Observando Mundu

Compania di Tabaco Ta Admití Cu Humamentu Ta Causa Cancer

Despues di a disputá pa décadanan e descubrimentunan di vários autoridad médico, Philip Morris, e productor mas grandi di sigaria na Merca, awor ta reconocé cu humamentu ta causa cancer di pulmon i otro malesanan mortal. Un comunicado di prensa dje compania ta bisa: “Tin un consenso médico i científico abrumador cu huma sigaria ta causa cancer di pulmon, malesa di curason, enfisema i otro malesanan serio cerca humadónan.” The New York Times ta comentá cu “anteriormente, e compania a argumentá . . . cu humamentu tabata un ‘factor cu ta aumentá e riesgo’ of un ‘factor casual’ den malesanan manera cancer di pulmon, pero no cu el a causa e malesanan.” Sin embargo, apesar di a admití esaki, e compania ta bisa: “Nos ta masha orguyoso di nos marcanan di sigaria i dje campañanan di propaganda cu a apoyá nan atrabes di añanan.”

Edificionan Conocí Ta Disparciendo

Tankinan di grano ta disparciendo lentamente for di Cánada su prairienan den west. Na aña 1933 nan tabatin e cantidad máximo di 5.758 tanki di grano plamá den e área di cunucu. Pa awor e cantidad a baha te na 1.052. E motibu? Un persona cu a para mira nan basha un tanki di grano abou a lamentá: “Tempu a cambia asina tantu. Awor agricultura a bira agrinegoshi. E cunucu di famia ta pasando pa historia. Mescos cu e tankinan.” “Prairie sin tanki di grano lo ta casi manera Venecia sin canal di awa, New York sin rascashelu of Gran Bretania sin bar,” segun e revista Harrowsmith Country Life. Gruponan di interes special ta trahando pa conserbá loke nan ta considerá di ta un símbolo di arkitectura dje yanuranan canades. Nan a combertí un tanki di grano den museo i un otro den un restaurant teater.

Nunca Tempu No Ta Suficiente

Segun e korant aleman Gießener Allgemeine, rond Europa mas i mas hende ta sinti cu nan falta tempu. I esei ta conta sea cu hende ta traha pafó di cas, ta haci trabou di cas of ta disfrutá di tempu liber. “Compará cu 40 aña pasá, hende ta drumi ménos, ta come mas lihé i ta sinti cu ta ansha nan mas na trabou,” segun sociólogo Manfred Garhammer, di Universidad Bamberg. El a descubrí cu bida di tur dia a acelerá den tur nacion europeo cu el a studia. Aparatonan doméstico cu ta scapa trabou i reduccion di ora di trabou no a trece ningun “sociedad relahá” ni “abundancia di tempu.” Mas bien, como promedio, hende a reducí tempu pa cuminda cu 20 minuut i tempu di sosiegu di anochi cu 40 minuut.

Australia Su Adiccion na Wega di Placa

“Awor wega di placa ta un problema serio di salubridad na Australia, afectando por lo ménos 330.000 gèmbeldó crónico directamente,” segun The Australian. E korant ta bisa cu mas cu 1 di cada 5 mashin electrónico di wega di placa na mundu ta ubicá na Australia, caminda 82 porciento dje poblacion adulto ta hunga wega di placa. Un comision cu a investigá e industria di wega di placa di Australia a descubrí cu 2,3 porciento dje australianonan adulto tin un problema serio cu wega di placa. Di esakinan, 37 porciento a pensa pa cometé suicidio, mas cu 11 porciento a purba cometé suicidio i 90 porciento a bisa cu nan tabata seriamente deprimí debí na nan gèmbelmentu. E comision a pidi pa renobá e negoshi di wega di placa completamente i a sugerí pa pone borchi di advertencia caminda ta hunga wega di placa.

Combatiendo Stres

Bo tin stres? E korant El Universal a informá cu e Instituto Mexicano di Seguro Social ta sugerí e siguiente puntonan pa yuda combatí tension. Drumi mes tantu cu bo curpa ta exigí, entre seis pa dies ora pa dia. Come un desayuno completo i balansá, un almuerso mediano i un cena liviano. Tambe, expertonan ta recomendá mashá pa bo reducí e cantidad di cuminda cu ta contené hopi vet, limitá e cantidad di salu, i ora bo pasa edad di 40 aña, reducí bo consumo di lechi cu sucu. Purba haña tempu pa meditacion trankil. Reducí stres mas ainda dor di keda den contacto cu naturalesa.

 Beyesa Venenoso

Awor hende ta sigui un procedura cosmético cu ta encerá inyectá e veneno mortal botulinum pa eliminá plooi den cara, segun e korant The Toronto Star. E veneno ta paralisá músculonan selectá di cara, cu den un par di dia ta perde nan elasticidad, loke ta plat e plooinan. E tratamentu ta dura un cuater luna i ta laga e pashent cu un aparencia mas relahá i hubenil. Pero, tin un prijs caru pa esei. E informe ta spierta cu ‘hende cu haci e tratamentu ei ta perde nan plooi, pero tambe nan ta perde e abilidad di hisa nan wenkbrou pa indicá sorpresa, i di producí un smile cu ta yega te na nan wowo i di cera cara.’ Ta un asuntu di ta prepará pa “paralisá partinan di bo cara pa e beyesa di hubentud,” segun e korant.

“Na Cua Banda Dios Ta?”

Columnista deportivo Sam Smith a skirbi: “No ta mi intencion pa rebahá ningun hende su creencia, pero e demostracion público aki di debocion no a bai demasiado leu den deporte? Pakico hungadónan di futbol mericano tin cu resa despues di scor?” Bo por mira e mésun hungadónan cu despues di wega ta reuní huntu pa resa ta “zundra reporteronan cu palabra malu” den nan kamerin of ta “purba lesioná hungadónan” durante e cayente di wega, segun Smith. E ta bisa cu kere cu Dios ta faborecé un tim riba otro “ta parce di rebahá e creencia den Dios.” P’esei, su artículo ta terminá: “Laga nos no haci deporte mas di loke e ta.”

Empleonan Peligroso

Cua ta e dies empleonan mas peligroso? Segun cifranan compilá pa e Departamento Mericano di Estadística Laboral, kapdónan di palu ta na cabes dje lista cu casi 129 morto pa cada 100.000 trahadó, miéntras cu piscadó i nabegante ta sigui djis nan tras cu 123 i 94 morto respectivamente pa cada 100.000 trahadó. Siguiendo e lista di ariba bai abou, otro empleonan riscante ta di piloto di avion, trahadó cu metal den construccion, minero, peon, shofer di taxi, shofer di truck i cunukero. Sin embargo, “e tasa general di lesionnan fatal na trabou—4,7 pa cada 100.000 empleado—a baha cu un 10 porciento” den e último cincu añanan, segun Scientific American.

Para Sabí!

“Mofi na Calcutta ta evitá malaria,” segun e revista frances di naturalesa Terre Sauvage. Expertonan a nota cu awor cu tin un aumento di malaria, e mofinan ta bula bai mas leu pa busca blachi di un palu conocí pa su concentracion haltu di kinina natural, un remedi contra malaria. Ademas di usa e blachinan pa fura nan neshi, ta parce cu e paranan ta come nan tambe. “Ta parce cu mofi cu gusta stad pero cu tin miedu di malaria a haña un manera pa protehá su mes,” segun e revista.

Placa Sushi

Mas cu 99 porciento di placa di papel di Londen ta contaminá cu cocaina, segun e korant Guardian. Expertonan a test 500 placa di papel i a haña cu 496 a contené rastro dje droga. Contaminacion ta cuminsá ora e cen pasa den man di usadónan di droga. Na nan turno e cennan aki ta contaminá otro placa di papel ora surti nan via mashin di banco of warda nan huntu. Cocaina a bira e droga di recreo cua su uso ta aumentando mas lihé na Gran Bretania entre hende di 20 pa 24 aña di edad. Segun e Proyecto di Concientisacion di Hubentud cu base na Londen, tienernan ta usa cocaina pasobra nan ta haña cu e ta mehorá nan reputacion i ta aumentá nan poder.

“Infeccion Mas Comun Transmití via Sanger”

“Por lo ménos 2,7 miyon mericano ta carga e vírus di hepatítis C, loke ta hacié e infeccion mas comun transmití via sanger na Merca,” segun un informe di Associated Press. Hepatítis C ta plama di un persona pa otro principalmente via contacto sexual of via sanger infectá. Esnan cu tin mas riesgo di contraé e malesa ta usadó di droga via inyeccion cu ta compartí angua i hende cu ta haci sex sin usa condon. Sin embargo, e infeccion por plama tambe via personanan cu ta haci tatuahe pa otronan of acupunturista cu no ta limpia nan ekipo bon. Hende cu a ricibí transfusion di sanger tambe ta core riesgo. Tur aña, rond di 1.000 hende na Merca ta haci transplante di higra dor cu e vírus a daña nan higra.