“Tin Bes Mi Ta Pensa Cu Mi Ta Soñando!”

For di e bentana di su apartamento Lourdes ta wak stret su dilanti n’e stad. I su dedenan ta tapa su boca cu ta tembla. E ta un señora latino cu pa mas cu 20 aña a sufri na man di Alfredo, su esposo violento. Alfredo a ser motivá pa cambia. Pero ainda ta difícil pa Lourdes papia di e dolor físico i emocional cu el a pasa aden.

“Tur cos a cuminsá apénas dos siman despues di nos casamentu,” Lourdes ta bisa den un tono abou. “Un biaha, el a dal dos di mi djentenan bula afó. Un otro biaha mi a sak abou, i su moketa a dal den un kashi di paña. Pero loke mas ta hùrt mi ta ora e ta yama mi tur sorto di cos. El a yama mi ‘basura inútil’ i a trata mi como si fuera mi no tin inteligencia. Mi kier a bai, pero con mi por bai cu tres yu?”

Alfredo ta mishi cu Lourdes su scouder suavemente i ta bisa: “Mi ta un profesional cu posicion haltu. Mi a sinti mi humiyá ora corte a dagvaar mi i a duna mi un órden hurídico pa percurá proteccion pa mi casá. Mi a purba cambia, pero poco despues mi tabata haci e mésun cos atrobe.”

Con cos a bin cambia? “E señora dje tienda na skina ta un Testigo di Jehova,” Lourdes ta splica, pero awor claramente mas relahá. “El a ofrecé pa yuda mi comprendé Bijbel. Mi a siña cu pa Jehova Dios hende muher tin balor. Mi a cuminsá asistí na reunionnan di Testigonan di Jehova, maske na promé instante esei tabata haci Alfredo furioso. Asociá cu amigunan na Salon di Reino tabata un experencia nobo pa mi. Mi a keda asombrá ora mi a descubrí cu mi por tabatin mi propio creencianan, expresá nan libremente i asta siña nan na otro hende. Mi a realisá cu Dios ta apreciá mi. Esaki a duna mi curashi.

Tabatin un momento decisivo cu nunca lo mi lubidá. Ainda Alfredo tabata asistí na misa católico tur diadomingo, i e tabata protestá contra loke mi tabata haci cu Testigonan di Jehova. Mi a wak e stret den su cara i a bis’é den un manera calmu pero cu confiansa: ‘Alfredo, loke bo ta pensa no ta loke ami ta pensa.’ Anto e no a dal mi! No a dura mashá cu mi a bautisá, i den e cincu añanan cu a pasa e no a dal mi nunca mas.”

Pero cambionan mas grandi tabatin cu bin ainda. Alfredo ta splica: “Mas o ménos tres aña despues cu Lourdes a bautisá, un colega di trabou cu ta Testigo di Jehova a invitá mi na su cas, i el a splica mi cosnan fasinante di Bijbel. Sin bisa mi esposa, mi a cuminsá studia Bijbel cuné. No a dura mashá cu mi tabata bai e reunionnan huntu cu Lourdes. Hopi discurso cu mi a tende einan tabata tocante bida di famia, i esakinan hopi bes tabata laga mi sinti bergwensa.”

Alfredo a keda impresioná ora el a mira miembronan di congregacion, incluso hende homber, bari despues di reunion. Ora e tabata bishitá nan na cas, el a mira esposonan yuda nan esposa laba co’i kibra. E cosnan chikitu aki a mustra Alfredo con amor berdadero ta actua.

Poco tempu despues, Alfredo a bautisá, i awor e cu su esposa ta sirbi como minister di tempu completo. “Hopi bes e ta yuda mi limpia mesa despues di come i ta drecha cama,” Lourdes ta bisa. “E ta bisa mi cu mi cuminda ta bon, i e ta laga mi scoge, por ehempel ki música lo mi tin gana di scucha of loke nos lo cumpra pa cas. Ántes Alfredo nunca lo a haci e cosnan aki! Poco dia ei, pa promé bes, el a trece un bukèt di flor pa mi. Tin bes mi ta pensa cu mi ta soñando!”

 [Plachi na página 10]

“Mi a realisá cu Dios ta apreciá mi. Esaki a duna mi curashi”

[Plachi na página 10]

Alfredo a mira esposonan yuda nan esposa laba co’i kibra

[Plachi na página 10]

Alfredo a keda impresioná ora el a mira miembronan di congregacion, incluso hende homber, bari despues di reunion

[Plachi na página 10]

“Poco dia ei, pa promé bes, el a trece un bukèt di flor pa mi”