Den e artíkulo anterior, nos a konsiderá e señal ku Hesus a duna. E señal ei ta duna evidensia bon kla ku e Reino di Dios a ser establesí den shelu ku Hesukristu komo Rei.

Beibel ta bisa ku ora Hesus a kuminsá goberná, el a saka Satanas i e demoñonan for di shelu. Aktualmente, nan por influensiá solamente loke ta sosodé riba tera. Esei ta un di e motibunan ku kos a bira asina malu desde aña 1914.—Revelashon 12:7, 9.

Aunke dia pa dia e situashon ta birando pió, Hesus komo Rei di e Reino di Dios a hasi vários kos pa yuda hende rònt mundu. Hesus ta dirigí e obra mundial di edukashon bíbliko ku el a profetisá di dje. E obra ei ta yuda hopi hende siña prinsipio di Beibel i apliká esakinan den nan bida. (Isaías 2:2-4) Miónes di hende a siña kon nan por tin un bida di famia felis i pa no laga trabou òf kos material bira e kos di mas importante den nan bida. E hendenan ei a siña kon pa mehorá nan bida awor i pa bira e tipo di persona ku Dios ke pa biba bou di su gobernashon.

Aunke Hesus ta reina den shelu, gobièrnu humano ainda ta goberná riba tera. Pero Dios a bisa Hesus: “Goberná meimei di bo enemigunan.” (Salmo 110:2) Pronto, Hesus lo destruí su enemigunan i kaba ku tur e problemanan ku ta afektá hende ku ke obedesé Dios.

Durante e tempu ei, e Reino di Dios lo tuma akshon:

• Lo e kaba ku religion falsu. Tur religion ku a siña hende mentira tokante Dios i ku a hasi bida di hende difísil lo no t’ei mas. Beibel ta kompará religion falsu ku un prostituta. Su destrukshon lo ta un sorpresa pa hopi hende.—Revelashon 17:15, 16.

• Lo e pone un fin na gobernashon di hende. E Reino di Dios lo tuma akshon i pone un fin na tur gobièrnu humano.—Revelashon 19:15, 17, 18.

• Lo e eliminá hende malbado. Kiko lo pasa ku hende ku ta determiná pa hasi loke ta malu i ku ta nenga di obedesé Dios? Beibel ta bisa: “E malbadonan lo wòrdu kòrtá kitá for di tera.”—Proverbionan 2:22.

• Lo e eliminá Satanas i e demoñonan. Satanas i su demoñonan lo no por “gaña e nashonnan mas.”—Revelashon 20:3, 10.

Kiko tur esaki lo nifiká pa e hendenan ku ke biba bou di e Reino di Dios?

Komo Rei den shelu, Hesus lo logra loke ningun gobernante humano no por a logra. Lo e haña yudansa di 144.000 ko-gobernante, kendenan a ser skohí for di humanidat. (Revelashon 5:9, 10; 14:1, 3) Lo e hasi sigur ku boluntat di Dios lo kumpli rònt mundu. Kiko e Reino di Dios lo hasi pa su habitantenan riba tera?

• Kaba ku malesa i morto. “Ningun habitante lo no bisa: ‘Mi ta malu.’” I “lo no tin morto mas.”—Isaías 33:24; Revelashon 21:4.

• Trese berdadero pas i siguridat. “E prosperidat [òf, “pas,” NW] di bo yu hòmbernan lo ta grandi.” I “kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”—Isaías 54:13; Mikéas 4:4.

• Sòru pa nos tin trabou agradabel pa hasi. “Mi skohínan lo disfrutá di e obra di nan mannan pa hopi tempu. Nan lo no traha enbano.”—Isaías 65:22, 23.

• Resolvé e problemanan di medio ambiente. “Tera seku i desierto lo ta kontentu, i Arabá lo regosihá i floria manera rosa.”—Isaías 35:1.

• Siña hende kiko nan mester hasi pa biba pa semper. “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.”—Huan 17:3.

Dios ta deseá pa bo por disfrutá di e bendishonnan ei. (Isaías 48:18) E siguiente artíkulo lo splika kiko bo por hasi awor pa disfrutá di e futuro maravioso akí.