1. Segun Kolosensenan 2:4 i 8, kon Satanas ta purba di pone nos pensa manera e ke pa nos pensa?

SATANAS ke pa nos bira lomba pa Yehova. Pa logra esei, e ta purba di influensiá nos manera di pensa. E ta purba di pone nos pensa manera e ke pa nos pensa. E ta usa nos deseonan pa asina engañá nos i konvensé nos pa bai su tras.—Lesa Kolosensenan 2:4, 8.

2-3. (a) Dikon nos mester tuma e spièrtamentu na Kolosensenan 2:8 na serio? (b) Kiko nos lo analisá den e artíkulo akí?

² Di bèrdat Satanas ke engañá nos? Sigur ku sí! Kòrda ku Pablo no a skirbi e spièrtamentu na Kolosensenan 2:8 pa hende no kreyente. El a skirbié pa e kristiannan ungí ku spiritu santu. (Kol. 1:2, 5) Si e kristiannan di e tempu ei tabata kore peliger, awendia nos ta kore mas peliger ainda. (1 Kor. 10:12) Dikon? Pasobra Satanas a ser bentá abou riba tera, i e ta hasi tur loke e por pa gaña Dios su sirbidónan fiel. (Rev. 12:9, 12, 17) Ademas, nos ta biba den un tempu ku hende malbado i gañadó ta “bai di malu pa pió.”—2 Tim. 3:1, 13.

³ Den e artíkulo akí, nos lo analisá kon Satanas ta usa “engaño bano” pa purba di influensiá nos manera di pensa. Nos lo identifiká tres di su “trampanan,” òf “kòmplòtnan.” (Efe. 6:11; nota.) I si nos a ripará ku algun táktika di Satanas ya a afektá nos manera di pensa, den  e siguiente artíkulo nos lo wak kon pa kambia esei. Pero promé, laga nos wak kiko nos por siña for di e manera ku Satanas a engañá e israelitanan despues ku nan a drenta Tera Primintí.

4-6. Segun Deuteronomio 11:10-15, dikon e israelitanan mester a siña método nobo di planta den Tera Primintí?

⁴ Ku astusia, Satanas a hinka e israelitanan den tentashon pa kometé idolatria. Pa logra esei, el a probechá di e nesesidat ku nan tabatin di haña alimento. Ora e israelitanan a drenta Tera Primintí, nan mester a siña método nobo di planta. Tempu ku nan tabata na Egipto, nan tabata haña awa for di Riu Nilo pa muha e tera. Pero, den Tera Primintí no tabatin riu grandi, pues pa haña awa nan tabata dependé di áwaseru i serena. (Lesa Deuteronomio 11:10-15; Isa. 18:4, 5) Pa siña e métodonan ei lo no tabata fásil pasobra mayoria di esnan ku tabatin eksperensia di plantashon a muri den desierto.

⁵ Yehova a splika su pueblo ku nan situashon a kambia. Despues, el a duna nan un spièrtamentu, ku na promé instante no a parse di tin nada di haber ku plantamentu. El a bisa: “Tene kuidou pa boso kurason no wòrdu gañá i boso bira bai i sirbi otro diosnan i adorá nan.” (Deu. 11:16, 17) Dikon Yehova a spièrta nan pa no adorá dios falsu miéntras e tabata papiando ku nan tokante método nobo di planta?

⁶ Yehova tabata sa ku e israelitanan lo a haña gana di bai puntra e kananeonan algun téknika di plantashon. Ta bèrdat ku nan tabatin mas eksperensia di  plantashon den e region ei, i e israelitanan por a siña for di nan. Pero tabatin un peliger. Tur loke e kananeonan tabata hasi tabata influensiá pa Baal. Segun nan, Baal tabata doño di shelu i ta e tabata laga áwaseru kai. Yehova no tabata ke pa su pueblo bai tras di e kreensianan falsu ei. Pero, bes tras bes e israelitanan a skohe pa adorá Baal. (Num. 25:3, 5; Hues. 2:13; 1 Rei. 18:18) Kon Satanas a logra kue e israelitanan den su gara? Laga nos wak e táktikanan ku el a usa.

7. Ki situashon a pone fe di e israelitanan na prueba despues ku nan a drenta Tera Primintí?

⁷ E promé táktika ku Satanas a usa tabata di probechá di e deseo normal di mira áwaseru kai i muha e tera. Den Tera Primintí, di aprel pa sèptèmber awa no tabata kai hopi. Bon kosecha tabata dependé di e áwaseru ku generalmente tabata kuminsá kai rònt di òktober. E nashonnan pagano bisiña a kere ku e diosnan lo manda áwaseru si nan a hasi sierto ritual. Satanas a laga e israelitanan kere ku nan bida i prosperidat a dependé si nan lo a adoptá e kustumbernan pagano ei. E israelitanan ku no tabatin fe den Yehova a kere ku esei tabata e úniko manera pa evitá ku lo tin temporada di sekura largu. Pues, nan a kuminsá hasi ritual pagano na onor di Baal.

8. Kiko ta e di dos táktika ku Satanas a usa? Splika.

⁸ E di dos táktika ku Satanas a usa tabata di probechá di e deseonan di karni di e israelitanan. E ritualnan religioso di e nashonnan pagano a inkluí aktonan inmoral pèrvèrso, entre otro, prostitushon di hòmber i muhé den santuario. Nan no solamente tabata tolerá homoseksualidat i otro forma di inmoralidat seksual, nan a asta mira nan komo algu normal. (Deu. 23:17, 18, BPK; 1 Rei. 14:24, BPK) Nan tabata kere ku tur e kosnan ei lo a laga ku e diosnan lo a hasi nan tera fértil. Hopi israelita a sinti nan atraí na e ritualnan ei i a bai mete ku adorashon di dios falsu. E realidat tabata ku Satanas a kue nan den su gara.

9. Di akuerdo ku Oséas 2:16 i 17, kon Satanas a nubla e identidat di Yehova?

⁹ E di tres táktika ku Satanas a usa tabata di nubla e identidat di Yehova. Den e dianan di profeta Yeremías, Yehova a bisa ku e profetanan falsu lo a pone Israel lubidá Su nòmber “pa motibu di Baal.” (Yer. 23:27) Aparentemente, e israelitanan a stòp di usa e nòmber di Dios i a remplas’é pa e nòmber Baal, ku ta nifiká “Doño” òf “Shon.” Esei a pone ku e israelitanan no por a mira e diferensia mas entre Yehova i Baal, i esei a fasilitá ku nan a meskla adorashon di Baal ku adorashon di Yehova.—Lesa Oséas 2:16, 17.

10. Ki táktika Satanas ta usa awe?

¹⁰ Awe Satanas ta usa e mesun táktikanan. Pa kue hende den su gara e ta probechá di tantu nan deseo natural komo nan deseo di karni i e ta nubla e identidat di Yehova. Laga nos analisá e último táktika ei promé.

11. Kon Satanas a nubla e identidat di Yehova?

¹¹ Satanas ta nubla e identidat di Yehova. Despues di e morto di Hesus su apòstelnan, algun supuesto kristian a  kuminsá plama siñansa falsu. (Echo. 20:29, 30; 2 Tes. 2:3) E apóstatanan ei a kuminsá skonde e identidat di e úniko Dios berdadero. Por ehèmpel, nan a stòp di usa Dios su nòmber den Beibel i a remplas’é pa título manera “Señor.” Loke nan a hasi a pone ku a bira difísil pa un lesadó di Beibel distinguí Yehova for di e otro “señor[nan]” ku tin den Beibel. (1 Kor. 8:5) Nan a usa e mesun palabra, “Señor,” pa referí tantu na Yehova komo Hesus. Esei a pone ku a bira difísil pa hende komprondé ku Yehova i Hesus no ta e mesun persona. (Huan 17:3) E konfushon ei a pone ku e siñansa di Trinidat a plama, un siñansa ku no ta den Beibel. Komo resultado, hopi hende ta kere ku nan no por konosé Dios i ku su identidat ta un misterio. Ki un mentira!—Echo. 17:27.

12. Segun Romanonan 1:28-31, kiko religion falsu a promové, i ku ki resultado?

¹² Satanas ta probechá di deseo di karni. Den tempu di e israelitanan, Satanas a usa religion falsu pa promové inmoralidat. Awe e ta hasi meskos. Religion falsu ta tolerá kondukta inmoral i asta ta lag’é parse komo algu normal. Debí na esei, hopi hende ku ta bisa ku nan ta sirbi Dios a bira lomba pa su normanan moral ku ta skirbí bon kla den Beibel. Ku ki resultado? Apòstel Pablo a menshoná e resultadonan den su karta na e romanonan. (Lesa Romanonan 1:28-31.) Hende a kuminsá hasi “kosnan ku no ta pas,” entre nan, tur forma di inmoralidat seksual inkluso homoseksualidat. (Rom. 1:24-27, 32; Rev. 2:20) Ta hopi importante pa nos obedesé e siñansanan ku ta skirbí bon kla den Beibel.

13. Ki otro táktika Satanas ta usa?

¹³ Satanas ta probechá di deseo natural. Ta natural ku nos tur ke proveé pa nos mes i pa nos famia. I nos ke forma nos mes pa esei. Kon nos ta hasi esei? Generalmente, bayendo skol i siña bon. (1 Tim. 5:8) Pero nos mester tene kuidou. Den hopi pais, e sistema di enseñansa ta bai mas leu ku djis siña e alumnonan kos útil pa bida. Nan ta purba di hinka filosofia humano den mente di e alumnonan i animá nan pa kuestioná  eksistensia di Dios i despresiá Beibel. Ademas, nan ta bisa e alumnonan ku tur hende inteligente ta kere ku bida a kuminsá pa medio di evolushon. (Rom. 1:21-23) E ideanan ei ta bai kontra ‘Dios su sabiduria.’—1 Kor. 1:19-21; 3:18-20.

14. Kiko filosofia humano ta promové?

¹⁴ Filosofia humano ta kontradisí Yehova su normanan. E filosofianan ei no ta promové e fruta di spiritu di Dios, sino “e obranan di karni.” (Gal. 5:19-23) P’esei, hende ta bira orguyoso, arogante i ta “stima nan mes” so. (2 Tim. 3:2-4) E karakterístikanan ei ta kontrali di loke Dios ta spera di su sirbidónan; e ke pa nos ta mansu i humilde. (2 Sam. 22:28, BPK) Pero, kiko a pasa ku algun kristian ku a bai universidat? Wèl, e ideanan di mundu, no esnan di Dios, a moldia nan mente. Laga nos wak un ehèmpel.

15-16. Kiko bo a siña for di e eksperensia di un ruman muhé?

¹⁵ Un ruman muhé ku tin mas ku 15 aña den sirbishi di tempu kompleto a konta: “Mi tabata un Testigu batisá, i mi a lesa i tende tokante e peligernan di studia na universidat, pero mi no a hasi kaso. Mi a pensa ku e konsehonan no tabata konta pa mi.” Ki problema el a hañ’é kuné? El a atmití: “E kursonan tabata tuma asina tantu di mi tempu i energia ku mi tabata muchu okupá pa papia ku Yehova manera mi tabata hasi ántes. Mi tabata muchu kansá pa papia tokante Beibel den sirbishi i morto kansá pa prepará bon pa e reunionnan. Mi a realisá ku mi tabata muchu enbolbí den enseñansa superior i  ku esei tabata perhudiká mi amistat ku Yehova. Ménos mal ku mi a komprondé ku mi mester a stòp ku universidat. I ta esei mi a hasi.”

¹⁶ Ki efekto enseñansa superior tabatin riba e ruman muhé ei su manera di pensa? El a bisa: “Mi tin bèrgwensa di bisa ku universidat a siña mi pa ta krítiko di otro hende, foral di e rumannan; pa eksigí hopi di nan i keda leu for di nan. A tuma mi hopi tempu pa saka e ideanan robes ei for di mi kabes. E eksperensia ei a laga mi komprondé e peliger di no skucha e atvertensianan ku Yehova ta duna pa medio di su organisashon. E ta mi Tata i e konosé mi mihó ku mi mes. Mare mi a skuch’é!”

17. (a) Kiko mester ta nos determinashon? (b) Kiko nos lo analisá den e siguiente artíkulo?

¹⁷ Sea determiná pa nunka laga e mundu di Satanas kue bo den su gara “pa medio di filosofia i engaño bano.” Keda semper alerta pa e táktikanan di Satanas. (1 Kor. 3:18; 2 Kor. 2:11) Nunka permitié laga bo lubidá ken Yehova ta i kon e ke pa bo ador’é. Respetá su normanan moral haltu. I no laga Satanas pone bo pasa por haltu di Yehova su konsehonan. Pero, kiko si bo a ripará ku e pensamentunan di mundu ya a afektá bo? E siguiente artíkulo lo mustra kon Beibel por yuda nos tumba pensamentu i kustumber ku ta “fuertemente ankrá.”—2 Kor. 10:4, 5.