Bon Obra Ta Glorifiká Dios

MEDIANTE nan kondukta ekselente i obranan ehemplar, kristiannan berdadero ta duna gloria na Dios. (1 Pedro 2:12) Esaki ta bisto den loke a sosodé na Italia den e último añanan.

Den luna di sèptèmber di 1997, un temblor fuerte a sagudí vários parti di e áreanan di Marche i Umbria, kousando daño na kasi 90.000 kas. Grupo di Testigunan di Yehova inmediatamente a ofresé yudansa na kompañeronan kreyente i na otro hende. Nan a perkurá pa esnan ku a ser afektá haña trailer, slaapzak, stof, generator i otro kosnan nesesario. Hende no a keda sin ripará esaki.

E korant Il Centro a informá: “E promé hendenan ku a yega pa duna yudansa den e áreanan afektá tabata Testigunan di Yehova di Roseto [den e provinsia di Teramo] . . . Ademas di reuní ku regularidat pa hasi orashon, esnan fiel na Yehova ta traha di un manera práktiko, dunando un man na esnan ku ta sufri, sin importá na kua religion nan ta pertenesé.”

E alkalde di Nocera Umbra, un di e pueblonan ku a keda mas afektá, a skirbi e Testigunan: “Mi ta gradisí boso personalmente di kurason pa e yudansa ku boso a duna na e poblashon di Nocera. Mi tin sigur ku mi ta ekspresá e sintimentunan di tur su habitantenan.” Ademas, e minister di asuntunan interior a duna e Congregazione Cristiana dei Testimoni di Geova (Kongregashon Kristian di Testigunan di Yehova) un sertifikado di onor i un medaya. Esaki tabata “pa duna rekonosementu na e trabou ku nan a hasi i e diligensia ku nan a mustra den aktividatnan relashoná ku e estado di emergensia ku a lanta den e áreanan di Umbria i Marche.”

Den luna di òktober 2000, un inundashon desastroso a dal e region di Piedmont den e parti nort di Italia. Atrobe, di biaha e Testigunan a kuminsá prepará pa duna yudansa. Ei tambe hende no a keda sin ripará e bon obranan ku nan tabata hasi. E region di Piedmont a duna nan un plakat pa nan “trabou boluntario i balioso den yuda e poblashon di Piedmont afektá pa inundashon.”

Hesukristu a instruí su disipelnan: “Laga boso lus bria dilanti di hende di tal manera ku nan por mira boso bon obranan i glorifiká boso Tata ku ta den shelu.” (Mateo 5:16) Testigunan di Yehova ta kontentu pa glorifiká Dios i no nan mes, dor di hasi ‘bon obra’ ku ta yuda nan próhimo spiritualmente i den otro maneranan.