Evitá e Trampa di Wega di Plaka

“Wega di plaka no a afektá mi salú físiko, i semper mi a kontrolá e kantidat di plaka ku mi tabata gasta na wega di plaka. Pero mi ta atmití ku ki ora ku mi tabata kumpra loteria, semper mi tabata skohe loke mi a konsiderá mi numbernan di suerte.”​—⁠ Linda.

HOPI persona ku ta hunga wega di plaka ta kuminsá kere den number di suerte òf amuleto di suerte. Kisas nan no ta kere ku nan ta tuma nan superstishonnan na serio, pero tòg nan ta sigui bai nan tras.

Algun hende ku ta hunga wega di plaka ta asta hasi orashon na Dios, i pidié pa e yuda nan gana. Pero Beibel ta mustra ku Dios ta kondená esnan ku ta bisa ku nan ador’é ma ta “pone mesa pa [e dios] Fortuna.” (Isaías 65:11) Sí, Dios ta odia práktikanan ku ta promové kreensia superstisioso den suerte.  Wega di plaka di mes ta animá hende pa konfia siegamente den doña Fortuna.

Tambe wega di plaka ta promové amor pa plaka abiertamente. Den e sosiedat di awendia ku kada bes ta ménos interesá den kosnan spiritual, plaka a bira un dios supstituto, i wega di plaka un forma popular di ador’é. E katedralnan nobo ta e kasinonan impreshonante, i e kredo nobo ta ku golosidat ta bon. Investigadónan a deskubrí ku e gran mayoria di hende ku ta bai kasino ta bisa ku nan ta bai, no pa entretené nan mes òf pa motibu di e ambiente, sino pa gana “hopi-hopi plaka.” Pero Beibel ta spièrta: “Amor pa plaka ta rais di tur sorto di maldat,  i algun hende, dor di deseá esaki, a desviá for di e fe, i a traspasá nan mes ku hopi doló.”​—⁠1 Timoteo 6:⁠10.

Na 1 Korintionan 6:9 i 10 Beibel ta bisa bon kla: “No laga nan gaña boso; ni . . . adoradó di dios falsu . . . ni esnan golos pa plaka . . . lo no heredá e reino di Dios.” Golosidat no ta djis un malesa sosial ku ta debilitá; e ta un malesa spiritual ku por tin konsekuensia fatal. Pero tin kura pa e malesa aki.

Nan A Haña Forsa pa Kambia

Kazushige, ku a wòrdu menshoná den e promé artíkulo, ta kòrda: “Hopi bes mi a purba stòp di hunga wega di plaka. Mi a realisá ku e gèmbelmentu ku mi amigunan na pista di kabai tabata kabando ku mi bida di famia. Semper mi tabata pèrdè tur e plaka ku mi a gana. Asta mi a pèrdè e plaka ku mi kasá a spar pa e nasementu di nos di dos yu, i finalmente mi a kuminsá usa e plaka di e kompania ku mi tabata traha p’e. Esei a pone ku mi a pèrdè rèspèt pa mi mes. Hopi bes mi esposa tabata yora i roga mi pa mi stòp di hunga wega di plaka, pero gewoon mi no por a stòp.”

Despues Kazushige a kuminsá studia Beibel ku Testigunan di Yehova. E ta bisa: “Mas mi a lesa Beibel, mas konfiansa mi a haña ku ta eksistí un Dios i ku lo mi benefisiá si mi skuch’é. Mi a yega na e desishon ku lo mi stòp di hunga wega di plaka ku e yudansa ku Dios ta duna. Pa mi sorpresa, no solamente mi a stòp di hunga wega di plaka sino tambe mi a kuminsá odi’é. Awor ora mi pensa bèk riba e angustia ku mi bisio di wega di plaka a kousa mi famia, mi kurason ta hasi doló. Mi ta sumamente gradisidu na Yehova Dios ku el a yuda mi kita for di mi adikshon na wega di plaka i ku el a yuda mi haña propósito den bida!”​—⁠Hebreonan 4:⁠12.

Asina tambe, John (menshoná tambe den e promé artíkulo) a kuminsá studia Beibel. E ta kòrda: “Mi studio di Beibel a yuda mi reevaluá mi sirkunstansianan. Pa promé bes, mi por a mira e daño ku mi bisio na wega di plaka tabata kousa tantu na ami mes komo na mi famia. Mi a bin komprondé ku wega di plaka ta promové un aktitut egoista i di golosidat den hende, kualidatnan ku Yehova ta odia. Segun ku mi a sigui studia, mi amor pa Yehova a duna mi e forsa nesesario pa libra di e bisio di wega di plaka. Mi a kuminsá hunga wega di plaka dor ku mi tabata soña ku un mihó bida. Awor ku mi a stòp di hunga wega di plaka i mi ta felis sirbiendo Yehova, e soño ei a bira realidat.”

John su esposa, Linda, tambe a disidí di stòp di hunga wega di plaka. “No tabata fásil,” e ta bisa. “Pero despues ku ami ku mi kasá a kuminsá studia Beibel ku Testigunan di Yehova, mi a siña enfoká riba e kosnan mas importante den bida. Mi a siña no solamente pa stima e kosnan ku Dios ta stima sino tambe odia e kosnan ku e ta odia, entre otro, tur forma di golosidat. Ademas di disfrutá di un bida yen di propósito, mi tin mas plaka den mi pòtmòni.”​—⁠Salmo 97:⁠10.

Dor di desaroyá un amistat íntimo ku Yehova Dios, abo tambe por haña e forsa i sabiduria nesesario pa evitá e trampa di wega di plaka. Si bo hasi esei, bo situashon finansiero, i bo salú emoshonal i spiritual lo mehorá. E ora ei lo bo tin e plaser di eksperensiá pa bo mes e bèrdat di e palabranan na Proverbionan 10:22: “E bendishon di SEÑOR ta hasi riku, i E no ta agregá tristesa na dje.”

[Komentario na página 11]

Golosidat no ta djis un malesa sosial ku ta debilitá; e ta un malesa spiritual ku por tin konsekuensia fatal

[Kuadro/Plachinan na página 9]

Wega di Plaka i Kos Sobrenatural

Den un rapòrt na e Komishon Nashonal Ku Ta Studia e Impakto di Wega di Plaka, investigadónan na e Universidat di Duke a referí na un konekshon ku ta eksistí entre e manera ku nan ta hasi propaganda pa wega di plaka, i e kreensia den kos sobrenatural. E rapòrt ta bisa: “Hopi propaganda [di loteria] ta enfoká abiertamente riba rikesa i poseshonnan material . . . Sin embargo, den e kasonan aki no ta trata di traha duru i perseverá pa haña kosnan material sino di wòrdu sirbí dor di genionan i lampi mágiko, materialismo basá riba speransa, soño i superstishon. Anto tur manager di loteria sa ku hopi di nan mihó klientenan ta gèmbel a base di superstishon personal, mapa di astrologia, informashon di hende ku ta praktiká adivinashon i ‘bukinan di soño’ hopi respetá ku tin un lista di number ku ta korespondé ku nòmber, fecha i soño. Agensianan di loteria no ta enfatisá ku tur number tin mes tantu chèns di sali i ku ora bo ta hunga numbernan popular e kantidat di plaka ku bo ta spera di gana hopi bes ta bira ménos dor ku bo ta haña mas ku un ganadó. En bes di esei, nan ta preferá di animá klientenan pa skohe (i pega na) numbernan personal signifikativo.”

[Plachinan na página 10]

“Mi amor pa Yehova a duna mi e forsa nesesario pa libra di e bisio di wega di plaka.”​—John

“Ademas di disfrutá di un bida yen di propósito, mi tin mas plaka den mi pòtmòni.”​—Linda

[Plachinan na página 10]

“Pa mi sorpresa, no solamente mi a stòp di hunga wega di plaka sino tambe mi a kuminsá odi’é.”​—Kazushige