Hóbennan Sa Puntra . . .

Mi Mester Conta un Hende Cu Mi Ta Deprimí?

5“Ora mi ta sinti mi deprimí, na promé instante mi ta preferá di no papia tocante dje pasobra por ta hende ta bai pensa cu mi ta un mucha problemático. Pero despues mi ta realisá cu mi tin cu papia cu un hende pa mi por haña un poco yudansa.”—Alejandro, 13 aña.

“Ora ami ta sinti mi deprimí, mi no ta bai cerca mi amigunan, pasobra mi no ta kere cu nan por yuda mi. Bofon so nan lo haci di mi.”—Arturo, 13 aña.

CASI tur hende ta sinti nan down de bes en cuando. * Sin embargo, dor cu bo ta yong i relativamente sin experencia, fácilmente bo por sinti bo aplastá dor dje preshonnan di bida. Exigencianan di bo mayornan, amigunan i maestronan, e cambionan físico i emocional di pubertad, of e sintimentu cu bo ta un fracaso debí na un of otro deficiencia chikitu, tur e cosnan aki por laga bo sinti tristu i deprimí.

Ora esei sosodé, ta bon pa bo tin un hende di confiansa pa papia cuné. Segun Beatriz di 17 aña: “Mi ta kere cu si mi no por a papia cu un hende tocante mi problemanan, lo mi a explotá.” Tristu pa bisa, pero hopi hóben ta tene nan problemanan pa nan mes, i frecuentemente nan ta haña nan ta cai mas i mas den desesperacion. María de Jesús Mardomingo, profesor na e Facultad Médico di Madrid, ta remarcá cu hóbennan cu yega n’e punto di purba cometé suicidio, hopi bes ta intensamente solitario. Hopi hóben cu a sobrebibí intento di suicidio a bisa cu nan no por a haña ni un solo adulto cu ken nan por a combersá i den ken nan por a confia.

Ke tal di bo? Abo tin un hende pa papia cuné ora bo ta sinti bo down? Si no ta asina, cerca ken bo por acudí?

Papia cu Bo Mayornan

Alejandro, citá na comienso, ta describí loke e ta haci ora e ta sintié deprimí: “Mi ta bai cerca mi mama, pasobra desde cu mi a nace, el a apoyá mi, i e ta inspirá mi confiansa. Tambe mi ta bai cerca mi tata, pasobra e tabatin experencianan similar na di mi. Si mi ta sinti mi infelis i mi no conta niun hende, e ora ei mi ta sinti mi pió.” Rodolfo di 11 aña, ta corda: “Tin biaha mi meneer di scol tabata humiyá mi of scual mi, di manera cu mi tabata sinti mi hopi tristu. Mi tabata bai yora den baño. Anto  despues, mi a papia cu mi mama, i el a yuda mi solucioná mi problema. Si mi no a papia cuné, lo mi a sinti mi mas tristu ainda.”

Bo a pensa di tene un combersacion franco cu bo mayornan? Kisas bo ta sinti cu ta imposibel pa nan comprendé bo problemanan. Pero realmente ta asina? Por ta nan no ta comprendé completamente tur e preshonnan cu hóbennan ta confrontá den e mundu djawe; sin embargo, no ta berdad cu probablemente nan conocé bo mihó cu cualkier otro hende na mundu? Alejandro ta bisa: “Tin biaha no ta fácil pa mi mayornan simpatisá cu mi i comprendé precis con mi ta sinti.” No obstante, e ta admití: “Mi sa cu mi por bai cerca nan.” Hopi bes hóbennan ta keda sorprendí ora nan descubrí con bon nan mayornan ta comprendé nan problemanan! Debí cu nan ta mas bieu i tin mas experencia, hopi bes nan por duna bo conseho útil, i esaki ta berdad foral si nan tin experencia den aplicá principionan bíblico.

Beatriz, citá anteriormente, ta bisa: “Ora mi papia cu mi mayornan, mi ta haña animacion i solucionnan práctico pa mi problemanan.” P’esei, cu bon motibu anto Bijbel ta ofrecé e conseho aki pa hóbennan: “Warda, o mi yu, e mandamentu di bo tata, i no bandoná e ley di bo mama. Scucha bo tata cu a causa bo nacementu, i no despreciá bo mama simplemente pa motibu cu el a bira bieu.”—Proverbionan 6:20; 23:22.

Claro cu ta difícil pa conta bo mayornan cos di confiansa si bo no tin un bon relacion cu nan. Segun dr. Catalina González Forteza, un investigacion cu nan a haci entre alumnonan di scol secundario a mustra cu esnan cu a bisa cu nan a purba kita nan bida, tabatin tiki balor propio i nan no tabatin un bon relacion cu nan mayornan. Na contraste, hóbennan cu ta evitá e pensamentu di haci daño na nan mes, por lo general ta “esnan cu ta disfrutá di un bon relacion cu nan mama i tata.”

P’esei, ta sabí pa bo traha riba cultivá un bon relacion cu bo mayornan. Crea e custumber di combersá cu nan regularmente. Conta nan kico ta pasando den bo bida. Haci nan pregunta. Combersacionnan alegre asina por haci cu ta bira mas fácil pa abordá nan ora bo tin un problema serio.

Ora Bo Papia cu un Amigu

Pero lo no ta mas fácil pa bai cu bo problemanan cerca un hende cu ta bo pareu? Wel, ta bon pa bo tin amigu cu bo por confia. Proverbionan 18:24 ta bisa cu “ta existí un amigu cu ta mas pegá cu un ruman.” Pero maske bo pareunan por ofrecé bo simpatia i apoyo, kisas no ta semper nan ta duna bo e mihó conseho. Al fin i al cabo, por lo general nan no tin mas experencia di bida cu bo. Bo ta corda Rehoboam? E tabata un rey den tempu bíblico. En bes di aceptá e conseho di hombernan maduro i experenciá, el a scucha su pareunan. E resultado? Desaster! Rehoboam a perde tantu e apoyo di mayoria di su nacion como e aprobacion di Dios.—1 Reynan 12:8-19.

Un otro problema di papia cos di confiansa cu bo pareunan ta e asuntu di confidencialidad. Arturo, citá na principio, ta bisa: “Mayoria mucha homber cu mi conocé ta papia cu nan amigunan ora nan ta tristu. Pero despues, nan amigunan ta conta tur cos na otro hende i haci bofon di nan.” Gabriela di 13 aña tabatin un experencia similar. E ta bisa: “Un dia mi a haña sa cu mi amiga tabata conta mi asuntunan personal na un amiga di dje, pues mi no tabata confi’é mi cosnan mas. Sí, mi ta papia cu hende di mi edad, pero mi ta purba di no conta nan cosnan cu lo afectá mi si  nan mester cont’é na otro hende.” Pues, ora bo ta busca yudansa, ta importante pa haña un hende cu no ta “revelá papiamentu confidencial di un otro.” (Proverbionan 25:9) Ta mas probabel cu un persona asina ta un hende mas bieu cu bo.

Pues si pa un motibu of otro bo no por haña apoyo na cas, no ta malu pa confia un amigu bo problema, pero haci sigur sí cu e tin experencia den bida i conocé principionan bíblico. Den e congregacion local di Testigonan di Jehova, sin duda tin personanan cu ta cumpli cu e descripcion ei. Liliana di 16 aña ta bisa: “Mi a conta algun ruman muher cristian mi cosnan di confiansa, i esaki a resultá hopi bon. Como cu nan ta mas bieu cu mi, nan conseho ta sano. Nan a bira mi amiganan.”

Ke tal si bo spiritualidad tambe a cuminsá sufri? Podisé bo tabata asina tristu cu bo a cuminsá neglishá oracion of lesamentu di Bijbel. Na Santiago 5:14 i 15, Bijbel ta duna e conseho aki: “Tin un hende enfermo entre boso? Lagu’é yama e ancianonan dje congregacion cerca dje i laga nan haci oracion riba dje, i hunt’é cu zeta den e nomber di Jehova. I e oracion di fe lo cura esun enfermo, i Jehova lo lant’é.” E congregacion local di Testigonan di Jehova tin anciano cu tin experencia den yuda hende cu ta desanimá of spiritualmente enfermo. Sinti bo liber pa papia cu nan. Bijbel ta bisa cu e hombernan ei por ta “manera un lugá di sconde for di bientu i un lugá di sconde for dje tempestad di awaceru.”—Isaías 32:2.

“Laga Boso Peticionnan Bira Conocí na Dios”

Sin embargo, e mihó fuente di yudansa ta “e Dios di tur consuelo.” (2 Corintionan 1:3) Ora bo ta tristu i deprimí, sigui e conseho di Filipensenan 4:6 i 7: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” Jehova semper ta dispuesto na scucha bo. (Salmo 46:1; 77:1) I tin biaha oracion ta tur loke bo tin mester pa trankilisá bo mente.

Si de bes en cuando bo ta sinti bo tristu of deprimí, no lubidá nunca cu hopi otro hóben ta sinti mescos. Cu tempu, e sintimentunan ei por lo general lo pasa. Pero miéntras tantu, no sufri bo so. Laga un hende sa cu bo ta tristu. Proverbionan 12:25 ta declará: “Preocupacion ansioso den curason di un hende ta loke lo hacié dobla, pero e bon palabra ta loke ta hacié alegrá.” Con bo por haña e “bon palabra” ei di animacion? Dor di conta un hende—un hende cu experencia, conocimentu i sabiduria divino—pa e duna bo e consuelo i yudansa cu bo mester.

[Nota]

[Komentario na página 14]

“Ora mi papia cu mi mayornan, mi ta haña animacion i solucionnan práctico”

[Plachi na página 15]

Mayornan temeroso di Dios, en bes di bo pareunan, por lo general ta den e mihó posicion pa duna bo conseho