Añadí na Boso Konosementu, Dominio Propio

“Añadí . . . na boso konosementu, dominio propio.”—2 PEDRO 1:5-8.

1. Kiko hende no por hasi i p’esei ta haña nan ku hopi problema?

DURANTE un kampaña grandi kontra uso di droga, nan tabata animá hóbennan na Merka: “Djis bisa nò.” E situashon djawe lo tabata hopi mas mihó si tur hende lo a djis bisa nò, no solamente na droga sino tambe na bebementu di mas, na estilonan di bida imprudente òf inmoral, na práktikanan desonesto di negoshi i na ‘e mal deseonan di karni’! (Romanonan 13:14) Sin embargo, tur hende sa ku no ta semper fásil pa bisa nò.

2. (a) Menshoná algun ehèmpel di Beibel ku ta mustra ku e difikultat pa bisa nò, no ta algu nobo. (b) Kiko e ehèmpelnan aki mester stimulá nos pa hasi?

² Siendo ku tur hende imperfekto tin difikultat pa ehersé dominio propio, nos mester ta interesá pa sa kon nos por vense kualkier bisio òf debilidat personal ku nos tin. Beibel ta konta nos tokante hende di ántes ku a hasi esfuerso pa sirbi Dios pero ku tin biaha tabatin difikultat pa bisa nò. Por ehèmpel, kòrda riba David i su piká di adulterio ku Betsabé (Bat-seba). Esei a hiba na morto di dos persona inosente: e yu ku nan a konsebí den adulterio i e esposo di Betsabé. (2 Samuel 11:1-27; 12:15-18) Òf kòrda riba apòstel Pablo, kende a konfesá abiertamente: “Pasobra e bon ku mi ta deseá di hasi, mi no ta hasi; ma mi ta praktiká eksaktamente e maldat ku mi no ta deseá di hasi.” (Romanonan 7:19) Abo tambe sa sinti e frustrashon ei? Pablo a sigui bisa: “Segun e hende interior mi ta deleitá mi mes den e lei di Dios, ma den e miembronan di mi kurpa mi ta mira un otro lei ku ta batayá kontra e lei di mi mente i ta hasi mi prezu di e lei di piká, kual ta den mi miembronan. Hende miserabel ku mi ta! Ken lo libra mi di e kurpa di morto aki?” (Romanonan 7:22-24) E ehèmpelnan di Beibel mester fortalesé nos determinashon pa nunka entregá den nos lucha pa alkansá mayor dominio propio.

Nos Mester Siña Ehersé Dominio Propio

3. Splika dikon nos no por ferwagt ku ta fásil pa desplegá dominio propio.

³ Dominio propio, lokual ta inkluí e kapasidat di bisa nò, ta ser menshoná na 2 Pedro 1:5-7 huntu ku fe, birtut, konosementu, perseveransia, santidat, kariño fraternal i amor. Niun di e otro kualidatnan deseabel aki no ta kos ku nos tin kompletamente di naturalesa. Nos mester kultivá nan. Pa nos por desplegá nan na un midí signifikativo ta eksigí determinashon i esfuerso. Siendo asina, nos por ferwagt ku dominio propio lo ta mas fásil pa desplegá?

4. Dikon hopi hende ta haña ku nan no tin problema ku dominio propio, pero kiko esaki ta indiká?

⁴ Miónes di hende kisas ta haña ku nan no tin problema ku dominio propio. Nan ta hiba nan bida manera nan ke. Anto konsientemente òf inkonsientemente nan ta komportá nan mes di akuerdo ku loke nan karni imperfekto ta dikta i nan ta presta masha tiki atenshon na e konsekuensianan, sea pa nan mes òf pa otro hende. (Hudas 10) Awor mas ku nunka ta bisto ku hende no por—i no ke—bisa nò. Esei ta un indikashon ku nos di bèrdat ta bibando den e “último dianan” ku Pablo a papia di dje ora el a predisí: “Tempunan trabahoso lo bin. Pasobra hende lo ta stimadó di nan mes, stimadó di plaka, gabadó, arogante, blasfemadó, . . . sin dominio propio.”—2 Timoteo 3:1-3.

5. Dikon Testigunan di Yehova ta interesá den e tópiko di dominio propio, i ki konseho ainda ta válido?

 ⁵ Testigunan di Yehova sí ta konsiente ku ta difísil pa ehersé dominio propio. Meskos ku Pablo, nan ta konsiente di e lucha entre e deseo pa agradá Dios dor di biba segun su normanan i e rumbo ku nan karni imperfekto kisas ta urgi nan pa sigui. Pa e motibu aki, for di hopi tempu kaba nan ta interesá pa sa kon nan por vense e bataya aki. Na aña 1916, un edishon di e revista aki ku bo ta lesando a papia di “e proseder apropiá ku nos mester sigui pa siña kontrolá nos mes, nos pensamentunan, nos palabranan i nos kondukta.” E revista a sugerí pa tene Filipensenan 4:8 na mente. E konseho divino den e teksto bíbliko ei ainda ta válido, maske ku originalmente el a ser duná kasi 2.000 aña pasá i awor probablemente ta mas difísil pa aplik’é ku e tempu ayá òf ku na 1916. No opstante, kristiannan ta traha duru pa bisa nò na deseonan di mundu, sabiendo ku dor di hasi esei nan ta bisando sí na nan Kreadó.

6. Dikon nos no mester desesperá ora nos ta kultivando dominio propio?

⁶ Galationan 5:22 i 23 ta menshoná dominio propio komo parti di e “fruta di e spiritu [santu].” Si nos desplegá e kualidat aki huntu ku “amor, goso, pas, pasenshi, kariño, bondat, fieldat [i] mansedumbre,” nos lo saka masha hopi benefisio. Pasobra manera Pedro a splika, dor di hasi esei nos ta evitá ku nos sirbishi na Dios ta bira ‘inútil i sin fruta.’ (2 Pedro 1:8) Pero nos no mester desesperá òf kondená nos mes si nos no logra desplegá e kualidatnan aki lihé i plenamente manera nos lo a deseá. Probablemente bo a ripará ku na skol tin alumno ta siña mas lihé ku otronan. Òf ku na trabou tin un persona ta siña un tarea nobo mas lihé ku otro koleganan. Asina tambe, tin hende ta siña desplegá kualidatnan kristian mas lihé ku otronan. E kos importante ta pa sigui kultivá e kualidatnan ku ta agradá Dios lo mihó ku nos por. Nos por hasi esaki dor di saka pleno probecho di e yudansa ku Yehova ta perkurá via su Palabra i kongregashon. Loke ta mas importante ta e esfuerso determiná pa sigui hasi progreso i no simplemente alkansá nos meta rápidamente.

7. Kiko ta demostrá ku dominio propio ta importante?

⁷ Apesar ku dominio propio ta ser menshoná último den e lista di kualidatnan produsí dor di spiritu, definitivamente e no ta ménos importante ku e otronan. Al kontrario. Nos mester tene na mente ku si nos por a ehersé dominio propio perfektamente, nos lo por a evitá tur “e obranan di karni.” Sin embargo, hende imperfekto ta inkliná na entregá na un òf otro forma di “e obranan di karni . . . [manera] inmoralidat, impuresa, sensualidat, idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu.” (Galationan 5:19, 20) P’esei konstantemente nos tin ku hiba un lucha, desididu pa eliminá tendensianan negativo for di nos kurason i nos mente.

Pa Algun Hende Ta Mas Difísil pa Ehersé Dominio Propio

8. Ki faktor ta pone ku pa algun hende ta mas difísil pa ehersé dominio propio?

⁸ Algun kristian tin mas difikultat pa ehersé dominio propio ku otro. Dikon? Kisas e manera ku nan mayornan a kria nan òf eksperensianan di pasado ta kontribuí na esei. Nos mester ta kontentu si aparentemente nos no tin problema pa kultivá i desplegá dominio propio. Pero siguramente nos lo mester demostrá kompashon i komprenshon ora nos ta trata ku esnan ku tin mas difikultat pa ehers’é, asta si nan falta di dominio propio ta kousa algun problema personal pa nos. En bista di nos propio imperfekshon, kua di nos tin kualkier motibu pa desplegá e aktitut ku nos ta mas hustu ku otro hende?—Romanonan 3:23; Efesionan 4:2.

9. Ki debilidat algun ruman tin, i na ki tempu nan lo vense nan kompletamente?

⁹ Algun ehèmpel: Podisé nos sa ku algun ruman kristian ku ántes tabata usa tabako òf droga kisas ainda sa tin un deseo fuerte pa nan. Òf pa algun ruman ta un reto pa limitá nan konsumo di kuminda i alkohòl. Otronan tin problema  pa dominá nan lenga, p’esei hopi bes nan ta peka ku nan boka. Pa trata ku e faltanan ei nan tin ku hasi esfuerso diligente pa kultivá dominio propio. Dikon? Santiago 3:2 ta atmití realístikamente: “Nos tur ta trompeká na hopi manera. Si un hende no ta trompeká den loke e ta bisa, e ta un hende perfekto, kapas pa frena henter e kurpa tambe.” Tin otro rumannan ku ta sinti un deseo fuerte pa hunga wega di plaka. Òf kisas nan tin difikultat pa kontrolá nan mes pa no rabia lihé. Podisé ta tuma tempu pa nan siña trata ku éksito ku e debilidatnan aki òf ku otronan similar. Ounke nos por hasi hopi progreso awor, ta te ora nos alkansá perfekshon, mal deseonan lo ser eliminá permanentemente. Miéntras tantu, dor di hasi esfuerso pa ehersé dominio propio nos lo por evitá di kai bèk den un patronchi di bida pekaminoso. Tanten ku e lucha ta sigui, laga nos un yuda otro pa no entregá.—Echonan 14:21, 22.

10. (a) Dikon ta masha difísil pa algun kristian ehersé dominio propio den asuntunan seksual? (b) Ki kambio grandi un ruman hòmber a hasi? (Wak e kuadro na página 16.)

¹⁰ Un otro tereno ku ta difísil pa algun kristian ehersé dominio propio ta den asuntu di seksualidat. Riba su mes, seksualidat humano ta parti di e manera ku Yehova Dios a traha nos. Sin embargo, pa algun hende ta masha difísil pa mantené sèks na su debido lugá, na armonia ku e normanan di Dios. Loke kisas ta hasié mas difísil pa nan ta ku nan impulsonan seksual ta eksepshonalmente fuerte. Nos ta biba den un mundu loko pa sèks i ku ta inkliná na stimulá pashon den hopi manera. Esaki por krea basta problema pa kristiannan ku ke keda soltero—por lo ménos pa un tempu—ya asina nan por sirbi Dios sin ku matrimonio ta distraé nan. (1 Korintionan 7:32, 33, 37, 38, NW) Pero na armonia ku e mandamentu bíbliko ku “ta mihó kasa ku kima di pashon,” nan lo por disidí di kasa, lokual sigur ta algu onorabel. Na mesun tempu nan ta keda determiná pa kasa “basta ta den Señor,” manera e Skritura ta konsehá. (1 Korintionan 7:9, 39) Nos por tin sigur ku Yehova ta alegrá ora e ta mira nan interes pa sostené su prinsipionan hustu. I nan rumannan kristian ta kontentu ku nan por asosiá ku adoradónan berdadero ku ta personanan íntegro ku ta sigui normanan moral haltu.

11. Kon nos por yuda un ruman ku ta interesá pa kasa pero ku no a haña e oportunidat?

¹¹ Kiko si un ruman no por haña un kasá  apropiá? Imaginá bo e frustrashon ku un persona lo por sinti ora ku e ta deseá di kasa pero no por hasié! Kisas e ta mira kon su amistatnan ta kasa i logra un grado di felisidat, miéntras ku e mes ketu bai ta buskando un kasá apropiá. Pa algun hende den e situashon ei, e kustumber sushi di masturbashon kisas ta un problema kontinuo. En todo kaso, ningun kristian lo ke ta esun ku inkonsientemente ta desanimá un otro ku ta luchando pa keda puru. Nos lo por kousa desanimashon inintenshonalmente si nos ta ekspresá komentarionan ku falta konsiderashon manera: “Bon, nada di kasamentu ainda?” Kisas nos no ta bis’é ku mal intenshon, pero lo ta hopi mas mihó si nos desplegá dominio propio den e sentido di dominá nos lenga! (Salmo 39:1) E rumannan soltero meimei di nos ku ta kedando puru den e kondishon ei, meresé nos mas sinsero elogio. En bes di bisa kos ku lo por desanimá nan, nos mester hasi esfuerso pa ta un animashon pa nan. Por ehèmpel, nos lo por purba inkluí personanan soltero ora un grupo di ruman maduro ta reuní huntu pa un komementu òf pa asosiashon kristian edifikante.

Dominio Propio den Matrimonio

12. Dikon asta esnan ku ta kasá tin mester di un midí di dominio propio?

¹² E echo ku un hende ta kasá no ta eliminá outomátikamente e nesesidat di dominio propio relashoná ku sèks. Por ehèmpel, kisas e nesesidatnan seksual di e esposo ta masha distinto for di esnan di e esposa. Òf e kondishon físiko di un kasá tin biaha por pone ku relashon seksual normal ta difísil òf asta imposibel. Tambe por sosodé ku debí na eksperensianan di pasado, ta difísil pa un kasá obedesé e mandamentu: “Laga e esposo kumpli ku su deber di matrimonio pa ku su esposa, i meskos tambe e esposa pa ku su esposo.” Den tal situashon, e otro kasá tin ku ehersé mas dominio propio. Pero tur dos por tene na mente e konseho amoroso ku Pablo a duna kristiannan kasá: “Stòp di nenga otro, si no ta pa un tempu, ku konsentimentu di otro, pa boso por dediká boso mes na  orashon; i bin huntu atrobe, pa Satanas no tenta boso pa motibu di boso falta di dominio propio.”—1 Korintionan 7:3, 5.

13. Kiko nos por hasi na fabor di esnan ku ta luchando pa ehersé dominio propio?

¹³ Parehanan kasá por ta masha gradisidu si nan tur dos a siña ehersé e debido dominio propio den e relashon sumamente íntimo aki. A la bes nan lo mester mustra komprenshon na rumannan den fe ku ainda ta luchando pa desplegá dominio propio riba e tereno aki. Nos no mester lubidá nunka di pidi Yehova den orashon pa duna nos rumannan spiritual e perspikasia, kurashi i determinashon pa sigui lucha pa desplegá dominio propio i pa nan dal pasonan pa vense deseonan ku no ta bon.—Filipensenan 4:6, 7.

Sigui Yuda Otro

14. Dikon nos mester trata nos rumannan kristian ku kompashon i komprenshon?

¹⁴ Tin biaha kisas ta difísil pa nos mustra komprenshon na rumannan kristian ku ta luchando pa mustra dominio propio riba un tereno ku nos no tin problema kuné. Pero di naturalesa hende ta diferente for di otro. Tin hende fásilmente ta laga emoshon dominá nan; otronan nò. Pa algun hende ta fásil pa nan kontrolá nan mes, i dominio propio no ta un gran problema. Otronan tin mas difikultat. Sin embargo, kòrda ku un persona ku ta luchando pa ehersé dominio propio no ta un mal hende. Nos rumannan kristian tin mester di nos komprenshon i kompashon. For di e palabranan di Hesus ku tin pará skirbí na Mateo 5:7, nos por mira ku nos propio felisidat ta dependé di e grado ku nos ta sigui demostrá miserikòrdia na esnan ku ainda ta lucha pa manifestá mas dominio propio.

15. Dikon e palabranan di Salmo 130:3 ta un konsuelo den e asuntu di dominio propio?

¹⁵ Nunka nos lo ke husga un ruman kristian robes, un ruman ku kisas de bes en kuando no ta logra manifestá e personalidat kristian. Ta un animashon grandi pa sa ku Yehova, fuera di mira esun biaha ku kisas nos a faya, ta mira tambe e hopi biahanan ku nos no a faya, asta si otro rumannan kristian sí no a tuma nota di nan. Ta un gran konsuelo pa tene na mente e palabranan di Salmo 130:3: “Si abo, SEÑOR, tuma inikidatnan na kuenta, o Señor, ken lo por a keda para?”

16, 17. (a) Kon nos por apliká Galationan 6:2 i 5 relashoná ku dominio propio? (b) Kiko nos lo konsiderá a kontinuashon tokante dominio propio?

¹⁶ Pa nos agradá Yehova, kada un di nos tin ku kultivá dominio propio, pero nos por tin sigur ku nos rumannan kristian lo yuda nos. Ounke nos kada un tin ku karga nos propio karga di responsabilidat, Beibel no opstante ta urgi nos pa yuda otro trata ku debilidat. (Galationan 6:2, 5) P’esei nos mester tin gran apresio pa e mayor, kasá, amigu òf amiga ku ta stòp nos di bai lugánan ku eigenlijk nos lo no mester bai, di mira kosnan ku eigenlijk nos lo no mester mira òf di hasi kosnan ku eigenlijk nos lo no mester hasi. E ta yuda nos pa desplegá dominio propio, pa por bisa nò i men e!

¹⁷ Hopi kristian kisas ta di akuerdo ku loke nos a konsiderá te ku awor tokante dominio propio, pero podisé nan ta sinti ku personalmente nan tin ku mehorá hopi den esei. Nan lo tin gana di desplegá dominio propio mas plenamente, te na e grado ku nan ta kere ta rasonabel pa hende imperfekto. Abo tambe ta sinti asina? Kiko bo por hasi anto pa kultivá e aspekto aki di e fruta di spiritu di Dios? I kon dor di hasi esei, lo bo por alkansá bo metanan di largu plaso komo kristian? Laga nos wak den e siguiente artíkulo.

Bo Ta Kòrda?

• Pakiko ta importante pa kristiannan kultivá dominio propio?

• Pakiko pa algun kristian ta masha difísil pa kultivá dominio propio?

• Pakiko dominio propio ta nesesario den matrimonio?

• Dikon dominio propio ta un kualidat ku nos por yuda otro kultivá?

[Preguntanan di Estudio]

[Kuadro/Plachi na página 16]

El A Siña Bisa Nò

Tabatin un Testigu di Yehova ku ta biba na Alemania i ku a traha komo tékniko di komunikashon. Su trabou a inkluí tene bista riba un 30 programa di radio i televishon. Ora presentá un storing, e mester wak e programa pa saka afó kiko ta e problema. El a konta: “Kasi semper ta manera kos ku storing ta presentá nèt na mal momentu, presis ora esenanan di violensia òf di sèks ta pasa. E mal esenanan ei tabata keda manera grabá den mi kabes pa dianan, tin biaha pa simannan largu.” El a atmití ku esaki tabatin un mal efekto riba su spiritualidat: “Mi ta un hende ku ta iritá basta lihé, i p’esei e esenanan di violensia a pone ku tabata difísil pa mi ehersé dominio propio. E esenanan di sèks a kousa tenshon entre ami ku mi esposa. Tur dia mi tabatin un lucha. Pa mi no pèrdè e lucha, mi a disidí di buska un otro trabou, maske esei lo por a nifiká ménos entrada. Poko tempu pasá mi a logra haña un otro trabou. Mi deseo a kumpli.”

[Plachinan na página 15]

E konosementu ku nos ta haña dor di studia Beibel ta yuda nos ehersé dominio propio