“Hala Serka Dios i E Lo Hala Serka Boso”

Ántes i Awor—Prinsipionan di Beibel A Yud’é Kambia

TEMPU Adrian tabata hóben e tabata yen di rabia i odio. Pa motibu ku e tabata rabia lihé, e tabata haña atakenan di rabia violento. E tabata bebe, huma i hiba un bida inmoral. Adrian tabata konosí komo un pùnk i e tabatin un tatuahe ku a reflehá e spiritu di anarkia. Deskribiendo e añanan ei, el a konta: “Mi tabata kòrta mi kabei den e forma tradishonal di pùnk, hunt’é ku djèl p’e keda spiña-spiña i tin bes tabata pint’é kòrá òf un otro koló.” Tambe Adrian tabata bisti renchi na nanishi.

Adrian a bai biba ku un par di otro hóben rebelde den un chòlhous. Ei, nan tabata bebe i usa droga. Adrian ta kòrda: “Mi tabata inyektá mi mes ku un droga ku yama speed, ku Valium òf kualkier otro kos ku mi por a haña den mi kaminda. Ora no tabatin droga òf leim, mi tabata saka gasolin for di outo di hende i tabata droga mi mes kuné.” Adrian tabata metí profundamente den kriminalidat di kaya, tabata intimidá hende i a bira sumamente violento. Por lo general hende no tabata kier tin nada di haber kuné. Na mes momentu, su reputashon tabata atraé mal amigu na dje.

Pokopoko, Adrian a realisá ku su “amigunan” tabata anda kuné djis pa nan saka probecho personal. Ademas, el a yega n’e konklushon ku “mi no a logra nada ku tur e rabia i violensia ku mi tabatin.” Bashí i frustrá, el a bai laga su amigunan. Ora el a haña un ehemplar di E Toren di Vigilansia na un sitio di konstrukshon, el a gusta e mensahe basá riba Beibel, i a kuminsá studia Beibel ku Testigunan di Yehova. Ku muchu gustu Adrian a aseptá e invitashon: “Hala serka Dios i e lo hala serka boso.” (Santiago 4:8) Komo resultado, no a dura mashá ku Adrian a komprondé ku e tin ku kuminsá apliká e prinsipionan ku tin den e Skritura Santu.

E konosementu di Beibel ku e tabata haña tabatin un bon efekto riba Adrian su konsenshi i esaki a drecha su bida. El haña yudansa pa stòp di rabia lihé i a kultivá dominio propio. Grásias na e poder di e Palabra di Dios, Adrian su personalidat a kambia.—Hebreonan 4:12.

Pero kon Beibel por a hasi un impakto asina grandi? Konosementu di e Skritura ta yuda nos “bisti e hende nobo.” (Efesionan 4:24) Sí, nos personalidat ta kambia ora nos apliká konosementu eksakto di Beibel. Kon e konosementu ei ta kambia hende?

Di promé, Beibel ta mustra kiko ta e karakterístikanan malu ku un hende mester laga un banda. (Proverbionan 6:16-19) Di dos, e Skritura ta motivá nos pa desplegá e bon kualidatnan ku e spiritu santu di Dios ta produsí. Nan ta entre otro “amor, goso, pas, pasenshi, kariño, bondat, fieldat, mansedumbre, dominio propio.”—Galationan 5:22, 23.

Konosementu mas profundo di Dios su rekisitonan a yuda Adrian eksaminá su mes i a yud’é mira e kualidatnan ku e mester a kultivá i esnan ku e mester a deshasí di dje. (Santiago 1:22-25)  Pero esei tabata djis e komienso. Ademas di konosementu, Adrian tabatin mester di motivashon tambe, algu ku lo pon’é haña gana di kambia.

Adrian a siña ku e personalidat nobo i atraktivo aki mester ser moldia “segun e imágen di Esun ku a kre’é.” (Kolosensenan 3:10) Tambe el a realisá ku e personalidat di un kristian mester ta manera e personalidat di Dios. (Efesionan 5:1) Mediante un studio di Beibel, Adrian a siña kon Yehova ta trata ku humanidat i di e forma ei a tuma nota di Yehova su kualidatnan ekselente, manera amor, kariño, bondat, miserikòrdia i hustisia. E konosementu aki a konmové Adrian pa stima Dios i pa hasi esfuerso pa ta e klase di persona ku Yehova ta aprobá.—Mateo 22:37.

Ku tempu i ku yudansa di e spiritu santu di Dios, Adrian a logra dominá su karakter violento. Awor e ku su esposa ta traha duru pa yuda otro hende kambia nan bida mediante konosementu di Beibel. Adrian ta bisa: “Kontrali na hopi di mi eks-amigunan ku awor ta morto, ami sí ta na bida i ta disfrutá di un bida di famia felis.” E ta un ehèmpel bibu di e poder ku Beibel tin pa transformá bida di hende.

[Komentario na página 25]

“Mi no a logra nada ku tur e rabia i violensia ku mi tabatin.”

[Kuadro na página 25]

Prinsipionan di Beibel den Akshon

E siguiente prinsipionan di Beibel a yuda hopi hende violento i yen di rabia bira pasífiko:

“Sea na pas ku tur hende. Nunka no venga boso mes, stimánan, ma laga lugá pa e furia di Dios.” (Romanonan 12:18, 19) Laga Dios determiná ki ora i kontra ken e mester tuma vengansa. Ora e hasi esei e ta kompletamente na haltura di tur e echonan, i kualkier kastigu ku e duna lo reflehá su hustisia perfekto.

“Rabia, ma no hasi piká; no laga solo baha riba boso rabiá, i no duna Diabel oportunidat.” (Efesionan 4:26, 27) Ta di komprondé ku tin bes un hende por rabia. Pero si esei pasa, e no mester keda “rabiá.” Dikon nò? Pasobra esei por pon’é hasi algu malu, i di e manera ei “duna Diabel oportunidat,” i komo resultado Yehova Dios lo no keda kontentu ku e persona ei.

“Stòp di rabia i laga furia para; no kunsumí—esei ta kondusí na maldat so.” (Salmo 37:8) Si nos no dominá nos emoshonnan esei por hiba na aktonan deskontrolá. Si un hende laga rabia domin’é, probablemente lo e bisa òf hasi kosnan ku lo ofendé tur hende ku ta enbolbí.