Na 1949, mi tata a emigrá di Alemania bai Australia. El a bai buska trabou den un área di mina i industria ku ta generá koriente, anto a bai biba den un kunuku na Viktoria. Ei el a kasa ku mi mama, i mi a nase na 1953.

Un par di aña despues, mi mama a tuma un kurso di Beibel serka e Testigunan di Yehova. Debí na esei, el a lanta mi segun e siñansanan di Beibel. Pero, mi tata no tabatin lei ku ningun religion. El a bira un abusadó violento, i mi mama tabatin miedu di dje. Pero tòg mi mama a sigui ku su estudio di Beibel den sekreto i a bin stima siñansanan bíbliko. Ora mi tata no tabata na kas, mi mama tabata siña ami ku mi ruman muhé e kosnan ku e tabata siña. E tabata konta nos di e futuro paradeis i kon nos por ta felis si nos apliká normanan bíbliko.— Salmo 37:10, 29; Isaías 48:17.

Ku 18 aña di edat, mi a haña mi obligá ta bai for di kas debí ku mi tata tabata masha violento. Aunke mi tabata kere loke mi mama tabata siña mi for di Beibel, mi no a balorá e siñansanan i no a apliká nan den mi bida. M’a kuminsá traha komo elèktrishèn na un mina di karbon. Ku mi 20 aña m’a kasa. Nos promé yu muhé a nase tres aña despues, i esei a pone mi pensa atrobe riba kiko tabata importante den mi bida. Mi tabata sa ku Beibel por a yuda nos famia, pues m’a kuminsá un kurso di Beibel ku Testigunan di Yehova. Pero mi kasá tabata masha kontra. Ora m’a asistí na un di nan reunionnan, mi kasá a duna mi un ultimatum: sea para mi estudio di Beibel òf bai fo’i kas. M’a sinti ku mi n’ por a hasi nada, m’a sede na su eksigensia anto separá mi mes for di e Testigunan. Despues a duel mi ku mi no a para pa loke mi tabata sa ku ta korekto.

Un dia, mi koleganan di trabou a introdusí mi na pornografia. Tabata algu eksitante pero na mes momento repugnante, i m’a sinti mi sumamente kulpabel. Ora m’a kòrda loke m’a siña for di Beibel, m’a ègt kere ku Dios lo a kastigá mi. Pero mas mi tabata wak potrètnan inmoral, mas mi aktitut pa ku pornografia a kambia. Ku tempu mi a bira adikto na dje.

Durante e 20 añanan ku a sigui, m’a drif bai mas i mas leu for di e normanan ku mi mama a purba di siña mi. Mi komportashon  tabata reflehá loke mi tabata hinka den mi mente. Mi manera di papia i chistenan tabata vulgar. Mi a haña un punto di bista trosí di sèks. Aunke mi tabata biba ainda ku mi kasá, mi tabatin otro hende muhé. Un dia mi a wak mi mes den spil i m’a pensa: ‘Mi n’ gusta bo.’ E rèspèt ku mi mester tabatin pa mi mes a para bira un odio.

Mi matrimonio a frakasá, i mi bida a kai den otro. E ora ei mi a hasi orashon na Yehova ku henter mi kurason. Aunke 20 aña a pasa, m’a bolbe kuminsá ku mi estudio di Beibel. Ya pa e tempu ei, mi tata a fayesé i mi mama a batisá komo un Testigu di Yehova.

Tabatin un diferensia masha grandi entre e manera ku mi tabata hiba mi biba i e normanan di Beibel. Pero e biaha akí mi tabata determiná pa haña e pas mental ku Beibel ta primintí. M’a disidí di drecha mi vokabulario i dominá mi mal genio. Mi a disidí tambe di bandoná mi bida inmoral, stòp di hunga wega di plaka, bebe di mas i hòrta mi doño di trabou.

Mi koleganan di trabou no por a komprondé dikon mi tabata ke hasi kambionan drástiko asina. Pa tres aña largu nan a purba di provoká mi pa mi bai bèk na mi manera di hasi di ántes. Si mi a kometé un fayo, manera grita, rabia òf bisa un palabra malu, nan tabata grita: “Aha! E Joe di ántes ta bèk.” E palabranan ei tabata hasi mi hopi doló! Hopi bes mi a sinti ku mi a frakasá.

Mi lugá di trabou tabata pèstá ku pornografia, tantu elektróniko komo imprimí. Hopi biaha, mi koleganan tabata manda potrètnan erótiko pa mi via kòmpiuter, manera mi tabata hasi ántes. Mi tabata purba di vense mi adikshon, pero nan tabata determiná pa pone mi faya. Mi a buska yudansa i animashon serka e Testigu ku tabata studia Beibel ku mi. El a skucha mi ku pasenshi segun ku mi tabata deshogá mi mes serka dje. El a usa tekstonan spesífiko di Beibel pa mustra mi kon mi por lucha kontra mi adikshon, i el a animá mi pa sigui buska Yehova su yudansa mediante orashon.—Salmo 119:37.

Un dia mi a yama mi koleganan pa un reunion. Ora nan a bini, mi a bisa nan pa duna dos di nos koleganan ku tabata alkohóliko serbes. Tur e koleganan a grita i protestá, bisando: “Bo n’ por hasi e kos ei! Nan tin problema ku adikshon!” Mi a respondé: “Sí, wèl ami tambe.” Desde e dia ei padilanti, nan a rekonosé ku mi tabata lucha kontra mi adikshon na pornografia, i nan no a pone preshon mas riba mi.

Ku tempu i ku hopi yudansa di Yehova, mi a logra vense mi adikshon. Na 1999, mi a batisá komo Testigu di Yehova, gradisidu ku mi a haña un chèns mas pa hiba un bida desente i felis.

Awor mi ta komprondé dikon Yehova ta odia loke mi tabata stima pa asina tantu tempu. Komo un Tata ku ta stima nos, e tabata ke protehá mi di e dañonan ku pornografia ta kousa. Ta nèt manera Proverbionan 3:5 i 6 ta bisa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” E normanan di Beibel no solamente ta protehá nos, sino tambe ta yuda nos haña éksito den bida.—Salmo 1:1-3.

Den pasado, mi tabata disgustá ku mi mes, pero awor mi tin rèspèt propio i pas mental. Mi ta hiba un bida limpi, i mi ta sinti ku mi tin Yehova su apoyo i pordon. Na 2000, mi a kasa ku Karolin, un bunita Testigu ku ta stima Yehova mes tantu ku mi. Den nos kas ta reina pas. Ta un gran privilegio pa forma parti di un hermandat mundial ku ta karakterisá pa amor i puresa moral.