Hobennan Sa Puntra . . .

Tatanan Realmente Por Core pa Nan Responsabilidad?

“Ora el a bisa mi: ‘Mi ta bai haña un yu di bo,’ el a shok mi. Ken ta bai cuida e baby? Mi no tabata den posicion pa cuida un famia. Mi a haña gana di core bai.”—Jim. *

“TUR aña,” segun un informe dje Instituto Alan Guttmacher, “casi 1 miyon mucha muher tiener . . . ta sali na estado.” Te cu “78% di yu cu nace di mama tiener ta tuma lugá pafó di matrimonio.”

Antes hende homber a sinti nan obligá di tuma responsabilidad p’e yunan cu nan a procreá. Pero manera e buki Teenage Fathers (Tatanan Tiener) ta bisa, “sali na estado sin ta casá no ta un bergwensa ni humiyacion mas manera [ántes].” Entre algun hóben den cierto comunidadnan, kisas nan ta asta considerá bira tata di un yu como un símbolo di posicion! Tog, masha poco mucha homber ta haci compromisonan di largu plaso pa cu e yunan cu nan a procreá. Cu tempu hopi di nan ta bai—of hui bai—laga nan. *

Pero un mucha homber por scapa completamente dje consecuencianan di conducta inmoral? No segun Bijbel. Bijbel ta spierta: “No sea gañá: hende no por tene mofa di Dios. Pasobra kico cu un hende sembra, esaki lo e cosechá tambe.” (Galationan 6:7) Manera nos lo mira, inmoralidad sexual hopi bes ta resultá den consecuencianan di bida largu tantu pa mucha muher como pa mucha homber. Hóbennan por evitá e consecuencianan ei dor di presta atencion na Bijbel su conseho bon cla di evitá inmoralidad sexual.

No Ta Asina Fácil pa Core di Responsabilidad

Cuida un yu ta encerá enorme sacrificio di tempu, placa i libertad personal. E buki Young Unwed Fathers (Tatanan Hóben Soltero) ta remarcá: “Tin mucha homber cu no ta interesá den ‘cuida un otro hende,’ ora esei ta nificá cu nan ta keda cu ménos placa.” Sin embargo, hopi di nan ta paga caru pa nan egoismo. Por ehempel, den mas i mas caso, corte i legisladornan den hopi pais no ta faborabel pa cu hombernan cu no ta mantené nan yunan. Una bes establecé legalmente ken ta e tata, por exigí  di tatanan yong pa nan paga loke ta debido pa añanan cu ta bini, i esei ta na su lugá. Hopi hóben ta haña nan obligá di kita for di scol of bai traha trabounan cu ta paga tiki cen pa cumpli cu e obligacionnan ei. Segun e buki School-Age Pregnancy and Parenthood (Embaraso i Ser Mayor na Edad Escolar): “Mas yong e edad dje mucha homber ta ora e bira tata, ménos educacion formal e ta logra.” I si un tata keda sin duna cen p’e yu, esei por acumulá bira debe grandi.

Claro cu no ta tur mucha homber ta sin heful pa cu nan yu. Hopi ta cuminsá cu bon intencion. Segun un encuesta, 75 porciento di tatanan tiener a bishitá nan yu na hospital. Tog, no ta dura muchu promé cu mayoria tata hóben ta sinti nan aplastá dor dje responsabilidadnan di cuida un yu.

Hopi ta descubrí cu gewoon nan no tin e abilidad ni experencia pa haña un bon trabou. Bergonsá pasobra nan no por percurá sosten financiero, nan cu tempu ta bandoná nan obligacionnan. No obstante, esei por keda duel un mucha homber pa añanan despues. Un tata hóben ta admití: “Tin biaha mi ta puntra mi mes kico a para di mi yu homber. . . . Mi no ta sinti mi bon cu mi a bai [lagu’é], pero awor mi a perd’é. Por ta un dia lo e haña mi.”

E Daño Causá n’e Muchanan

Tatanan cu ta core pa nan obligacion kisas tin cu trata tambe cu sintimentunan intenso di bergwensa, bergwensa di a perhudicá nan propio yu. Al fin i al cabo, manera Bijbel ta indicá, un mucha tin mester di un mama i un tata. (Exodo 20:12; Proverbionan 1:8, 9) Ora un homber bandoná su yu, e ta exponé su yu na un cantidad di posibel problema. Segun un informe dje Departamento Mericano di Salubridad Público i Bienestar: “Mucha chikitu den famianan di mama soltero ta incliná na scor mas abou den testnan di ‘taal cu rekenen.’ Mucha di 7 pa 10 aña cu lanta cerca un mayor soltero ta incliná na ricibí puntonan mas abou, tin mas problema cu comportacion i tin mas casonan di problema crónico di salú i trastornonan sikiátrico. Cerca adolesentenan i adultonan hóben, lanta den un famia di mama soltero ta ser asociá cu mayor riesgo di haña yu na tiener, mas chens di keda sin caba scol secundario, di cai cerá i di no tin trabou ni ta bai scol.”

E revista Atlantic Monthly ta concluí: “Segun un creciente cantidad di evidencia social-científico, den vários aspecto di bienestar cos ta bai mas malu cu muchanan den famianan kibrá pa divorcio i cu nace pafó di matrimonio cu den caso di muchanan den famianan intacto. Muchanan den famia di un solo mayor tin seis biaha mas tantu chens di ta pober. Tambe tin hopi chens cu nan ta keda pober.”

Tene na mente cu e riesgonan aki ta basá riba estadística di estudio di gruponan i cu no necesariamente nan ta aplicá na hende individual. Hopi mucha ta resultá di ta adultonan excelente i bon balansá apesar di a bini di un famia cu un antecedente cu desbentaha. Asina mes, sintimentunan di culpa por pisa mente di un mucha homber cu a bandoná su yu. Un tata soltero a bisa: “Mi tin miedu cu mi a ègt [bruha] su bida pa semper.”—Teenage Fathers.

E Tarea Difícil di Duna Sosten

No ta tur tata yong ta tata cu ta core pa responsabilidad. Tin mucha homber cu debidamente ta sinti un obligacion moral pa nan yunan i di berdad kier yuda lanta nan. Sin embargo, hopi bes esaki ta muchu mas fácil pa bisa cu pa haci. Un problema por ta cu un tata soltero kisas tin masha tiki derecho legal, lagando asina na e mucha muher i su mayornan pa controlá cuantu contacto e por tin cu su yu. Jim, citá na comienso, ta bisa cu “ta un lucha constante pa haña un chens pa mi por tin algu di bisa tocante e mucha.” Como resultado nan por tuma decisionnan cu un tata yong ta masha contra dje, manera adopcion of asta aborto. * “Ta duru pa mi pa laga nan djis dun’é na un hende straño,” un tata yong ta lamentá, “pero mi ta suponé cu mi no tin ningun otro opcion.”

Algun mucha homber ta ofrecé pa casa cu e  mama di nan yu. * Ta berdad cu matrimonio lo spar e mucha muher di poco bergwensa i lo permití e yu lanta cu dos mayor. Por ta asta cu apesar di nan mal conducta, e pareha yong ta stima otro di berdad. Sin embargo, e echo cu un mucha homber por reproducí no kier men cu e tin e madures mental i emocional necesario pa ta esposo i tata. Esei no kier men tampoco cu e tin e abilidad di mantené un esposa i yu financieramente. Estudionan ta mustra cu matrimonionan impulsá dor di salimentu na estado tin tendencia di ta di corto duracion. Pues pura casa no ta semper e solucion sabí.

Hopi mucha homber ta ofrecé pa mantené nan yu financieramente. Manera a mencioná anteriormente, ta rekerí berdadero determinacion pa un tata yong sigui duna e sosten ei pa un periodo largu, kisas pa 18 aña of mas! Pero duna e yudansa ei consistentemente por prevení cu e mama i e yu ta hiba un bida di pobresa.

Kico di cria e yu huntu? Esaki tambe por resultá di ta un tarea difícil. Tin biaha mayornan dje pareha tin miedu cu lo por tin mas enbolbimentu sexual i pues ta trata na descurashá—of asta prohibí—e pareha di mira otro. Por ta e mucha muher mes ta dicidí cu e no kier pa su yu “cera un laso emocional” cu un homber cu no ta su casá. Di tur manera, si permití e tata tene contacto regular cu su yu, famianan ta haci bon di soru di tin bon shaperon durante e bishitanan ei, pa evitá mas mal conducta.

Algun tata soltero cu kier a cera mas cu nan yu, a siña haci algun tarea básico di mayor, manera baña nan yu, dun’é cuminda i lesa p’e. Un mucha homber cu haña un aprecio pa normanan di Bijbel por asta purba siña su yu algun principio dje Palabra di Dios. (Efesionan 6:4) Pero aunke pa un mucha algu di atencion amoroso for di un tata sin duda ta mihó cu nada, simplemente esei no ta mescos cu tin un tata cu t’ei tur dia. I si e mama dje yu casa un dia, un tata yong tin cu para mira con un otro homber ta tuma over e tarea di lanta su yu, sin cu e mes por haci nada.

Ta bisto anto, cu bira tata di un yu pafó di matrimonio ta hiba na hopi infelicidad, tantu p’e mayornan como p’e yu. Ademas dje asuntunan práctico, tin e peliger di perde e fabor di Jehova Dios, kende ta condená tur sex ilegítimo. (1 Tesalonicensenan 4:3) Aunke por ta posibel pa haci bo best pa trata cu un situacion desagradabel manera salimentu na estado como tiener, mester ta bisto cu e mihó caminda ta di evitá di haña bo enbolbí den conducta inmoral for di principio. Un tata yong ta admití: “Una bes bo bira tata di un yu pafó di matrimonio, bo bida nunca mas lo ta mescos.” Sí, un tata yong kisas tin cu biba pa resto di su bida cu e consecuencianan di su eror. (Galationan 6:8) Un biaha mas e conseho di Bijbel a resultá sabí ora e ta bisa: “Hui di fornicacion.”—1 Corintionan 6:18.

[Nota]

[Plachi na página 14]

Pa cuminsá, ta mihó evitá conducta inmoral