Informe di Proklamadónan di Reino

“Mi Kier A Sirbi Dios”

“SALI for di dje, mi pueblo.” Esei tabata un yamada ku apòstel Huan a tende un angel hasi den promé siglo Era Komun. Den nos tempu miónes di hende di kurason onrado a respondé na e yamada i a hui di “e gran Babilonia,” e imperio mundial di religion falsu. (Revelashon 18:1-4) Wilner di Haiti ta un di nan, i e ta konta su eksperensia.

“Mi a nase na 1956 den un famia katóliko deboto den e pueblo chikitu di St. Marc, Haiti. Imaginá bo kon kontentu mi famia a keda ora mi a ser selektá, huntu ku dos otro persona di nos pueblo, pa drenta un seminario na St. Michel de l’Atalaye, Haiti. Despues na 1980, nan a manda nos Stavelot, Bèlgika, pa mas entrenamentu. Ei nos a bai un universidat katóliko tambe.

Na prinsipio mi tabata entusiasmá ku e idea di bira pastor. Pero un dia den komedor, e pastor na enkargo di nos grupo a pidi mi keda un ratiko mas pasobra tabatin algu ku e kier a bisa mi. Imaginá bo e shòk ku mi a haña ora el a bisa mi flèt asina ku e ta sinti su mes seksualmente atraí na mi! Mi a rechasá su avansenan pero mi a keda totalmente desilushoná. Mi a skirbi mi famia tokante e insidente i a bandoná e seminario un par di luna despues, maske mi famia a keda malkontentu ku mi. Mi a haña lugá di keda den e stat i a sigui studia un otro profeshon.

Ora mi a regresá St. Marc, mi no tabatin niun tiki konfiansa mas den Iglesia Katóliko. No opstante, mi kier a sirbi Dios, pero mi no tabata sa kiko pa hasi. Mi a bai misa atventista, ebenezer i mormon. Mi tabata spiritualmente pèrdí.

Despues mi a bin kòrda ku tempu mi tabata den seminario na Bèlgika, mi tabata lesa e vershon di Beibel di Crampon. Den dje mi a haña sa ku Dios tin un nòmber. Pues, usando Dios su nòmber mi a hasi orashon ferviente na dje p’e yuda mi haña e religion berdadero.

Djis despues, dos Testigu di Yehova a bin biba banda di mi. Nan tabata hende ketu, respetuoso i ku bon manera. Nan forma di biba a impreshoná mi. Riba un dia, un di nan a invitá mi na e Konmemorashon anual di e morto di Kristu. Mi a gusta e reunion masha tantu i a aseptá un studio di Beibel regular ku e Testigunan. Den mas o ménos seis luna, mi a keda konvensí ku mi a haña e manera korekto pa sirbi Dios. Mi a dediká mi bida na Yehova i a batisá dia 20 di novèmber 1988.”

Ku tempu, Wilner a kuminsá e sirbishi di tempu kompleto. Awe, e ta sirbi komo ansiano di kongregashon. E ku su kasá, huntu ku nan dos yunan, ta sirbi felismente den e kongregashon.

[Plachi na página 9]

Lesando Beibel, Wilner a bin haña sa ku e nòmber di Dios ta Yehova