1. Ora ku un hende kometé un piká serio, ki posibilidat t’ei ainda?

 DEN e artíkulo anterior, nos a mira ku Apòstel Pablo a bisa e kongregashon na Korinto kon pa trata ku un kaso di piká serio. Komo ku e kristian no a arepentí, mester a sak’é for di e kongregashon. Pero manera nos por mira for di e teksto sentral, Dios ta purba di hiba un hende na arepentimentu, esta, e ta purba di yud’é yega na arepentimentu. (Rom. 2:4) Kon e ta usa ansianonan pa purba di yuda un pekadó pa arepentí?

2-3. Kiko nos mester hasi si nos haña sa ku un ruman a kometé un piká serio, i dikon?

² Pero si e ansianonan no sa ku un ruman a kometé un piká serio, nan no por yud’é. P’esei, si nos haña sa ku un ruman a kometé un piká serio, nos mester anim’é pa papia ku e ansianonan.—Isa. 1:18; Echo. 20:28; 1 Ped. 5:2.

³ Pero, kiko si e no ke papia ku e ansianonan? Komo ku nos ke p’e haña e yudansa ku e mester, nos mes lo papia ku e ansianonan. Esei ta mustra kuantu nos stima nos ruman; nos no ke pèrd’é. Nos sa ku si e sigui hasi loke ta malu, lo e daña su amistat ku Yehova mas ainda. I kisas asta e por pone ku hende pafó, ku sa loke e ta hasi, ta kuminsá papia malu di Yehova i su sirbidónan. P’esei aunke e ta duru, nos ta tuma un kurashi i bai serka e ansianonan pasó nos stima Yehova i nos ruman.—Sal. 27:14.

 ANSIANO TA YUDA RUMAN KU KOMETÉ PIKÁ SERIO

 4. Ki meta un komité di ansiano tin?

⁴ Ora ku un ruman kometé un piká serio, e kuerpo di ansiano ta skohe tres ansiano for di e kuerpo ku lo forma un komité i ku lo reuní ku e ruman. a Nan mester ta modesto i humilde i rekonosé ku aunke nan lo purba di yud’é arepentí, nan no por fòrs’é pa kambia. (Deu. 30:19) Nan ta komprondé ku no ta tur ruman ku kometé un piká serio lo reakshoná bon meskos ku Rei David. (2 Sám. 12:13) Tin ku lo skohe pa no hasi kaso di Yehova su konseho. (Gén. 4:​6-8) Apesar di esei, e komité di ansiano tin e meta pa yuda e ruman yega na arepentimentu. Ban wak loke e komité di ansiano mester keda kòrda ora nan reuní ku e ruman.

 5. Kiko e ansianonan tin ku kòrda ora nan reuní ku un ruman ku a peka? (2 Timoteo 2:​24-26) (Wak e plachi.)

⁵ Ansianonan ta mira e ruman komo un karné presioso ku a dual. (Lukas 15:​4, 6) Nan ta demostrá esei den nan aktitut, trato i manera di papia ora nan reuní ku e ruman. Pues, nan no ta kruel ni severo, ni ta pensa ku e úniko kos ku nan tin ku hasi ta djis hasi pregunta i saka afó kiko a pasa. Mas bien, nan ta demostrá e kualidatnan menshoná na 2 Timoteo 2:​24-26. (Les’é.) Nan ta sòru pa keda amabel, suave i bondadoso segun ku nan ta purba di yega na kurason di e ruman ku a peka.

 6. Kon ansianonan ta prepará nan kurason pa reuní ku un ruman ku a peka? (Romanonan 2:4)

⁶ E ansianonan ta prepará nan kurason. Nan ta keda kòrda e palabranan di Pablo: “Dios, den su bondat, ta purba di hiba bo na arepentimentu.” (Lesa Romanonan 2:4.) Pues, nan ta hasi esfuerso pa imitá e manera bondadoso ku Yehova ta trata hende ku a peka. Nan tin ku kòrda tambe ku, promé ku tur kos, nan ta wardadó i mester sigui e instrukshon i ehèmpel di Kristu. (Isa. 11:​3, 4; Mat. 18:​18-20) Promé ku e komité di ansiano reuní ku e ruman, tin sierto kos ku nan mester hasi. E ansianonan ku ta forma parti di e komité lo hasi orashon pa asina nan logra nan meta di yuda e ruman yega na arepentimentu. Tambe, nan lo buska informashon den Beibel i den nos publikashonnan. Ademas, nan lo pidi Yehova pa yuda nan komprondé e  ruman i su situashon. Nan lo puntra nan mes kiko nan mester sa di loke a pasa den e ruman su bida ku lo por tabatin influensia riba su aktitut, manera di pensa i kondukta.—Pro. 20:5.

7-8. Kon e ansianonan ta imitá Yehova su pasenshi ora nan reuní ku un ruman ku a kometé un piká serio?

⁷ Ansianonan ta imitá Yehova su pasenshi. Nan ta keda tene na mente kon Yehova, den pasado, a trata hende ku a kometé piká. Por ehèmpel, ku pasenshi Yehova a rasoná ku Kain. El a bisa Kain loke lo pasa si e no kambia i ku lo e haña bendishon si e kambia su mal kondukta. (Gén. 4:​6, 7) Den un otro okashon, Yehova a manda Profeta Nátan pa korigí David. Nátan a usa un ilustrashon ku a yuda David arepentí. (2 Sám. 12:​1-7) Anto Yehova a “keda manda” su profetanan “bes tras bes” ora e israelitanan a desobedesé. (Yer. 7:​24, 25) E no a warda pa su sirbidónan arepentí promé pa djei e kuminsá yuda nan. Mas bien, el a dal e promé pasonan miéntras ainda nan tabata pekando.

⁸ Ansianonan ta sigui Yehova su ehèmpel ora nan ta purba di yuda un ruman ku a kai den piká. Nan lo rasoná kuné “ku tur pasenshi,” manera 2 Timoteo 4:2 ta instruí. P’esei semper un ansiano mester hasi su esfuerso pa dominá su mes i pa papia kalmu pa motivá e ruman ku a peka pa hasi loke ta korekto. Si e ansiano laga rabia òf frustrashon poderá di dje, kisas e ruman por stòp di skucha òf asta nenga di arepentí.

9-10. Kon ansianonan por yuda un ruman rasoná tokante loke a hib’é na piká?

⁹ E ansianonan ta purba haña sa kiko a pone ku e ruman a kometé e piká. Kiko a pone su amistat ku Yehova bira suak? Por ehèmpel, kisas el a stòp di studia òf bai sirbishi regularmente? Su kantidat i kalidat di orashon a baha? El a kuminsá laga mal deseonan krese den su kurason? Ku ken e ta pasa tempu? Ki sorto di entretenimentu e ta skohe? E ta konsiente ku su desishon- i akshonnan a hasi su Tata, Yehova, tristu?

¹⁰ Ansianonan por hasi e ruman pregunta pa yud’é rasoná tokante loke a pone su amistat ku Yehova bira suak i hib’é na piká. Ta klaru ku nan lo hasi esei na un manera bondadoso i sin puntra kosnan privá ku nan no mester sa. (Pro. 20:5) Ademas, meskos ku Nátan a hasi ku David, kisas e ansianonan por usa ilustrashon pa yuda e ruman mira ku loke el a hasi tabata robes. Kisas durante e promé reunion ei, e ruman ta kuminsá sinti duele di e mal desishonnan ku el a tuma i asta e por arepentí.

11. Kon Hesus a trata pekadónan?

¹¹ Ansianonan ta hasi esfuerso pa imitá Hesus. Pa motivá Saulo di Tarso pa analisá su mes, Hesus a puntr’é: “Saulo, Saulo, pakiko bo ta persiguí mi?” E pregunta ei a yuda Saulo rasoná tokante su mal kondukta. (Echo. 9:​3-6) Anto den kaso di “e muhé Yézabèl,” Hesus a bisa: “Mi a dun’é tempu pa e arepentí.”—Rev. 2:​20, 21.

12-13. Kon ansianonan por duna un ruman ku a peka tempu pa arepentí? (Wak e plachi.)

¹² Meskos ku Hesus, ansianonan no ta kore disidí ku un ruman ku a peka no ke arepentí. Ta bèrdat ku algun ruman ku peka lo arepentí durante e promé reunion ku e komité. Pero otronan mester di mas tempu. P’esei e ansianonan  por reuní mas ku un biaha ku e ruman. Podisé despues di e promé reunion, e ruman ku a peka ta keda pensa seriamente riba loke e ansianonan a bis’é i ta pidi Yehova humildemente pa pordon’é. (Sal. 32:5; 38:18) Kisas na e siguiente reunion e ruman su aktitut a kambia kompletamente.

¹³ Pa yuda e ruman ku a peka yega na arepentimentu, e ansianonan semper mester mustra ku nan ta amabel i ku nan t’ei pa yud’é. Nan lo roga Yehova pa bendishoná nan esfuerso i nan ta spera ku nan ruman ku a peka lo rekobrá su sano huisio i arepentí.—2 Tim. 2:​25, 26.

14. Ken nos tin ku yama danki ora un ruman arepentí, i dikon?

¹⁴ Si e ruman ku a peka arepentí, nos ta masha kontentu! (Luk. 15:​7, 10) Pero, ken nos tin ku yama danki? E ansianonan? Kòrda loke Pablo a bisa: “Tal bes Dios ta laga nan arepentí.” (2 Tim. 2:25) Pues, ta Yehova a yuda e ruman ku a peka kambia su pensamentu i aktitut, i no hende. Despues, Pablo a menshoná algun di e kosnan bon ku ta pasa ora personanan arepentí. El a bisa ku nan ta yega na un konosementu eksakto di e bèrdat, ta rekobrá nan sano huisio i ta skapa for di e trampa di Satanas.

15. Kon ansianonan por sigui yuda un ruman ku a arepentí?

¹⁵ Ora ku un ruman arepentí, e komité ta hasi areglo pa e ruman haña bishita di pastoreo pa asina e sigui fortalesé su fe i sigui resistí Satanas su trampanan i hasi loke ta korekto. (Heb. 12:​12, 13) Klaru ku e kuerpo di ansiano lo no revelá na niun hende detayenan di e kaso di e ruman. Pero kiko sí kisas e kongregashon mester sa?

“KORIGÍ DILANTI DI TUR HENDE”

16. Segun 1 Timoteo 5:​20, ken Pablo tabata ke men ku “tur hende”?

¹⁶ Lesa 1 Timoteo 5:20. Pablo a bisa Timoteo, ku tambe tabata un ansiano,  pa “korigí dilanti tur hende e personanan ku ta praktiká piká.” Pero kiko Pablo tabata ke men ora el a bisa “dilanti tur hende”? E tabata referí na tur ruman ku tabata sa di e piká. Kisas pasó nan mes a mira òf pasó e ruman ku a peka mes a konta nan. Ta solamente e rumannan ei ansianonan lo bisa ku nan a atendé e kaso.

17. Si hopi ruman den e kongregashon sa òf lo haña sa di un piká serio, ki anunsio un ansiano lo duna, i dikon?

¹⁷ Den algun kaso, sa sosodé ku hopi ruman den e kongregashon ya sa ku un ruman a kometé un piká serio òf tin chèns ku, ku tempu, e piká lo bira konosí. Den un situashon asina, e ora ei sí “tur hende” lo por nifiká henter e kongregashon. Pues, un ansiano lo hasi un anunsio ku Ruman Tal i Tal a ser korigí. Dikon? Pablo a bisa ku esei lo sirbi “komo un spièrtamentu pa e otronan,” pa asina nan no kai den piká.

18. Kiko ansianonan lo hasi si un menor di edat ku ta batisá kometé un piká serio? (Wak e plachi.)

¹⁸ Pero awor, kiko si un ruman batisá bou di 18 aña kometé un piká serio? E kuerpo di ansiano lo skohe dos ansiano pa reuní ku e menor i su mayornan kristian. b E ansianonan ei lo puntra e mayornan ki pasonan nan a dal kaba pa purba di yuda nan yu hasi e kambionan nesesario i arepentí. Si e yu ta skucha e konsehonan di su mayornan i ta hasiendo kambionan den su manera di pensa i  aktua, e dos ansianonan por disidí ku no ta nesesario pa un komité di ansiano reuní ku nan i lo laga e mayornan sigui yuda nan yu. E ansianonan sa ku Yehova a duna mayornan e responsabilidat di korigí nan yunan ku amor. (Deu. 6:​6, 7; Pro. 6:20; 22:6; Efe. 6:​2-4) Despues, e ansianonan lo papia de bes en kuando ku e mayornan pa hasi sigur ku e menor ta sigui haña e yudansa ku e mester. Pero kiko si e menor batisá no ta arepentí i ta sigui kometé piká? Den e kaso ei, un komité di tres ansiano lo reuní kuné huntu ku su mayornan kristian.

“YEHOVA TIN MASHA KARIÑO, KOMPASHON I MISERIKÒRDIA”

19. Kon ansianonan ta hasi nan esfuerso pa imitá Yehova ora nan ta yuda un ruman ku a peka?

¹⁹ Yehova a duna ansianonan e responsabilidat di protehá e kongregashon dor di manten’é limpi. (1 Kor. 5:7) Pero, tambe nan tin ku hasi esfuerso pa yuda un ruman ku a peka yega na arepentimentu. P’esei nan ta keda ku un aktitut positivo i ta spera ku e ruman ta hasi kambio. Asina ei nan ta imitá Yehova, kende tin “masha kariño, kompashon i miserikòrdia.” (Sant. 5:11) Apòstel Huan, kende a trata su rumannan ku amor, a skirbi: “Mi yunan stimá, mi ta skirbi boso e kosnan akí pa boso no kometé piká. Ma si sosodé ku un di boso kometé piká, nos tin un ayudante serka e Tata: Hesukristu, un persona hustu.”—1 Huan 2:1.

20. Kiko nos lo trata den e siguiente artíkulo?

²⁰ Lamentablemente, tin biaha algun ruman ku peka ta nenga di arepentí. Si esei pasa, mester sak’é for di e kongregashon. Kiko ansianonan tin ku hasi den un kaso asina? Nos lo trata esei den e último artíkulo di e seri akí.