Mozaïk—Pintura den Piedra

DI UN ESKRITOR DI SPIÈRTA! NA ITALIA

HENDE a yega di yama mozaïk “un forma di arte hopi straño,” un téknika “impreshonante” di dekorá, i un di “e formanan di arte dekorativo mas duradero ku a sobrebibí for di antigwedat.” E artesano italiano di siglo 15, Domenico Ghirlandajo, a yam’é e “manera outéntiko pa traha pintura ku ta dura pa eternidat.” Sea loke sea bo ta pensa di mozaïk, e tin un historia berdaderamente fasinante.

Mozaïk por wòrdu definí komo e arte di dekorá un superfisie—manera flur, muraya òf bodega—ku diseñonan trahá di pida-pida piedra, glas òf tegel chikitu pegá banda di otro. For di antigwedat hende a usa e téknika di mozaïk pa dòrna flur i muraya. Tambe nan a usa e téknika aki pa dekorá baño, pisina i fòntein—lugánan kaminda humedat lo por daña otro tipo di arte ku ta mas delikado.

Tin un variedat amplio di diseño ku mozaïk: flur simpel di un solo koló, diseñonan pretu ku blanku, diseñonan di flor kompliká i kolorido, pinturanan ku ta impreshonante, pero difísil pa traha.

Invento i Desaroyo

Nos no tin sigur ta ken a inventá mozaïk. E sivilisashonnan di Egipto i di Sumer di antigwedat a dòrna nan edifisionan ku patronchinan kolorido. Sin embargo, ta parse ku e arte a kaba na nada i no a sigui desaroyá. Nan ta pensa ku e arte aki a originá na paisnan tal komo Asia Menor, Cartago, Gresia, Kreta, Siria, Sisilia i Spaña. Komo resultado, segun e teoria di un eskritor, e téknika a wòrdu “inventá, lubidá i inventá di nobo na diferente tempu i na vários lugá di e region mediteráneo.”

Obranan di mozaïk di hopi tempu pasá—algun for di siglo 9 promé ku nos era—a wòrdu trahá di piedra lizu ku patronchinan simpel. E koló natural di piedra ku nan a haña  lokalmente a determiná e matis di kolónan. Generalmente e piedranan tabatin un diameter di 10 pa 22 milimeter, pero den algun parti mas kompliká di e patronchinan tabatin piedra hopi chikitu di 5 milimeter. Pa siglo 4 promé ku nos era, artesanonan a kuminsá kòrta piedra chikitu den tamaño mas chikitu ainda. Esaki a permití nan traha ku mas presishon. Pokopoko pero sigur nan a kuminsá usa tesera, un tipo di piedra firkant ku aspekto di marmer òf glas, na lugá di gewon piedra chikitu. E variedat di matis di piedra di tesera ta mas amplio i nan ta mas fásil pa pega i pa krea e diseño deseá. Tesera a produsí un superfisie lizu ku artesanonan por a pòlish i trata ku waks pa oumentá e brio di e kolónan. Pa siglo 2 di nos era, tambe nan tabata hasi hopi uso di pida-pida glas di koló, lokual a duna nan hopi mas posibilidat.

E periodo di kultura griego (rònt di aña 300 te ku aña 30 promé ku nos era) a produsí bunita obranan di mozaïk riba piedra. Segun e buki Glossario tecnico-storico del mosaico (Dikshonario Tékniko-Históriko di Arte di Mozaïk), “dor di usa tur tipo di koló disponibel i dor di redusí e tamaño di tesera na un milimeter kúbiko . . . , e obranan di artesania griego tabata kasi mes bunita ku  pinturanan riba muraya.” Nan a usa koló di un manera ingenioso pa krea efekto di lus, sombra, profundidat, kantidat i dimenshon.

Loke ta típiko di mozaïk griego ta e detayenan kompliká ku bo por mira den un emblema, esta un pintura den un otro pintura—hopi bes reprodukshonnan di kalidat haltu di pinturanan famoso—rondoná pa un leshi elaborá. Algun emblema tin piedra di tesera asina chikitu i bon hinká den otro ku ta parse ku ta fèrf nan a fèrf nan ku kuashi, miéntras ku ta pida-pida piedra nan ta.

Mozaïk di Roma di Antigwedat

Hopi bes hende ta konsiderá mozaïk komo arte romano dor di e gran kantidat di obranan ku nan a haña na Italia i provinsianan di e Imperio Romano. Un publikashon ta bisa: “Nan a haña míles di e tipo di flur aki den edifisionan di e époka romano for di e parti nort di Gran Bretaña te na Libia, for di e kosta Atlántiko te na e desierto di Siria. Pa algun hende, esakinan ta rastro di e presensia romano den un área pasobra e téknika úniko aki a kana pareu ku e kultura romano ku a plama rònt.”

Sin embargo, obranan kolorido di mozaïk no a satisfasé e nesesidat di e Imperio Romano. E stat a krese masha tantu mes durante promé siglo di nos era, lokual a pone ku e demanda pa obranan di mozaïk trahá lihé i mas barata a oumentá. Esaki a pone ku hende a kuminsá produsí obranan ku uso di tesera pretu ku blanku so. Produkshon a oumentá rápidamente, i segun e Enciclopedia dell’arte antica (Ensiklopedia di Arte Antik), “tur famia bon pará den kualkier stat di e Imperio Romano tabatin un obra di m[ozaïk].”

Por haña réplikanan eksakto di sierto obranan di mozaïk na lugánan hopi leu for di otro. Esaki ta indiká ku timnan di artesano—òf kisas bukinan ku ta kontené patronchinan di mozaïk—a move di un área di konstrukshon pa  otro. Si un hende a deseá esei, e por a hasi pedido di antemano di un emblema, laga trah’é i transport’é pa e área di konstrukshon riba un teblachi di marmer òf terra-cotta, anto despues laga instal’é. Tur otro trabou di mozaïk tabata wòrdu hasí na e lugá di konstrukshon.

Mester a plania bon pa fit e diseñonan i rantnan den nan frame. Tabata paga bon tinu ora di traha e fundeshi i su superfisie, pa hasi sigur ku e ta lizu i na waterpas. Despues nan tabata basha un kapa fini di semènt (werkvloer) riba un área di kisas ménos ku un meter kuadrá—sufisiente chikitu pa nan por kaba di traha riba dje promé ku e seka. Nan tabata marka skèts riba e superfisie komo guia. Despues nan tabata kòrta e piedranan di tesera na midí, i e artesano tabata kuminsá pega nan.

E artesano tabata près e teseranan un pa un den e semènt, lokual tabata keda sali entre e mozaïknan. Unabes ku nan a kubri un área, nan tabata traha un werkvloer den e siguiente área, i despues un otro, etc. Artesanonan eksperto tabata traha den sekshonnan mas difísil, miéntras nan tabata laga nan asistèntnan yena e áreanan mas fásil.

Mozaïk i Kristiandat

Den siglo 4 di nos era, a kuminsá apliká e arte di mozaïk den misanan di kristiandat. E obranan aki a sirbi pa instruí adoradónan, dor ku hopi bes nan a representá esenanan bíbliko. Lus ku a reflehá riba oro i glas di koló a krea un oura místiko. E Storia dell’arte italiana (E Historia di Arte Italiano) ta bisa: “Arte di mozaïk tabata na armonia perfekto ku e ideologia di e tempu ei, bou di influensia fuerte . . . di neoplatonismo. Un dado momentu obranan di mozaïk a kuminsá transformá materia sin bida den puru spiritualidat, lus i forma.” * Esei ta hopi diferente for di e manera simpel di adorá ku Hesukristu, e fundadó di kristianismo, a siña.—Juan 4:21-24.

Iglesianan bizantino ta kontené algun ehèmpel impreshonante di obra di arte mozaïk. Den algun kas di adorashon, piedra di tesera ta kubri kasi henter e murayanan interior i bodeganan. Por mira loke a ser yamá “obranan maestro di mozaïk kristian” na Ravenna, Italia, kaminda koló di oro ta dominá den background, representando lus divino i mistisismo difísil òf imposibel pa komprondé.

Hende a sigui usa mozaïk masha hopi mes den misanan na Wèst Europa durante henter e periodo di Edat Medio, i e mundu islámiko tambe a us’é na un manera maestral. Durante e periodo di Renaissanse na Italia, shòpnan ku tabatin un relashon ku katedralnan grandi, manera San Marko na Venesia i San Pedro na Roma, a bira sentronan di produkshon di mozaïk. Mas o ménos na aña 1775, artesanonan na Roma a siña kon pa kòrta glas di smèlt di tur tipo di koló ku bo por imaginá i traha tesera hopi chikitu di nan. Esaki a hasi posibel ku nan por a reprodusí pintura den forma di mozaïk na miniatura.

Método i Uso Moderno

Awendia artesanonan di mozaïk ta usa e asina yamá método indirekto. Den shòp nan ta pega tesera boka abou riba un patronchi di papel. Despues nan ta hiba kada sekshon di e mozaïknan na e lugá ku mester pega nan, kaminda nan ta ser pegá boka ariba den un frame òf werkvloer. Ora e semènt seka, nan ta laba e mozaïknan pa kita e papel ku leim, i laga e parti ariba di e piedranan bira visibel. E método aki ta redusí tempu i trabou, pero e mozaïk no ta keda bria mes hopi ku e mozaïknan di Edat Medio.

Asina mes, masha hopi edifisio di siglo 19 manera stadhuis, teater i misa, a wòrdu dekorá usando e método aki. Ademas, hende a usa e método aki ekstensamente den museo, stashonnan di trein bou di tera, sentro komersial, parkenan i lugánan di rekreo, for di Mexico City te Moskú i for di Israel te Hapon. Hende a konsiderá e superfisie di mozaïk ku ta lizu, pero tòg ku hopi aspekto, komo algu ideal pa dekorá fachada di edifisionan moderno.

E artista italiano i historiadó di arte di siglo 16 Giorgio Vasari a skirbi: “Mozaïk ta e ‘pintura’ di mas duradero ku ta eksistí. Otro pinturanan ta blikia ku tempu, pero mozaïk ta sigui bria segun ku tempu pasa.” Sí, e arte ku nos ta mira reflehá den obranan di mozaïk ta atraé nos. Mozaïk en bèrdat ta pinturanan fasinante den piedra!

[Nota]

[Plachi na página 18]

Mapa di Yerusalèm (siglo 6 di nos era)

[Rekonosementu]

Garo Nalbandian

[Plachi na página 18]

Alehandro e Grandi (siglo 2 promé ku nos era)

[Rekonosementu]

Erich Lessing/Art Resource, NY

[Plachinan na página 18, 19]

Kupel dje Baranka, Yerusalèm (trahá na aña 685-691 di nos era)

[Plachi na página 19]

“Dionysos,” Antiokia (mas o ménos aña 325 di nos era)

[Rekonosementu]

Museum of Art, Rhode Island School of Design, by exchange with the Worcester Art Museum, photography by Del Bogart

[Plachi na página 20]

Tesera, glas di koló i piedra chikitu ainda ta wòrdu usá den mozaïk moderno

[Plachi na página 20]

Mozaïk ku por ser mirá na Lynn Heritage State Park, Massachusetts

[Rekonosementu]

Kindra Clineff/Index Stock Photography

[Plachinan na página 20]

Mozaïk diseñá pa Antoni Gaudí na Barcelona (1852-1926)

[Rekonosementu]

Foto: Por cortesía de la Fundació Caixa Catalunya