Dikon Nos No Por Ta Kompletamente Independiente

“Dos ta mihó ku un . . . Si un di nan kai, esun lo lanta su kompañero.”—Rei Salomon

REI SALOMON di Israel di antigwedat a deklará: “Dos ta mihó ku un, pasobra nan tin un bon pago pa nan trabou. Pasobra si un di nan kai, esun lo lanta su kompañero. Ma ai di esun ku kai ora no tin ningun hende pa lant’é.” (Eklesiastés 4:9, 10) Asina e sabio aki ku a studia komportashon di hende a enfatisá nos nesesidat di kompañerismo i e importansia di no isolá nos mes. Sin embargo, esaki no tabata djis un opinion di hende. Sálomon por a deklará esaki dor ku e tabatin sabiduria divino i a ser inspirá dor di Dios.

No ta sabí pa isolá nos mes. Hende tin mester di otro. Nos tur tin mester di e fortalesa i yudansa ku nos por risibí for di otro hende. Un proverbio bíbliko ta bisa: “Esun ku isolá su mes ta buska su mes deseo; su furia ta lanta kontra tur sabiduria sano.” (Proverbionan 18:1) P’esei no ta straño ku sosiólogonan ta animá hende pa djòin un grupo i pa mustra interes den otro hende.

Entre e rekomendashonnan pa rebibá e manera ku hende mester biba bon ku otro den un komunidat, Profèser Robert Putnam ta menshoná “e influensia fortalesedor di religion.” Testigunan di Yehova ta sobresalí den e aspekto aki pasobra rònt mundu den nan kongregashonnan tin un ambiente di famia ku ta brinda nan protekshon. Na armonia ku e palabranan di apòstel Pedro, nan ta ‘stima henter e asosiashon di rumannan’ ku ta “teme Dios” i respet’é. (1 Pedro 2:17) Ademas, Testigunan di Yehova ta evitá isolashon i su efektonan perhudisial pasobra nan tin hopi aktividat positivo relashoná ku adorashon berdadero ku ta tene nan okupá den yuda nan próhimo siña e bèrdat ku Beibel, e Palabra di Dios, ta kontené.—2 Timoteo 2:15.

Amor i Kompañerismo A Kambia Nan Bida

Testigunan di Yehova ta forma un komunidat uní den kua tur miembro ta hunga un papel importante. Konsiderá komo ehèmpel, e kaso di Miguel, Froylán, i Alma Ruth, tres miembro di e mesun famia latinoamerikano. Nan a nase ku un malesa di wesu ku a pone ku nan a keda enano. Nan tur tres tin ku usa ròlstul. Ki efekto asosiashon ku Testigunan tabatin riba nan bida?

Miguel ta komentá: “Mi a pasa den hopi krísis, pero ora mi a kuminsá asosiá ku e pueblo  di Yehova, mi bida a kambia. Isolá bo mes ta masha peligroso. Asosiashon ku kompañeronan kreyente tur siman na reunion kristian tabata di gran yudansa pa mi por a haña satisfakshon den bida.”

Alma Ruth ta agregá: “Tabatin momentunan ku mi tabata hopi deprimí; mi tabata sinti mi hopi tristu. Pero ora mi a kuminsá siña tokante Yehova, mi a sinti ku mi por a sera un relashon íntimo kuné. Esei a bira e kos di mas balioso den mi bida. Mi famia a apoyá nos masha hopi mes, i esaki a uni nos mas ainda.”

Ku amor Miguel su tata a siñ’é lesa i skirbi. Despues Miguel na su turno a yuda Froylán ku Alma. Esaki tabata esensial pa nan spiritualidat. “E echo ku nos a siña lesa a benefisiá nos masha hopi mes, pasobra e ora ei nos por a alimentá nos mes spiritualmente dor di lesa Beibel i publikashonnan bíbliko,” Alma Ruth a bisa.

Aktualmente Miguel ta sirbi komo un ansiano kristian. Froylán a lesa henter e Beibel nuebe bes. For di 1996, Alma Ruth a amplia su sirbishi na Yehova dor di sirbi komo un minister pionero, esta, un proklamadó di Reino di tempu kompletu. El a bisa: “Ta ku bendishon di Yehova mi a logra e meta aki, segun ku mi ta haña apoyo di mi ruman muhénan stimá. Nan no solamente ta yuda mi pa mi por prediká, sino tambe pa mi por siña otro hende dor di kondusí 11 studio di Beibel ku mi a logra kuminsá.”

Otro ekselente ehèmpel ta esun di Emelia. El a haña un aksidente ku a lag’é den ròlstul debí na leshonnan ku el a risibí na su pia i wes’i lomba. Testigunan di Yehova na Mexico City a studia Beibel kuné, i el a batisá na 1996. Emelia a bisa: “Promé ku mi a konosé e bèrdat, mi kier a mata mi kurpa; mi no kier a biba mas. Mi tabata sinti un bashí inmenso i mi tabata yora di dia i anochi. Pero ora mi a kuminsá asosiá ku e pueblo di Yehova, mi a sinti e amor di e rumannan. E interes personal ku nan a mustra den mi a duna mi ánimo. Un di e ansianonan tabata manera un ruman òf un tata pa mi. El a hasi areglo pa algun sirbidónan ministerial hiba mi reunion i den e trabou di prediká den mi ròlstul.”

José, kende a batisá komo Testigu di Yehova na 1992, ta biba su so. E tin 70 aña di edat i a baha ku penshon na 1990. José tabata sintié deprimí, pero despues ku un Testigu a prediká na dje, mesora el a kuminsá asistí na  reunionnan kristian. El a gusta loke el a tende i mira einan. Por ehèmpel, el a opservá e kompañerismo ku tin entre e rumannan i el a sinti ku nan tabata realmente interesá den dje. Awor e ansianonan i sirbidónan ministerial den su kongregashon ta perkurá p’e. (Filipensenan 1:1; 1 Pedro 5:2) E kompañeronan di fe ei ta ‘enkurash’é’ mashá. (Kolosensenan 4:11) Nan ta hib’é dòkter, bishit’é na kas i nan a dun’é apoyo moral durante e periodonan ku el a hasi kuater operashon. El a bisa: “Nan ta mustra interes den mi. Nan realmente ta mi famia. Mi ta disfrutá di nan kompañerismo.”

Dunamentu Ta Trese Berdadero Felisidat

Ora ku Rei Sálomon a bisa ku “dos ta mihó ku un,” ta nèt despues ku el a kaba di mustra e banidat di dediká tur energia pa haña rikesa material. (Eklesiastés 4:7-9) I esei ta presisamente loke hopi hende ta hansha nan bida kuné awe, ounke esaki ta nifiká ku nan tin ku sakrifiká nan relashonnan ku otro hende tantu pafó komo den famia.

Golosidat i egoismo a pone hopi hende isolá nan mes. Pero esaki no a trese ni felisidat ni satisfakshon den nan bida, pasobra frustrashon i desesperashon ta komun entre hende ku ta laga golosidat i egoismo guia nan. Na kontraste ku esei, e relatonan ku nos a kaba di konta ta mustra e bon resultadonan di asosiashon ku hende ku ta sirbi Yehova i ku ta motivá dor di amor p’e i pa nan próhimo. Asistensia regular na reunionnan kristian, apoyo i interes di kompañeronan kristian, i aktividat seloso den sirbishi tabata faktornan vital ku a yuda e personanan aki vense sintimentunan negativo ku tin di haber ku isolashon.—Proverbionan 17:17; Hebreonan 10:24, 25.

Siendo ku nos ta dependé di otro, ta normal ku ora nos ta hasi kos pa otro nos ta haña un satisfakshon. Albert Einstein, kende su obra a benefisiá otro hende, a bisa: “Mester balorá hende na loke e ta duna i no na loke e por risibí.” Esaki ta di akuerdo ku e palabranan di nos Señor Hesukristu: “Tin mas felisidat den duna ku tin den risibí.” (Echonan 20:35, NW) P’esei, ounke ta bon pa risibí amor, mustra amor na otro hende tambe ta masha bon pa salú.

Un superintendente biahero ku tin vários aña ta bishitá kongregashonnan pa duna yudansa spiritual i tambe a yuda traha lugá di reuní pa kristiannan di ménos rekurso, a ekspresá su sintimentunan ku e palabranan aki: “E goso di sirbi mi rumannan i di mira nan kara yen di apresio ta motivá mi pa sigui buska oportunidat pa yuda. Mi a realisá ku mustra interes personal den otro hende ta e klave pa felisidat. I mi sa ku komo ansiano, nos mester ta ‘manera un refugio kontra bientu . . . , manera koridanan di awa den un tera seku, manera sombra di un baranka masha grandi mes den un tera ku tin set di awa.’”—Isaias 32:2.

Ki Dushi Ta pa Rumannan Biba Huntu den Armonia!

Berdaderamente, yuda otro hende i buska kompañerismo ku esnan ku ta sirbi Yehova ta trese berdadero felisidat i hopi benefisio. E salmista a sklama: “Mira, ki bon i ki dushi ta  pa rumannan biba huntu den armonia!” (Salmo 133:1) Manera e kaso di Miguel, Froylán i Alma Ruth a mustra, union den famia ta un faktor vital pa yuda otro. I ta ki un bendishon pa ta uní ku otro den adorashon berdadero! Despues ku apòstel Pedro a duna esposo i esposa kristian konseho, el a skirbi: “Finalmente, boso tur sea di akuerdo ku otro, teniendo kompashon ku otro, stimando manera ruman, i sea miserikòrdioso i humilde den spiritu.”—1 Pedro 3:8.

Berdadero amistat ta trese hopi benefisio, tantu emoshonalmente komo spiritualmente. Dirigiendo su mes na su kompañeronan di fe, apòstel Pablo a duna e spièrtamentu: “Enkurashá esnan ku ta falta ánimo, yuda e debilnan, tene pasenshi ku tur hende. . . . Semper buska loke ta bon pa otro i pa tur hende.”—1 Tesalonisensenan 5:14, 15.

P’esei, buska maneranan práktiko pa hasi bon na otro hende. “Hasi bon na tur hende, i spesialmente na esnan ku ta di [bo] famia di fe” pasobra esaki lo duna bo bida berdadero propósito i lo yuda bo haña satisfakshon. (Galationan 6:9, 10) Santiago, disipel di Hesus, a skirbi: “Si un ruman hòmber òf ruman muhé ta sin paña i den nesesidat di e kuminda di kada dia, i un di boso bisa nan: ‘Bai na pas, tene bo kurpa kayente i yena bo barika’ i sin embargo, boso no ta duna nan loke ta nesesario pa nan kurpa, kiko esei ta bal?” (Santiago 2:15, 16) E kontesta riba e pregunta ei ta opvio. Nos no mester ‘buska nos interes personal so, ma buska tambe interes di otronan.’—Filipensenan 2:4.

Ademas di yuda otro hende ku kosnan material ora un nesesidat spesial òf desaster surgi, Testigunan di Yehova ta traha duru tambe pa benefisiá nan próhimo den un manera ku ta sumamente importante: dor di prediká e evangelio di e Reino di Dios. (Mateo 24:14) E echo ku tin mas ku 6.000.000 Testigu ta partisipá den proklamá e mensahe di speransa i konsuelo aki ta duna prueba di nan berdadero interes amoroso den otro hende. Pero e yudansa ku nan ta duna for di e Skritura Santu tambe ta yuda satisfasé un otro nesesidat di hende. Kiko esei ta?

Satisfasiendo un Nesesidat Vital

Pa nos disfrutá di berdadero felisidat, nos mester tin un bon relashon ku Dios. Un outor a yega di bisa: “E echo ku hende di tur kaminda i di tur tempu, for di prinsipio te ku awor, a sinti e impulso pa invoká algu ku e ta kere ta mas elevá i mas poderoso kuné, ta mustra ku e deseo pa adorá ta algu ku nos a nase kuné i esei ta un kos ku siensia mester rekonosé. . . . E manera ku hende di tur parti di mundu ta buska i kere den un ser supremo mester yena nos ku asombro i rèspèt profundo.”—Man Does Not Stand Alone di A. Cressy Morrison.

Hesukristu a deklará: “Felis ta esnan ku ta konsiente di nan nesesidat spiritual.” (Mateo 5:3, NW) Kos no ta bai bon pa hende ku ta isolá nan mes hopi tempu for di otronan. Sin embargo, e situashon ta bira hopi mas serio ainda si nos isolá nos mes for di nos Kreadó. (Revelashon 4:11) Atkerí i apliká “e konosementu di Dios” mester ta un parti importante di nos bida. (Proverbionan 2:1-5) Sí, nos mester ta determiná pa satisfasé nos nesesidat spiritual, pasobra nos no por biba independiente ni sin yudansa di Dios. Un bida ku realmente ta duna nos satisfakshon ta dependé di un bon relashon ku Yehova, “e Haltísimo riba henter tera.”—Salmo 83:18.

[Plachi na página 5]

Miguel: “Mi a pasa den hopi krísis, pero ora mi a kuminsá asosiá ku e pueblo di Yehova, mi bida a kambia”

[Plachi na página 5]

Alma Ruth: “Ora mi a kuminsá siña tokante Yehova, mi a sinti ku mi por a sera un relashon íntimo kuné”

[Plachi na página 6]

Emelia: “Promé ku mi a konosé e bèrdat, . . . mi tabata sinti un bashí inmenso”

[Plachi na página 7]

Asosiashon ku adoradónan berdadero ta yuda satisfasé nos nesesidat spiritual