E Punto di Bista Bíbliko

Suavedat Ta un Señal di Debilidat?

“E sirbidó di Señor no mester ta pleitadó, ma kariñoso ku tur hende.”—2 TIMOTEO 2:24.

HOPI tempu promé ku nos nase, segun ku nos kueru ta desaroyá nos ta haña heful. For di nos nasementu nos ta kuminsá anhelá e karisia tierno di nos mama. Durante nos infansia, nos tendensia pa smail, nos kapasidat pa desaroyá emoshonalmente i asta nos deseo pa desaroyá abilidatnan di komuniká ta dependé di e kantidat di kariño ku nos ta risibí di nos mayornan.

Sin embargo, Beibel a profetisá ku den e último dianan, hende lo ta “desobedesidu na mayornan, ingrato, impio, sin amor [“kariño natural,” NW].” Kualidatnan ku ta reflehá suavedat tal komo kariño i kompashon lo a bira masha skars, ya ku hende lo ta “stimadó di nan mes” i “grosero, odiadó di loke ta bon.”—2 Timoteo 3:1-3.

Hopi hende awe ta pensa ku nan mester ta ròf sin ningun sintimentu pa otronan. Nan ta pensa ku ser suave  òf kariñoso ta un señal di debilidat. Pero esei ta asina?

Suave, Pero Tòg Poderoso

Beibel ta deskribí Yehova Dios komo “un guerero.” (Eksodo 15:3) E ta e Fuente prinsipal di tur poder. (Salmo 62:11; Romanonan 1:20) Tòg, Yehova su fortalesa no a strob’é di ta ‘yen di kompashon i miserikòrdioso’ ora el a rekompensá e hòmber fiel Jòb. (Santiago 5:11) Den su trato ku e pueblo di Israel, Yehova a deskribí e relashon di mas tierno ku por eksistí dor di kompará su sintimentunan ku esnan di un mama ku ta duna yu pechu i ku ta sinti duele di e “yu di su barika.”—Isaias 49:15, NW.

Hesus tambe a demostrá tantu poder komo suavedat. Di un manera konvinsente i firme el a denunsiá e lidernan religioso hipókrita di su tempu. (Mateo 23:1-33) Ku un vigor tambe el a kore ku e kambiadónan di plaka golos for di e tèmpel. (Mateo 21:12, 13) Pero Hesus su odio kontra korupshon i golosidat a pon’é pèrdè heful? Di ningun manera! Hesus tabata konosí komo un persona ku tabata trata otronan ku kariño òf suavedat. Sí, el a asta kompará su mes ku un galiña ku “ta hunta su puitunan bou di su alanan.”—Lukas 13:34.

Duru di Pafó òf Fuerte di Paden?

Beibel ta animá kristiannan berdadero pa imitá Kristu dor di bisti “e hende nobo, ku a wòrdu kreá segun Dios.” (Efesionan 4:20-24) E ta bisa nos pa “pone un banda e hende bieu ku su práktikanan malbado,” meskos ku un kangreu ta kita su kaska bieu pa e por krese. (Kolosensenan 3:9) Sin embargo, distinto di e kurpa di kangreu ku ta bira duru atrobe despues ku e kita su kaska bieu, Beibel ta manda nos pa bisti nos mes permanentemente ku “un kurason di kompashon, kariño . . . i pasenshi.” (Kolosensenan 3:12) P’esei anto, nos mester tin un karakter suave.

E echo ku nos tin un karakter suave no ta nifiká ku nos ta débil. Al kontrario, e ta rekerí ku nos tin ku laga ‘e spiritu di Yehova fortalesé e hende ku nos ta di paden.’ (Efesionan 3:16) Por ehèmpel, un hòmber ku yama Lee a bisa: “No muchu tempu pasá, mi tabata un persona kruel i malbado. Asta mi aparensia tabata intimidante, pasobra mi a laga bora vários parti di mi kurpa pa bisti renchi. Mi tabata desididu pa gana hopi plaka i no tabata vasilá pa usa palabra malu ni violensia pa logra loke mi ke. Mi no tabatin kompashon.” Apesar di esei, Lee a kuminsá studia Beibel ku un kompañero di trabou i a siña konosé Yehova Dios i stim’é. El a kita su personalidat bieu i a siña ehersé dominio propio. Awor e ta ekspresá su amor pa hende dor di usa su tempu boluntariamente pa yuda nan studia Beibel.

Un tempu, apòstel Pablo tambe tabata un hòmber “masha agresivo mes” ku a usa violensia pa logra su metanan. (1 Timoteo 1:13; Echonan 9:1, 2) Sin embargo, ora Pablo a bin komprondé i apresiá e miserikòrdia i amor ku Yehova Dios i Hesukristu a mustra na dje, el a reakshoná dor di hasi esfuerso pa imitá e kualidatnan ei. (1 Korintionan 11:1) Ounke Pablo a para firme pa prinsipionan kristian, el a siña ser suave ora e tabata trata ku otro hende. Sí, Pablo a ekspresá su tierno kariño na su rumannan sin reserva.—Echonan 20:31, 36-38; Filemon 12.

Kon pa Haña e Forsa pa Ser Suave

Manera e eksperensianan di tantu Lee komo di apòstel Pablo ta mustra, pa un persona siña trata otro hende ku suavedat, e no tin nodi di tin un karakter débil. Al kontrario, pa un persona transformá su mente i akshonnan i pa lucha kontra e tendensia karnal di “paga malu ku malu,” e mester ta hopi fuerte.—Romanonan 12:2, 17.

Nos tambe por siña ser tierno i kompasivo dor di lesa e Palabra di Dios riba un base regular i meditá riba e amor i miserikòrdia ku Yehova Dios i su Yu, Hesukristu, a ekstendé na nos kaba. Dor di hasi esei, nos lo permití e poder di e Palabra di Dios suavisá nos kurason. (2 Krónikanan 34:26, 27; Hebreonan 4:12) Sin importá e background di nos famia òf ki kosnan kruel nos a eksperensiá den bida, nos por siña pa ta “kariñoso ku tur hende.”—2 Timoteo 2:24.

[Plachi na página 18]

Un bon tata ta kariñoso ku su yunan