Un Dilema Religioso na Brazil Kolonial

DI E KORESPONSAL DI SPIÈRTA! NA BRAZIL

DIA 30 di novèmber 1996, representantenan di e Konferensia Riba Mishon Mundial i Evangelismo (organisá pa Konsilio Mundial di Iglesia) a reuní na un haf na Salvador, Brazil. E sitio tabata signifikativo. E haf aki ta kaminda den siglonan pasá nan a bende miónes di afrikano komo katibu. Papiando di e biahe desafortuná di e prezunan ei, un pastor a bisa: “E laman aki a fangu nan lágrimanan.” Riba e dia spesial aki di konmemorashon, hende a ekspresá remordimentu pa loke un orador a yama kristianismo su partisipashon eskandaloso den sklabitut. Kon religion tabata enbolbí den e komersio di katibu na Brazil tempu ku e pais aki tabata un kolonia portugues?

“Salba Almanan Pèrdí”

Na aña 1441⁠—⁠kasi 60 aña promé ku ofisialmente nan a deskubrí Brazil⁠—⁠e nabegante portugues Antão Gonçalves a kapturá i transportá e promé kargamentu di hendenan di tribu afrikano pa Portugal. Masha tiki hende durante Edat Medio a kuestioná si prinsipionan moral a permití pa hasi prizoneronan di guera katibu, spesialmente esnan ku iglesia a katalogá komo “infielnan.” Sin embargo, durante e siguiente binti añanan, nan mester a hustifiká e komersio lukrativo di katibu den tempu di pas. Algun hende a pretendé ku dor di hasi e afrikanonan katibu, nan tabata “salba almanan pèrdí,” ya komo ku nan tabata reskatá e stranheronan aki for di nan forma di biba pagano.

E dekreto Romanus Pontifex, ku Papa Nikolas V a saka dia 8 di yanüari 1455, a duna sosten ofisial na e komersio di katibu ku ya kaba tabata prosperá. Pues, iglesia no a protehá hende kontra sklabitut. Al kontrario, segun e historiadó brazilero João Dornas Filho, algun di e pastornan tabata “promotornan kabesura” di sklabitut. Asina nan a pone e base pa sklabitut plama na Brazil ora ku kolonistanan portugues a establesé nan mes einan.

“E Úniko Opshon”

Na aña 1549, misioneronan hesuita ku a kaba di yega Brazil a keda hopi molestiá ora nan a deskubrí ku gran parti di e forsa laboral tabata konsistí di katibunan kapturá ilegalmente. Doñonan di tereno simplemente a obligá nan bin traha den nan kunuku i plantashonnan di suku. Na 1550, e superior hesuita Manuel de Nóbrega a skirbi: “Mayoria di e hòmbernan [aki] nan konsenshi ta molestiá nan debí na e katibunan ku nan tin.” Pero tòg e doñonan di tereno a keda ku nan katibunan, apesar ku esaki a nifiká ku kisas nan lo no a haña apsolushon òf pordon di iglesia.

Pero no a tarda ku e hesuitanan na Brazil a konfrontá un dilema. Tabata difísil pa nan hasi obranan di karidat debí na skarsedat di plaka. Un solushon tabata di kultivá e terenonan ku gobièrnu a duna nan i usa e ganashi di kosecha pa finansiá aktividatnan religioso. Pero ta ken lo a bai traha den e kunukunan aki? Segun historiadó portugues Jorge Couto, “e úniko opshon tabata pa usa e forsa laboral di katibu neger. Un solushon ku a base di prinsipionan moral a molestiá nan konsenshi, pero ku e Superior na Brazil a disidí di ignorá.”

E hesuitanan a duna apoyo na e kresiente grupo di doño di tereno ku tabata sklama pa nan haña katibu afrikano. E katibunan indjan aparentemente tabatin difikultat pa kustumbrá ku e trabou kontinuo den kunuku, i hopi bes nan a rebelá òf simplemente a hui bai den mondi. * Di otro banda, e afrikanonan  tabata traha kaba den plantashonnan di suku riba e islanan kolonial di Portugal den Oséano Atlántiko i a resultá masha efikas. Segun un eskritor di e tempu ei, e afrikanonan “nunka a hui, ni nan no tabatin niun kaminda pa hui bai.”

Pues anto, ku bendishon di e pastornan e importashon di katibu afrikano a sigui oumentá. Despues Brazil tabata dependé pisá di e komersio di katibu ku a krusa Oséano Atlántiko. Pa aña 1768 plantashi Santa Cruz ku tabata propiedat di e hesuitanan, tabatin 1.205 katibu. E religiosonan di e órden benediktino i e karmelitanan tambe a atkerí propiedat i gran kantidat di katibu. Joaquim Nabuco, un persona di siglo 19 ku a oponé sklabitut, a sklama: “E monasterionan ta yen di katibu.”

Komo ku kultivashon di e tera tabata un negoshi kompetitivo, doñonan di katibu ku tabata traha riba tereno di iglesia hopi bes a imponé un orario di trabou masha pisá. Stuart Schwartz, dosente di historia, ta remarká ku asta hopi di e pastornan ku a protestá kontra e abusu di katibu tabatin “masha tiki rèspèt pa e afrikanonan” i “a kere ku disiplina, kastigu i trabou tabata e úniko manera pa vense e katibunan su superstishon, flohera i falta di bon manera.”

“Teologia di Sklabitut”

Segun ku pastornan tabata hasi esfuerso pa trese armonia entre normanan kristian i un sistema ku tabata drei a base di abusu persistente, nan a krea un apoyo moral pa sklabitut. I un teólogo a yama esaki teologia di sklabitut. Siendo ku e barkunan di katibu tabata pèrtá i yen di malesa i nan a kousa morto di un gran parti di nan kargamentu humano, iglesia a insistí ku mester batisá e afrikanonan promé ku nan sali rumbo pa e Mundu Nobo. * Klaru ku e personanan ku nan kombertí asina, masha poko bes tabata risibí instrukshon religioso promé ku nan batisá nan.​—⁠Wak e kuadro “Kristiannan Instantáneo?”

Di tur manera, e oranan largu ku e katibunan mester a traha i e bida kòrtiku ku awor nan tabatin a nifiká ku e katibunan tabatin masha tiki chèns di praktiká nan religion nobo. Sin embargo, doktrinanan di iglesia relashoná ku “e separashon entre kurpa i alma” a minimisá e problema aki. E pastornan a rasoná: ‘Ta bèrdat ku e afrikanonan tabata pena debí na sklabitut kruel,  pero nan alma tabata liber. P’esei katibunan mester aseptá nan humiashon ku goso, komo parti di Dios su plan pa prepará nan pa gloria ku nan lo risibí den shelu.’

Miéntras tantu, iglesia a sigui kòrda doñonan di katibu di nan deber moral di permití nan katibunan bai misa, selebrá dianan di fiesta religioso i kasa. Saserdotenan a krítika maltrato severo, pero alabes nan a perkurá pa enfatisá e peliger di ta muchu tolerante. Un saserdote hesuita a konsehá: “Usa zuip, kadena i bui di pia, pero tur kos na su tempu i ku regla i moderashon, i lo bo mira kon lihé bo ta dominá kriánan rebelde.”

Masha poko di nan a pensa pa usa medionan ménos doloroso pa kombertí e afrikanonan. Mas bien, esnan ku abiertamente tabata apoyá sklabitut, manera e obispu brazilero Azeredo Coutinho, a duna e impreshon ku komersiantenan di katibu tabata hasi e afrikanonan un fabor! Den su defensa vigoroso di sklabitut publiká na aña 1796, Coutinho a puntra: “Lo tabata mihó i mas apropiá si kristianismo a permití [afrikanonan] muri den paganismo i idolatria en bes di den nos religion santu?” Asina tambe e misionero hesuita António Vieira a animá e afrikanonan: ‘Boso mester gradisí Dios sinfin ku el a trese boso na e pais aki, kaminda una bes boso haña instrukshon den e fe, boso lo biba komo kristian i lo salba.’

E Preis di Sklabitut

Dor di apoyá sklabitut, iglesia a spera di “salba almanan pèrdí.” Ta un ironia ku esei simplemente a prepará e kaminda pa divishon, pasobra e afrikanonan a resistí di bandoná nan kustumber- i kreensianan religioso. P’esei awe un kantidat grandi di brazilero ta praktiká sinkretismo: un religion ku ta un meskla entre katolisismo i religion di tribu afrikano.

Ounke pa algun hende di e tempu ei tabata parse masha bentahoso ku iglesia a aseptá sklabitut komo un nesesidat ekonómiko den e kolonia Brazil, riba término largu esei a resultá desastroso. E morto i sufrimentu ku sklabitut a kousa a lanta pregunta relashoná ku e étika di iglesia, i e preguntanan aki no por ser kontestá satisfaktoriamente. Den bista di un historiadó, e echo ku iglesia a aprobá sklabitut tabata komo si fuera nan a adoptá e aktitut di esnan ku profeta Isaías a denunsiá pasobra nan tabata “yama loke ta malu, bon, i loke ta bon, malu.”​—⁠Isaías 5:⁠20.

 Abusu di Katibu No Ta Kuadra ku Beibel

Beibel ta laga nos komprendé bon kla ku Yehova Dios no ta aprobá ku ‘hende ta ehersé outoridat riba un otro hende pa su daño.’ (Eklesiástes 8:⁠9) Por ehèmpel, e Lei ku Dios a duna Israel a deklará ku sekuestrá i bende un ser humano tabata kastigabel ku morto. (Éksodo 21:16) Ta bèrdat ku den Dios su pueblo antiguo tabatin un sistema di sklabitut, pero esei no ta di kompará ku e forma kruel di sklabitut ku nos a trata den e artíkulo aki. Si nos wak bon, e echo ku algun katibu israelita a opta pa keda ku nan doño ora ku nan a bini na remarke pa haña libertat, ta indiká bon kla ku den e pueblo di Dios nan no tabata abusá di e katibunan. (Deuteronomio 15:​12-17) Pues, un hende ku ta pretendé ku sklabitut den Israel ta hustifiká e inhumanidat ku a tuma lugá durante henter historia, ta saka e Skritura kompletamente for di su konteksto. *

Den su Palabra, Beibel Santu, Yehova Dios ta primintí ku pronto lo bini un fin na tur forma di sklabitut. Nos por ta masha kontentu ku den Dios su mundu nobo, hende lo no biba den miedu bou di kòntròl opresivo di un doño kruel. En bes di esei, “kada un di nan lo sinta bou di su palu di wendrùif i bou di su palu di figo, i ningun hende lo no spanta nan.”​—⁠Mikéas 4:⁠4.

[Nota]

[Komentario na página 15]

Yehova Dios Ta Priminti Ku Tur Forma di Sklabitut Lo Disparsé Pronto

[Kuadro/Plachinan na página 13]

PA DIOS ÒF PA GANASHI?

Segun Fernão de Oliveira, un erudito portugues di siglo 16, ta golosidat pa plaka⁠—⁠i no selo pa evangelisá⁠—⁠a motivá e komersiantenan di katibu. Barkunan for di Europa kargá ku produkto a kambia nan pa katibu na hafnan afrikano. E katibunan aki e ora ei a ser transportá pa e kontinente di Amérika kaminda tabata kambia nan pa suku, ku nan a hiba bèk Europa pa bende. E ruta komersial triangular aki a produsí masha hopi ganashi tantu pa e komersiantenan komo pa e monarkia portugues. Asta e pastornan a saka benefisio, pasobra nan tabata kobra un impuesto pa kada afrikano ku nan a batisá promé ku barka nan pa Amérika.

[Kuadro na página 14]

KRISTIANNAN INSTANTÁNEO?

“Na prinsipio di siglo 17, a bira un kustumber pa batisá e katibunan na Áfrika promé ku nan salida,” Hugh Thomas a skirbi den su buki The Slave Trade (E Komersio di Katibu). “Por lo general e katibunan no a haña ningun tipo di instrukshon promé ku e seremonia aki, i hopi di nan, si no ta mayoria, nunka no a yega di tende ku ta eksistí un Dios kristian. Pues e boutismo tabata algu superfisial.”

Profèser Thomas ta komentá ku normalmente nan tabata hiba e presunan misa, kaminda un instruktor di kadisashi⁠—⁠ku por lo general tambe ta un katibu⁠—⁠a papia ku e katibunan den nan idioma natal tokante nan kombertimentu. Thomas ta agregá: “Anto e pastor tabata pasa meimei di e katibunan tur konfundí, i duna kada un di nan un nòmber kristian, ku mas promé el a skirbi riba un pida papel. Tambe el a sprengu salu riba lenga di e katibunan, i despues a sigui ku awa bendita. Por último, lo el a bisa mediante un intérprete: ‘Konsiderá ku desde awor, boso ta yunan di Kristu. Boso ta saliendo rumbo pa teritorio portugues, kaminda boso lo siña asuntunan di e Fe [katóliko]. No pensa nunka mas riba boso lugá di orígen. No kome kachó, ni djaka ni kabai. Keda satisfecho ku loke boso tin.’”

[Plachi na página 13]

Papa Nikolas V

[Rekonosementu]

Culver Plachinan

[Plachi na página 15]

Sutamentu públiko, pintá dor di Johann Rugendas, kende tabata testigu di esaki den siglo 19

[Rekonosementu pa Potrèt na página 15]

Katibunan pintá na página 13 i 15: De Malerische Reise in Brasilien de Johann Moritz Rugendas, cortesia da Biblioteca Mário de Andrade, São Paulo, Brasil