1. Kiko ke men tin temor di Dios, i dikon e sintimentu ei ta importante?

UN KRISTIAN ta stima Dios i, na mesun momento, ta tem’é. Pa algun hende, esei por parse kontradiktorio. Pero, e temor ku nos ta papiando di dje aki no ke men miedu. E ta un otro sorto di temor. Hende ku ta sinti e sorto di temor ei, tin rèspèt profundo pa Dios. E sintimentu ei ta importante pasobra lo e stòp nos di hasi kualke kos ku lo desapuntá nos Tata selestial i ku por daña nos amistat kuné.—Sal. 111:10; Pro. 8:13.

2. A base di loke David a bisa na Salmo 86:11, ki dos kos nos lo analisá?

² Lesa Salmo 86:11. Segun ku bo ta analisá e palabranan ei, bo por mira bon kla ku Rei David a komprondé ku temor di Dios ta masha importante. Den e artíkulo akí, nos lo analisá loke nos por siña for di e palabranan di David. Promé, nos lo mira dikon nos mester tin rèspèt profundo pa e nòmber di Dios. Di dos, nos lo mira kon den nos bida diario nos por demostrá ku nos tin temor pa e nòmber di Dios.

3. Ki eksperensia mester a yuda Moises sinti temor pa e nòmber di Dios?

³ Imaginá kon Moises lo mester a sinti ora e tabata riba Seru Horèb i a mira e gloria di Yehova pasa su dilanti. Esei lo mester tabata un eksperensia masha maravioso pa un hende pasa aden! Moises a skucha e siguiente palabranan, probablemente di un angel: “Yehova, Yehova, un Dios miserikòrdioso i di kompashon, ku tin pasenshi i ta  yen di amor leal i bèrdat, ku ta demostrá amor leal na míles di generashon, ku ta pordoná eror, desobedensia i piká.” (Éks. 33:17-23; 34:5-7, NW) Kisas e esena ei semper a pasa den Moises su mente ora el a usa e nòmber Yehova. Pues, no ta nada straño ku, mas despues, el a animá e israelitanan pa “teme e nòmber onrá i temibel” ei.—Deu. 28:58.

4. Kiko lo yuda nos tin mas rèspèt pa Yehova?

⁴ Ora nos ta pensa riba e nòmber Yehova, ta bon pa nos meditá tambe riba esun ku tin e nòmber ei. Nos mester kòrda riba su kualidatnan, manera su poder, sabiduria, hustisia i amor. Ora nos pensa riba nan i otro kualidatnan, nos lo tin mas rèspèt pa Yehova.—Sal. 77:11-15.

5-6. (a) Kiko e nòmber di Dios ta nifiká? (b) Di akuerdo ku Éksodo 3:13 i 14 i Isaías 64:8, den ki manera Yehova ta perkurá pa su boluntat kumpli?

⁵ Kiko e nòmber di Dios ta nifiká? Hopi eksperto ta di akuerdo ku e nòmber Yehova ta nifiká “E Ta Kousa pa Bira.” Esei ta kòrda nos ku nada no por stòp e boluntat di Yehova di kumpli. Si Yehova ke pa algu sosodé, lo e hasié sosodé. Kon asina?

⁶ Promé, ora Yehova tin un propósito, e ta bira loke sea ta nesesario pa kumpli ku su propósito. (Lesa Éksodo 3:13, 14.) * Hopi biaha, nos publikashonnan a animá nos pa meditá riba e aspekto maravioso ei di Dios su personalidat. Di dos, Yehova por hasi su sirbidónan imperfekto tambe bira loke sea ta nesesario pa sirbié i kumpli ku su propósito. (Lesa Isaías 64:8.) Den e dos maneranan ei, Yehova ta perkurá pa su boluntat kumpli, i nada no por stòp e.—Isa. 46:10, 11.

7. Kon bo por oumentá bo apresio i rèspèt pa bo Tata selestial?

⁷ Meditá semper riba e kosnan ku  Yehova a hasi i riba e kosnan el a yuda bo hasi. Di e manera ei, bo apresio i rèspèt p’e lo oumentá. Por ehèmpel, meditá riba e maravianan di kreashon. Esei lo yena bo kurason ku apresio pa tur loke Yehova a hasi—tur loke el a krea. (Sal. 8:3, 4) Meditá tambe riba tur loke Yehova a laga bo bira pa kumpli ku su boluntat. Asina ei, bo rèspèt profundo pa Dios lo oumentá. Sin duda, e nòmber Yehova ta inspirá temor! E nòmber ei ta representá tur loke nos Tata ta, tur loke el a hasi i loke ainda lo e hasi.—Sal. 89:7, 8.

8. Di akuerdo ku Deuteronomio 32:2 i 3, kiko Yehova ta pensa tokante su nòmber?

⁸ Djis promé ku e israelitanan a drenta Tera Primintí, Yehova a siña Moises un kantika. (Deu. 31:19) I Yehova a mand’é siña e israelitanan e kantika ei. (Lesa Deuteronomio 32:2, 3. *) Ora nos ta meditá riba versíkulo 2 i 3, nos por mira ku Yehova no ke pa su nòmber ta skondí òf pa hende pensa ku e ta demasiado sagrado pa pronunsiá. Yehova ke pa tur su kreashon inteligente konosé su nòmber! Pensa riba e gran privilegio ku e israelitanan tabatin ora Moises a siña nan tokante Yehova i Su glorioso nòmber! Meskos ku finfin di áwaseru ta refreská mata i ta yud’é bona, asina tambe loke Moises a siña e israelitanan den e kantika tokante Yehova a fortalesé i animá nan. Esei ta un bon ehèmpel pa nos sigui ora nos ta siña otro hende.

9. Kon nos por yuda santifiká e nòmber di Yehova?

⁹ Ora nos ta den sirbishi, usa Beibel pa mustra hende e nòmber di Dios, Yehova. Hasi bon uso di e literatura bunita, vidio ekselente i informashon riba nos website ku ta onra Yehova. Na trabou, skol òf durante un biahe, buska oportunidat pa papia tokante nos Dios stimá i tokante e klase di Persona ku e ta. Bisa hende kiko ta e kosnan maravioso ku Yehova lo hasi pa humanidat den futuro. Ora bo hasi esei, bo por yuda hende mira Yehova na un manera kompletamente diferente. Bo por yuda santifiká e nòmber di Dios, sakando na kla algun di e mentiranan i kalumnianan ku hende a siña tokante Yehova. Ningun siñansa por ta mas animante i refreskante ku esei.—Isa. 65:13, 14.

10. Dikon nos mester hasi mas ku djis siña nos studiantenan e lei- i normanan di Yehova?

¹⁰ Ora nos ta dirigí estudio di Beibel, yuda e studiantenan konosé i usa e nòmber di Yehova. Ademas, yuda nan konosé Yehova bon. Akaso djis siña nan Yehova su instrukshon-, norma- i reglanan lo logra esei? Ta bèrdat ku un bon studiante por konosé e leinan di Dios i te asta apresiá nan. Pero si e no siña stima Yehova, lo ta difísil pa e sintié motivá pa obedesé nan. Kòrda riba Eva. E tabata konosé e leinan di Dios, pero e no a stima Esun ku a dun’é e leinan ei di bèrdat. Anto ku Adam tabata meskos. (Gén. 3:1-6) P’esei, nos mester hasi mas ku djis siña nos studiantenan e lei- i normanan hustu di Yehova.

11. Ora nos ta siña nos studiantenan e lei- i normanan di Dios, kon nos por yuda nan stima Esun ku a duna e leinan ei?

¹¹ E lei- i normanan di Yehova ta bunita  i pa nos mes bon. (Sal. 119:97, 111, 112) Pero, un studiante lo no mira esei a ménos ku e mira e amor di Yehova tras di e leinan ei. Pues, puntra bo studiante: “Dikon bo ta pensa Yehova ta pidi nos hasi esei òf pa no hasi esei? Kiko nan ta siña nos tokante Yehova su personalidat?” Tipo di pregunta asina tin mas chèns di yega na su kurason. Nan ta laga e studiante pensa riba Yehova i lo yud’é stima e nòmber di Yehova. E studiante lo no djis stima e leinan, ma tambe Esun ku a duna e leinan ei. (Sal. 119:68) E studiante su fe lo bira mas fuerte i lo e ta mas mihó prepará pa soportá prueba difísil den futuro.—1 Kor. 3:12-15.

12. Na ki okashon David a permití su kurason bira dividí, i ku ki resultado?

¹² Na Salmo 86:11, Rei David a bisa: “Uni mi kurason.” E palabranan ei ta masha importante. Durante su bida, el a mira kon fásil ta pa kuminsá enfoká riba kos robes. Un biaha, e tabata riba dak di su kas i el a mira esposa di un otro hòmber ta baña. Kon David su kurason tabata na e momento ei? Uní òf dividí? E tabata konosé e lei di Yehova: “No kudishá [òf, “deseá,” NW] esposa di bo próhimo.” (Éks. 20:17) Pero aparentemente el a sigui wak e muhé. Su kurason a bira dividí; di un banda e tabata ke tin Bètsabé, pero di otro banda e tabata ke agradá Yehova. Aunke David tabata stima i teme Yehova, el a bai den mal kaminda. El a trese reproche riba Yehova su nòmber, i David a kousa daño na hende inosente, inkluso su mes famia.—2 Sam. 11:1-5, 14-17; 12:7-12.

13. Kon nos sa ku no ta pa semper David su kurason a keda dividí?

¹³ Yehova a yuda David komprondé kon grave su eror tabata, i su amistat ku Yehova a drecha. (2 Sam. 12:13; Sal. 51:2-4, 17) David nunka a lubidá kuantu problema i sufrimentu a bini ora el a laga su kurason bira dividí. Su palabranan na Salmo 86:11 por ser tradusí tambe: “Duna mi un kurason ku no ta dividí.” Yehova a yud’é? Sí. Nos sa esei pasobra mas despues Beibel ta referí na David komo un hende ku “su kurason . . . tabata kompletamente dediká na” Yehova su Dios.—1 Rei. 11:4; 15:3.

14. Kiko nos mester puntra nos mes, i dikon?

¹⁴ E ehèmpel di David ta masha animante, pero e ta duna nos algu pa pensa  ariba. E pikánan grave ku el a kometé ta sirbi komo un atvertensia pa nos awe. Nos no ke kometé e mesun eror. P’esei, sin importá kuantu tempu nos tin ta sirbi Yehova, nos mester puntra nos mes: ‘Mi ta para firme kontra e intentonan di Satanas pa dividí mi kurason?’

15. Kon temor di Dios por protehá nos si nos haña nos ku imágennan sensual?

¹⁵ Por ehèmpel, kiko lo bo hasi si na televishon òf riba Internet bo mira algu ku por lanta deseo inmoral den bo? Kisas ta fásil pa bo bisa bo mes ku e plachi òf pelíkula ei no ta ègt pornográfiko. Pero, bo a pensa ku kisas e por ta algu ku Satanas ta usa pa dividí bo kurason? (2 Kor. 2:11) Pensa riba e siguiente ilustrashon: Si un hende ke habri un pida tronkon for di otro, e mester usa un hacha. E promé biahanan ku e ta dal e tronkon ku e hacha, e tronkon ta djis haña un par di splet chikitu. Pero, segun ku e ta sigui dal e tronkon ku e hacha, e spletnan ta bira mas grandi i hundu. I no ta tarda mashá ku e tronkon ta habri for di otro. Esei ta loke imágen sensual ta hasi ku nos kurason. Kisas nan por parse chikitu i inofensivo, meskos ku e spletnan chikitu. Pero masha lihé nan por dividí un hende su kurason, i pon’é peka kontra Yehova. Pues, no laga espasio pa deseo robes! Mantené bo kurason uní pa teme e nòmber di Yehova!

16. Ki pregunta nos mester hasi nos mes ora nos haña nos ku tentashon?

¹⁶ Ademas di imágen sensual, Satanas ta usa vários tipo di tentashon kontra nos. Kon nos lo reakshoná? Algun hende kisas ta pensa: ‘Ai, lo mi no ser ekspulsá si mi hasi tal kos, pues e no ta dje grave ei.’ Pero e tipo di rasonamentu ei ta masha peligroso. Ta mihó pa nos puntra nos  mes: ‘Satanas ta purbando di usa e tentashon akí pa dividí mi kurason? Kiko lo pasa si mi sede na mal deseo? Lo mi trese reproche riba e nòmber di Yehova? Loke mi disidí di hasi lo hala mi mas serka mi Dios òf mas leu for di dje?’ Meditá riba e preguntanan ei. Pidi Yehova sabiduria pa kontestá e preguntanan ei onestamente i di kurason. (Sant. 1:5) Esei por ta un berdadero protekshon. Lo bo tin e forsa pa rechasá tentashon meskos ku Hesus, kende a bisa: “Bai for di aki, Satanas!”—Mat. 4:10.

17. Dikon un kurason dividí no tin masha balor? Ilustrá esei.

¹⁷ Un kurason dividí no tin masha balor. Imaginá ku den un tim di futbòl e hungadónan no ta bai bon ku otro. Algun di nan ke gloria pa nan mes, otronan no ke sigui e reglanan i tin otro ku ta falta e entrenadó rèspèt. Kuantu chèns un tim asina tin di gana un wega? Pa nan gana, e tim mester ta uní. Meskos ta pasa ku bo kurason. E por gana solamente si bo pensamentu-, deseo- i sintimentunan ta uní den sirbi Yehova. Nunka lubidá: Satanas tin masha gana di dividí bo kurason. E ke pa bo pensamentu-, deseo- i sintimentunan ta na konflikto ku e normanan di Yehova. Pero pa sirbi Yehova, bo mester dun’é bo kurason kompleto. (Mat. 22:36-38) P’esei, no permití Satanas dividí bo kurason!

18. Di akuerdo ku e palabranan di Mikéas 4:5, kiko ta bo determinashon?

¹⁸ Pidi Yehova meskos ku David: “Uni mi kurason pa teme bo nòmber.” Hasi tur bo esfuerso pa biba di akuerdo ku e orashon ei. Den tur desishon ku bo ta tuma, sea chikitu òf grandi, demostrá ku bo tin rèspèt profundo pa Yehova su nòmber santu. Di e manera ei, lo bo ta un Testigu di Yehova ku realmente ta trese alabansa pa e nòmber ei. (Pro. 27:11) I nos tur por bisa, huntu ku profeta Mikéas: “Nos lo kana den e nòmber di Yehova nos Dios pa semper i semper.”—Mik. 4:5, NW.