Si bo ta buska konseho enkuanto kon pa superá bo tristesa, bo ta haña masha hopi sugerensia, pero tin ta mas mihó ku otro. Kisas e motibu ta ku, manera nos a menshoná kaba, tur hende ta ekspresá tristesa na un manera diferente. Loke ta yuda un persona kisas no ta yuda un otro persona.

Pero tòg tin algun konseho ku a yuda vários hende. Hopi biaha eksperto ta usa e konsehonan ei pa konsehá esnan ku ta den tristesa. E konsehonan akí ta reflehá prinsipionan ku a resultá di ta konfiabel i ku bo por haña den un buki di sabiduria ku no ta bira ouderwets, esta, Beibel.

• Algun eksperto ta haña ku esaki ta e faktor di mas importante ku lo yuda un hende superá tristesa. Pero tin biaha lo bo deseá di ta bo so. Kisas asta lo bo por sinti ku esnan ku ta purba di yuda bo ta iritá bo. Ta normal pa sinti asina.

• No pensa ku henter ora bo mester tin hende rònt di bo, pero no alehá for di nan tampoko. Pasobra den futuro kisas lo bo tin mester di nan sosten. Na un manera bondadoso, laga hende sa kiko bo tin mester i kiko nò.

• Segun bo nesesidat, purba di haña un balansa entre e tempu ku bo ta pasa ku otro hende i e tempu ku bo ta pasa bo so.

PRINSIPIO DI BEIBEL: “Dos ta mihó ku un . . . Pasobra si un di nan kai, esun lo lanta su kompañero.”​—Eklesiástes 4:9, 10.

• Un dieta balansá lo yuda bo trata ku e strès ku bo ta haña debí na bo doló. Purba di kome diferente fruta, bèrdura i proteina ku no ta hopi vèt.

• Bebe hopi awa i otro kos di bebe ku ta saludabel.

• Si bo no tin muchu gana di kome, kome porshon chikitu ku mas frekuensia. Kisas lo ta bon tambe pa puntra bo dòkter si ta nesesario pa tuma un suplemento ku balor nutritivo. *

• Ta bon tambe pa kana i hasi otro ehersisio pa redusí emoshon negativo. Ora bo ta hasi ehersisio, esei por ta un oportunidat pa pensa riba e pèrdida di bo ser kerí òf pa pone bo mente un ratu riba algu otro.

PRINSIPIO DI BEIBEL: “Nunka niun hende no a odia su mes kurpa; ma e ta kuid’é i aliment’é.”—Efesionan 5:29, BPK.

• Semper ta importante pa drumi, pero esaki ta mas importante ainda pa hende ku tin tristesa, pasobra tristesa por kousa mas kansansio ku normal.

• Tene kuidou ku bo konsumo di kafeina i alkohòl, pasobra tur dos por stroba bo di drumi.

PRINSIPIO DI BEIBEL: “Un man yen di sosiegu ta mihó ku dos moketa yen di trabou i korementu tras di bientu.”—Eklesiástes 4:6.

• No lubidá ku tur hende ta ekspresá nan tristesa na un otro manera. Finalmente, ta abo mes mester saka afó ki ta e mihó manera pa trata ku bo tristesa.

• Hopi hende ta haña ku papia di nan tristesa ta yuda nan trata ku e situashon, pero tin otronan ku ta preferá di no papia di nan tristesa. Ekspertonan tin diferente opinion tokante e importansia di ekspresá tristesa ora bo pèrdè un ser kerí. Si bo ta sinti ku bo mester deshogá bo sintimentu ku un hende pero ta duda pa hasi esei, kisas ta mas fásil pa kuminsá papia tiki tiki di bo sintimentu ku un bon amigu.

• Tin hende ta haña ku ora nan yora, esei ta kalma nan doló; siendo ku tin otro hende ku ta superá nan tristesa maske nan no ta yora muchu.

PRINSIPIO DI BEIBEL: “Kada un konosé su mes aflikshon i su mes doló.”—2 Krónikanan 6:29.

• Tin hende ta usa droga òf ta bebe di mas pa purba di kalma nan doló. Pero si bo hasi esei, bo ta kousa bo mes daño. I kualke alivio ku bo sinti ta temporal i ta trese konsekuensia serio. P’esei, purba di kalma bo doló na un manera ku no ta hasi bo daño.

PRINSIPIO DI BEIBEL: “Laga nos limpia nos mes di tur impuresa.”—2 Korintionan 7:1.

• Hopi hende ta haña ku ta bon pa tuma tempu pa hasi algun aktividat ku ta yuda nan pa no keda enfoká henter ora riba nan tristesa.

• Kisas bo por kalma bo doló ora bo fortalesé bo amistat ku amigunan ku bo tin kaba, sera amistat nobo, siña hasi kosnan nobo òf dibertí bo mes un poko.

• • Ku tempu, probablemente bo situashon lo kambia. Kisas lo bo nota ku bo ta sinti bo mas mihó i ku bo ta pasa ménos tempu ekspresando bo tristesa. Esei ta un señal ku bo ta superando bo doló.

PRINSIPIO DI BEIBEL: “Tin un tempu stipulá pa tur kos. . . . Un tempu pa yora i un tempu pa hari, un tempu pa tene rou i un tempu pa baila.”—Eklesiástes 3:1, 4.

• Bolbe bèk na bo rutina diario mas pronto posibel.

• Si bo tin un orario pa drumi, traha i hasi otro aktividat, bo bida lo normalisá te na sierto grado.

• Si bo mantené bo mes okupá ku aktividat ku ta hasi bo sinti bon, esei por kalma bo doló emoshonal.

PRINSIPIO DI BEIBEL: “E lo no rekordá e añanan di su bida mashá, pasobra Dios ta ten’é okupá ku e alegria di su kurason.”—Eklesiástes 5:20.

• Hopi hende ku tuma desishon grandi despues ku nan a pèrdè un ser kerí ta lamentá esei despues.

• Si ta posibel, warda pa un periodo di tempu rasonabel promé ku bo muda, kambia di trabou òf deshasí di e pertenensianan di bo ser kerí ku a muri.

PRINSIPIO DI BEIBEL: “E plannan di hende balente siguramente ta kondusí na abundansia [òf, “bentaha,” NW], ma tur esnan ku tin purá, siguramente ta resultá den pobresa.”—Proverbionan 21:5.

• Hopi hende ta haña ku ta benefisioso pa hasi kosnan ku ta tene e rekuerdo di nan ser kerí bibu.

• Kisas bo por tene potrèt òf rekuerdo na man òf skirbi e momentonan importante ku bo ke keda kòrda. Esaki por kalma bo doló.

• Warda opheto ku ta pone bo kòrda riba kosnan agradabel. I ora bo ta sinti ku bo ta kla, bo por wak nan.

PRINSIPIO DI BEIBEL: “Kòrda e dianan di promé aya.”—Deuteronomio 32:7.

• Kisas lo ta bon pa wak si bo por tuma fakansi.

• Si bo no por tuma un fakansi largu, kisas bo por hasi algu ku bo ta gusta hasi pa solamente ún òf dos dia, por ehèmpel, bishitá un parke, bai laman òf bai keiru ku bo amigunan.

• Asta un kambio chikitu den bo rutina por yuda bo trata ku bo tristesa.

PRINSIPIO DI BEIBEL: “Ban ku mi, boso so, na un lugá solitario i sosegá un poko.”—Marko 6:31.

• No lubidá ku ora bo ta yuda otro hende, abo tambe lo sinti mihó.

• Por ta bo por kuminsá yuda bo famia- i amigunan ku tambe ta tristu debí na morto di bo ser kerí. Kisas nan tambe tin mester di un hende pa deshogá nan mes kuné.

• Ora bo sostené i konsolá otronan, esei por yuda bo haña bo alegria bèk i pone bo sinti ku bo bida tin propósito atrobe.

PRINSIPIO DI BEIBEL: “Tin mas felisidat den duna ku den risibí.”—Echonan 20:35.

• Tristesa por yuda bo mira kiko ta realmente importante.

• Probechá di e oportunidat pa analisá kon bo ta hiba bo bida.

• Si ta nesesario, hasi kambio den bo prioridatnan.

PRINSIPIO DI BEIBEL: “Ta mihó bai na un kas di rou ku bai na un kas di fiesta, pasobra morto ta e fin di tur hende, i esun ku ta na bida ta tuma esaki na kuenta.”—Eklesiástes 7:2.

 Pa ta realístiko, nada lo kita bo doló kompletamente. Pero hopi hende ku a pèrdè un ser kerí i ku a apliká e sugerensianan ku nos a trata den e artíkulo akí ta bisa ku nan a haña konsuelo. Klaru ku e sugerensianan ku tin den e artíkulo akí no ta e úniko manera pa aliviá bo doló. Pero si bo purba di sigui algun di e sugerensianan ei, lo bo por haña un sierto grado di alivio.