Miembronan Nobo di Cuerpo Gobernante

DIASABRA, 2 di october 1999, na final dje Reunion Anual di Watch Tower Bible and Tract Society of Pennsylvania tabatin un anuncio di sorpresa. E 10.594 personanan cu tabata presente of conectá via di telefon, a keda emocioná pa tende cu a agregá cuater miembro nobo n’e Cuerpo Gobernante di Testigonan di Jehova. E cuater miembronan nobo, tur cristian ungí, ta: Samuel F. Herd, M. Stephen Lett, Guy H. Pierce i David H. Splane.

• Samuel Herd a cuminsá traha pionero na 1958, i for di 1965 te cu 1997, e tabata den e trabou di circuito i di distrito. Despues di esei, e cu su casá Gloria, a forma parti dje famia di Betel na Merca, caminda ruman Herd a traha den e Departamento di Sirbishi. Tambe e tabata asistente dje Comité di Sirbishi.

• Stephen Lett a cuminsá traha pionero na december 1966, i di 1967 te cu 1971, el a sirbi na Betel na Merca. Na october 1971, el a casa cu Susan, i a bai den sirbishi di pionero special. Di 1979 te cu 1998, el a sirbi como superintendente di circuito. E cu Susan ta forma parti dje famia di Betel na Merca for di april 1998. Einan el a traha den e Departamento di Sirbishi i como asistente dje Comité di Siñansa.

• Guy Pierce a lanta su famia, i despues e cu su casá a cuminsá traha pionero na april 1982. El a sirbi como superintendente di circuito di 1986 te cu 1997, ora e cu su casá Penny, a bira parti dje famia di Betel na Merca. Ruman Pierce tabata sirbi como asistente dje Comité di Personal.

• David Splane a cuminsá traha pionero na september 1963. Como un graduado dje di 42 klas di Galad, el a sirbi como misionero na Senegal, Africa, i despues pa 19 aña den e trabou di circuito na Cánada. For di 1990, e cu su casá Linda, ta na Betel na Merca, unda ruman Splane a traha den e Departamentonan di Sirbishi i di Redaccion. Desde 1998, e tabata asistente dje Comité di Redaccion.

Fuera dje cuater miembronan nobo, e Cuerpo Gobernante ta consistí awor di C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle i D. Sydlik. Nos tur ta pidi den oracion pa Jehova sigui bendicioná i fortalecé e Cuerpo Gobernante, cu awor ta mas amplio, miéntras cu e ta sigui supervisá e actividadnan dje pueblo di Dios rond mundu i sirbi nan interes spiritual.