TUR aña tin hopi karné presioso ta bolbe bèk den e kongregashon kristian. Imaginá bo e “goso [ku tin] den shelu” ora ku kada ún di nan bolbe! (Luk. 15:7, 10) Si abo a ser restorá, bo por tin sigur ku Hesus, e angelnan i Yehova mes ta masha kontentu ku bo ta forma parti di e kongregashon atrobe. Pero, segun ku bo ta drecha bo amistat ku Yehova, kisas lo bo haña bo ku algun difikultat. Kiko nan ta anto kiko por yuda bo?

Tin hopi ruman ku ainda ta sinti nan desanimá aunke ku nan a bolbe na e kongregashon. Kisas bo ta sinti meskos ku Rei David. Asta despues ku Yehova a pordon’é, el a bisa: “Mi pikánan ta blo persiguí mi.” (Sal. 40:12, BPK; 65:3) Despues ku un hende bolbe serka Yehova, kisas pa hopi aña ainda e ta sintié malu pa e piká ku el a kometé òf e ta sinti bèrgwensa. Isabelle tabata ekspulsá pa mas ku 20 aña. * El a bisa: “Tabata masha difísil pa mi kere ku Yehova por pordoná mi.” Si bo desanimá, bo amistat ku Yehova por bira suak atrobe. (Pro. 24:10) P’esei, purba pa no laga esei pasa ku bo.

Tin otro ruman ta mira tur e trabou ku nan mester hasi pa por drecha nan amistat ku Yehova, pero nan no sa unda pa kuminsá. Despues ku Antoine a ser restorá, el a bisa: “M’a sinti manera ku m’a lubidá kon pa ta un Testigu.” Dor ku algun ruman ta sinti nan asina, kisas nan ta duda pa hasi tur loke nan por pa Yehova.

Imaginá ku un orkan a basha bo kas abou. Ora bo mira kuantu trabou bo mester hasi pa drecha e kas anto kuantu tempu esei  lo tuma bo, kisas bo no sa unda pa kuminsá. Di mes manera, si un piká serio a daña bo amistat ku Yehova, kisas bo ta sinti ku bo mester hasi hopi trabou pa drecha e amistat ei bèk. Pero no preokupá, bo no tin ku hasi tur e trabou ei bo so.

Yehova ta pidi nos: “Awor bini, i laga nos drecha asuntu entre nos.” (Isa. 1:18, NW) Bo a hasi bo bèst kaba pa “drecha asuntu,” i Yehova ta stima bo pa esei. Djis pensa riba esaki: E echo ku bo a bolbe serka Yehova, a dun’é un bon motibu pa e por bisa Satanas ku e ta un gañadó.—Pro. 27:11.

Dor ku bo a bolbe serka Yehova, bo a hala serka dje i e ta primintí ku e tambe lo hala serka bo. (Sant. 4:8) Pero, tin mas kos ku bo tin ku hasi ku djis yega na e punto ku otro hende ta rekonosé ku atrobe bo ta parti di e kongregashon. Bo mester sigui fortalesé bo amor pa bo Tata i Amigu Yehova. Kon bo por hasi esaki?

Bo fundeshi spiritual, esta, loke bo sa tokante Yehova su promesa di un paradeis, t’ei ainda. Pero, awor bo mester drecha bo rutina spiritual. Por ehèmpel, prediká regularmente, bai reunion i pasa tempu ku bo rumannan. Ban wak e siguiente metanan.

Papia ku Yehova regularmente. Bo Tata sa ku si bo ta keda sinti bo malu pa e piká ku bo a kometé, por ta difísil pa bo hasi orashon na dje. (Rom. 8:26) Pero, “perseverá den orashon” bisando Yehova kuantu bo ke su amistat. (Rom. 12:12) André ta kòrda: “Mi tabata sinti mi hopi malu i mi tabatin hopi bèrgwensa. Pero, despues di kada orashon ku m’a hasi, m’a kuminsá sinti mi mihó i m’a sinti mi mas na pas.” Si bo no sa kiko pa bisa den bo orashonnan, wak e orashonnan di Rei David ku a arepentí, ku ta skirbí na Salmo 51 i 65.

Studia Beibel regularmente. Esaki lo yuda bo den sentido spiritual i lo yuda bo amor pa Yehova krese. (Sal. 19:7-11) Felipe a bisa: “Pa kuminsá, mi no tabatin un rutina spiritual. I debí na esei m’a bira suak i a desapuntá Yehova. Mi no tabata kier a kometé e mesun fayo dos biaha. Pues, m’a disidí pa protehá mi mes ku estudio personal.” Abo tambe por hasi meskos. Si bo mester di yudansa pa skohe un tópiko pa bo estudio personal, dikon no pidi un ruman spiritualmente maduro pa yuda bo ku esei?

Drecha bo amistat ku bo rumannan. Tin ruman ku a bolbe na e kongregashon ta kere ku e rumannan lo pensa malu di nan. Larissa a bisa: “Mi tabata sinti masha bèrgwensa mes. M’a sinti manera m’a traishoná e kongregashon, i e sintimentunan ei a keda pa basta tempu.” Sea sigur ku e ansiano- i e rumannan spiritualmente maduro den e kongregashon ta kla pa yuda bo drecha bo amistat ku Yehova. (Wak e kuadro “ Loke Ansianonan Por Hasi.”) Nan ta masha kontentu ku bo a bolbe, i nan ke pa tur kos bai bon ku bo.—Pro. 17:17.

Kiko por hala bo mas serka di e kongregashon? Bai tur reunion i partisipá regularmente den sirbishi ku bo rumannan. Kon esei por yuda? Felix a bisa: “E kongregashon no por a warda pa mi bolbe. M’a sinti mi mashá stimá. Nan a yuda mi pa ta parti di e famia atrobe, pa sinti ku m’a ser pordoná i pa sigui sirbi Yehova.”—Wak e kuadro “ Loke Abo Por Hasi.”

Segun ku bo ta drecha bo amistat ku Yehova, Satanas lo sigui manda mas “orkan” pa purba di suak bo. (Luk. 4:13) Ta p’esei ta masha importante pa awor bo fortalesé bo amistat ku Yehova.

Yehova a primintí su karnénan: “Lo mi buska esnan ku ta pèrdí, trese bèk esnan ku tabata dual, pone verbant pa esnan ku ta heridá, i fortifiká esnan ku ta malu.” (Eze. 34:16) Yehova a yuda hopi ruman drecha nan amistat kuné. I e ke yuda abo tambe drecha bo amistat kuné i hasié mas fuerte ku nunka.