòrdia [“bondat amoroso,” NW].”—SALMO 145:8.
1. Kon grandi e amor di Dios ta?
“DIOS ta amor.” (1 Juan 4:8) E ekspreshon alentador ei ta demostrá ku Yehova su manera di goberná ta basá riba amor. Imaginá bo, asta hende ku no ta obedesé Dios ta benefisiá di e solo i e áwaseru ku e ta perkurá den su gran amor! (Mateo 5:44, 45) Pa motibu di su amor p’e mundu di humanidat, asta su enemigunan por repentí, kombertí i haña bida eterno. (Juan 3:16) Pero pronto Yehova lo destruí e malbadonan inkoregibel pa asina hende ku ta stim’é por gosa di bida eterno den un hustu mundu nobo.—Salmo 37:9-11, 29; 2 Pedro 3:13.
2. Ki tipo di amor spesial Yehova ta mustra na esnan ku a dediká nan mes na dje?
2 Yehova ta mustra amor na su adoradónan berdadero den un manera hopi spesial i duradero. E palabra hebreo pa e tipo di amor ei ta wòrdu tradusí komo “bondat amoroso” òf “amor leal.” Rei David di e Israel di pasado a balorá Dios su bondat amoroso profundamente. A base di su eksperensia personal i su meditashon riba Dios su trato ku otro hende, ku konfiansa David por a kanta: “SEÑOR ta . . . grandi den miserikòrdia [amor leal].”—Salmo 145:8.
Ken Ta Dios Su Lealnan
3, 4. (a) Kon Salmo 145 ta yuda nos sa ken ta Yehova su lealnan? (b) Kon e lealnan di Dios ta ‘bendishon’é’?
3 Hana, mama di profeta Samuel, a bisa tokante Yehova Dios: “E ta warda e pianan di su santunan [“lealnan,” NW].” (1 Samuel 2:9) Ken ta e “lealnan” aki? Rei David a duna e kontesta. Despues ku el a elogiá e kualidatnan maravioso di Yehova, el a deklará: “Bo santunan [“lealnan,” NW] lo bendishoná bo.” (Salmo 145:10) Kisas bo ta puntra bo mes kon hende por bendishoná Dios. Nan ta hasi esei prinsipalmente dor di alab’é òf papia bon di dje.
4 E lealnan di Yehova ta e personanan ku ta usa nan boka pa papia bon di dje. Na okashonnan sosial i na reunionnan kristian, di kiko nan sa papia mas tantu? No ta di Yehova su Reino? Dios su sirbidónan leal tin e mesun sintimentunan ku David, kende a kanta: “Nan lo papia di e gloria di bo [Yehova su] reino, i papia di bo poder.”—Salmo 145:11.
5. Kon nos por sa ku Yehova ta tuma nota ora su lealnan ta papia bon di dje?
5 Yehova ta tuma nota ora su lealnan ta alab’é? Sí, e ta presta atenshon na loke nan ta papia. Den un profesia relashoná ku adorashon berdadero den nos tempu, Malakias a skirbi: “E ora ei esnan ku a teme SEÑOR a papia ku otro, i SEÑOR a presta atenshon i a tende esaki, i un buki di memoria a wòrdu skirbí su dilanti pa esnan ku ta teme SEÑOR i ku ta onra su nòmber.” (Malakias 3:16) Yehova ta keda hopi kontentu ora su lealnan ta papia bon di dje, i e ta kòrda riba nan.
6. Ki aktividat ta yuda nos rekonosé e lealnan di Dios?
6 Tambe nos por rekonosé Yehova su sirbidónan leal na nan kurashi i n’e inisiativa ku nan ta tuma pa papia ku hende ku no ta adoradó di e Dios berdadero. Sí, e lealnan di Dios ta “hasi yunan di hende konosé [su] echonan poderoso, i e mahestat glorioso di [su] reino.” (Salmo 145:12) Abo ta buska oportunidat i ta probechá plenamente di esakinan pa papia ku otro hende ku no ta kreyente ainda tokante e reino di Yehova? Distinto di gobièrnunan humano ku lo disparsé pronto, su reino ta eterno. (1 Timoteo 1:17) Ta urgente pa hende siña tokante Yehova su reino eterno i apoy’é aktivamente. David a kanta: “Bo reino ta un reino eterno, i bo dominio ta di generashon pa generashon.”—Salmo 145:13.
7, 8. Kiko a tuma lugá na 1914, i ki prueba tin ku Dios ta reinando awor pa medio di e Reino di su Yu?
7 Desde 1914 tabatin mas motibu ainda pa papia tokante e reino di Yehova. Den e aña ei, Dios a establesé e Reino Mesiániko den shelu ku Kristu Hesus, Yu di David, komo Rei. Dje manera ei, Yehova a kumpli ku su promesa di ku e reino di David lo a keda firmemente establesí pa tempu indefiní.—2 Samuel 7:12, 13; Lukas 1:32, 33.
8 E kumplimentu progresivo di e señal di e presensia di Hesus ta un prueba ku Yehova ta reinando awor pa medio di e Reino di su Yu, Hesukristu. E aspekto mas sobresaliente di e señal ei ta e obra ku Hesus a profetisá ku tur Yehova su lealnan lo hasi, ora el a bisa: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mateo 24:3-14) Pa motibu ku e lealnan di Dios ta kumpliendo yen di entusiasmo ku e profesia ei, awor mas ku seis mion hòmber, muhé i mucha ta hasiendo e trabou impreshonante aki ku hamas lo ser ripití. E fin pa tur opositor di Yehova su Reino lo yega pronto.—Revelashon 11:15, 18.
Benefisiá di Yehova Su Soberania
9, 10. Ki kontraste tin entre Yehova i gobernantenan humano?
9 Si nos ta kristiannan dediká, nos relashon ku Señor Soberano Yehova ta trese hopi benefisio pa nos. (Salmo 71:5; 116:12) Por ehèmpel, dor ku nos ta teme Dios i ta praktiká hustisia, nos tin su aprobashon i den sentido spiritual nos a hala serka dje. (Echonan 10:34, 35; Santiago 4:8) Na kontraste, hopi bes nos por mira gobernantenan humano den kompania di hendenan importante manera lidernan militar, komersiantenan riku, òf selebridatnan di deporte i di farándula. Segun e korant afrikano Sowetan, un funshonario prominente di gobièrnu a bisa lo siguiente tokante zonanan pober den su pais: “Mi ta komprondé dikon mayoria di nos no kier bai n’e lugánan ei. Ta pasobra simplemente nos kier lubidá ku e situashonnan ei ta eksistí. E ta molestiá nos konsenshi i nos ta sinti nos masha inkómodo den e [outonan] karu ku nos ta kore.”
10 Klaru ku tin algun gobernante humano ku tin e bienestar di nan súpditonan mashá na pechu. Pero ni esnan di mas noble den nan no konosé nan súpditonan íntimamente. En bèrdat, nos por puntra nos mes: Tin un gobernante ku ta interesá asina tantu den tur su súpditonan ku e ta kla pa yuda nan den tempu di difikultat? Sí, tin unu. David a skirbi: “SEÑOR ta sostené tur ku kai, i ta lanta tur ku ta abatí.”—Salmo 145:14.
11. Ki pruebanan e lealnan di Dios sa haña nan aden, i ki yudansa nan tin?
11 E lealnan di Yehova Dios ta haña nan ku hopi prueba i kalamidat pa motibu ku nan ta biba den un mundu kontrolá pa Satanas “e malbado.” I nan mes imperfekshon tambe ta kontribuí na esei. (1 Juan 5:19; Salmo 34:19) Por ehèmpel, kristiannan ta wanta persekushon. Algun ta sufri di un enfermedat króniko òf a pèrdè un ser kerí. Tin biaha e erornan ku e lealnan di Yehova mes ta kometé ta laga nan keda “abatí” òf kibrá. Sin embargo, ora nan haña nan ku prueba, Yehova ta semper kla pa duna kada un di nan konsuelo i fortalesa spiritual. E Rei Hesukristu tin e mesun interes amoroso den su súpditonan leal.—Salmo 72:12-14.
Kuminda Satisfasiente na Su Debido Tempu
12, 13. Kon bon Yehova ta perkurá p’e nesesidatnan di “tur ser bibu”?
12 Pa motibu di Yehova su gran bondat amoroso, e ta satisfasé tur nesesidat di su sirbidónan. Esaki ta enserá duna nan kuminda nutritivo. Rei David a skirbi: “Wowo di tur hende ta spera riba bo [Yehova], i bo ta duna nan nan kuminda na su debido tempu. Bo ta habri bo man, i ta satisfasé e deseo di tur ser bibu.” (Salmo 145:15, 16) Asta den tempu di kalamidat, Yehova por maniobrá kosnan pa su lealnan por haña nan “pan di kada dia.”—Lukas 11:3; 12:29, 30.
13 David a menshoná ku “tur ser bibu” lo keda satisfecho. Esei ta inkluí bestia tambe. Si no tabata p’e vegetashon abundante di tera i mata den awa, ni bestia di laman, ni para ni animal riba tera lo no haña oksígeno pa hala rosea ni kuminda di kome. (Salmo 104:14) Ma Yehova ta perkurá pa satisfasé tur nan nesesidatnan.
14, 15. Kon kuminda spiritual ta ser perkurá awe?
14 Distinto di bestia, hende tin un nesesidat spiritual. (Mateo 5:3, NW) Yehova ta satisfasé e nesesidatnan spiritual di su lealnan na un manera maravioso! Promé ku su morto, Hesus a primintí ku “e esklabo fiel i prudente” lo duna siguidó di Hesus kuminda spiritual “na su debido tempu.” (Mateo 24:45) Awe, e restu di e 144.000 rumannan ungí ta forma e esklabo ei. Pa medio di nan, Yehova en bèrdat a suministrá alimento spiritual na abundansia.
15 Por ehèmpel, mayoria sirbidó di Yehova ta benefisiá awor aki di un tradukshon di Beibel moderno i eksakto den nan mes idioma. E Tradukshon di Mundu Nobo di e Santu Skritura sí tabata un bendishon maravioso! Ademas, aktualmente ta publikando miónes di medionan pa studia Beibel den mas ku 300 idioma. Tur e kuminda spiritual aki tabata un bendishon pa adoradónan berdadero rònt mundu. Ken mester haña e mérito pa tur esaki? Yehova Dios. Den su gran bondat amoroso, el a hasi posibel pa e esklabo duna “kuminda na su debido tempu.” Pa medio di e perkurashonnan ei, Yehova ta satisfasiendo “e deseo di tur ser bibu” den e paradeis spiritual di e tempu aki. I kuantu Yehova su sirbidónan ta alegrá den e speransa di por mira e tera transformá pronto den un paradeis literal!—Lukas 23:42, 43.
16, 17. (a) Ki ehèmpelnan tin di kuminda spiritual ku a bini na ora? (b) Kon Salmo 145 ta ekspresá e sintimentunan di e lealnan di Dios relashoná ku e kuestion prinsipal ku Satanas a lanta?
16 Konsiderá un ehèmpel sobresaliente di kuminda spiritual risibí na ora, na su debido tempu. Na 1939, Segundo Guera Mundial a kuminsá na Europa. Den e mesun aña ei, E Toren di Vigilansia [na ingles] di 1 di novèmber a kontené un artíkulo ku e tema “Neutralidat.” E informashon hopi kla presentá a yuda Testigunan di Yehova rònt mundu komprondé ku nan mester a keda estriktamente neutral den asuntunan di e nashonnan ku tabata den guera kontra otro. Esaki a resultá den odio di parti di gobièrnunan na ámbos banda di e konflikto ei ku a dura seis aña. Sin embargo, apesar ku nan a ser prohibí i persiguí, e lealnan di Dios a sigui prediká e bon nobo di Reino. Di 1939 pa 1946, nan a wòrdu bendishoná ku un oumento asombroso di 157 porshento. Ademas, nan registro notabel di neutralidat durante e guera ei ta sigui yuda hende identifiká e religion berdadero.—Isaias 2:2-4.
17 E kuminda spiritual ku Yehova ta perkurá no ta solamente oportuno sino tambe e ta kumpli ku un nesesidat. Miéntras ku e nashonnan tabata den kayente di bataya durante Segundo Guera Mundial, Yehova a yuda su pueblo enfoká riba algu muchu mas importante ku nan mes salbashon. El a laga nan komprondé ku e kuestion prinsipal, ku a enserá henter universo, ta relashoná ku Su soberania legítimo. Pues, kada Testigu di Yehova ku a keda leal, a kontribuí n’e vindikashon di Yehova su soberania i a duna prueba ku Diabel ta un mentiroso, i esei ta motibu di hopi satisfakshon! (Proverbionan 27:11) Distinto di Satanas, kende ta kalumniá Yehova i su manera di goberná, e lealnan di Yehova ta sigui deklará públikamente: “SEÑOR ta hustu den tur su kamindanan.”—Salmo 145:17.
18. Ki ehèmpel resien nos tin di kuminda spiritual ku a yega na ora i ku ta kumpli ku un nesesidat?
18 Un otro ehèmpel di kuminda spiritual ku a yega na ora i ku ta kumpli ku un nesesidat ta e buki Hala Serka Yehova, ku a wòrdu presentá rònt mundu na sentenáres di Kongreso di Distrito “Proklamadónan Seloso dje Reino” durante 2002/2003. E buki aki, produsí dor di “e esklabo fiel i prudente” i publiká dor di Testigunan di Yehova, ta enfoká riba Yehova Dios su kualidatnan maravioso, inkluso esnan menshoná na Salmo 145. E buki ekselente aki sigur lo bai yuda e lealnan di Dios hala mas i mas serka dje.
Un Tempu pa Hala Mas Serka Yehova
19. Ki tempu krusial ta aserkando, i kon nos por trata ku esaki?
19 Un di e momentunan krusial pa resolvé e kuestion di e soberania di Yehova ta yegando serka. Manera Ezekiel kapítulo 38 ta profetisá, pronto Satanas lo hunga su ròl di “Gog di e tera di Magog.” Esaki lo enserá un atake mundial riba e pueblo di Yehova den un intento desididu di parti di Satanas pa kibra integridat di e lealnan di Dios. Manera nunka promé, Yehova su adoradónan lo tin ku invok’é ku fervor, asta sklama pa yudansa. Nan temor respetuoso di Dios i amor p’e lo resultá di ta en bano? Nò, pasobra en bèrdat Salmo 145 ta bisa: “SEÑOR ta serka di tur esnan ku ta sklama na dje, serka di tur esnan ku ta sklama na dje den bèrdat. E lo kumpli ku e deseo di esnan ku ta tem’é; tambe e lo tende nan sklamashon i lo salba nan. SEÑOR ta warda tur ku ta stim’é, ma tur e malbadonan e lo destruí.”—Salmo 145:18-20.
20. Kon e palabranan di Salmo 145:18-20 lo kumpli den futuro serkano?
20 Nos relashon estrecho ku Yehova i e echo ku nos por eksperensiá su poder di salba ora e destruí tur e malbadonan lo ta algu emoshonante! N’e tempu krusial ei ku ta asina serka awor, Yehova lo skucha solamente “esnan ku ta sklama na dje den bèrdat.” E hipókritanan lo no haña oido serka dje. E Palabra di Dios ta mustra bon kla ku, manera semper, ta pòrnada e malbadonan ta invoká su nòmber na último momentu.—Proverbionan 1:28, 29; Mikeas 3:4; Lukas 13:24, 25.
21. Kon e lealnan di Yehova ta mustra ku nan ta usa e nòmber divino gustosamente?
21 Awor mas ku nunka promé ta tempu pa esnan ku ta teme Yehova “sklama na dje den bèrdat.” Gustosamente su lealnan ta usa su nòmber den nan orashonnan i tambe ora nan ta duna komentario na nan reunionnan. Nan ta usa e nòmber divino den nan kòmbersashonnan privá. I ku kurashi nan ta deklará Yehova su nòmber den nan ministerio públiko.—Romanonan 10:10, 13-15.
22. Pakiko ta vital pa nos sigui resistí aktitut i deseo di mundu?
22 Pa sigui benefisiá di nos relashon íntimo ku Yehova Dios, ta vital tambe pa nos sigui resistí kosnan ku por perhudiká nos salú spiritual manera materialismo, dibertishon insaludabel, un aktitut indispuesto pa pordoná òf indiferensia pa ku hende den nesesidat. (1 Juan 2:15-17; 3:15-17) Si nos no eliminá e empeñonan i karakterístikanan ei, nan por pone nos kai den e práktika di piká serio i despues pèrdè Yehova su aprobashon. (1 Juan 2:1, 2; 3:6) Ta sabí di nos parti pa kòrda ku ta únikamente si nos keda fiel na dje, lo e sigui mustra bondat amoroso, òf amor leal, na nos.—2 Samuel 22:26.
23. Ki futuro grandioso ta spera tur leal di Dios?
23 P’esei laga nos mantené nos pensamentunan fihá riba e futuro grandioso ku ta warda tur Yehova su lealnan. Dor di hasi esei, nos tin e prospekto maravioso di ser kontá den esnan ku lo halsa, bendishoná i alabá Yehova “tur dia” i “pa semper.” (Salmo 145:1, 2) P’esei, laga nos ‘konserbá nos mes den e amor di Dios ku antisipashon di bida eterno.’ (Hudas 20, 21) Segun ku nos ta sigui benefisiá di e kualidatnan maravioso di nos Tata selestial, inkluso e gran bondat amoroso ku e ta desplegá pa ku esnan ku ta stim’é, laga nos sintimentunan semper ta manera esnan ku David a ekspresá den e palabranan final di Salmo 145: “Mi boka lo papia di e alabansa di SEÑOR; i tur karni lo bendishoná su nòmber santu pa semper i semper.”
Kon Lo Bo Kontestá?
• Kon Salmo 145 ta yuda nos rekonosé e lealnan di Dios?
• Kon Yehova ta ‘satisfasé e deseo di tur ser bibu’?
• Pakiko nos tin ku hala mas serka Yehova?
[Preguntanan di Estudio]
[Plachi na página 16]
E lealnan di Dios ta papia gustosamente di su aktonan poderoso
[Plachi na página 17]
Ku kurashi Yehova su sirbidónan ta yuda hende ku no ta kreyente ainda pa siña tokante e gloria di su reino
[Plachinan na página 18]
Yehova ta perkurá kuminda pa “tur ser bibu”
[Rekonosementu]
Animalnan: Parque de la Naturaleza de Cabárceno
[Plachi na página 19]
Yehova ta duna forsa i guia na su lealnan ku ta buska su yudansa den orashon