Yudansa i Protekshon pa Hóbennan

TA MASHA tristu ora un hobensita—kende e mes ainda ta un mucha—ta sali na estado anto e no ta kasá. Sin embargo, embaraso hubenil ta tur kaminda, i ta afektá tur hende den un manera òf otro. E tragedia di embaraso hubenil ta djis un prueba mas ku ta na su lugá ku Dios a manda pa “hui for di inmoralidat.”—1 Korintionan 6:18.

No opstante, de bes en kuando, un hobensita ku a ser instruí den e kaminda di Dios ta skohe pa no hasi kaso òf ta rechasá loke e sa. E ta kometé inmoralidat seksual i ta sali na estado. Kon kristiannan berdadero ta reakshoná? Ora un mucha asina ku a kue mal kaminda duna prueba ku el a repentí, su mayornan i otro miembronan di e kongregashon kristian amorosamente mester dun’é un man i sosten’é.

Tuma atrobe e kaso di Nicole. Su mayornan  tabata kri’é pa bira un Testigu di Yehova. Pues tabata hopi doloroso ora ku el a sali na estado sin ta kasá. Sin embargo, Nicole ta kòrda: “Rumannan kristian tabata bin mi kas i purba animá mi pa studia Beibel i keda serka di Yehova.”

Esaki no ta nifiká ku Testigunan di Yehova ta aprobá inmoralidat seksual. Pero nan ta rekonosé ku dor di apliká prinsipionan bíbliko, malechornan por ser “transformá.” (Romanonan 12:2) Nan ta kere firmemente ku Dios ta pordoná malechornan ku arepentí. (Efesionan 1:7) Tambe nan ta rekonosé ku asta si un yu a ser konsebí pafó di matrimonio, e yu no a hasi nada malu. P’esei en bes di marka e yu, miembronan di e kongregashon kristian ta mustr’é e mesun tierno kariño, kompashon i bondat ku nan lo a mustra na kualke otro yu entre nan.—Kolosensenan 3:12.

Por ehèmpel, un mama soltero a kuminsá studia Beibel ku Testigunan di Yehova. El a reakshoná masha lihé riba e mensahe di Beibel i a hasi kambionan grandi den su bida. El a bisa di e Testigunan: “Nan tur a demostrá berdadero interes den ami ku mi yunan. Nan a duna mi kuminda i paña ora tabata nesesario i tambe yudansa finansiero. Ora mi a kualifiká pa sali den sirbishi di vèlt ku Testigunan di Yehova, nan tabata wak mi yunan pa mi. Nan a hasi tur loke nan tabata por pa yuda mi kultivá berdadero amor pa Yehova.”

Kon pa Prevení

Pero, ta hopi mas mihó pa yuda hóbennan pa asina nan no tin nodi kai mes den tal problema. P’esei Testigunan di Yehova ta purba perkurá pa nan yunan lanta den un ambiente di famia kaminda tin amor i kariño. En bes di djis purba spanta nan yunan ku e peliger di haña AIDS òf asta di sali na estado, Testigunan ta purba inkulká un berdadero amor pa Yehova Dios i pa su leinan den hóbennan. (Salmo 119:97) Nan ta kere ku mester duna yunan informashon eksakto tokante sèks. Mas importante, nan ta haña ku for di infansia mester siña yunan e prinsipionan moral ku tin den Beibel. (2 Timoteo 3:15) Na Salònnan di Reino lokal di Testigunan di Yehova nan ta risibí instrukshon formal. Sin embargo, mayornan Testigu ta haña e animashon tambe pa studia Beibel ku nan yunan riba un base personal. Tin literatura produsí pa yuda mayornan duna nan yunan guia moral, manera por ehèmpel e buki Loke hovenan sa puntra—Contesta práctica. *

Siguiendo e normanan moral estrikto di Beibel ta bai kontra e ola di inmoralidat ku ta asotá e mundu. Pero e ta un estilo di bida ku lo por spar miónes di mucha muhé di e tragedia di embaraso hubenil.

[Nota]

[Plachi na página 12]

Kristiannan berdadero ta trata mamanan soltero ku bondat i konsiderashon