Unda Bo Por Haña Berdadero Speransa?

IMAGINÁ bo ku bo oloshi a stòp di traha, i ta parse ku el a daña. Si bo ke laga drech’é, lo bo ripará ku tin masha hopi opshon. Tin hopi propaganda; tur ta garantisá bon servisio, ma algun ta zona kontradiktorio. Pero, kiko lo bo hasi si bo haña sa ku e persona ku hopi aña pasá a inventá e tipo di oloshi ei ta bo bisiña? Es mas, e ta dispuesto pa drecha bo oloshi sin kobra. Ta mas ku klaru ken lo bo skohe pa drecha bo oloshi!

Nos por kompará e oloshi ei ku e speransa ku bo tin. Si bo ta haña ku bo ta pèrdiendo speransa—meskos ku hopi hende den e tempu difísil akí—unda lo bo buska yudansa? Masha hopi hende ta bisa ku nan por solushoná e problema, pero nan sugerensianan sa ta konfuso i kontradiktorio. Pakiko no bai serka e Persona ku a diseñá hende ku e kapasidat di tene speransa? Beibel ta bisa ku “e no ta masha leu for di kada un di nos” i ku e ta kla pa yuda nos.—Echonan 17:27; 1 Pedro 5:7.

Un Definishon Mas Amplio di Speransa

Beibel su konsepto di speransa ta mas amplio i profundo ku e konsepto ku por lo general dòkter, sientífiko i sikólogo ta usa. E palabranan na e idiomanan original di Beibel ku ta ser tradusí komo “speransa” ta nifiká warda ansiosamente riba algu i spera algu bon. Bon mirá, speransa ta konsistí di dos punto básiko: e deseo di haña algu bon i tambe e base pa kere ku e kos bon ei lo bini. E speransa ku Beibel ta ofresé no ke men sera wowo pa realidat i biba den un mundu di fantasia. E ta basá firmemente riba echo i prueba.

Den e aspekto ei, speransa ta meskos ku fe. Fe mester ta basá riba prueba; fe no ta djis kere siegamente. (Hebreonan 11:1) Pero tòg, Beibel ta hasi un distinshon entre fe i speransa.—1 Korintionan 13:13.

Pa ilustrá: Ora bo pidi un amigu hasi bo un fabor, bo tin e speransa ku e lo yuda bo. Bo speransa no ta sin base, pasobra bo tin fe den bo amigu; bo konos’é bon, i bo a yega di mira kon el a demostrá bondat i generosidat. Bo fe i bo speransa ta hopi ligá na otro i asta ta dependé di otro, pero nan no ta meskos. Kon nos por kultivá e speransa ei den Dios?

E Base pa Speransa

Dios ta e fuente di berdadero speransa. Den tempu di Beibel, nan a yama Yehova e “speransa di Israel.” (Yeremías 14:8) Tur speransa konfiabel ku Dios su pueblo tabatin a bini di Yehova, ta p’esei e tabata nan speransa. E speransa ei no tabata djis un deseo. Dios a duna nan un base firme pa tene speransa. Durante e siglonan ku Dios a trata ku nan, e tabatin e reputashon di kumpli ku tur e promesanan ku el a hasi. Hosue, un lider di Israel, a bisa: “Boso sa . . . ku ni un palabra di tur e bon palabranan ku SEÑOR boso Dios a papia tokante di boso no a faya.”—Hosue 23:14.

Despues di míles di aña, Yehova a mantené su bon reputashon. Beibel ta konta di masha hopi promesa remarkabel ku Dios a hasi i kon nan a kumpli den tur detaye atraves di historia. Dios su promesanan profétiko ta asina konfiabel ku tin biaha tabata skirbi nan komo si fuera nan a kumpli kaba.

Ta p’esei nos por yama Beibel un buki di speransa. Segun ku bo ta studia kon Beibel ta konta tokante e manera ku Dios a trata ku hende, lo bo haña mas motibu pa pone bo speransa den Dios. Apòstel Pablo a skirbi: “Tur loke a ser skirbí anteriormente a ser skirbí pa nos instrukshon, pa asina mediante nos perseveransia i e konsuelo for di e Skritura nos por tin speransa.”—Romanonan 15:4.

Ki Speransa Dios Ta Duna Nos?

Ki ora nos tin mas mester di speransa? Esei ta ora nos ta enfrentá morto. Pero pa hopi hende, ta nèt e ora ei, por ehèmpel, ora morto ranka un ser kerí for di nan, ta mas difísil pa karga speransa. Tin algu mas pió ku morto? Morto ta persiguí nos tur sin eksepshon. Nos no por evitá su gara ni hasi nada pa eliminá su efekto. Ku bon motibu, Beibel ta yama morto “e último enemigu.”—1 Korintionan 15:26.

Kon anto nos por haña speransa ora nos ta enfrentá morto? E versíkulo di Beibel ku ta yama morto e último enemigu ta bisa tambe ku “lo e kaba kuné.” Yehova Dios ta mas fuerte ku morto. El a demostrá esei na vários okashon. Den ki manera? El a resusitá hende for di morto. Beibel ta menshoná nuebe okashon ku Dios a usa su poder pa lanta hende for di morto.

Un okashon spesial tabata ora ku Yehova a duna su Yu, Hesus, poder pa resusitá su amigu stimá Lázaro. Lázaro ya kaba tabatin kuater dia morto. Anto Hesus no a resusit’é den sekreto, sino abiertamente dilanti di un públiko grandi.—Huan 11:38-48, 53; 12:9, 10.

Kisas bo ta puntra bo mes dikon a resusitá e hendenan ei si despues tòg nan a bira bieu i muri. Esei ta bèrdat, pero debí na e relatonan konfiabel ei di resurekshon, nos por tin mas ku djis e deseo di mira nos sernan kerí lanta for di morto; nos tin motibu pa kere ku nan lo lanta tambe. Ku otro palabra, nos tin berdadero speransa.

Hesus a bisa: “Ami ta e resurekshon i e bida.” (Huan 11:25) Hesus ta Esun ku Yehova lo duna poder pa resusitá hende na tur parti di mundu. Hesus a bisa: “Lo yega e ora ku tur esnan ku ta den graf lo tende [Kristu] su stèm i lo sali afó.” (Huan 5:28, 29) Sí, tur hende ku a bai sosegá den graf tin e speransa di ser resusitá pa biba den Paradeis riba tera.

Profeta Isaías a deskribí resurekshon ku e palabranan emoshonante akí: “Bo mortonan lo bolbe biba, kadavernan di mi pueblo lo lanta atrobe. Boso tur, drumí bou’i tera, spièrta i grita di alegria. E serena ku ta tapa boso ta yená ku lus. P’esei tera ta debolbé su mortonan.”—Isaías 26:19, BPK.

Bo no ta haña ku e promesa ei ta un konsuelo? Hende morto ta den e situashon di mas sigur ku nos por imaginá; nan ta manera un yu protehá den barika di su mama. Asina tambe, hende ku a bai sosegá ta bon wardá den e memoria di Dios Todopoderoso, un memoria sin límite. (Lukas 20:37, 38) Pronto, lo e resusitá nan pa biba den un mundu felis, kaminda nan lo ser risibí ku brasa habrí, meskos ku un famia amoroso ta risibí nan yu resien nasí! Pues, asta ora nos enfrentá morto, nos por tin speransa.

Loke Speransa Por Hasi pa Bo

Pablo a siña nos hopi kos tokante e balor di speransa. El a papia di speransa komo un parti importante di nos armadura spiritual: e hèlm. (1 Tesalonisensenan 5:8) Kiko Pablo tabata ke men ku esei? Den tempu di Beibel, sòldá a bisti hèlm di metal pa bai den bataya, hopi biaha riba un mùts di felpa òf di kueru. Danki na e hèlm, mayoria di sla na kabes no tabata kousa daño mortal. P’esei, meskos ku hèlm ta protehá kabes, asina tambe speransa ta protehá mente, sí, e kapasidat di pensa. Si bo tin un speransa firme ku ta na armonia ku e propósito di Dios, e ora ei ni pániko ni desesperashon lo no por kita bo pas mental ora bo ta enfrentá difikultat. Ta ken no tin mester di un hèlm asina?

Pablo a usa un otro ilustrashon bibu tokante speransa ku ta relashoná ku e boluntat di Dios. El a skirbi: “Nos tin e speransa akí manera un anker pa nos alma; e ta sigur i tambe firme.” (Hebreonan 6:19) Mas ku un biaha, barku a yega di senk ku Pablo, p’esei e tabata sa e balor di un anker. Ora tin mal tempu na kaminda, nabegante sa baha e anker di e barku. Si e anker yega fondo di laman i gara bon, e barku tin chèns di wanta e tormenta sin sufri hopi daño. Ma si esei no sosodé, bientu lo por hiba e barku kosta i kibr’é den baranka.

Di mes manera, si e promesanan di Dios ta un speransa “sigur i tambe firme,” e speransa ei lo yuda nos wanta e tormenta den e tempu difísil ku nos ta biba aden awe. Yehova ta primintí ku pronto lo yega e tempu ku hende lo no sufri mas pa motibu di guera, kriminalidat, tristesa ni morto. (Wak e kuadro na página 10.) Si nos tene duru na e speransa ei, nos por evitá desaster. I esei lo duna nos e motivashon ku nos mester pa biba segun e normanan di Dios i rechasá mundu su kondukta kaótiko i inmoral ku ta asina komun awe.

E speransa ku Yehova ta ofresé ta na bo alkanse tambe. E ke pa bo disfrutá di e bida manera tabata su propósito na kuminsamentu. Dios su deseo ta pa “tur sorto di hende ser salbá.” Kon hende por salba? Di promé, un hende tin ku haña “konosementu eksakto di e bèrdat.” (1 Timoteo 2:4) E editornan di e revista akí ta animá bo pa haña e konosementu ei tokante e bèrdat di e Palabra di Dios, pasobra esei por duna bo bida. Pa medio di e konosementu ei, Dios lo duna bo un speransa ku ta muchu mas superior na kualke speransa ku e mundu akí ta ofresé.

Si bo tin e speransa ei, nunka lo bo sinti bo desesperá, pasobra Dios por duna bo e forsa nesesario pa logra kualke meta ku bo tin ku ta na armonia ku su boluntat. (2 Korintionan 4:7; Filipensenan 4:13) No ta e tipo di speransa ei bo mester? Pues, si bo mester di speransa i ta busk’é, no entregá. Tin speransa. Bo por hañ’é!

[Kuadro/Plachi]

Motibu pa Karga Speransa

E siguiente tekstonan di Beibel por yuda bo haña mas speransa:

▪ Dios ta primintí un futuro felis.

Su Palabra ta bisa ku Tera lo bira un paradeis, habitá pa un famia humano felis i uní.—Salmo 37:11, 29; Isaías 25:8; Revelashon 21:3, 4.

▪ Dios no por gaña.

Yehova ta odia tur forma di gañamentu. E ta un Dios kompletamente santu i puru, p’esei ta imposibel pa e gaña.—Proverbionan 6:16-19; Isaías 6:2, 3; Tito 1:2; Hebreonan 6:18.

▪ Dios su poder no tin límite.

Ta Yehova so ta todopoderoso. No tin nada den universo ku por stroba Dios di kumpli ku loke el a primintí.—Éksodo 15:11; Isaías 40:25, 26.

▪ Dios ke pa bo biba pa semper.

​—Huan 3:16; 1 Timoteo 2:3, 4.

▪ Dios semper ta spera lo mihó di nos.

Yehova ta skohe pa enfoká riba nos bon kualidatnan i akshonnan, i no riba nos defektonan i fayonan. (Salmo 103:12-14; 130:3; Hebreonan 6:10) E tin e speransa ku nos lo hasi loke ta korekto i e ta keda kontentu ora nos hasié.—Proverbionan 27:11.

▪ Dios ta primintí di yuda bo alkansá bo metanan ku ta na armonia ku su propósito.

Su sirbidónan no tin ku sinti nan mes desesperá nunka. Dios ta yuda nos i generosamente e ta duna nos su spiritu santu, ku ta e forsa di mas poderoso ku ta eksistí.—Filipensenan 4:13.

▪ Speransa den Dios nunka ta enbano.

Dios nunka lo desepshoná bo, pasobra e ta fiel i kompletamente konfiabel.​—Salmo 25:3.

[Plachi]

Meskos ku hèlm ta protehá kabes, asina tambe speransa ta protehá mente

[Plachi]

Meskos ku un anker, speransa ku tin un base firme por duna stabilidat

[Rekonosimentu]

Kortesia di René Seindal/Ku pèrmit di Museo Archeologico Regionale A. Salinas di Palermo