1, 2. Ki retonan sirbidónan di Yehova mester enfrentá?

FOR di tempu di Abel, e promé hende fiel, te den nos tempu, sirbidónan leal di Yehova a hiba un lucha. Apòstel Pablo a skirbi e kristiannan hebreo ku nan “a perseverá i a sufri pruebanan severo” den nan esfuersonan pa haña e aprobashon i bendishon di Yehova. (Heb. 10:32-34) Pablo a kompará e lucha di e kristiannan ku atletanan ku tabata hasi esfuerso vigoroso den kompetensianan griego, manera korementu, lucha libre i bòkseo. (Heb. 12:1, 4) Awe, nos ta den e kareda di bida, i nos ta enfrentá enemigunan ku ke distraí nos, pone nos trompeká i bira desanimá i kita nos goso i speransa pa futuro bendishonnan.

² Na promé lugá, nos tin un lucha pisá kontra Satanas i su mundu malbado. (Efe. 6:12) P’esei, ta importante pa nos resistí “loke ta fuertemente ankrá” den e mundu akí, inkluso su doktrina-, filosofia- i práktikanan perhudisial, manera inmoralidat, uso di tabako i droga i buracheria. I konstantemente nos mester lucha kontra nos debilidatnan karnal i desanimashon.—2 Kor. 10:3-6; Kol. 3:5-9.

3. Kon Dios ta entrená nos pa lucha kontra nos enemigunan?

 ³ Ta posibel pa gana den e lucha? Klaru ku sí, pero nos mester hasi hopi esfuerso. Pablo a kompará su mes ku un bòksdó ora el a bisa: “E manera ku mi ta dirigí mi gòlpinan no ta pa dal den bashí.” (1 Kor. 9:26) Meskos ku un bòksdó ta bringa kontra su kontrinkante, nos tambe mester lucha kontra nos enemigunan. Yehova ta entrená nos i ta yuda nos den nos lucha. Den su Palabra e ta duna nos instrukshon ku ta salba bida. Tambe e ta yuda nos mediante nos publikashonnan basá riba Beibel, nos reunionnan, asambleanan i kongresonan. Bo ta pone na praktiká loke bo ta siña? Si esei no ta e kaso, ta komo si fuera bo ta “dal den bashí” i no ta hasiendo tur bo esfuerso pa gana e lucha.

4. Kon nos por evitá di laga malu vense nos?

⁴ Nos mester keda alerta, pasobra nos enemigunan por ataká nos ora ménos nos ta spera esei i dal nos nèt ora nos ta sinti nos mas débil. Beibel ta spièrta nos: “No laga malu vense bo, ma sigui vense malu ku bon.” (Rom. 12:21) E palabranan “no laga malu vense bo” ta mustra ku nos por vense malu. Nos por logra esaki si nos sigui lucha. Si nos no keda alerta i sigui lucha, Satanas i su mundu i nos imperfekshon lo vense nos. Pues, nunka laga Satanas desanimá bo i pone bo laga bo mannan kai.—1 Ped. 5:9.

5. (a) Kiko por yuda nos sigui den nos lucha pa haña e bendishon di Dios? (b) Kua personahenan di Beibel nos lo bai analisá?

⁵ Pa nos tin éksito, nos no mester pèrdè for di bista pakiko nos ta lucha. Pa nos por haña Dios su aprobashon i bendishon, nos mester keda enfoká riba e siguransa ku nos ta haña na Hebreonan 11:6: “Ken ku ta aserká [Dios] mester kere ku e ta eksistí i ku e ta bira Esun ku ta rekompensá esnan ku ta hasi esfuerso pa busk’é.” E verbo griego tradusí komo ‘hasi esfuerso pa buska’ ta enserá intensidat i esfuerso vigoroso. (Echo. 15:17) Den e Skritura nos por haña ehèmpel di hòmber- i muhénan ku a hasi hopi esfuerso pa nan haña e bendishon di Yehova. Por ehèmpel, apesar ku Yakòb, Rakel, Yosef i Pablo a enfrentá situashonnan ku a kansa nan den sentido emoshonal i físiko, nan a demostrá ku perseveransia ta trese hopi bendishon. Kon nos por imitá e kuater ehèmpelnan sobresaliente akí?

6. Kiko a yuda Yakòb perseverá, i kon el a ser rekompensá? (Wak e promé plachi.)

⁶ E patriarka Yakòb a lucha i perseverá pasobra e tabata stima Yehova, el a balorá kosnan spiritual i e tabatin un fe fuerte den Yehova su promesa di bendishoná su desendientenan. (Gén. 28:3, 4) Esaki ta laga nos komprondé dikon Yakòb, tempu e tabatin kasi 100 aña di edat, a hasi tur loke e tabata por pa haña Dios su bendishon; el a asta lucha ku un angel ku a tuma kurpa humano. (Lesa Génesis 32:24-28.) Ta riba Yakòb su mes forsa i resistensia el a lucha kontra un angel poderoso? Klaru ku nò! Pero e tabata un hòmber desididu i a mustra ku lo e no a hala atras. I Yehova a rekompens’é pa su perseveransia. El a haña un nòmber ku tabata pas kuné, esta, Israel (ku ta nifiká “Luchadó [òf, Esun Ku Ta Perseverá] ku Dios,” òf “Dios Ta Lucha”). Yakòb a haña e gran rekompensa ku nos tambe ta buska, esta, e aprobashon i bendishon di Yehova.

7. (a) Ki situashon difísil Rakel a pasa aden? (b) Kon el a sigui lucha, i kon el a ser bendishoná despues?

 ⁷ Yakòb su kasá stimá, Rakel, tambe tabata ansioso pa wak kon Yehova lo a kumpli ku e promesa ku El a hasi na su esposo. Pero tabatin un opstákulo pa kua aparentemente no tabatin solushon. Rakel no tabatin yu. Den e tempu ei, esei tabata algu doloroso. Kon Rakel a haña e forsa físiko i emoshonal pa sigui lucha ku sirkunstansianan ku a desanim’é i ku no tabata den su man? Nunka el a pèrdè speransa. Mas bien, el a sigui lucha i a hasi orashon mas intenso. Yehova a skucha Rakel su súplika di kurason, i ku tempu el a bendishon’é ku yu. Pues, ku bon motibu anto Rakel por a bisa: “Ku gran lucha mi a lucha . . . , i di bèrdat mi a vense.”—Gén. 30:8, 20-24.

8. Ki pruebanan difísil Yosef a enfrentá, i kon su manera di reakshoná ta un bon ehèmpel pa nos?

⁸ E ehèmpel di perseveransia ku Yakòb ku Rakel a pone sin duda tabatin un bon efekto riba nan yu Yosef i a yud’é enfrentá e pruebanan ku e mes a pasa aden den su bida. Tempu ku Yosef tabatin 17 aña, su bida a kambia por kompleto. Komo ku su ruman hòmbernan tabata yalurs riba dje, nan a bend’é komo esklabo. Despues, el a keda enkarselá inhustamente na Egipto pa añanan largu. (Gén. 37:23-28; 39:7-9, 20, 21) Yosef no a desanimá, e no a karga renkor ni e no a tuma vengansa. Na lugá di esei, su mente i kurason a keda enfoká riba su relashon presioso ku Yehova. (Lev. 19:18; Rom. 12:17-21) E ehèmpel di Yosef mester yuda nos. Por ehèmpel, asta si nos tabatin un infansia difísil òf si nos sirkunstansianan aktual ta parse sin speransa, nos tin ku sigui lucha i perseverá. Nos por tin sigur ku si nos hasi esei, Yehova lo bendishoná nos.—Lesa Génesis 39:21-23.

9. Ki esfuerso nos por hasi, meskos ku Yakòb, Rakel i Yosef, pa haña e bendishon di Yehova?

⁹ Pensa riba un situashon ku bo ta aden aworakí ku por ta un prueba pa bo. Kisas bo ta víktima di inhustisia, diskriminashon òf bofon. Òf podisé debí na yalursheit, un hende a akusá bo falsamente. En bes di laga bo mannan kai i entregá, kòrda kiko a yuda Yakòb, Rakel i Yosef sigui sirbi Yehova ku goso. Dios a fortalesé i bendishoná nan pasobra nan a sigui balorá kosnan spiritual. Nan a sigui lucha i aktua na armonia ku nan orashonnan sinsero. Nos ta bibando serka di e fin di e sistema di kosnan malbado akí, pues nos tin bon motibu pa tene duru na e speransa poné nos dilanti. Bo ta dispuesto pa lucha, esta, hasi esfuerso pa haña Yehova su aprobashon?

10, 11. (a) Dikon nos lo mester lucha pa haña Dios su bendishon? (b) Kiko lo yuda nos tuma bon desishon i gana e bataya kontra desanimashon i distraishon?

¹⁰ Kiko ta algun sirkunstansia ku kisas ta pone nos lucha pa haña e bendishon di Dios? Un di nan ku hopi hende ta lucha kuné ta nan debilidatnan karnal. Otronan mester hasi esfuerso pa mantené un punto di bista positivo di sirbishi. Òf den bo kaso, podisé bo mester sigui perseverá apesar di soledat òf problema di salú. Ademas, nos no mester lubidá riba e rumannan ku ta lucha pa pordoná un hende ku a faya òf peka kontra nan. Sin importá pa  kuantu tempu kaba nos ta sirbiendo Yehova, nos tur mester bringa kontra kualke kos ku por stroba nos sirbishi na Dios, kende ta rekompensá su fiel sirbidónan.

¹¹ Frankamente bisá, kisas nos tin ku ègt lucha pa tuma bon desishon i perseverá riba e kaminda di bida, foral si nos kurason engañoso ke manda nos den e direkshon kontrali. (Yer. 17:9) Si bo a ripará ku bo tin un tendensia un poko negativo, pidi Yehova pa su spiritu santu. Orashon i spiritu santu por duna bo e forsa pa sigui den e kaminda ku bo sa ku ta korekto i haña Yehova su bendishon. Biba na armonia ku bo orashonnan. Purba di lesa un porshon di Beibel tur dia i saka tempu pa hasi estudio personal i Adorashon Komo Famia riba un base regular.—Lesa Salmo 119:32.

12, 13. Ki yudansa dos kristian a haña pa tene nan mal deseonan bou di kontrol?

¹² Tin hopi ehèmpel ku ta mustra kon Dios su Palabra, su spiritu i nos publikashonnan a yuda rumannan vense mal deseo. Por ehèmpel, un tiner a lesa e artíkulo “Kon Bo Por Resistí Deseonan Robes?” den Spièrta! di 8 di desèmber 2003. Kon el a reakshoná? El a bisa: “Mi ta lucha pa tene mal pensamentu bou di kontrol. Ora mi a lesa den e artíkulo ku ‘pa hopi hende e bataya pa resistí mal deseo ta masha fuerte mes,’ mi a sinti ku mi ta parti di e hermandat. Mi a sinti ku mi no ta mi so.” E hóben akí a benefisiá tambe di e artíkulo  “Dios Ta Aprobá Estilonan di Bida Alternativo?” ku a sali den Spièrta! di 8 di òktober 2003. El a ripará ku e artíkulo ta menshoná ku pa algun hende e bataya ei ta manera “un sumpiña den karni.” (2 Kor. 12:7) Segun ku nan ta sigui lucha pa mantené un bon kondukta, nan por ta optimista tokante futuro. El a sigui bisa: “Pa e motibu ei, mi ta kere ku kada dia ku pasa mi por keda fiel. Mi ta masha gradisidu na Yehova ku e ta usa su organisashon pa yuda nos sobrebibí kada dia den e sistema malbado akí.”

¹³ Tuma tambe e eksperensia di un ruman muhé na Merka. El a skirbi: “Mi ke gradisí boso pasobra semper boso ta duna nos nèt loke nos tin mester i na momento ku nos tin mester di dje. Hopi biaha mi ta sinti ku ta pa mi e artíkulonan akí ta. Pa hopi aña mi a lucha ku un deseo fuerte pa algu ku Yehova ta odia. Tin biaha, mi ke djis entregá i stòp di lucha. Mi sa ku Yehova ta miserikòrdioso i kla pa pordoná, pero komo ku mi tin e mal deseo akí, i den fondo di mi kurason mi no ta odi’é, mi ta sinti ku mi no meresé su yudansa. E lucha kontinuo akí a afektá tur aspekto di mi bida. . . . Despues ku mi a lesa e artíkulo ‘Bo Tin “un Kurason pa Konosé” Yehova?’ den E Toren di Vigilansia di 15 di mart 2013, mi a sinti ku di bèrdat Yehova ke yuda mi.”

14. (a) Kon Pablo a sinti tokante su lucha? (b) Kon nos por gana e bataya kontra debilidatnan karnal?

¹⁴ Lesa Romanonan 7:21-25. Pablo tabata sa bon kon difísil por ta pa lucha kontra e deseo- i debilidatnan di nos imperfekshon. Pero e tabatin pleno konfiansa ku si e akudí na Yehova pa medio di orashon i ehersé fe den e sakrifisio di reskate di Hesus, e por a gana e lucha ei. Kiko di nos? Si nos lucha sin entregá, nos por sali ganá. Kon? Esei ta ora nos imitá Pablo, pone tur nos konfiansa den Yehova i no dependé riba nos mes forsa i ehersé fe den e reskate.

15. Kon orashon ta yuda nos keda fiel i perseverá ora nos ta wanta prueba?

¹⁵ Tin bes Dios por laga nos demostrá kon profundo nos preokupashon pa un asuntu ta. Por ehèmpel, kiko si nos (òf un miembro di nos famia) tin un malesa grave òf ta enfrentá algun inhustisia? Nos ta mustra ku nos tin pleno konfiansa den Yehova ora nos ta suplik’é pa e duna nos forsa pa keda fiel i pa no laga nos pèrdè nos goso i balansa spiritual. (Flp. 4:13) E eksperensia di hopi hende, tantu den tempu di Pablo komo den nos tempu, ta duna prueba ku orashon por duna nos forsa i mas konfiansa pa sigui perseverá.

16, 17. Kiko ta bo determinashon?

¹⁶ Diabel tin masha gana di mira bo laga bo mannan kai i entregá. Sea determiná pa “tene duru na loke ta ekselente.” (1 Tes. 5:21) Un kos ta sigur, bo por gana e lucha kontra Satanas, su mundu malbado i kualke tendensia pekaminoso. Bo por logra esaki ora bo ta pone tur bo konfiansa den Dios pa e duna bo e forsa ku bo mester.—2 Kor. 4:7-9; Gal. 6:9.

¹⁷ Sigui bringa anto. Sigui hasi esfuerso. Sigui lucha. Sigui perseverá. Nos por tin pleno konfiansa ku Yehova lo “basha asina tantu bendishon, ku [nos] lo no tin sufisiente lugá pa konten’é.”—Mal. 3:10.