Bida Perfecto—No Ta Djis un Soño!

Un mundu perfecto—kico e ta nificá pa bo? Imaginá bo un sociedad humano caminda no tin crímen, uso di droga, pobresa of inhusticia. Tur hende ta gosa di excelente salú emocional i físico. No tin tristesa ni infelicidad pasobra asta morto a ser eliminá. Ta realístico pa anhelá un mundu asina?

MASKE nan no ta ignorá e avancenan di ciencia i tecnologia, mayoria di hende tog no ta kere realmente cu inteligencia of enseñansa humano lo trece un mundu perfecto den cua tur hende lo biba den pas i felicidad. Di otro banda, e tendencia humano indiscutiblemente ta di kier mehorá cosnan i corigí imperfeccion. Naturalmente, simpel soñamentu irealista lo no yuda esnan sin cas i e pobernan, ni lo no satisfacé esnan incapacitá i esnan enfermo cu ta deseá alivio for di nan sufrimentu. Un mundu perfecto simplemente lo no bira realidad dor di creatividad humano. Apesar dje miseria i opresion actual, tog tin motibunan sólido pa kere cu un mundu cu lo bo yama perfecto ta realmente cerca.

Ora bo ta pensa riba bida perfecto, e bida di Jesucristo kisas ta bini na bo mente. Jesus no tabata e único humano perfecto cu a yega di biba riba tera. Adam cu Eva, creá den Dios su imágen, a disfrutá di bida perfecto den un paradijs. No obstante, nan a perde e condicion excelente aki pa motibu di nan rebelion contra nan Tata celestial. (Génesis 3:1-6) Sin embargo, e Creador a pone den hende un deseo di biba pa semper. Eclesiástes 3:11 ta duna prueba di esei: “Tur cos [Dios] a haci bunita na su tempu. Asta tempu indefiní el a pone den nan curason, pa humanidad nunca no descubrí e obra cu e Dios berdadero a haci for di principio te final.”

Aunke imperfeccion i picá a hiba humanidad na un bida di “banidad” i “sclabitud na corupcion,” tuma nota di e palabranan consolador di apostel Pablo: “E expectativa anheloso dje creacion ta spera e revelacion dje yunan  di Dios. Pasobra e creacion a ser sometí na banidad, no dor di su mes boluntad sino dor di esun cu a somet’é riba base dje speransa cu e creacion mes tambe lo ser librá for di sclabitud na corupcion i lo tin e glorioso libertad dje yunan di Dios.” (Romanonan 8:19-21) Bijbel ta bisa bon cla cu Dios su provisionnan pa restorá bida humano perfecto ta disponibel mediante Jesucristo.—Juan 3:16; 17:3.

Banda di e speransa maraviyoso aki pa futuro, nos tur tin e potencial pa bai dilanti spiritualmente, haciendo nos progreso bisto asta awor akí.

Purba di Ta Razonabel

Jesucristo a considerá e asuntu di perfeccion asina importante cu el a bisa un auditorio grandi: “P’esei anto, boso mester ta perfecto, mescos cu boso Tata celestial ta perfecto.” (Mateo 5:48) Di berdad Jesus a spera pa nos ta sin defecto den e sistema malbado actual? No. Sigur-sigur nos mester haci esfuerso pa cultivá e cualidadnan di generosidad, bondad i amor pa nos próhimo, pero tog hopi bes nos ta faya di haci loke ta bon. Asta un di Jesus su apostelnan a skirbi: “Si nos confesá nos picánan, e ta fiel i hustu pa pordoná nos nos picánan i haci nos limpi di tur inhusticia. Si nos haci e declaracion: ‘Nos no a peca,’ nos ta hacié un mentiroso, i su palabra no ta den nos.”—1 Juan 1:9, 10.

No obstante, nos por mehorá e manera cu nos ta mira nos mes i ta trata otronan, evitando extremo. Ken por tin un mihó recept pa haña un personalidad razonabel i balansá cu esun hañá den e Palabra di Dios, Bijbel? Si nos cultivá cualidadnan manera goso i moderacion esei lo yuda nos pa por tin un mihó relacion cu otronan na trabou, cu nos casá i cu nos mayornan of yunan. Apostel Pablo a urgi cristiannan: “Semper alegrá den Señor. Un bes mas lo mi bisa: Alegrá! Laga tur hende sa cu boso ta razonabel.”—Filipensenan 4:4, 5.

Beneficionan di Ser Razonabel

Ora bo ta razonabel den loke bo ta spera i ta evitá perfeccionismo cu ta tormentá bo i caba cu bo, lo bo beneficiá bo mes i tambe otronan. Conocé bo berdadero potencial ta encerá ser realista i tambe razonabel tocante loke bo kier haci. Corda, Dios a crea nos pa biba riba tera i haña satisfaccion den trabou significativo cu ta beneficiá nos mes i otronan.—Génesis 2:7-9.

Si bo tabata exigí muchu di bo mes, pakico no acudí na Jehova den oracion? Haña Dios su fabor lo duna bo hopi alivio. Jehova conocé nos composicion i estado imperfecto, p’esei e no ta irazonabel of difícil pa agradá. E salmista ta sigurá nos: “Manera un tata ta mustra misericordia na su yunan, Jehova a mustra misericordia na esnan cu ta tem’é. Pasobra e mes sa bon con nos ta formá, cordando cu nos ta stof.” (Salmo 103:13, 14) Ki gradicidu nos por ta cu Dios ta trata cu hende di un manera asina misericordioso! E conocé nos limitacionnan i tog nos por ta mes precioso cu yunan stimá den su bista.

 En bes di sigui tras di perfeccionismo, ta cuanto mas sabí pa cultivá dicernimentu spiritual i un punto di bista balansá! Mas ainda, nos por tin sigur cu ningun hende no por stroba Jehova di cumpli cu su propósito di elevá humanidad na perfeccion bou dje Reino di Dios. Pero kico perfeccion humano ta nificá?

Bida Perfecto Ta Mihó Cu Perfeccionismo

Perfeccion no ta nificá ser perfeccionista. Esnan cu haña e privilegio pa biba den Paradijs riba tera bou di e Reino di Dios sigur lo no kier ta personanan exigente i hustu den nan mes bista. Un di e rekisitonan pa sobrebibí e tribulacion grandi ta aprecio di curason pa e sacrificio di rescate, manera e ta ser expresá dor di e multitud grandi internacional cu apostel Juan a describí: “Salbacion nos ta debe na nos Dios, kende ta sintá riba e trono, i n’e Lamchi.” (Revelacion 7:9, 10, 14) Tur cu sobrebibí e binidero tribulacion grandi lo ta gradicidu cu Cristo a muri boluntariamente pa nan i pa tur esnan cu ta ehercé fe den dje. Su sacrificio amoroso ta pone e fundeshi pa trece alivio pa semper for di nan imperfeccion i debilidadnan.—Juan 3:16; Romanonan 8:21, 22.

Con bida perfecto lo ta? En bes di competencia i ambicion egoista, amor i bondad entre hende lo haci bida bale la pena, eliminando ansiedad i tiki balor propio. Sin embargo, bida perfecto lo no ta laf of monótono. E Palabra di Dios no ta duna tur e detayenan tocante Paradijs pero e ta describí sí e clase di bida cu nos por spera: “I nan siguramente lo traha cas i biba den nan; i nan siguramente lo planta hofi di wijndruif i come nan fruta. Nan lo no traha cas i otro hende biba aden; nan lo no planta i otro hende come. Pasobra e dianan di mi pueblo lo ta mescos cu e dianan di un palu; i mi scogínan lo gosa completamente dje trabou di nan mes man. Nan lo no traha duru por nada, ni nan lo no duna lus pa disturbio.”—Isaías 65:21-23.

En bes di speculá tocante ki sorto di recreo, facilidadnan di haci cómpras, tecnologia of transportacion e Reino lo proveé, imaginá bo mes disfrutando di e cumplimentu di e palabranan aki: “‘E lobo i e lamchi mes lo come huntu, i e leon lo come yerba mescos cu e toro; i pa loke ta e colebra, su cuminda lo ta stof. Nan lo no haci daño ni causa ningun ruina den henter mi ceru santu,’ Jehova a bisa.” (Isaías 65:25) Ki diferente bida perfecto lo ta for di loke bo ta haña awe! Si bo yega di ta entre esnan digno di biba e tempu ei, lo bo tin motibu pa confia cu bo amoroso Tata celestial lo ta interesá den abo i bo famia. “Haña deleite exkisito den Jehova, i lo e duna bo e peticionnan di bo curason.”—Salmo 37:4.

Bida perfecto no ta simplemente un soño. Jehova su propósito amoroso en cuanto humanidad lo ser realisá plenamente. Abo i bo famia por ta entre esnan cu lo ser elevá na perfeccion humano i biba pa semper den Dios su mundu nobo. Bijbel ta predicí: “E hustunan mes lo poseé e tera, i nan lo biba pa semper riba dje.”—Salmo 37:29.

[Plachi na página 6]

Nos por mehorá e manera cu nos ta mira nos mes i otronan, dor di evitá perfeccionismo of di ta demasiado precis

[Plachi na página 7]

Pakico no imaginá bo mes disfrutando caba di condicionnan pacífico i hustu den Paradijs?