1. Kon envidia a afektá e famia di Yosef?

YAKÒB tabata stima tur su yunan, pero e tabatin kariño spesial pa Yosef. Kon e rumannan di Yosef a sinti? Nan a envidi’é i a kuminsá odi’é. Yosef no a meresé esei, e no a hasi nada. Ku su 17 aña, nan a bend’é komo esklabo, i nan a gaña nan tata ku un bestia salbahe a mata su yu faborito. Envidia a pone nan kita e pas dje famia i trese hopi sufrimentu pa nan tata.—Gén. 37:3, 4, 27-34.

2. Segun Galationan 5:19-21, dikon envidia ta asina peligroso?

² Den Beibel, envidia * ta parti di “e obranan [mortal] di karni” ku por stroba un hende di risibí e Reino di Dios. (Lesa Galationan 5:19-21.) Generalmente, e sintimentu ei ta manera venenu i hopi biaha ta kousa hostilidat, bringamentu i atake di rabia.

3. Kiko nos lo analisá den e artíkulo akí?

³ E ehèmpel di e rumannan di Yosef ta mustra ku envidia por daña relashon i kita e pas di un famia. Aunke nunka nos lo hasi loke e rumannan di Yosef a hasi, nos tur tin un kurason imperfekto i engañoso. (Yer. 17:9) Pues, no ta straño ku tin biaha nos ta sinti envidia. Den e artíkulo akí, nos lo analisá algun ehèmpel bíbliko ku lo yuda nos komprondé kon bini envidia por saka rais den nos kurason. Despues, nos lo wak algun manera práktiko pa lucha kontra envidia i promové pas.

4. Dikon e filisteonan a envidiá Isak?

⁴ Rikesa. Isak tabata masha riku, i e filisteonan tabata envidi’é. (Gén. 26:12-14) Nan te asta a dèmpel e posnan ku e tabata usa pa duna su bestianan awa. (Gén. 26:15, 16, 27) Meskos ku e filisteonan, awendia tin hende ta envidiá esnan ku tin mas kos material ku nan. Nan no solamente ke loke e otro hende tin, ma nan ke kit’é for di dje tambe.

5. Dikon e lidernan religioso a envidiá Hesus?

⁵ Apresio. E lidernan religioso hudiu a envidiá Hesus pasobra hopi hende a stim’é. (Mat. 7:28, 29) Hesus tabata e representante di Dios i tabata siña hende e bèrdat. Pero tòg, e lidernan religioso ei a plama mentira i kalumnia pa daña Hesus su bon nòmber. (Mar. 15:10; Huan 11:47, 48; 12:12, 13, 19) Kiko esei ta siña nos? Nos mester lucha kontra tur tendensia di envidiá ruman ku ta masha stimá den kongregashon debí na nan kualidatnan. Na lugá di esei, nos mester purba di imitá nan.—1 Kor. 11:1; 3 Huan 11.

6. Kon Diótrefes a demostrá ku e tabata envidioso?

⁶ Asignashon. Den promé siglo, Diótrefes a envidiá e rumannan ku tabata guia e kongregashon. Komo e tabata ke “ta na promé lugá” entre e rumannan di kongregashon, el a kana papia malu di apòstel Huan i di e otro ruman hòmbernan pa asina daña nan reputashon. (3 Huan 9, 10) Aunke nos lo no bai dje leu ei manera Diótrefes, nos tambe por kuminsá envidiá un ruman ku ta haña un asignashon ku nos tabata ke, foral si segun nos, nos lo por kumpli kuné mesun bon òf te asta mas mihó.

7. Kon envidia por afektá nos?

⁷ Envidia ta meskos ku un yerba venenoso. Unabes e simia di envidia saka rais den nos kurason, ta difísil pa kaba kuné. Sintimentu negativo manera yalursheit, orguyo i egoismo por pone ku envidia ta sigui krese. Envidia por stroba bon kualidat manera amor, kompashon i amabilidat di krese. Nos tin ku rank’é for di nos kurason asina ku e kuminsá sprùit. Kon nos por lucha kontra e sintimentu peligroso ei?

8. Ki kualidat por yuda nos lucha kontra envidia?

⁸ Nos por lucha kontra envidia si nos ta humilde i ta keda kontentu ku loke nos tin. Si nos kurason ta yen di e bon kualidatnan ei, envidia no tin lugá pa krese. Humildat ta yuda nos pa no pensa demasiado di nos mes. Un hende humilde no ta sinti ku e meresé mihó trato ku tur otro hende. (Gal. 6:3, 4) Un hende ku ta kontentu ku loke e tin no ta kompará su mes ku otro hende. (1 Tim. 6:7, 8) Ora un hende ku tin e dos kualidatnan ei mira un otro hende haña algu bon, e ta keda kontentu p’e.

9. Segun Galationan 5:16 i Filipensenan 2:3 i 4, kiko spiritu santu lo yuda nos hasi?

⁹ Pa nos evitá envidia i sea humilde i keda kontentu ku loke nos tin, nos mester di yudansa di Dios su spiritu santu. (Lesa Galationan 5:16; Filipensenan 2:3, 4.) Yehova su spiritu santu ta yuda nos saminá nos mente i motivashonnan. Ku yudansa di Dios, nos por remplasá  pensamentu i sintimentu negativo pa esnan positivo. (Sal. 26:2; 51:10) Laga nos analisá e ehèmpel di Moises i Pablo, kendenan a lucha kontra envidia.

10. Ki situashon a pone Moises na prueba? (Wak e plachi riba portada.)

¹⁰ Moises tabatin hopi outoridat riba e pueblo di Dios, pero e no a pensa ku e asignashon ei tabata p’e so. Por ehèmpel, na un okashon, Yehova a tuma un tiki di su spiritu santu for di Moises i a dun’é na un grupo di ansiano israelita ku tabata para rònt di e tènt di reunion. Poko despues, Moises a komprondé ku dos ansiano ku no a sali bai na e tènt di reunion tambe a risibí spiritu santu i a kuminsá profetisá. Kiko Moises a hasi ora Hosue a pidié pa stòp nan? E no a sinti envidia debí na e atenshon ku Yehova a duna e dos hòmbernan ei. Mas bien, el a alegrá ku nan tambe por a profetisá. (Num. 11:24-29) Kiko nos ta siña for di Moises?

11. Kon e ansianonan por imitá Moises?

¹¹ Bo ta un ansiano? Kisas bo gusta, por ehèmpel, e asignashon di dirigí e Estudio di Toren di Vigilansia semanal mashá. Awor, e kuerpo di ansiano ta pidi bo entrená un ruman ku mas despues lo tuma e asignashon ei over. Si bo ta humilde meskos ku Moises, lo bo no sinti bo menasá. Mas bien, lo bo ta kontentu pa yuda bo ruman.

12. Kon hopi kristian awendia ta demostrá ku nan ta humilde i ta keda kontentu ku loke nan tin?

¹² Laga nos papia di un otro situashon ku hopi ruman hòmber di edat ta enfrentá. Pa hopi aña, nan a sirbi komo koordinadó di e kuerpo di ansiano. Pero ora nan yega 80 aña, di buena gana nan ta pasa e asignashon ei over pa un otro ruman. Superintendente di sirkuito ku yega 70, humildemente ta stòp ku e asignashon ei i ta aseptá un otro forma di sirbishi. I, den e último añanan, hopi bètelita rònt mundu a kuminsá un asignashon nobo pafó di Bètel. E rumannan fiel ei no ta envidiá esnan ku awor tin e asignashonnan ku un tempu nan tabatin.

13. Kiko por a pone Pablo envidiá e 12 apòstelnan?

¹³ Apòstel Pablo ta un otro bon ehèmpel di un hende ku a kultivá humildat i a keda kontentu ku loke e tabatin. Pablo no a permití envidia saka rais den su kurason. El a traha duru den sirbishi, pero humildemente el a bisa: “Mi ta esun di mas insignifikante di e apòstelnan, i mi no ta digno di ser yamá apòstel.” (1 Kor. 15:9, 10) E 12 apòstelnan a sigui Hesus durante su sirbishi riba tera, pero Pablo a bira un kristian te despues ku Hesus a muri i a resusitá. Aunke ku tempu Pablo a bira “un apòstel mandá na e nashonnan,” nunka e no a bira un di e 12 apòstelnan. (Rom. 11:13; Echo. 1:21-26) En bes di envidiá e 12 hòmbernan ei debí na e amistat ku nan tabatin ku Hesus, Pablo a keda kontentu ku loke e tabatin.

14. Kiko nos lo hasi si nos ta humilde i ta keda kontentu ku loke nos tin?

¹⁴ Si nos ta humilde i ta keda kontentu ku loke nos tin, nos lo ta meskos ku Pablo i nos lo respetá e rumannan ku Yehova a duna outoridat. (Echo. 21:20-26) El a nombra ansiano pa guia e kongregashon kristian. Aunke nan ta imperfekto, Yehova ta konsiderá nan komo “regalo den forma di hende.” (Efe. 4:8, 11) Ora nos ta respetá nan i humildemente ta  sigui nan instrukshon, nos ta keda serka Yehova i nos tin pas ku nos rumannan kristian.

15. Kiko nos mester hasi?

¹⁵ Pas no por sobrebibí si nos permití envidia saka rais den nos kurason. Nos mester rank’é for di nos kurason i evitá di plant’é den esun di nos rumannan. Nos mester hasi e kosnan importante ei si nos ke obedesé e mandamentu di Yehova di “hasi esfuerso pa buska e kosnan ku ta promové pas i ku ta yuda edifiká otro.” (Rom. 14:19) Kiko spesífikamente por yuda nos lucha kontra envidia, i kon nos por promové pas?

16. Kon nos por yuda nos rumannan lucha kontra envidia?

¹⁶ Loke nos ta bisa i hasi por tin un gran influensia riba nos rumannan. Mundu ke pa nos “kana broma” ku e kosnan ku nos tin. (1 Huan 2:16) Pero e aktitut ei ta promové envidia. Nos por evitá di hasi nos rumannan envidioso si nos skohe pa no papia konstantemente tokante e kosnan ku nos tin òf ke kumpra. Un otro manera ta di sea modesto tokante e asignashonnan ku nos tin den kongregashon. Si nos hala atenshon na nan, nos ta preparando e tera pa envidia krese. Di otro banda, ora nos tin berdadero interes den nos rumannan i ta rekonosé e kosnan bon ku nan ta hasi, nos ta yuda pa nan ta kontentu ku loke nan tin  i nos ta promové pas i union den kongregashon.

17. Kiko e rumannan di Yosef a logra, i dikon?

¹⁷ Nos por gana e lucha kontra envidia! Laga nos wak e ehèmpel atrobe di e rumannan di Yosef. Hopi aña despues ku nan a maltratá Yosef, nan a top’é na Egipto. Promé ku el a laga nan sa ken e ta, el a pone nan na prueba pa haña sa si nan a kambia. El a organisá un komementu pa nan tur, pero el a duna Benyamin, su ruman chikitu parti di mama, muchu mas kuminda ku e otronan. (Gén. 43:33, 34) Pero, nan no a envidiá Benyamin. Mas bien, nan a demostrá ku nan tabata berdaderamente preokupá pa e bienestar di nan ruman i nan tata, Yakòb. (Gén. 44:30-34) Debí ku e rumannan di Yosef a ranka envidia for di nan kurason, nan a logra restorá e pas den nan famia. (Gén. 45:4, 15) Di mes manera, si nos ranka kualke sintimentu di envidia for di nos kurason, nos lo yuda mantené pas den nos famia i kongregashon.

18. Segun Santiago 3:17 i 18, kiko lo pasa si nos promové pas?

¹⁸ Yehova ke pa nos lucha kontra envidia i hasi esfuerso pa promové pas. Nos mester traha duru pa hasi tur e dos kosnan ei. Manera nos a mira den e artíkulo akí, nos tin e tendensia di envidiá. (Sant. 4:5) I nos ta biba den un mundu ku ta promové envidia. Pero si nos ta humilde i ta keda kontentu ku loke nos tin, nos lo no laga lugá pa envidia krese den nos kurason. Mas bien, nos lo promové pas di manera ku nos por kultivá bon kualidat.—Lesa Santiago 3:17, 18.