ASTROLOGIA: Algun hende ta kere ku e posishon di e streanan na momento ku un hende nase ta loke ta determiná un hende su futuro. Nan ta lesa horoskop pa haña sa kiko e ta bisa tokante nan futuro i pa tuma desishon basá riba esei.

FENG SHUI: Otro hende ta kere ku e manera ku nan ta diseñá nan kas lo trese éksito i felisidat. Lo Wing, * ku ta biba na Hong Kong, a bisa: “Un eksperto di feng shui a bisa mi ku si mi pone un kristal spesial na un lugá spesífiko den mi tienda lo mi gana mas plaka.”

ADORASHON DI ANTEPASADO: Otro hende ta kere ku nan mester agradá nan antepasadonan òf vários dios pa haña nan protekshon i bendishon. Van, ku ta biba na Vietnam, a bisa: “Mi tabata kere ku si mi mustra onor na mi antepasadonan, lo mi tin un mihó bida awor i un futuro sigur pa mi i pa mi yunan.”

REENKARNASHON: Hopi hende ta kere ku ora un persona muri e ta nase di nobo i ku esei ta sigui pasa bes tras bes. Nan ta kere ku e kosnan bon i malu ku nan ta eksperensiá awor ta pa motibu di loke nan a hasi den nan bida anterior.

Sinembargo, hopi hende ta kere ku e kreensianan ei ta superstishon. Pero asina mes, nan ta praktiká lesamentu di plant’i man, wak horoskop, konsultá Ouija^® bord, usa bará di karta tarot i kosnan similar. Nan ta pensa ku kisas e práktikanan ei por yuda nan haña sa nan futuro.

Hende ku a pone tur nan konfiansa den e kreensia- i práktikanan ei a logra haña un bon bida i un futuro sigur?

Wak e ehèmpel di Hào, un hòmber ku ta biba na Vietnam. E tabata laga astrologia, feng shui, i adorashon di antepasado guia su bida. E tabatin éksito? Hào a bisa: “Mi negoshi a pèrdè hopi plaka, mi a kai den debe, mi tabatin yen di problema den famia i mi a bira hopi deprimí.”

Qiuming, un hòmber di Taiwan, tambe tabata kere den astrologia, reenkarnashon, destino, feng shui, i adorashon di antepasado. Despues di a tuma tempu pa analisá e kreensianan ei bon, el a bisa: “Mi a realisá ku e siñansa- i kustumbernan ei ta den konflikto ku otro i nan ta konfundí hende. Mi a ripará ku hopi bes e pronóstikonan di astrologia tabata inkorekto. I loke ta trata di reenkarnashon, si bo no por kòrda loke bo a hasi den bo bida anterior, kon bo por hasi kambio i biba mihó den bo siguiente bida?”

Meskos ku Hào i Qiuming, hopi otro hende tambe a realisá ku nos futuro no ta ser determiná pa destino, strea, adorashon di antepasado ni reenkarnashon. Esei ke men ku nos no por mehorá nos futuro?

Hopi hende ta pensa ku e manera pa garantisá un mihó futuro ta di bai tras di enseñansa superior i rikesa. Kiko tabata e resultado pa algun hende ku a tuma e desishon ei?