Historia di Bida

Nos A Implantá Amor pa Yehova den Kurason di Nos Yunan

SEGUN E RELATO DI WERNER MATZEN

Algun aña pasá mi yu hòmber mayó, Hans Werner, a duna mi un Beibel. Parti paden di e kaft, el skirbi: “Kerido Tata, mi deseo ta pa Yehova su Palabra sigui guia nos komo un famia riba e kaminda di bida. Bo yu hòmber mayó ku ta masha agradesido.” Kualkier mayor lo por komprendé ku kuantu gratitut i goso e palabranan aki a yena mi kurason. Pero e tempu ei mi no tabata sa ainda ki klase di difikultatnan nos famia lo a hañ’é ta enfrentá.

MI A nase na aña 1924 na Halstenbek, un 20 kilometer for di e haf di Alemania, Hamburg, i mi mama ku mi tawela a kriá mi. Dor ku mi a traha komo aprendis di trahadó di instrumènt, na 1942 nan a skohé mi pa bai den Wehrmacht, forsanan armá. Loke mi a eksperensiá durante Segundo Guera Mundial ora mi tabata bringa na frontera ruso ta asina horibel ku mi no por deskribié. Mi a haña e keintura di tífùs, pero despues ku mi a kura nan a bolbe manda mi na frontera. Na yanüari 1945 ora mi tabata na Lodz, Polonia, mi a keda seriamente heridá i nan a manda mi un hospital militar. Mi tabata einan ainda ora guera a terminá. Tempu mi tabata den hospital i tambe den e kampo pa detenidonan na Neuengamme, mi a haña tempu pa meditá. E preguntanan aki tabata molestiá mi: Di bèrdat ta eksistí un Dios? Si e ta eksistí, dikon e ta pèrmití asina tantu krueldat?

Djis despues ku mi a sali for di kampo pa detenidonan, na sèptèmber 1947, mi a kasa ku  Karla. Nos a krese den e mesun stat. Karla tabata katóliko, ami sí no a haña un edukashon religioso. E pastor ku a kasa nos a sugerí pa nos hasi por lo ménos e Orashon di Nos Tata huntu tur anochi. Nos a hasi manera el a bisa, sin sa realmente ta kiko nos tabata resa pidi p’e.

Un aña despues Hans Werner a nase. Durante e mesun tempu ei, un kolega di trabou, Wilhelm Ahrens, a sera mi konosí ku Testigunan di Yehova. For di Beibel el a mustra mi ku guera lo stòp un dia. (Salmo 46:9) Durante hèrfst di aña 1950, mi a dediká mi bida na Yehova i a batisá. Mi tabata masha kontentu mes ora ku, un aña despues, mi kerida esposa tambe a batisá!

Lanta Yunan den e Kamindanan di Yehova

Mi a lesa den Beibel ku ta Yehova a originá matrimonio. (Génesis 1:26-28; 2:22-24) E echo ku mi a presensiá e nasementu di nos yunan—Hans Werner, Karl-Heinz, Michael, Gabriele i Thomas—a fortalesé mi determinashon pa ta un bon esposo i tata. Nasementu di kada un di nos yunan a yena ami ku Karla ku hopi emoshon.

E kongreso na 1953 di Testigunan di Yehova na Nuremberg tabata un okashon signifikativo pa nos famia. Riba djabièrnè atardi, durante e diskurso “Lanta Yunan den e Sosiedat di Mundu Nobo,” e orador a bisa algu ku nunka mas nos a lubidá: “E herensia mas grandi ku nos por duna nos yunan ta e deseo di ta sirbidó di Dios.” Ta nèt esei ami ku Karla kier a hasi ku e yudansa di Yehova. Pero kon?

Pa kuminsá, nos a tuma pa kustumber pa hasi orashon huntu komo famia tur dia. Esaki a inkulká den e muchanan e importansia di orashon. For di chikitu tur nos yunan a siña ku semper nos ta hasi orashon promé ku kome. Asta ora nan tabata beibi, nan tabata baha nan kabes chikitu i pone nan mannan delikado huntu ora nan mira e bòter di lechi. Un biaha nos a haña invitashon pa un kasamentu di un famia di mi kasá ku no ta Testigu. Despues dje seremonia, mayornan di e brùit a invitá e huéspetnan na kas pa un kuminda leve. Tur hende kier a kuminsá kome mesora. Pero nos yu Karl-Heinz di sinku aña a haña ku esaki no ta bon. El a bisa: “Por fabor, hasi orashon promé.” E bishitantenan a wak’é, despues wak nos, i por último nan a wak e anfitrion. Pa niun hende no pasa bèrgwensa mi a ofresé pa hasi un orashon pa yama danki p’e kuminda, i e anfitrion a bai di akuerdo.

E episodio ei a laga mi kòrda e palabranan di Hesus: “For di boka di mucha chikitu i di  yunan na pechu bo a prepará alabansa.” (Mateo 21:16) Nos tin sigur ku nos orashonnan regular i sinsero a yuda nos yunan mira Yehova komo nan amoroso Tata selestial.

Nos Responsabilidat Dilanti Yehova

Pa siña yunan stima Dios tambe mester lesa i studia su Palabra ku nan regularmente. Ku esaki na mente nos tabatin studio di famia tur siman, kasi tur bes riba djaluna anochi. Dor ku mi yu hòmber mayó ta nuebe aña mas grandi ku esun mas chikitu, e nesesidatnan dje muchanan tabata varia, pues no ta tur bes nos por a trata e mesun informashon ku nan tur.

Por ehèmpel, p’e muchanan ku no tabata bai skol ainda nos tabata tene e seshonnan di instrukshon simpel. Karla tabata trata djis un teksto di Beibel ku nan, òf e tabata usa e plachinan den e publikashonnan basá riba Beibel. Ainda mi tin grato rekuerdonan di e manera ku e muchanan mas chikitu tabata spièrta nos mainta trempan ora nan tabata subi riba nos kama pa mustra nos nan plachinan faborito den e buki E Mundu Nobo. *

Karla a desaroyá un don pa siña e muchanan ku pasenshi e vários motibunan ku nos tur tin pa stima Yehova. Esaki por zona simpel i fásil. Pero bon mirá, físikamente i tambe emoshonalmente, e trabou di instruí nos yunan tabata un trabou full-time pa ami ku Karla. Tòg, nos no a entregá. Nos kier a forma nan kurason tierno promé ku otro hende ku no konosé Yehova kuminsá influensiá nan. Ta p’esei, asina ku nos yunan por a sinta, nos tabata insistí pa nan ta presente na e studio di famia.

Komo mayornan, ami ku Karla a rekonosé ku ta importante pa nos pone e ehèmpel korekto pa nos yunan den asuntu di adorashon. I sea ku nos tabata kome, traha den hòfi òf keiru, nos a purba fortalesé e relashon ku kada yu tabatin ku Yehova. (Deuteronomio 6:6, 7) Nos a hasi sigur pa for di chikitu kada yu tabatin su propio Beibel. Ademas, kada bes ku nos a risibí e revistanan, mi tabata skirbi nòmber di kada miembro di famia riba nan ehemplar personal. Asina e muchanan a siña identifiká nan propio literatura. Nos a bin riba e idea di asigná e muchanan sierto artíkulonan di Spièrta! pa nan lesa. Despues di nos kuminda di djadumingu mèrdia, nan tabata splika kiko nan a komprendé for dje informashon.

Nos A Duna e Muchanan e Atenshon Ku Nan Tabatin Mester

Ta klaro ku kos no a bai fásil tur ora. Segun ku e muchanan a krese, nos a deskubrí ku pa nos implantá amor den nan kurason, nos mester a saka afó kiko tabatin den nan kurason kaba. Esaki a nifiká skucha nan. Tabatin bes ku nos yunan a sinti ku nan mester a reklamá sierto kosnan, pues ami ku Karla a sinta papia tokante e asuntunan aki ku nan. Pa esei nos a introdusí un mei ora spesial na fin di e studio di famia. Tur miembro di famia por a ekspresá frankamente loke e tabata sinti.

Por ehèmpel, Thomas ku Gabriele, nos dos yunan mas chikitu a haña ku komo mayornan nos tabata faboresé nan ruman hòmber mayó. Durante un seshon nan a ekspresá nan mes i a bisa: “Tata, nos ta haña ku abo ku Mama semper ta laga Hans Werner hasi loke e ke.” Na promé instante kasi mi no por a kere mi oreanan. Sin embargo, despues ku nos a konsiderá e asuntu di un manera ophetivo, ami ku Karla mester a atmití ku e muchanan tabatin rason. P’esei, nos a bai hasi mas esfuerso pa trata tur nos yunan meskos.

A yega di sosodé ku mi a kastigá nos yunan muchu lihé òf inhustamente. Na e okashonnan ei nos komo mayor mester a siña pidi despensa. Despues di esei, nos tabata aserká Yehova den orashon. Tabata importante pa nos yunan mira ku nan tata ta kla pa pidi Yehova i nan tambe despensa. Esaki a pone ku nos tabatin un relashon kaluroso i amigabel ku nan. Hopi bes nan tabata bisa: “Boso ta nos mihó amigunan.” Esaki a hasi nos hopi kontentu.

 Traha huntu komo famia ta promové unidat. P’esei, tur hende tabatin nan trabou di kas pa hasi regularmente. Un bes pa siman Hans Werner tabatin e tarea di hasi kompras. Esaki ta nifiká ku nos tabata dun’é un lista di loke e mester a kumpra i e plaka. Tabatin un siman ku nos no a dun’é ni e lista ni sèn. El a puntra su mama dikon, i Karla a bis’é ku ainda nos no tin niun sèn. Wèl, e muchanan a kuminsá fluister nan ku nan, despues nan kada un a bai kohe nan sparpòt i a basha e sènnan riba mesa. Nan tur a grita: “Mama awor sí nos por bai kumpra kos!” Sí, e muchanan a siña duna un man durante emergensia, i esei a hala e famia asta mas serka di otro.

Ora e mucha hòmbernan a bira mas grandi, nan a kuminsá interesá den mucha muhé. Thomas, por ehèmpel, tabata masha interesá den un kompañera Testigu di 16 aña di edat. Mi a splik’é ku si ta intenshon serio e tin ku e mucha muhé ei, e tin ku prepará su mes pa kasá kuné i aseptá e responsabilidat ku un kasá i yu ta trese kuné. Thomas a realisá ku e no ta kla pa kasa, ya ku ta 18 aña so e tabatin.

Hasiendo Progreso Komo Famia

Tempu ku nos muchanan tabata hopi chikitu ainda, un tras di otro nan a inskribí den e Skol di Ministerio Teokrátiko. Ku atenshon nos tabata skucha nan partinan, i esakinan tabata animá nos pasobra nos tabata mira e gran amor ku e muchanan tabatin pa Dios. Superintendentenan di sirkuito i di distrito ku de bes en kuando tabata keda serka nos, tabata konta nan eksperensianan personal òf lesa for di Beibel pa nos. E ruman hòmbernan aki i nan kasá a yuda kultivá un amor pa e sirbishi full-time den kurason di nos famia.

Nos tabata anhelá pa bai nos kongresonan. Nan tabata un faktor klave den nos esfuersonan pa implantá e deseo pa ta sirbidó di Dios den nos yunan. Pa e muchanan, e ora pa pega nan badge promé ku nan bai e sitio di kongreso tabata un momento speshal. Nos tabata masha emoshoná ora ku Hans Werner a batisá ku dies aña di edat. Vários hende a pensa ku e tabata muchu yòn pa dediká su mes na Yehova, pero na edat di 50 aña el a bisa mi ku e ta masha gradisidu ku e tin 40 aña ta sirbi Yehova.

Nos a mustra nos yunan ku un relashon personal ku Yehova ta importante, pero nos no a pusha nan pa nan dediká nan mes. Sin embargo, nos a keda kontentu ora ku e otronan tambe a progresá i batisá ora nan a sinti ku nan tabata kla.

Nos A Siña Tira Nos Karga Riba Yehova

Nos a keda masha kontentu mes ora ku na 1971, Hans Werner a gradua komo miembro di e di 51 klas dje Skol Bíbliko di Galad di Watchtower i a ser asigná pa sirbi komo misionero na Spaña. Un pa un nos otro yunan tambe a dediká algu di nan tempu komo sirbidónan di tempu kompleto. Esaki a hasi nos komo mayor masha  felis. Ta rònt dje tempu ei, Hans Werner a duna mi e Beibel ku mi a menshoná na prinsipio di e artíkulo aki. A parse ku e felisidat di nos famia tabata kompleto.

Despues nos a ripará ku nos mester pega mas duru ku nunka na Yehova. Dikon? Pasobra nos a mira kon algun di nos yunan grandi kaba a haña nan ku problemanan ku a pone nan fe na prueba severo. Por ehèmpel, nos yu muhé stimá Gabriele, a hañ’é ku tribulashon. Na 1976 el a kasa ku Lothar. Djis despues di kasamentu Lothar a bira malu. Segun ku e tabata bira mas i mas débil, Gabriele a kuid’é te dia ku el a muri. Mira un miembro di famia salú bira malu i muri a laga nos realisá kuantu nos mester di Yehova su man amoroso.—Isaías 33:2.

Privilegionan den e Organisashon di Yehova

Ora mi a ser nombrá komo sirbidó di kongregashon (awe superintendente presidente) na 1955, mi no a sinti ku mi tabata kla pa kumpli ku e responsabilidat ei. Tabatin asina hopi kos di hasi ku e úniko manera pa mi kumpli ku nan tur tabata dor di lanta algun dia for di kuat’or di mardugá. Mi kasá i yunan a koperá bon ku mi, i nan a hasi sigur pa nada no stroba mi e anochinan ku ainda mi tabatin trabou pa hasi.

Apesar di esei, nos a pasa mas tantu tempu liber posibel huntu komo famia. Tabatin bes ku mi doño di trabou a fia mi su outo pa mi por a sali ku mi famia. E muchanan tabata gusta ora nos studia E Toren di Vigilansia den kunuku. Tambe nos tabata kana keiru huntu, i tin bes segun ku nos tabata kana pasa den mondi, e famia ta kanta i ami ta kompañá nan ku mi harmónika.

Na 1978, mi a ser nombrá komo superintendente di sirkuito (sirbidó biahero) supstituto. Mi a sinti ku esaki tabata demasiado pa mi i mi a resa: “Yehova, mi no ta sinti ku mi ta kapas pa hasi e trabou ei. Pero si abo ke pa mi purba, lo mi hasi mi bèst.” Dos aña despues, na edat di 54 aña, mi a pasa mi negoshi chikitu ofer pa Thomas, nos yu hòmber mas chikitu.

Dor ku tur nos yunan tabata grandi kaba, ami ku Karla a haña oportunidat pa hasi mas pa Yehova. E mesun aña ei mi a ser nombrá komo superintendente di sirkuito, i nan a asigná mi na un parti di Hamburg i henter Schleswig-Holstein. Dor di nos eksperensia den lanta famia, nos por a mustra komprendimentu speshal pa mayornan i nan yunan. Hopi ruman tabata yama nos nan mayornan di sirkuito.

Despues ku Karla a kompañá mi dies aña largu den e trabou di sirkuito, e mester a hasi un operashon. I den e mesun aña ei, dòkternan a deskubrí ku mi tabatin un temor selebral. P’esei, mi a stòp ku e trabou di superintendente di sirkuito i a bai operá. A dura tres aña promé ku mi por a fungi atrobe komo superintendente di sirkuito supstituto. Awor ami ku Karla ta den nos 70 i piku aña, i nos no ta den e trabou biahero mas. Yehova a yuda nos komprendé ku no tabatin sentido pa sigui ku un privilegio ku mi no ta kapas mas pa kumpli kuné.

Mirando bèk, ami ku Karla ta masha gradisidu na Yehova ku el a yuda nos implantá amor p’e bèrdat den kurason di nos yunan. (Proverbionan 22:6) Atraves di añanan, Yehova a guia nos, entrená nos i yuda nos kumpli ku nos responsabilidatnan. Ounke awor nos mes ta bieu i débil, nos amor pa Yehova sí ta mes yòn i bibu ku semper.—Romanonan 12:10, 11.

[Nota]

[Plachi na página 26]

Nos famia, kanando na oriya di riu Elbe, Hamburg, 1965

[Plachi na página 28]

Algun miembro di famia n’e kongreso internashonal na Berlin na 1998

[Plachi na página 29]

Huntu ku Karla mi kasá