Si bo ke konosé un hende bon, ta importante pa bo haña sa kiko el a hasi den pasado i ki reto el a logra vense. Asina tambe, si bo ke siña konosé Dios bon, bo tin ku haña sa loke el a hasi den pasado. Ora bo haña sa esei, lo bo keda sorprendí kuantu nos ta benefisiá di tur loke Dios a hasi den pasado i ki efekto esei tin riba nos futuro.

Yehova ta nos Magnífiko Kreador, i su “kualidatnan invisibel, esta, su poder eterno i Divinidat, ta ser mira bon kla for di kreashon di mundu padilanti, ya ku nan ta bisto den e kosnan trahá.” (Romanonan 1:20) “El a traha tera ku su poder, el a establesé mundu ku su sabiduria; i ku su konosementu el a span e shelunan.” (Yeremías 10:12) I tur e maravianan ku tin den kreashon ta mustra ku Dios ta stima nos.

Pensa un ratu riba kuantu Yehova a enrikesé nos bida debí ku el a krea nos “segun su mes imágen.” (Génesis 1:27) Esei ta pone ku nos por reflehá su kualidatnan inkomparabel te na sierto grado. Ademas, el a krea nos ku e kapasidat pa ta hende spiritual, es desir, ku e kapasidat di komprondé su manera di pensa i su normanan. Ora nos ta laga esakinan guia nos, nos lo ta mas felis i nos bida lo tin propósito. I mas importante ainda, nos lo por bira su amigu.

Nos planeta Tera ta duna prueba ku Dios ta stima nos masha hopi mes. Manera apòstel Pablo a bisa, Dios “no a laga di duna prueba ta ken e ta, ya ku el a hasi bon, dunando [nos] áwaseru for di shelu i tempu di bon kosecha, i asina a laga [nos] haña kuminda na abundansia i a yena [nos] kurason ku alegria.” (Echonan 14:17) Dios no solamente a perkurá pa nos nesesidatnan básiko, sino el a sòru tambe pa duna nos tur loke nos tin mester pa nos  por disfrutá di bida. Anto tur esaki ta djis un muestra chikitu di tur loke e ke hasi pa nos.

Yehova a krea nos planeta Tera di tal manera ku nos por biba pa semper riba dje. Beibel ta bisa: “Tera el a duna na e yunan di hende,” i e “no a krea esaki pa e keda bashí, ma el a form’é pa e wòrdu habitá.” (Salmo 115:16; Isaías 45:18) Pero ken lo biba riba dje i pa kuantu tempu? “E hustunan lo heredá e tera, i lo biba den dje pa semper.”—Salmo 37:29.

Yehova a krea Adam ku Eva pa biba pa semper. El a pone e promé pareha den un paradeis pa nan “kultiv’é i kuid’é.” (Génesis 2:8, 15) Dios a duna nan un tarea emoshonante ku a konsistí di dos parti: “Sea fruktífero i multipliká, i yena e tera i hasi esaki someté na bo.” (Génesis 1:28) Pues, esei a nifiká ku Adam ku Eva por a biba felis riba tera pa semper. Lamentablemente, nan a skohe pa desobedesé Dios, i nan a pèrdè e oportunidat di ta entre “e hustunan” ku “lo biba [riba tera] pa semper.” Sinembargo, manera nos lo mira, loke nan a hasi no a kambia Yehova su propósito pa hende ni pa e planeta Tera. Pero promé, laga nos ban wak algu mas ku Dios a hasi.

Pakiko Dios a duna nos su Palabra skirbí, esta, Beibel? Wèl, esei ta pa nos por siña konos’é. (Proverbionan 2:1-5) Ta bèrdat ku Beibel no ta kontestá tur pregunta ku nos por tin tokante Dios; ningun buki lo no por hasi esei. (Eklesiástes 3:11) Sinembargo, tur loke Beibel ta bisa ta yuda nos konosé Dios. Ora nos les’é, nos por siña konosé Dios na e manera ku e ta trata hende. Nos por mira ki tipo di hende tin su aprobashon. (Salmo 15:1-5) Nos ta siña ki forma di adorashon e ta aseptá, kiko ta su normanan moral i kiko e ta pensa di kos material. Ademas, Beibel ta yuda nos konosé Dios su personalidat mihó mediante loke su Yu, Hesukristu, a bisa i hasi.—Huan 14:9.

Un otro motibu pakiko Yehova a duna nos su Palabra, Beibel, ta pa nos por haña sa kon nos por tin un bida felis i ku propósito. Pa medio di Beibel, Yehova ta bisa nos kiko nos mester hasi pa nos por tin un bida di famia felis, kon nos por sinti nos satisfecho i kon pa vense ansiedat. Ademas, manera nos lo bai mira despues, Beibel ta kontestá e preguntanan di mas importante di bida, manera: Dikon tin asina tantu sufrimentu? Kiko ta spera nos den futuro? Beibel ta splika tambe kiko Dios a hasi pa kumpli ku su propósito.

Tin hopi detaye mas ku ta hasi Beibel un buki sobresaliente i ku ta mustra ku Dios ta su outor. Aunke ta rònt di 40 hòmber a skirbi Beibel atraves di un periodo di 1.600 aña, e tin un solo tema sentral pasobra ta Dios ta su berdadero Outor. (2 Timoteo 3:16) Diferente for di tur otro buki di antigwedat, su kontenido a keda intakto atraves di tempu, manera míles di manuskrito di Beibel antiguo ta komprobá. Es mas, Beibel a sobrebibí tur e intentonan ku hende a hasi pa e no ser tradusí, distribuí ni lesá. Aktualmente Beibel ta e buki mas bendí i tradusí na mundu. E echo ku nos tin Beibel ta un prueba ku “e palabra di nos Dios ta permanesé pa semper.”—Isaías 40:8.

Dios a hasi un areglo spesial pa sigurá nos ku su propósito lo kumpli. Manera nos a menshoná kaba, Dios a krea hende pa nan por biba pa semper riba tera. Sinembargo, ora Adam a disidí di desobedesé Dios i a peka, el a pèrdè e oportunidat di biba pa semper pa su mes i tambe pa su yunan. Beibel ta bisa: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Romanonan 5:12) Pues, komo ku Adam a desobedesé Dios, por parse ku Dios su propósito lo no a kumpli. Pero kiko Yehova a hasi?

Loke Yehova a hasi ta kuadra ku su kualidatnan. El a aktua ku hustisia i a kastigá Adam ku Eva pa nan desobedensia, pero amor a motiv’é pa tuma medida pa garantisá futuro di humanidat. I Yehova a usa su sabiduria pa wak kon pa trata ku e  situashon ei, anto mesora el a bini ku un solushon. (Génesis 3:15) Dios lo a libra nos di piká i morto mediante morto di su Yu, Hesukristu. Kiko esei a enserá?

Pa libra humanidat di e konsekuensianan di Adam su rebelion, Yehova a manda Hesus na mundu pa siña hende e kaminda pa bida i pa “duna su alma komo reskate a kambio di hopi hende.” a (Mateo 20:28; Huan 14:6) Hesus por a paga e reskate pasobra e tabata un hòmber perfekto meskos ku Adam. Pero kontrali na Adam, semper Hesus a keda obediente na Dios, asta te na su morto. Komo ku Hesus no tabata meresé di muri, Yehova a resusit’é i lag’é bolbe na shelu. Di e manera ei, Hesus por a logra duna hende obediente loke Adam no por a logra duna nan, esta, e oportunidat di biba pa semper. “Pasobra meskos ku mediante desobedensia di esun hende ei hopi a bira pekadó, asina tambe mediante obedensia di esun persona akí hopi lo bira hustu.” (Romanonan 5:19) Pa medio di e sakrifisio di reskate di Hesus, Dios lo kumpli ku su promesa di laga hende biba pa semper riba tera.

E manera ku Yehova a solushoná e problemanan ku e rebelion di Adam a kousa ta yuda nos konosé Yehova mihó. Nos por mira ku nada no por stroba Yehova di kumpli ku su propósito; su palabra lo “tin éksito sigur.” (Isaías 55:11, NW) Nos ta siña tambe kuantu Yehova ta stima nos. “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje. E amor ei ta nifiká esaki: no ta nos a stima Dios, sino ta é a stima nos i a manda su Yu komo un sakrifisio di rekonsiliashon pa nos pikánan.”—1 Huan 4:9, 10.

Dios “no a spar ni su mes Yu, ma a entreg’é na morto pa nos tur,” pa asina nos por tin sigur ku Dios lo “duna nos bondadosamente tur otro kos” ku el a primintí. (Romanonan 8:32) Kiko Dios a primintí di hasi pa nos den futuro? E siguiente artíkulo lo kontestá esei.