Sí, nan ta eksistí. Di unda nan a bini? Kòrda ku Dios a krea angel ku e regalo di boluntat liber. Poko despues ku Dios a krea e promé hòmber i muhé, Adam ku Eva, un angel perfekto a hasi mal uso di e libertat ei i a instigá un rebelion riba tera. El a logra pone Adam ku Eva rebeldiá kontra Dios. (Génesis 3:1-7; Revelashon 12:9) Beibel no ta menshoná nòmber di e angel ei ni ki posishon e tabatin den shelu promé ku el a rebeldiá. Pero despues di su rebelion, ku rason Beibel ta yam’é Satanas, ku ta nifiká “Resistidó,” i Diabel, ku ta nifiká “Kalumniadó.”—Mateo 4:8-11.

Lamentablemente, e rebelion ei kontra Dios no a kaba einan. Den tempu di Noe, un kantidat inkontabel di angel a “bandoná nan propio lugá di biba” den e famia selestial di Dios. Nan a baha bini na tera i a tuma kurpa di hende pa hiba un bida inmoral i malbado, i asina nan a desviá for di e propósito pa kua Dios a krea nan.—Hudas 6; Génesis 6:1-4; 1 Pedro 3:19, 20.

Kiko a para di e angelnan malbado ei? Ora Dios a trese un diluvio pa limpia henter e tera, nan a bandoná nan kurpa humano, a bolbe bira spiritu i a drenta den e region di spiritu. Pero Dios no a permití e angelnan rebelde ei bai bèk na nan “puesto original.” En bes di esei, el a kondená nan na un estado di “skuridat [spiritual] profundo” ku yama Tártaro. (Hudas 6; 2 Pedro 2:4) E demoñonan akí a pone nan mes bou di kontrol di Satanas e Diabel, e “gobernante di demoño,” kende “ta sigui disfrasá su mes na un angel di lus.”—Mateo 12:24; 2 Korintionan 11:14.

Beibel ta siña ku e Reino Mesiániko di Dios, un gobièrnu den shelu, a ser establesé na 1914. * Despues di e momento importante ei, Satanas i su demoñonan a ser saká for di shelu i bentá riba tera. E maldat i inmoralidat grosero ku ta reina tur kaminda awe riba tera ta duna prueba di nan influensia vengativo i destruktivo.—Revelashon 12:9-12.

Pero e oumento di violensia i kosnan degradá ta konfirmá ku e fin di nan reinado di teror ta serka. Pronto, e Reino di Dios lo stroba e spiritunan malbado ei di tuma akshon. E Reino akí lo transformá e tera den un paradeis i lo reina pa mil aña. Despues di esei, pa último biaha e spiritunan malbado ei lo bolbe haña un chèns kòrtiku pa pone humanidat na prueba. Anto finalmente, nan lo ser destruí pa semper.—Mateo 25:41; Revelashon 20:1-3, 7-10.