E Clave pa un Mundu Felis

“E PERSONAHE individual mas poderoso—no solamente den e dos milenionan aki sino den henter historia humano—tabata Jesus di Názaret,” segun e revista Time. Tempu cu Jesus tabata riba tera, miles di hende di curason onrado a ripará no solamente su grandesa, sino tambe su interes den otro hende. P’esei, no ta nada straño cu nan kier a hacié rey. (Juan 6:10, 14, 15) Sin embargo, manera a ser mencioná den e artículo anterior, Jesus a nenga di mete cu política.

JESUS su reaccion tabata basá riba por lo ménos tres factor: e manera cu su Tata a mira expresionnan di hende su auto-determinacion, locual a incluí gobernacion humano; e echo cu Jesus tabata conciente cu tin forsanan scondí poderoso cu ta traha contra asta e mihó esfuersonan humano pa goberná; i Dios su propósito pa establecé un gobiernu celestial pa goberná henter e tera. Segun cu nos ta analisá e tres puntonan aki mas djacerca, nos lo mira pakico hende su esfuersonan pa drecha mundu a fracasá. Tambe nos lo mira con sí lo bai tin éxito.

Hende Por Goberná Nan Mes?

Ora Dios a crea hende, el a duna nan autoridad riba e mundu di animal. (Génesis 1:26) Pero humanidad mes tabata bou dje autoridad supremo di Dios, esta su soberania. E promé homber i muher mester a confirmá nan sumision na Dios dor di obedec’é i keda leu for dje fruta di un cierto palu, “e palu di conocimentu di bon i malu.” (Génesis 2:17) Lamentablemente, Adam cu Eva a abusá di nan boluntad liber i a desobedecé Dios. E echo cu nan a coge e fruta prohibí no tabata djis un acto di ladronicia. Esei a encerá rebelion contra e soberania di Dios. Den The New Jerusalem Bible un nota na pia di página relacioná cu Génesis 2:17 ta bisa cu Adam i Eva a tira man “riba independencia moral completo pa  medio di cua hende ta nenga di reconocé su státus di ta un ser creá . . . E promé picá tabata un atake contra e soberania di Dios.”

Pa motibu dje cuestionnan moral crucial enbolbí, Dios a permití Adam cu Eva i nan desendientenan scoge con nan ta hiba nan bida, i nan a establecé nan mes normanan di bon i malu. (Salmo 147:19, 20; Romanonan 2:14) Básicamente, ei hende su experimento cu auto-determinacion a cuminsá. E tabata exitoso? Cu e bentaha di por mira atras riba miles di aña di historia, nos por bisa cu no! Eclesiástes 8:9 ta declará: “Hende a dominá hende pa su perhuicio.” E registro lamentabel aki di gobernacion na man di hende mes, ta confirmá e veracidad di Jeremías 10:23: “Mi sa masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta cana pa ni sikiera dirigí su paso.” Historia a proba cu hende no tin e capacidad pa goberná nan mes cu éxito sin nan Creador.

Jesus tabata completamente eens cu esei. Ser independiente di Dios tabata un cos repudiabel p’e. “Mi no ta haci nada di mi mes iniciativa,” el a bisa. “Semper mi ta haci e cosnan cu ta agradá [Dios].” (Juan 4:34; 8:28, 29) P’esei, sin e autorisacion divino pa ricibí reinado for di hende, Jesus no a ni pensa di acept’é. Sin embargo, esaki no ta nificá cu e no tabatin gana di yuda su próhimo. Al contrario, el a haci tur loke tabata na su alcanse pa yuda hende haña e mayor felicidad tantu e tempu ei como den futuro. El a asta duna su bida na fabor di humanidad. (Mateo 5:3-11; 7:24-27; Juan 3:16) Pero Jesus tabata sa cu “pa tur cos tin un tempu señalá,” incluso e tempu pa Dios ehercé su soberania riba humanidad. (Eclesiástes 3:1; Mateo 24:14, 21, 22, 36-39) Pero, corda cu den Eden nos mayornan original a someté nan n’e boluntad di un criatura spiritual malbado cu a papia via un colebra visibel. Esaki ta trece nos na un di dos motibu pakico Jesus a keda leu for di política.

E Gobernante Secreto di Mundu

Bijbel ta bisa nos cu Satanas a ofrecé Jesus “tur e reinonan di mundu i nan gloria” a cambio di un solo acto di adoracion. (Mateo 4:8-10) Básicamente, Diabel a ofrecé Jesus gobernacion mundial—pero bou di su condicionnan. Jesus no a sucumbí n’e tentacion aki. Pero, esei tabata ègt un tentacion? Satanas realmente por a haci un oferta extravagante asina? Sí, pasobra Jesus mes a yama Diabel “e gobernante di mundu,” i apostel Pablo a describié como “e dios dje  sistema di cosnan aki.”—Juan 14:30; 2 Corintionan 4:4; Efesionan 6:12.

Claro cu Jesus tabata sa cu Diabel no tin e bienestar di humanidad na pechu. El a describí Satanas como un “matadó” i como “e tata di mentira i di tur loke ta falsu.” (Juan 8:44, The Amplified Bible) Ta bisto cu un mundu cu “ta drumí den poder” di un spiritu malbado asina hamas por ta berdaderamente felis. (1 Juan 5:19) Pero Diabel lo no tin e autoridad aki pa tempu indefiní. Pronto Jesus, cu awor ta un criatura spiritual poderoso, lo kita Satanas i eliminá su influencia completamente.—Hebreonan 2:14; Revelacion 20:1-3.

Satanas mes sa cu su dianan como gobernante di mundu ta contá. P’esei e ta haciendo un último esfuerso desesperá pa corumpí humanidad completamente, mescos cu el a haci den e tempu promé cu e Diluvio di Noe. (Génesis 6:1-5; Hudas 6) “Ai di tera i di laman,” Revelacion 12:12 ta bisa, “pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” Profecia di Bijbel i sucesonan mundial ta indicá cu nos ta bibando cerca dje conclusion di e “periodo di tempu corticu” aki. (2 Timoteo 3:1-5) Alivio ta cerca.

Un Gobiernu Cu Lo Trece Felicidad

Un di tres motibu pakico Jesus a keda leu for di política ta pasobra e tabata sa cu na un dado momento den futuro, Dios lo a establecé un gobiernu celestial pa goberná e tera. Bijbel ta yama e gobiernu aki e Reino di Dios, i esei tabata e tema principal di Jesus su siñansa. (Lucas 4:43; Revelacion 11:15) Jesus a siña su disipelnan pa pidi p’e Reino ei bini, pasobra ta únicamente bou di su gobernacion ‘e boluntad di Dios lo sosodé riba tera mescos cu den shelu.’ (Mateo 6:9, 10) Kisas bo ta puntra bo mes: ‘Si e Reino aki ta bai goberná riba henter e tera, kico lo sosodé cu gobiernu di hende?’

Bo por haña e contesta na Daniel 2:44: “Den e dianan dje reynan ei [na mando na fin dje sistema actual] e Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan [di hende] aki, i e mes lo permanecé te na tempu indefiní.” Pakico e Reino di Dios lo tin cu “aplastá” gobernacion terenal? Esei ta pasobra esakinan ta insistí na sigui cu e actitud di auto-determinacion cu Satanas a fomentá aya den e hofi di Eden. I esei ta un actitud cu ta desafiá Dios. Fuera di traha contra e bienestar di humanidad, esnan cu ta haci esfuerso pa continuá cu e actitud ei ta siguiendo un rumbo cu ta pone nan bai dal contra e Creador. (Salmo 2:6-12; Revelacion 16:14, 16) P’esei nos tin cu puntra nos mes: ‘Nos ta na fabor of contra Dios su gobernacion?’

Ken Su Soberania Lo Bo Scoge?

Pa por yuda hende tuma un decision tocante gobernacion basá riba conocimentu exacto, Jesus a comisioná su disipelnan pa predicá e ‘bon nobo dje reino den tur e tera habitá como testimonio pa tur nacion’ promé cu e fin dje sistema di cosnan yega. (Mateo 24:14) Ken awe ta conocí rond mundu pa nan trabou di predicá e Reino di Dios? Esei ta Testigonan di Jehova. De echo, pa hopi tempu caba e revista aki tin riba su portada e palabranan “Anunciando e Reino di Jehova Dios.” Awe, rond di seis miyon Testigo den mas cu 230 pais ta yudando hende gana un conocimentu exacto dje Reino ei. *

Bendicionnan pa Súbditonan dje Reino

Semper Jesus a haci cosnan na Dios su manera. P’esei, en bes di scoge un curso independiente  i purba apoyá of mehorá e sistema di cosnan actual cu medionan político, el a traha duru pa promové e interesnan dje Reino di Dios, e único solucion p’e problemanan di mundu. Pa su lealtad, Dios a recompens’é cu un trono glorioso den shelu como e berdadero Rey dje Reino ei. Ki un premio maraviyoso pa su sumision na Dios!—Daniel 7:13, 14.

Awe, miyones di hende cu ta imitá Jesus den pone e Reino di Dios na promé lugá i den someté nan n’e boluntad di Dios tambe lo disfrutá di un regalo maraviyoso, esta, e privilegio di ser súbdito terenal dje Reino di Dios. (Mateo 6:33) Bou di su gobernacion amoroso, nan lo ser elevá na perfeccion humano, cu e prospecto di bida eterno. (Revelacion 21:3, 4) Promé Juan 2:17 ta bisa: “Mundu ta pasa bai i tambe su deseo, pero esun cu haci e boluntad di Dios ta permanecé pa semper.” Lo ta ki un goso exkisito pa permanecé pa semper ora Satanas i su siguidónan ser eliminá i tera ser transformá den un paradijs mundial liber di nacionalismo cu ta dividí hende, sistemanan comercial corupto i religion falsu!—Salmo 37:29; 72:16.

Sí, e Reino di Dios ta e berdadero clave pa un mundu berdaderamente felis, i cu bon motibu por describí e mensahe cu ta anunci’é como bon nobo. Si ainda bo no a hacié, pakico no scucha e bon nobo aki e siguiente biaha cu Testigonan di Jehova bishitá bo cas?

[Nota]

[Plachi na página 5]

Historia ta proba cu hende no por goberná cu éxito sin Dios

[Plachi na página 5]

Dor cu ta Satanas ta goberná e “sistema di cosnan” actual, e por a ofrecé Jesus “tur e reinonan di mundu”

[Plachi na página 7]

Jesus a siña hende cu bou dje areglo dje Reino di Dios, mundu lo ta un lugá maraviyoso