Goso pa Esnan Cu Ta Cana den e Lus
Goso pa Esnan Cu Ta Cana den e Lus
“Bini i laga nos cana den e lus di Jehova.”—ISAÍAS 2:5.
1, 2. (a) Con importante lus ta? (b) Di con e advertencia di cu scuridad lo tapa tera ta asina grave?
JEHOVA ta e Fuente di lus. Bijbel ta yam’é “e Dunador di solo pa lus den dia, e statutonan di luna i e streanan pa lus anochi.” (Jeremías 31:35; Salmo 8:3) E ta Esun cu a crea nos solo, cu realmente ta un enorme fornu nuclear cu ta manda un inmenso cantidad di energia den espacio, di cua un parti ta den forma di lus i calor. E porcentahe chikitu dje energia ei cu ta yega cerca nos como lus di solo, ta sostené bida riba e tera aki. Sin lus di solo, nos lo no por existí. Tera lo ta un planeta sin bida.
2 Cu esei na mente, nos por comprendé e gravedad di un situacion cu profeta Isaías a describí. El a bisa: “Mira! scuridad mes lo tapa e tera, i tiniebla diki e gruponan nacional.” (Isaías 60:2) Claro cu esaki no ta referí na scuridad den sentido físico. Isaías no tabata kier men cu un dia solo, luna i e streanan lo stop di duna lus. (Salmo 89:36, 37; 136:7-9) Mas bien e tabata papiando di scuridad spiritual. Pero scuridad spiritual ta mortal. Riba término largu, nos no por biba sin lus spiritual, mescos cu nos no por biba sin lus físico.—Lucas 1:79.
3. En bista dje palabranan di Isaías, kico cristiannan mester haci?
3 Den bista di esei, ta un asuntu serio pa sa cu maske e palabranan di Isaías a cumpli riba Huda di antigwedad, nan ta hañando un cumplimentu mayor awe. Sí, den nos tempu mundu ta tapá cu scuridad spiritual. Den un situacion peligroso asina, lus spiritual ta di sumo importancia. Ta p’esei ta bon pa cristiannan haci caso di e animacion aki di Jesus: “Laga boso lus briya dilanti hende.” (Mateo 5:16) Cristiannan fiel por iluminá e scuridad pa hende mansu, i asina duna nan e oportunidad pa gana bida.—Juan 8:12.
Tempu Scur na Israel
4. Na ki tempu e palabranan profético di Isaías a cumpli pa promé bes, pero ki situacion a existí caba den su tempu?
4 E palabranan di Isaías tocante scuridad cu ta tapa tera a cumpli pa promé bes ora Huda a keda desolá i su pueblo tabata den exilio na Babilonia. Sin embargo, asta promé cu esei, for di den tempu di Isaías mes, gran parti dje nacion tabata tapá cu scuridad spiritual caba, i esei a motiv’é p’e urgi su paisanonan: “O hombernan dje cas di Jacob, bini i laga nos cana den e lus di Jehova”!—Isaías 2:5; 5:20.
5, 6. Ki factornan a contribuí na e scuridad cu tabatin den tempu di Isaías?
5 Isaías a profetisá na Huda “den e dianan di Uzías, Jotan, Acas i Ezekías, reynan di Huda.” (Isaías 1:1) Tabata un tempu turbulento di intrankilidad político, hipocresia religioso, corupcion hudicial i opresion di hende pober. Asta durante reinado di reynan fiel, manera Jotan, bo por a mira altar di dios falsu riba hopi cabes di ceru. Bou dje reynan infiel, e situacion tabata pió. Por ehempel Acas, e rey malbado, a bai asina leu di ofrecé su desendencia den un sacrificio ritual n’e dios Molec. Esei sí tabata scuridad!—2 Reynan 15:32-34; 16:2-4.
6 E situacion internacional tambe tabata pinta scur. Moab, Edom i Filistea tabata menasá na e fronteranan di Huda. E reino di Israel di nort a declará su enemistad abiertamente, maske nan tabata dje mésun sanger. Mas pa nort, Siria a menasá e pas di Huda. Asta mas peligroso tabata e cruel Asiria, cu semper tabata busca manera pa expandé su poder. Durante e periodo cu Isaías a profetisá, Asiria a bari e nacion di Israel completamente for di mapa, i casi el a destruí Huda. Na dado momento tur stad fortificá na Huda tabata den man di Asiria, cu excepcion di Jerusalem.—Isaías 1:7, 8; 36:1.
7. Ki caminda Israel i Huda a scoge, i con Jehova a reaccioná?
7 Dios su pueblo di pacto a sufri e desasternan ei dor cu Israel i Huda tabata desleal na djE. Mescos cu e hendenan mencioná den e buki di Proverbionan, nan tabata “bahando for dje camindanan di rectitud pa cana den e camindanan di scuridad.” (Proverbionan 2:13) Sin embargo, maske Jehova tabata rabiá cu su pueblo, e no a bandoná nan completamente. Mas bien el a lanta Isaías i otro profetanan pa nan percurá lus spiritual pa tur esnan den e nacion cu ainda a purba sirbi Jehova lealmente. E lus percurá pa medio dje profetanan aki tabata realmente precioso. El a duna bida.
Tempu di Scuridad Awe
8, 9. Ki factornan ta contribuí na e scuridad di mundu awe?
8 E situacion den tempu di Isaías tabata hopi similar na e condicionnan djawe. Den nos tempu, lidernan humano a bira lomba pa Jehova i su Rey entronisá, Jesucristo. (Salmo 2:2, 3) E lidernan religioso di cristiandad a engañá nan tounan. E lidernan ei ta pretendé di ta sirbi Dios, pero en realidad mayoria di nan ta promové e diosnan dje mundu aki: nacionalismo, militarismo, rikesa i hende prominente; i no papia mes di e doctrinanan pagano cu nan ta siña hende.
9 Na un lugá tras di otro, religionnan di cristiandad tabata enbolbí den guera i disturbio civil caminda purificacion étnico i otro horornan a tuma lugá. Mas ainda, na lugá di para na fabor di moralidad bíblico, hopi iglesia ta sea ignorá of ta apoyá prácticanan inmoral manera fornicacion i homosexualidad activamente. Como resultado di nan rechaso di normanan bíblico, e tounan di cristiandad ta manera e hombernan cu e salmista di antigwedad a papia di dje: “Nan no a sa, i nan no ta comprendé; den scuridad nan ta keda cana rond.” (Salmo 82:5) Di berdad cristiandad ta den scuridad profundo, mescos cu Huda di antigwedad.—Revelacion 8:12.
10. Con lus ta briya den e scuridad awe, i con hende mansu ta beneficiá di esei?
10 Meimei di tantu scuridad, Jehova ta lagando lus briya pa beneficio di hende mansu. P’e propósito aki e ta usa su sirbidónan ungí riba tera, “e esclabo fiel i discreto,” i nan ta “briyando como iluminadónan den mundu.” (Mateo 24:45; Filipensenan 2:15) E clase di esclabo, apoyá dor di miyones di compañeronan cu ta “otro carné,” ta reflehá lus spiritual basá riba e Palabra di Dios, Bijbel. (Juan 10:16) Den e mundu scur aki, e lus ei ta duna hende mansu speransa, i e ta yuda nan pa nan tin un relacion cu Dios i evitá trampanan spiritual. E ta precioso. E ta duna bida.
“Mi Ta Elogiá Bo Nomber”
11. Ki informacion Jehova a haci disponibel den tempu di Isaías?
11 Den e dianan scur cu Isaías a biba, i den e dianan ainda mas scur despues di esei, ora e babilonionan a hiba Jehova su nacion den cautiverio, ki clase di guia Jehova a percurá? Ademas di duna guia moral, el a mustra bon cla di antemano con lo e bai cumpli cu su propósito relacioná cu su pueblo. Considerá por ehempel, e profecianan maraviyoso cu tin na Isaías capítulo 25 pa 27. E palabranan den e capítulonan aki ta indicá con Jehova a atendé cu e asuntunan e tempu ei, i con e ta hacié awe.
12. Ki expresion sincero Isaías ta haci?
12 Promé, Isaías ta declará: “O Jehova, abo ta mi Dios. Mi ta halsa bo, mi ta elogiá bo nomber.” Esta un expresion sincero di alabansa! Pero kico a motivá e profeta p’e expresá un oracion asina? Un factor principal ta ser revelá den e di dos mitar dje versículo, caminda nos ta lesa: “Pasobra [Jehova] bo a haci cosnan maraviyoso, consehonan for di tempu mas promé, den fieldad, den confiabilidad.”—Isaías 25:1.
13. (a) Ki conocimentu a fortalecé Isaías su aprecio pa Jehova? (b) Con nos por siña dje ehempel di Isaías?
13 Pa tempu di Isaías, ya Jehova a yega di haci hopi cos maraviyoso caba pa Israel, i nan a keda registrá por escrito. Evidentemente Isaías tabata conocé e skirbimentunan aki. Por ehempel, e tabata sa cu Jehova a saca su pueblo for di sclabitud na Egipto i a scapa nan dje rabia di fárao su ehército na laman Corá. E tabata sa cu Jehova a guia su pueblo dor dje desierto i trece nan den e Tera Primintí. (Salmo 136:1, 10-26) E relatonan histórico ei a mustra cu Jehova Dios ta fiel i digno di confiansa. Su “consehonan,” esta, tur loke ta su propósito, ta bira realidad. Conocimentu exacto cu Dios a dun’é, a fortalecé Isaías p’e keda cana den e lus. Pues, e ta un excelente ehempel pa nos. Si nos studia Dios su Palabra skirbí cuidadosamente, anto aplik’é den nos bida, nos tambe lo permanecé den e lus.—Salmo 119:105; 2 Corintionan 4:6.
Un Stad Ta Ser Destruí
14. Kico a ser profetisá tocante un stad, i probablemente ta cua stad e tabata?
14 Nos por haña un ehempel di Dios su conseho na Isaías 25:2, caminda nos ta lesa: “Bo a haci un stad un monton di piedra, un pueblo fortificá un ruina cu ta basha abou, un toren di habitacion di stranheronan pa no ta stad mas, cu asta pa tempu indefiní lo no ser reedificá.” Cua stad esaki ta? Probablemente Isaías tabata papia proféticamente di Babilonia. Sí, en berdad e dia a yega ora cu Babilonia a bira un monton di piedra.
15. Cua “stad grandi” ta existí awe, i kico lo pasa cuné?
15 E stad cu Isaías a mencioná tin un ekivalente awe? Sí. E buki di Revelacion ta papia di “e stad grandi cu tin un reino riba e reynan dje tera.” (Revelacion 17:18) E stad grandi ei ta “Babilonia e Grandi,” e imperio mundial di religion falsu. (Revelacion 17:5) Awe, e parti principal di Babilonia e Grandi ta cristiandad, esun cu su clero ta hiba delantera den oponé e obra di predicá e Reino cu Jehova su pueblo ta efectuá. (Mateo 24:14) Pero mescos cu Babilonia di antigwedad, pronto Babilonia e Grandi lo keda destruí pa no lanta nunca mas.
16, 17. Con e enemigunan di Jehova a glorifik’é den tempu antiguo i den tempu moderno?
16 Kico mas Isaías ta profetisá tocante e “pueblo fortificá”? Dirigiendo su mes na Jehova, Isaías ta bisa: “Esnan cu ta un pueblo fuerte lo glorificá bo; e pueblo dje nacionnan tiránico, nan lo teme bo.” (Isaías 25:3) Con e stad hostil aki, “e pueblo dje nacionnan tiránico,” lo a glorificá Jehova? Wel, corda kico a pasa cu e rey mas poderoso di Babilonia, Nabucodonosor. Despues di un experencia cu a pon’é refleccioná, i cu a mustra con swak e tabata, el a hañ’é obligá di confesá e grandesa di Jehova i Su omnipotencia. (Daniel 4:34, 35) Ora Jehova ehercé su poder, asta su enemigunan ta haña nan obligá di reconocé su obranan poderoso, maske ta contra nan boluntad.
17 Babilonia e Grandi a yega di hañ’é obligá di reconocé Jehova su obranan poderoso? Sí. Durante e promé guera mundial, Jehova su sirbidónan ungí a predicá den tribulacion. Na 1918 nan a bai den cautiverio spiritual ora cu funcionarionan principal di Sociedad Watch Tower a cai cerá. Prácticamente e obra di predicá organisá a stop. Pero na 1919 Jehova a restorá nan i a duna nan vigor di nobo cu su spiritu, anto nan a sali pa cumpli cu e comision di predicá e bon nobo den henter e tera habitá. (Marco 13:10) Tur esaki, i tambe e efecto cu lo e tin riba nan opositornan, tabata profetisá den e buki di Revelacion. Nan opositornan “a spanta i a duna gloria n’e Dios di shelu.” (Revelacion 11:3, 7, 11-13) No cu nan tur a combertí, sino cu nan a keda obligá di reconocé e obra poderoso di Jehova n’e ocasion aki, net manera Isaías a profetisá.
“Un Lugá Fortificá pa Esun di Condicion Humilde”
18, 19. (a) Di con opositornan no a logra kibra e integridad di Jehova su pueblo? (b) Con “e melodia di esnan tiránico” lo ser dominá?
18 Awor Isaías ta dirigí atencion na Jehova su tratonan bondadoso cu esnan cu ta cana den e lus, i ta bisa Jehova: “Bo a bira un lugá fortificá pa esun di condicion humilde, un lugá fortificá pa esun pober den e angustia cu e tin, un refugio contra e tempestad di awaceru, un sombra contra calor, ora cu e suplamentu di esnan tiránico ta manera un tempestad di awaceru contra un muraya. Manera e calor den un pais sin awa, bo ta baha e boroto di stranheronan, e calor, cu e sombra di un nubia. Asta e melodia di esnan tiránico ta ser dominá.”—Isaías 25:4, 5.
19 Desde 1919, tiranonan a purba tur cos pa kibra e integridad di adoradónan berdadero, pero nan a fracasá. Di con? Dor cu Jehova ta e lugá fortificá i e refugio di su pueblo. E ta percurá sombra frescu pa sconde for dje calor ardiente di persecucion, i e ta para manera un muraya firme contra e tempestad di oposicion. Nos cu ta cana den e lus di Dios ta anticipá cu confiansa e tempu ora cu ‘e melodia di esnan tiránico ser dominá.’ Sí, nos ta anhelá e dia ora cu Jehova su enemigunan lo no t’ei mas.
20, 21. Ki bankete Jehova ta percurá, i kico e bankete ei lo incluí den e mundu nobo?
20 Jehova ta haci mas cu protehá su sirbidónan. E ta percurá pa nan como nan Tata amoroso. Despues cu el a libra su pueblo for di Babilonia e Grandi na 1919, el a pone un bankete di victoria nan dilanti, un suministro abundante di alimento spiritual. Esaki a ser profetisá na Isaías 25:6, caminda nos ta lesa: “Jehova di ehércitonan sigur lo prepará pa tur pueblo, den e ceru aki, un bankete di plato cu hopi zeta, un bankete di biña mantené riba kachi-kachi, di plato cu hopi zeta yená cu tuti di wesu, di biña mantené riba kachi-kachi, filtrá.” Esta bendicioná nos ta di por participá na e bankete ei! (Mateo 4:4) “E mesa di Jehova” ta berdaderamente cargá cu bon cos pa come. (1 Corintionan 10:21) Pa medio dje “esclabo fiel i discreto,” nos ta ricibí tur loke nos por tin mester den sentido spiritual.
21 Anto e bankete cu Dios a percurá aki ta encerá mas ainda. E bankete spiritual cu nos ta disfrutando di dje awor ta corda nos riba e abundancia di cuminda físico cu lo ta disponibel den Dios su mundu nobo primintí. E ora ei, e “bankete di plato cu hopi zeta” lo incluí cuminda físico na abundancia. Niun hende lo no mester pasa hamber, ni den sentido físico, ni den sentido spiritual. Esta un alivio esei lo ta pa nos kerido rumannan fiel, cu ta sufri awor debí na e ‘scarcedadnan di cuminda’ cu ta parti di “e señal” di Jesus su presencia! (Mateo 24:3, 7) Pa nan, e palabranan dje salmista ta en berdad un consuelo. El a bisa: “Lo yega di tin abundancia di grano riba tera; riba top dje cerunan lo tin sobreabundancia.”—Salmo 72:16.
22, 23. (a) Cua “obra di flegtu” of “enboltura” lo ser kitá, i con? (b) Con ‘e reproche di Jehova su pueblo’ lo ser kitá?
22 Awor, scucha un promesa asta mas maraviyoso. Comparando picá i morto cu un “obra di flegtu” of un “enboltura,” Isaías ta bisa: “Den e ceru aki [Jehova] sigur lo . . . traga e cara dje enboltura cu ta lora rond di tur pueblo i e obra di flegtu cu ta di flegtu den otro riba tur e nacionnan.” (Isaías 25:7) Djis pensa! Picá i morto, cu a pisa humanidad manera un klechi sofocante, lo no t’ei mas. Cuantu nos ta anhelá e dia ora cu e beneficionan dje sacrificio di rescate di Jesus ser aplicá completamente na hende obediente i fiel!—Revelacion 21:3, 4.
23 Señalando na e tempu glorioso ei, e profeta inspirá ta sigurá nos esaki: “[Dios lo] realmente traga morto pa semper, i e Señor Soberano Jehova sigur lo limpia e lágrimanan for di tur cara. I e reproche di su pueblo lo e kita di tur e tera, pasobra Jehova mes a papi’é.” (Isaías 25:8) Niun hende lo no muri di causanan natural, of yora pérdida di un ser kerí. Esta un dushi cambio! Ademas, niun caminda na tera lo bo no tende e reproche i e calumnia cu Dios i su sirbidónan a soportá pa asina tantu tempu. Di con no? Dor cu Jehova lo kita esun cu ta originá nan: Satanas e Diabel, i tambe henter e simia di Satanas.—Juan 8:44.
24. Con esnan cu ta cana den e lus ta reaccioná riba Jehova su obranan poderoso na nan fabor?
24 Ora esnan cu ta cana den e lus contemplá e manifestacionnan ei di Jehova su poder, nan lo ser impulsá pa sclama: “Mira! Esaki ta nos Dios. Nos a pone nos speransa den dje, i lo e salba nos. Esaki ta Jehova. Nos a pone nos speransa den dje. Laga nos ta gososo i alegrá den su salbacion.” (Isaías 25:9) Pronto humanidad hustu lo tin tur motibu pa alegrá. E scuridad lo ser kitá completamente, i esnan fiel lo baña den Jehova su lus pa tur eternidad. Por tin un speransa mas glorioso? Absolutamente cu no!
Bo Por Splica?
• Pakico ta di vital importancia awe pa nos cana den e lus?
• Di con Isaías a elogiá Jehova su nomber?
• Di con nunca e enemigunan lo no kibra e integridad di Dios su pueblo?
• Ki bendicionnan grandi ta spera esnan cu cana den e lus?
[Preguntanan di Estudio]
[Plachi na página 12, 13]
Habitantenan di Huda a sacrificá mucha na Molec
[Plachinan na página 15]
Conocimentu di Jehova su obranan poderoso a motivá Isaías pa elogiá Jehova su nomber
[Plachi na página 16]
E hustunan lo baña den Jehova su lus pa semper