Algu Mas Balioso ku e Tesoronan di Egipto

MOISES ta un dje gran personahenan históriko. Kuater buki di Beibel, for di Éksodo te Deuteronomio, ta konta kasi eksklusivamente kon Dios a trata ku Israel bou di e liderato di Moises. Moises a dirigí nan éksodo for di Egipto, a sirbi komo intermediadó di e pakto di Lei i a guia Israel te na frontera dje Tera Primintí. Moises a lanta den e kas di famia di Fárao, pero a bira e komandante ofisial di e pueblo di Dios, i tambe profeta, hues i eskritor inspirá pa Dios. Tòg e tabata “masha humilde, mas ku tur hòmber.”—Numbernan 12:3.

Mayoria detaye ku Beibel ta duna tokante Moises tin di haber ku e último 40 añanan di su bida, e periodo ku ta kore for dje tempu ku Israel a ser librá for di sklabitut te na su morto ku 120 aña di edat. Di 40 pa 80 aña di edat, e tabata wardadó di bestia na Madian. Pero segun un fuente, “talbes e parti mas interesante di su bida i tòg esun ménos konosí,” ta e promé 40 añanan, for di ora ku el a nase te ora el a hui for di Egipto. Kiko eksaktamente nos sa dje periodo aki? Kon e sirkunstansianan bou di kua Moises a ser lantá por a afektá e tipo di hende ku el a bira? Kiko ta e kosnan ku lo por a influensiá su bida? Kiko ta e difikultatnan ku lo e tabatin ku enfrentá? I kiko tur esaki por siña nos?

Sklabitut den Egipto

E buki di Éksodo ta konta ku komo ku e israelitanan ku a bin establesé nan mes den Egipto a oumentá rápidamente, un dje fáraonan a kuminsá haña miedu di nan. Keriendo ku e tabata aktua ‘sabí,’ el a purba redusí nan kantidat dor di fòrsa nan traha komo katibu bou di supervishon di bomba ku tabata kla pa suta nan. Nan mester a karga kos, traha semènt di klei i produsí un kantidat mínimo di blòki pa dia.—Éksodo 1:8-14; 5:6-18.

E deskripshon aki di e Egipto ku Moises a nase aden ta kuadra perfektamente ku historia. Papironan di antigwedat i e pinturanan den por lo ménos un kèlder ta deskribí kon e katibunan tabata traha blòki di lodo den e di dos milenio promé ku Era Komun òf mas promé. E  ofisialnan responsabel pa perkurá e blòkinan tabata organisá sentenáres di katibu den gruponan di 6 pa 18 persona bou di un forman òf ‘ploegleider.’ Esakinan mester a koba saka klei i hiba yerba seku pa e kurá di traha blòki. Obreronan di diferente nashonalidat tabata saka awa, i ku chapi nan tabata meskla esaki ku klei i yerba seku. For di malchi firkant nan tabata produsí hopi kareda di blòki. E blòkinan tabata seka den solo pa despues otro obreronan karga nan ku yugo hiba pa e sitio di konstrukshon. Tin bes nan tabata usa un ‘baan’ pa baha e blòkinan. E hefenan egipsio, armá ku bara, tabata sinta òf kana kontrolá e trabou.

Un papel antiguo riba kua tabata registrá detayenan di produkshon ta referí na 39.118 blòki ku 602 obrero a traha, loke ta nifiká un promedio di 65 blòki pa persona pa kada warda. I un dokumento di siglo 13 promé ku Era Komun ta bisa: “E hòmbernan ta trahando . . . nan kantidat mínimo di blòki pa dia.” Tur esaki ta pone nos kòrda e trabou fòrsá ku e israelitanan mester a hasi manera e buki di Éksodo ta deskribí.

Opreshon no a logra redusí e poblashon hebreo. Al kontrario, “mas [e egipsionan] tabata afligí nan, mas nan tabata multipliká . . . , asina ku e egipsionan tabata teme e yunan di Israel.” (Éksodo 1:10, 12) P’esei, Fárao a manda promé pa e parteranan (frumú) hebreo i despues henter su pueblo mata tur yu hòmber israelita ku kaba di nase. Ta den e sirkunstansianan horibel aki, Jokabed i Amram a haña un bunita yu hòmber, Moises.—Éksodo 1:15-22; 6:20; Echonan 7:20.

Skondí, Hañá i Adoptá

Moises su mayornan no a obedesé e òrdu di Fárao pa mata nan yu chikí; mas bien nan a skond’é. Nan a hasi esei apesar dje echo ku spion i inspektornan tabata kana hasi nan chekeonan pa buska kriaturanan resien nasí? Nos no sa sigur. Sea kual sea e kaso, despues di tres luna Moises su mayornan no por a skond’é mas. P’esei su mama desesperá a traha un makutu di papiro, a fur’é ku breu pa awa no drent’é i a pone su yuchi den dje. Den un sentido Jokabed a obedesé, no e spiritu, pero sí e lèter dje òrdu di Fárao pa tira tur yu hòmber resien nasí dje hebreonan den Nilo. Anto Miriam, ruman muhé mayó di Moises, a bai para den banda pa tira bista.—Éksodo 1:22–2:4.

Nos no sa si e intenshon di Jokabed tabata pa laga nèt e yu muhé di Fárao haña Moises ora e bin baña den e riu, pero ta esei ta loke a pasa si. E prensès a realisá ku esaki tabata un yu dje hebreonan. Kiko el a hasi? El a sigui òrdu di su tata i laga mat’é? Nò, el a reakshoná manera mayoria hende muhé lo hasi di naturalesa. El a mustra kompashon.

 Mesora Miriam a bin banda di dje. ‘Bo kier mi bai yama un mènchi pa kria e yu na pechu pa bo?’ el a puntra. Algun hende ta haña e pasashi aki kolmo di ironia. E ruman muhé di Moises a hasi nèt kontrali ku Fárao, kende huntu ku su konseheronan a traha un kòmplòt pa trata na un manera ‘sabí’ ku e hebreonan. Klaro ku ta ora e prensès a bai di akuerdo ku e plan di Moises su ruman muhé, e bienestar di Moises por a ser garantisá. “Sí, bai!” e yu muhé di Fárao a respondé, i mesora Miriam a manda yama su mama. Pues, komo resultado di un negosiashon ekstraordinario, Jokabed a ser kontratá pa lanta su propio yu ku protekshon real.—Éksodo 2:5-9.

E kompashon dje prensès sigur a forma un kontraste ku e krueldat di su tata. E yu muhé no tabata ignorante ni e no a ser engañá tokante e mucha. Duele di kurason a motiv’é pa adoptá e mucha, i e echo ku el a bai di akuerdo ku e idea di un mènchi hebreo ta mustra ku e no tabatin e mesun prehuisio ku su tata.

Kriansa i Edukashon

Jokabed “a tuma e mucha i a kri’é. I e mucha a krese bira grandi, i el a hib’é pa yu muhé di Fárao i el a bira su yu.” (Éksodo 2:9, 10) Beibel no ta bisa kuantu tempu Moises a biba serka su mes mayornan. Algun hende ta pensa ku esei mester tabata por lo ménos te ora el a stòp di bebe pechu—dos pa tres aña—pero por tabata mas tantu. Éksodo ta bisa simplemente ku el “a krese bira grandi” serka su mayornan, ma esei no ta duna ningun indikashon di edat. Un kos ta sigur, sin duda Amram i Jokabed a probechá dje tempu pa hasi nan yu konsiente ku ta hebreo e ta i pa siñ’é tokante Yehova. Tempu a demostrá kon bon nan a logra inkulká fe i amor pa hustisia den kurason di Moises.

Ora nan a entregá Moises bèk den man di e yu muhé di Fárao, el a ser eduká “den tur e siñansa di e egipsionan.” (Echonan 7:22) Esei lo a nifiká preparashon p’e por a okupá kargonan den gobièrnu. E siñansa amplio dje egipsionan a inkluí matemátika, geometria, arkitektura, konstrukshon i otro arte i siensianan. Probablemente e famia real lo tabata kier p’e risibí instrukshon den e religion egipsio tambe.

Kisas Moises a risibí su edukashon privilegiá huntu ku otro yunan di rei. “Yunan di gobernantenan stranhero ku a ser mandá òf tumá komo rehen na Egipto pa ser ‘sivilisá’ i despues mandá bèk pa goberná komo rei supordiná fiel na Fárao” tambe a benefisiá di e edukashon elitario ei. (The Reign of Thutmose IV, di Betsy M. Bryan) Parse ku krèshnan konektá ku palasionan real tabata prepará hóbennan pa sirbi komo ofisial di korte. * Inskripshonnan ku ta data for di e periodonan di e Reino Mediano i Reino Nobo di Egipto ta revelá ku asta komo adulto vários asistente di personal di Fárao i ofisialnan haltu di gobièrnu a keda ku e título onorabel di “Mucha di Krèsh.”

Bida den e korte lo tabata un prueba pa Moises. Esei a ofresé rikesa, luho i poder. Tambe el a presentá peligernan moral. Kon Moises lo a reakshoná? Na ken lo e tabata leal? E tabata un adoradó di Yehova di fondo di su kurason, ruman dje hebreonan oprimí, òf el a preferá tur loke Egipto pagano por a ofresé?

 Un Desishon Krusial

Tempu ku Moises tabatin 40 aña, e edat ku lo a pèrmitié bira un egipsio natural, ‘el a sali bai serka su rumannan pa mira nan trabou pisá.’ Loke el a hasi despues a demostrá ku esaki no tabata djis pa kuriosidat; el a anhelá pa yuda nan. Ora el a mira un egipsio bati un hebreo, el a intervení, matando e opresor. E akto ei a mustra ku e kurason di Moises tabata ku su rumannan. Probablemente e hòmber ku Moises a mata tabata un ofisial ku tabata kumpliendo ku su tarea. Den bista dje egipsionan, Moises tabatin tur motibu pa ta leal na Fárao. Tòg, loke a motivá Moises tabata amor pa hustisia, un kalidat ku a ser manifestá mas aleu ora e siguiente dia el a lanta kontra un hebreo ku tabata maltratá su kompañero inhustamente. Moises a deseá di libra e hebreonan for di sklabitut severo, pero ora Fárao a haña sa di Moises su deslealtat i a purba mat’é, Moises a hañ’é obligá di hui bai Madian.—Éksodo 2:11-15; Echonan 7:23-29. *

E momentu ku Moises kier a libra e pueblo di Dios no a kuadra ku e tempu di Yehova. No opstante, su akshonnan a revelá ku e tabatin fe. Hebreonan 11:24-26 ta bisa: “Pa medio di fe Moisés, ora ku el a krese bira grandi, a nenga di wòrdu yamá yu di Farao su yu muhé, skohiendo pa mas bien sufri maltrato huntu ku e pueblo di Dios, ku gosa di e plasernan pasahero di piká.” Pakiko? Pasobra el a ‘konsiderá e reproche di Kristo rikesanan mas grandi ku e tesoronan di Egipto, pasobra e tabatin su bista riba e rekompensa.’ E uso eksepshonal aki di e ekspreshon “Kristu” ku ta nifiká “esun ungí,” ta kuadra ku Moises den e sentido ku mas despues el a risibí un tarea spesial direktamente for di Yehova.

Djis imaginá bo! Moises a haña un kriansa ku ta solamente un aristokrat egipsio por a risibí. Dor di su posishon lo e por a sigui un karera briante i haña tur plaser di mundu. Tòg el a rechasá tur esei. El a mira ku e no por a stima Yehova i Su hustisia anto keda biba den e korte di Fárao, e opresor. E tabata sa dje promesanan ku Dios a duna su antepasadonan Abraham, Isak i Yakòb i a meditá riba nan, p’esei el a preferá e aprobashon di Dios. Komo resultado, Yehova por a duna Moises un tarea masha importante pa kumpli ku Su propósito.

Nos tur ta haña nos ta tuma desishon riba loke ta mas importante den bida. Meskos ku Moises, tal bes bo ta pará dilanti un desishon difísil. Bo tin ku bandoná sierto kustumbernan òf supuesto bentahanan, sin importá e sakrifisio? Si bo ta pará dilanti un desishon asina, kòrda ku Moises a konsiderá amistat ku Yehova mas balioso ku tur e tesoronan di Egipto i e no a lamentá esei.

[Nota]

[Kuadro na página 11]

Kontrakt pa Duna Yu Pechu

Normalmente ta un mama mes ta duna su yu pechu. Sin embargo, segun e analista di Beibel, Brevard Childs den Journal of Biblical Literature, “den algun kaso famianan aristokrat [di Medio Oriente] tabata kontratá un mènchi. E kustumber aki tabata komun tambe ora e mama no por a alimentá su yu òf kaminda e mama tabata deskonosí. E mènchi a asumí e responsabilidat di lanta e mucha i dun’é pechu durante e tempu stipulá.” A haña vários papiro bieu ku kontrakt di mènchi den e regionnan di Medio Oriente. E dokumentonan aki ta konfirmá loke tabata un kustumber komun for dje periodo sumirio te den e periodo di kultura griego den Egipto. Rasgonan komun dje dokumentonan aki ta deklarashon di e individuonan enbolbí, e tempu ku e kontrakt ta kubri, kondishonnan di trabou, spesifikashonnan relashoná ku alimentashon, but pa kibramentu di kontrakt, kuantu e pago lo ta i kon lo paga. Childs ta splika ku normalmente “e periodo pa duna pechu tabata dura dos pa tres aña. E mènchi tabata lanta e mucha na kas dje mènchi mes, pero sa sosodé ku nan mester a debolbé e mucha na su mayor pa esaki kontrol’é.”

[Plachinan na página 9]

Manera un pintura di antigwedat ta mustra, trahamentu di blòki na Egipto no a kambia mashá for di tempu di Moises

[Rekonosementu]

Ariba: Pictorial Archive (Near Eastern History) Est.; abou: Erich Lessing/Art Resource, NY