Imitá e Dios di Bèrdat

“Sea imitadónan di Dios, manera yunan stimá.”—EFESIONAN 5:1.

1. Kiko algun hende ta pensa tokante bèrdat, i dikon nan manera di rasoná ta robes?

“KIKO ta bèrdat?” (Juan 18:38) E pregunta ei ku Ponsio Pilato a hasi yen di duda i menospresio kasi 2.000 aña pasá, kier mustra indirektamente ku bèrdat ta muchu difísil pa alkansá i p’esei no ta bale la pena busk’é. Awe hopi hende lo ta di akuerdo ku esei. Pues, loke ta bou di diskushon ta kiko presis ta e definishon di bèrdat. Podisé bo a yega di tende hende bisa ku ta kada persona ta disidí pa su mes kiko ta bèrdat, ku bèrdat ta algu relativo òf ku bèrdat ta algu ku semper ta kambia. E maneranan di rasoná ei ta robes. E meta di investigashon i edukashon ta juist pa haña sa echonan, e bèrdat, tokante e mundu den kua nos ta biba. Bèrdat no ta un asuntu di opinion personal. Por ehèmpel, sea alma humano ta inmortal òf e no ta. Sea Satanas ta eksistí òf e no ta eksistí. Bida tin propósito òf e no tin. Den tur e kasonan ei ta un kontesta so por ta korekto. Unu ta bèrdat, i e otro ta mentira; nan tur dos no por ta bèrdat.

2. Den ki maneranan Yehova ta e Dios di bèrdat, i ki preguntanan nos lo konsiderá awor?

² Den e artíkulo anterior nos a mira ku Yehova ta e Dios di bèrdat. E sa e bèrdat di tur kos. Tin un kontraste skèrpi entre Yehova i su atversario engañoso, Satanas e Diabel, pasobra Yehova semper ta papia bèrdat. Es mas, Yehova ta revelá bèrdat na abundansia na otronan. Apòstel Pablo a animá su kompañeronan kristian: “Sea imitadónan di Dios, manera yunan stimá.” (Efesionan 5:1) Komo Testigu di Yehova, kon nos lo por imit’é dor di papia i biba di akuerdo ku e bèrdat? Dikon ta importante pa nos hasi esei? I ki garantia nos tin ku Yehova ta aprobá di esnan ku ta papia i biba di akuerdo ku e bèrdat? Laga nos ban wak.

3, 4. Kon apòstel Pablo i apòstel Pedro a deskribí loke lo a bai pasa durante “e último dianan”?

³ Nos ta biba den un era kaminda mentira religioso ta plamá tur kaminda. Manera apòstel Pablo a profetisá bou di inspirashon di Dios, hopi hende den e “último dianan” aki tin aparensia di ta religioso ma nan ta nenga e  poder di e deboshon ei. Algun di nan ta resistí e bèrdat dor ku nan tin “mente korupto.” Ademas, “hendenan malbado i gañadónan [ta] bai di malu pa peor, gañando i siendo gañá.” Ounke e hendenan aki ta siña ketu bai, nunka nan no ta yega na e ‘konosementu eksakto dje bèrdat.’—2 Timoteo 3:1, 5, 7, 8, 13.

⁴ Apòstel Pedro tambe a ser inspirá pa skirbi tokante e último dianan. I nèt manera el a skirbi, hende no solamente ta rechasá e bèrdat, sino tambe ta hasi bofon di e Palabra di Dios i di esnan ku ta proklamá e bèrdat ku e ta kontené. “Di nan mes boluntat,” e hasidónan di bofon aki no kier aseptá e echo ku e mundu di tempu di Noe a ser inundá ku awa, poniendo asina un patronchi pa un futuro dia di huisio. Nan manera di pensa lo nifiká desaster pa nan ora e tempu di Dios yega pa destruí hende malbado.—2 Pedro 3:3-7.

Yehova Su Sirbidónan Sa e Bèrdat

5. Segun profeta Daniel, kiko lo a sosodé durante “e tempu di e fin,” i kon e profesia aki a kumpli?

⁵ Den un deskripshon di “e tempu di e fin,” profeta Daniel a profetisá un desaroyo kompletamente diferente den e pueblo di Dios: restorashon di bèrdat religioso. El a skirbi: “Hopi hende lo kore pariba-pabou, i konosementu lo oumentá.” (Daniel 12:4) E gran Gañadó lo no konfundí ni siega e pueblo di Yehova. Dor di kore pariba-pabou, na moda di papia, den e páginanan di Beibel, nan a yega na berdadero konosementu. Den promé siglo, Hesus a iluminá su disipelnan. El “a habri nan huisio pa nan komprondé e Skrituranan.” (Lukas 24:45) Den nos tempu Yehova a hasi meskos. Mediante su Palabra, su spiritu i su organisashon, el a yuda miónes di hende rònt mundu komprondé loke e mes sa kaba: e bèrdat.

6. Ki bèrdatnan bíbliko e pueblo di Dios djawe ta komprondé?

⁶ Komo e pueblo di Dios nos ta komprondé hopi kos ku di otro manera nos lo no tabata sa. Nos sa e kontesta riba preguntanan ku e sabionan di mundu a lucha kuné pa siglonan. Por ehèmpel, nos sa dikon tin sufrimentu, pakiko hende ta muri, i dikon hende no por logra e meta di pas i union mundial. Tambe nos a ser bendishoná ku un bista di loke lo bini den futuro: e Reino di Dios, un paradeis riba tera i bida perfekto pa semper. Nos a siña konosé Yehova, e Supremo. Nos a siña tokante su personalidat atraktivo i tambe kiko nos tin ku hasi pa nos haña su bendishon. Dor ku nos sa e bèrdat, nos por rekonosé loke no ta bèrdat. Apliká e bèrdat ta protehá nos di metanan bano, e ta yuda nos saka lo mihó for di bida, i ta duna nos un speransa maravioso pa futuro.

7. Ken sí por komprondé e bèrdatnan di Beibel, i ken nò?

⁷ Abo ta komprondé e bèrdatnan di Beibel? Si esei ta e kaso, bo ta hopi bendishoná. Ora un outor ta skirbi un buki, por lo general e ta hasié di un manera ku e ta atraé un grupo spesífiko di hende. Algun buki ta ser skirbí pa hende ku hopi edukashon, otronan ta pa mucha, i tin tambe pa hende spesialisá den sierto ramonan. Ounke ta fásil pa tur hende yega na un Beibel, el a wòrdu skirbí pa un grupo spesífiko di hende komprond’é i disfrutá di dje. Yehova a prepar’é pa hende mansu i humilde. Ta e hendenan ei por kapta e sentido di Beibel, sin importá nan edukashon, kultura, grupo étniko òf status den bida. (1 Timoteo 2:3, 4) Di otro banda, hende ku no tin e disposishon korekto pa bida eterno no ta komprondé e bèrdat di Beibel ni maske kon inteligente i eduká nan ta. Hende arogante i orguyoso no por kapta e bèrdatnan balioso di e Palabra di Dios. (Mateo 13:11-15; Lukas 10:21; Echonan 13:48, NW) Ta Dios so por a produsí un buki asina.

Yehova Su Sirbidónan Ta Papia Bèrdat

8. Dikon Hesus tabata e bèrdat en persona?

⁸ Meskos ku Yehova, su Testigunan fiel ta onesto i ta papia bèrdat. Hesukristu, e Testigu prinsipal di Yehova, a duna prueba di e bèrdat  dor di loke el a siña hende, i na e manera ku el a biba i muri. El a sostené e bèrdat di Yehova su palabra i promesanan. Pues, manera Hesus mes a bisa, e tabata e bèrdat en persona.—Juan 14:6; Revelashon 3:14; 19:10.

9. Kiko e Skritura ta bisa tokante papia bèrdat?

⁹ Hesus tabata “yen di grasia i bèrdat” i “mentira no a wòrdu hañá den su boka.” (Juan 1:14; Isaias 53:9) Kristiannan berdadero ta sigui e ehèmpel ku Hesus a pone di papia e bèrdat ku otro hende. Pablo a konsehá su rumannan den fe: “Kada un di boso papia bèrdat ku su próhimo, pasobra nos ta miembro di otro.” (Efesionan 4:25) Mas promé profeta Zakarias a skirbi: “Papia bèrdat un ku otro.” (Zakarias 8:16) Kristiannan ta papia bèrdat pasobra nan kier agradá Dios. Semper Yehova ta papia bèrdat i e sa ki daño mentira por hasi. P’esei, e tin derecho di spera pa su sirbidónan tambe papia bèrdat.

10. Dikon hende ta gaña, i kiko ta e resultadonan negativo?

¹⁰ Pa hopi hende, mentira por parse un manera kumbiniente pa logra sierto bentaha. Hende ta gaña pa skapa kastigu, pa saka probecho di un òf otro manera òf pa haña elogio di otro hende. Sin embargo, e kustumber di gaña ta un bisio. Es mas, un hende ku ta gaña no por haña e aprobashon di Dios. (Revelashon 21:8, 27; 22:15) Ora nos ta konosí komo un persona ku ta papia bèrdat, otro hende ta kere loke nos ta bisa; nan ta konfia nos. Sin embargo, si hende haña sa di un solo mentira ku nos a papia, nan por kuminsá duda di tur loke nos bisa despues di esei. Un proverbio afrikano ta bisa: “Un mentira ta daña mil bèrdat.” Un otro proverbio ta bisa: “Den boka di gañadó lo sierto ta dudoso.”

11. Den ki manera ser onesto ta mas ku simplemente papia bèrdat?

¹¹ Ser onesto ta nifiká mas ku simplemente papia bèrdat. E ta e manera ku nos ta biba. E ta definí ken nos ta. Nos ta laga hende konosé e bèrdat no solamente pa medio di loke nos ta bisa sino tambe pa medio di loke nos ta hasi. Apòstel Pablo a puntra: “Abo, ku ta siña un otro, bo no ta siña bo mes? Abo ku ta prediká ku hende no mester hòrta, bo mes ta hòrta? Abo ku ta bisa ku hende no mester kometé adulterio, bo mes ta kometé adulterio?” (Romanonan 2:21, 22) Pa nos por kompartí e bèrdat ku otro hende, nos mester ta onesto i ta papia bèrdat den tur loke nos ta hasi. Nos reputashon di ta hende onesto i ku ta papia bèrdat lo tin un impakto poderoso riba e manera ku hende ta reakshoná riba loke nos ta siña nan.

12, 13. Kiko un hóben a skirbi tokante onestidat, i kon bini e tabatin normanan moral haltu?

¹² Hóbennan entre e sirbidónan di Yehova tambe ta komprondé e importansia di ser onesto i papia bèrdat. Den un òpstèl ku Jenny a traha pa skol tempu ku e tabatin 13 aña di edat, el a skirbi: “Ser onesto ta algu ku pa mi ta hopi balioso. Ta yamer, pero hopi hende no ta kompletamente onesto awe. Ami a primintí mi mes ku semper lo mi keda onesto den mi bida. Tambe lo mi ta onesto asta si papia e bèrdat lo no benefisiá ami ni mi amigunan mesora. Mi ta hasi sigur ku mi amigunan ta hende onesto ku ta papia bèrdat.”

¹³ Komentando riba e òpstèl aki, Jenny su yùfrou a remarká: “Bo ta hopi yòn pa ya kaba a desaroyá étika i normanan moral fuerte. Mi sa ku lo bo tene bo na bo normanan pasobra bo tin e fortalesa moral.” Kon bini e mucha di skol aki tabatin e fortalesa moral ei? Den e introdukshon di su òpstèl Jenny a deklará ku su religion “ta establesé e normanan pa [su] bida.” Ya ta shete aña kaba ku Jenny a skirbi e òpstèl aki. Manera su yùfrou a asumí, Jenny ta sigui manifestá normanan moral haltu den su bida komo un Testigu di Yehova.

Yehova Su Sirbidónan Ta Revelá e Bèrdat

14. Dikon sirbidónan di Dios tin un responsabilidat serio i spesial di sostené loke ta bèrdat?

¹⁴ Klaru ku hende ku no ta Testigu di Yehova tambe sa papia bèrdat i hasi esfuerso pa ta  onesto. Sin embargo, komo sirbidónan di Dios, nos tin un responsabilidat serio i spesial: sostené loke ta bèrdat. Nos a ser konfiá ku e bèrdatnan di Beibel—bèrdatnan ku por duna un persona bida eterno. P’esei nos tin e obligashon di kompartí e konosementu ei ku otro hende. Hesus a bisa: “Esun ku hopi a wòrdu konfiá na dje, di esei nan lo eksigí muchu mas.” (Lukas 12:48) Definitivamente, ‘muchu mas ta ser eksigí’ di esnan ku a ser bendishoná ku e konosementu balioso di Dios.

15. Ki felisidat bo ta haña ora bo kompartí e bèrdat di Beibel ku otro hende?

¹⁵ Kompartí e bèrdat di Beibel ku otro hende ta trese felisidat. Meskos ku Hesus su disipelnan di promé siglo, nos tambe ta deklará e bon nobo—un mensahe alentador di speransa—na hende ku ta “kansá i plamá, manera karné sin wardadó” i na esnan siegá i konfundí dor di “doktrinanan di demoñonan.” (Mateo 9:36; 1 Timoteo 4:1) Apòstel Juan a skirbi: “No tin goso mas grandi pa mi ku di tende ku mi yunan ta kana den e bèrdat.” (3 Juan 4) Fieldat di Juan su “yunan”—kisas e personanan ku el a siña e bèrdat—a dun’é hopi goso. Nos tambe ta sinti un goso ora nos mira hende reakshoná ku apresio riba e Palabra di Dios.

16, 17. (a) Dikon no ta tur hende ta aseptá e bèrdat? (b) Ki goso abo por haña segun ku bo ta proklamá e bèrdat di Beibel?

¹⁶ Ta sierto ku no ta tur hende lo aseptá e bèrdat. Hesus a papia e bèrdat tokante Dios asta ora hende no tabata gusta esei. El a bisa hudiunan ku tabata kontra: “Pakiko boso no ta kere mi? Esun ku ta di Dios ta tende e palabranan di Dios; pa e motibu aki boso no ta tende nan, pasobra boso no ta di Dios.”—Juan 8:46, 47.

¹⁷ Meskos ku Hesus, nos tampoko no ta keda sin konta hende e bèrdat balioso tokante Yehova. Nos no ta ferwagt ku tur hende ta aseptá loke nos bisa nan, pasobra no ta tur hende a aseptá loke Hesus a bisa. Sin embargo, e echo ku nos sa ku nos ta hasi loke ta  korekto ta duna nos goso. Debí na Yehova su bondat amoroso, e kier pa hende haña sa e bèrdat. Komo esnan ku tin e bèrdat, kristiannan ta bira kargadó di lus den un mundu skur. Dor di laga e lus di bèrdat bria mediante nos palabra i echonan, nos por yuda otro hende duna gloria na nos Tata selestial. (Mateo 5:14, 16) Públikamente nos ta laga hende sa ku nos ta rechasá e klase di bèrdat falsu ku Satanas ta promové, i ku nos ta sostené e Palabra puru di Dios. E bèrdat ku nos konosé i ta kompartí por duna berdadero libertat na hende ku asept’é.—Juan 8:32.

Papia i Biba di Akuerdo ku e Bèrdat

18. Dikon i di ki manera Hesus a mustra su aprobashon na Natanael?

¹⁸ Hesus a stima e bèrdat i papia e bèrdat. Durante su ministerio riba tera, el a duna su aprobashon na hende ku a papia bèrdat. Por ehèmpel, Hesus a bisa di Natanael: “Ata un berdadero israelita, den kende no tin mentira!” (Juan 1:47) Despues, Natanael, kende probablemente tambe a ser yamá Bartolomé, a ser skohé komo un di e 12 apòstelnan. (Mateo 10:2-4) Esta un privilegio!

19-21. Kon un hòmber ku un tempu tabata siegu a ser bendishoná p’e echo ku el a papia bèrdat ku kurashi?

¹⁹ Henter un kapítulo den e buki bíbliko di Juan ta konta e relato di un otro hòmber onesto ku Hesus a bendishoná. Nos no sa su nòmber. Loke nos sa ta ku e tabata un pididó di limosna ku a nase siegu. E hendenan a keda asombrá ora Hesus a kur’é. E notisia di e kurashon milagroso aki a yega na orea di e fariseonan, kendenan tabata odia e bèrdat. Nan a sera kabes pa ekspulsá for di snoa kualkier persona ku pone fe den Hesus. Dor ku e mayornan miedoso di e hòmber ku tabata siegu a haña sa di e kòmplòt aki, nan a gaña e fariseonan i a bisa ku nan no tabata sa kon bini nan yu por a mira awor ni ta ken a kur’é.—Juan 9:1-23.

²⁰ E fariseonan a bolbe manda yama e hòmber ku a ser kurá. Sin importá e konsekuensianan, el a bisa nan e bèrdat ku kurashi. El a splika nan kon el a ser kurá i ku ta Hesus a hasié. El a keda straño ku e hòmbernan prominente i eduká aki no tabata kere ku Hesus a bini di Dios. P’esei, ku kurashi el a hasi un apelashon na nan pa aseptá loke ta bisto: “Si e hòmber aki no tabata di Dios, e lo no por a hasi nada.” Dor ku e fariseonan no por a kontestá nada mas, nan a akus’é di ta tribí i a sak’é afó.—Juan 9:24-34.

²¹ Ora Hesus a haña sa esaki, amorosamente el a tuma su tempu pa buska e hòmber. Despues di esei, el a sigui edifiká e fe di e hòmber ku ántes tabata siegu. Abiertamente Hesus a identifiká su mes komo e Mesias. Ki un bendishon e hòmber ei a haña pasobra el a papia bèrdat! Definitivamente, hende ku ta papia bèrdat tin aprobashon di Dios.—Juan 9:35-37.

22. Dikon nos mester papia i biba di akuerdo ku e bèrdat?

²² Práktika e bèrdat ta algu ku nos mester tuma na serio. E ta fundamental pa forma i mantené bon relashon ku hende i ku Dios. Ser onesto ta nifiká ser franko, sinsero, aserkabel i digno di konfiansa, i e ta pone nos haña Yehova su aprobashon. (Salmo 15:1, 2) Ser desonesto ta nifiká ser engañoso, inkonfiabel i falsu, i e ta pone nos pèrdè Yehova su aprobashon. (Proverbionan 6:16-19) P’esei, sea determiná pa papia i biba di akuerdo ku e bèrdat. Realmente, pa imitá e Dios di bèrdat, nos mester sa e bèrdat, papia e bèrdat i biba e bèrdat.

Kon Lo Bo Kontestá?

• Dikon nos por ta gradisidu ku nos sa e bèrdat?

• Kon nos lo por imitá Yehova dor di ta hende onesto?

• Ki benefisio tin den kompartí bèrdat di Beibel ku otro hende?

• Pakiko ta importante pa papia i biba di akuerdo ku e bèrdat?

[Preguntanan di Estudio]

[Plachinan na página 17]

Kristiannan a ser konfiá ku e bèrdat di Beibel, i ku selo nan ta kompartié ku otro hende

 [Plachinan na página 18]

E hòmber siegu ku Hesus a kura a haña gran bendishon pasobra el a papia bèrdat