1, 2. (a) Ki pas nos por tin for di awor? (b) Kiko ta stroba nos na e momentonan akí di tin pas kompleto? (Wak e promé plachi.)

NOS tur ke tin un bida trankil, liber di ansiedat. Nos ta masha gradisidu ku Yehova ta duna nos “e pas di Dios,” un trankilidat ku por protehá nos di pensamentu- i sintimentunan ku ta hasi nos intrankil. (Flp. 4:6, 7) Komo ku nos a dediká nos mes na Yehova, nos ta gosa tambe di “pas ku Dios,” esta, un bon relashon kuné.—Rom. 5:1.

² Pero Dios su tempu pa trese pas kompleto no a yega ainda. E último dianan krítiko akí ta yen di konflikto, i tin hopi hende ku aktitut violento. (2 Tim. 3:1-4) Komo kristiannan, nos mester lucha kontra Satanas i e siñansanan falsu ku e ta promové. (2 Kor. 10:4, 5) Pero loke mas por kita nos pas ta oposishon di parti di nos famianan ku no ta Testigu. Algun di nan por hasi chèrchi di nos kreensianan òf akusá nos ku nos a dividí e famia òf bisa nos ku si nos no stòp di sirbi Yehova, nan lo rechasá nos. Kon nos mester mira oposishon di famia? Kon nos por trata ku e difikultatnan ku esei ta trese kuné?

3, 4. (a) Kiko por pasa ora un hende kuminsá sigui Hesus? (b) Ki ora lo por ta mas difísil pa sigui Hesus?

³ Hesus tabata sa ku su siñansanan lo a kousa divishon i ku su siguidónan lo tabatin mester di kurashi pa siguié ora nan haña nan ku oposishon. E oposishon akí por afektá e pas ku tin den famia. Hesus a bisa: “No pensa ku mi a bini pa pone pas riba tera; mi no a bini pa pone pas, sino spada. Pasobra mi a bini pa kousa desunion: entre un yu hòmber i su tata, entre un yu muhé i su mama i entre un esposa hóben i su suegra. Sí, e enemigunan di un hende lo ta su mes hendenan di kas.”—Mat. 10:34-36.

⁴ Ora Hesus a bisa pa “no pensa ku mi a bini pa pone pas,” e tabata ke men ku algun di e hendenan ku tabata skuch’é lo mester a pensa riba kiko por a pasa si nan a siguié. Su mensahe por kousa divishon. Klaru ku Hesus su meta tabata pa siña hende e bèrdat tokante Dios i no pa kousa desunion. (Huan 18:37) Pero tòg lo no ta fásil pa sigui Kristu foral si nos amigunan será òf famianan rechasá e bèrdat.

5. Kiko siguidónan di Hesus mester a soportá?

⁵ Hesus a bisa ku su siguidónan mester ta dispuesto pa soportá oposishon di famia. (Mat. 10:38) Pa Kristu su disipelnan por a agrad’é, nan mester a soportá chèrchi òf asta rechaso di nan famia. Pero nan a haña muchu mas tantu ku nan a pèrdè.—Lesa Marko 10:29, 30.

6. Kiko nos tin ku keda kòrda si nos famia ta stroba nos di sirbi Yehova?

⁶ Nos ta sigui stima nos famia asta ora nan ta oponé nos esfuersonan pa adorá Yehova, pero nos mester keda kòrda ku nos amor pa Dios i Kristu ta bini promé. (Mat. 10:37) Nos mester realisá tambe ku Satanas lo purba di usa e amor ku nos tin pa nos famia pa kibra nos integridat. Ban analisá algun ehèmpel di oposishon di famia i kon nos por trata ku difikultat ku esei ta trese kuné.

7. Si bo kasá no ta Testigu, kon bo mester mira e situashon?

⁷ Beibel ta spièrta ku hende ku kasa “lo haña nan ku difikultat den bida.” (1 Kor. 7:28) Si bo kasá no ta Testigu, kisas bo ta pasa den mas ansiedat i strès ku normal. Sinembargo, ta importante pa bo mira bo situashon manera Yehova ta mir’é. E echo ku bo kasá no ke sigui Kristu no ta un motibu bálido pa separá ni divorsiá for di dje. (1 Kor. 7:12-16) Maske un esposo ku no ta Testigu no ta dirigí e famia den asuntunan spiritual, henter e famia mester respet’é pasobra e ta kabes di e famia. Di igual manera, un esposo kristian mester mustra amor sin egoismo i tierno kariño na su esposa ku no ta un Testigu.—Efe. 5:22, 23, 28, 29.

8. Ki preguntanan bo por hasi bo mes si bo kasá ta purba di stroba bo di sirbi Yehova manera bo ke?

⁸ Kiko si bo kasá ta purba di stroba bo di sirbi Yehova manera bo ke? Por ehèmpel, un ruman muhé su esposo a bis’é pa e sali den sirbishi solamente riba sierto dianan di siman. Si bo ta den un situashon similar, puntra bo mes: ‘Ta stòp mi kasá ke stòp mi di sirbi Dios? Si esei no ta e kaso, mi por hasi loke e ta pidi mi?’ Ora bo ta rasonabel, bo por evitá problema innesesario den bo matrimonio.—Flp. 4:5.

9. Si bo kasá no ta Testigu, kon bo por siña boso yunan pa onr’é?

⁹ Lantamentu di yu por ta mas difísil si bo kasá no ta un Testigu. Por ehèmpel,  bo mester siña bo yunan pa obedesé e mandamentu di Beibel pa “onra bo tata i bo mama.” (Efe. 6:1-3) Pero kiko si bo kasá no ta biba segun e normanan moral haltu di Beibel? Den tal kaso, pone un bon ehèmpel i onra bo kasá. Bo mester enfoká riba su bon kualidatnan i bis’é ku bo ta apresiá tur e kosnan bon ku e ta hasi. Anto evitá di bisa kosnan negativo di bo kasá dilanti di bo yunan. En bes di esei, splika nan ku kada hende mester disidí si nan ke sirbi Yehova òf nò. E bon kondukta di e yunan por atraé e mayor ku no ta Testigu na adorashon berdadero.

10. Kon un mayor kristian por siña su yunan tokante bèrdatnan bíbliko asta ora su kasá no ta Testigu?

¹⁰ Tin biaha, un kasá ku no ta Testigu ta eksigí pa e yunan partisipá den selebrashonnan pagano òf pa siña nan kreensianan falsu. Algun esposo ta prohibí un esposa kristian di siña e yunan loke Beibel ta bisa. Asta asina un esposa kristian ta hasi loke e por pa siña e yunan tokante bèrdatnan di Beibel. (Echo. 16:1; 2 Tim. 3:14, 15) Por ehèmpel, un ruman muhé su kasá ku no ta Testigu kisas no ta lag’é dirigí un estudio di Beibel regular ku nan yunan menor di edat òf bai reunion ku nan. Aunke ku e ruman muhé ta respetá e desishon di su esposo, e por papia di e bèrdat ku e yunan ora e oportunidat presentá i asina siña nan tokante Yehova i su normanan moral. (Echo. 4:19, 20) Klaru, ku tempu e yunan mes mester disidí si nan lo sirbi Yehova òf nò.—Deu. 30:19, 20. *

11. Kiko por bira un problema pa nos famianan ku no ta Testigu?

¹¹ Na promé instante, kisas nos no a bisa nos famia ku nos ta asosiá ku Testigunan di Yehova. Pero segun ku nos fe tabata bira mas fuerte, nos a haña ku tabata nesesario pa bisa nan ku nos ke sirbi Yehova. (Mar. 8:38) Kisas bo lealtat na Dios a trese problema entre abo i bo famianan ku no ta Testigu. Ban wak algun kos ku bo por hasi pa yuda bo keda bon ku nan i na mes momento, mantené bo integridat.

12. Dikon famianan ku no ta Testigu por oponé nos, pero kiko nos por hasi?

¹² Nos mester purba di pone nos mes den sapatu di nos famianan ku no ta Testigu. Aunke ku nos ta masha kontentu ku e bèrdatnan ku nos a siña, nos famianan por pensa ku hende ta engañá nos òf ku nos a bira parti di un kulto. Kisas nan ta pensa ku nos no ta stima nan mas pasobra nos no ta selebrá dianan di fiesta huntu ku nan. Nan por asta kuminsá preokupá ku algu malu lo pasa nos despues ku nos muri. Nos mester purba di komprondé pa nan i mira e asuntu for di nan punto di bista i skucha bon ora nan ta papia pa nos por saka afó kiko realmente ta preokupá nan. (Pro. 20:5) Apòstel Pablo a hasi esfuerso pa komprondé “tur sorto di hende” pa e por a kompartí e bon notisia ku nan. Si nos purba di komprondé nos famianan, esaki por yuda nos haña sa kon pa siña nan e bèrdat.—1 Kor. 9:19-23.

13. Kon nos mester papia ku nos famianan ku no ta Testigu?

¹³ Nos mester papia na un manera suave. Beibel ta bisa: “Laga boso palabranan semper ta ku grasia.” (Kol. 4:6) Nos por pidi Yehova duna nos spiritu santu pa nos por desplegá e fruta di spiritu ora nos ta papia ku nos famianan. Nos no mester diskutí tokante tur nan kreensianan falsu. Si nan hùrt nos ku loke nan ta bisa òf hasi, nos por imitá e ehèmpel di e apòstelnan. Pablo a skirbi: “Ora hende insultá nos, nos ta bendishoná nan; ora nan persiguí nos, nos ta soportá ku pasenshi; ora nan kalumniá nos, nos ta kontestá nan na un manera suave.”—1 Kor. 4:12, 13.

14. Ki benefisio nos ta haña ora nos mantené un bon kondukta?

¹⁴ Nos mester mantené un bon kondukta. Maske ku ora nos ta papia na un manera suave esei por yuda mantené pas entre nos i nos famia, nos bon kondukta por tin mas impakto ainda. (Lesa 1 Pedro 3:1, 2, 16.) Bo ehèmpel por laga bo famia mira ku Testigunan di Yehova tin matrimonio felis, nan ta kuida nan yunan, nan ta hiba un bida limpi den sentido moral i físiko i nan bida ta yen di satisfakshon. Asta si nos famia no aseptá e bèrdat, nos por ta felis pasobra nos a agradá Yehova i a keda fiel na dje.

15. Kon nos por prepará adelantá pa situashonnan ku por hiba na konflikto?

¹⁵ Nos mester ta prepará. Pensa riba situashonnan ku por hiba na konflikto i wak kon lo bo por trata ku nan. (Pro. 12:16, 23) Un ruman muhé di Australia ta konta: “Mi suegro tabata masha kontra e bèrdat. Promé ku nos yam’é pa wak kon ta kuné, ami ku mi kasá tabata pidi Yehova yuda nos pa nos kontest’é na un manera amigabel. Pa tene e kòmbersashon ameno, di antemano nos tabata prepará algun tópiko pa papia ariba. Anto pa evitá kòmbersashonnan largu ku hopi biaha ta hiba na diskushon tokante religion,  nos tabata pone un kantidat di tempu limitá pa kòmbersá.”

16. Kiko bo por hasi si bo ta sinti bo malu ku bo ta desagradá bo famia?

¹⁶ Klaru ku bo no por spera ku lo bo evitá tur malkomprondementu ku bo famianan ku no ta Testigu. Tal konflikto por laga bo sinti bo malu, foral pasobra bo ta stima bo famia mashá i semper a purba di hasi nan kontentu. Si bo ta sinti asina, hasi esfuerso pa pone bo lealtat na Yehova promé ku bo amor pa bo famia. Esei por yuda bo famia mira ku ta masha importante pa apliká bèrdatnan bíbliko pasobra esei ta un asuntu di bida i morto. Sea kual sea e kaso, kòrda ku bo no por fòrsa otro hende pa aseptá e bèrdat. Mas bien, laga nan mira na bo ehèmpel e benefisionan di obedesé Yehova. Nos Dios ku ta stima nos ta duna nan tambe e chèns di sirbié.—Isa. 48:17, 18.

17, 18. Kiko por yuda bo trata ku e situashon ora un miembro di bo famia bandoná Yehova?

¹⁷ No ta niun tiki fásil ora un miembro di nos famia ser ekspulsá òf a desasosiá su mes for di e kongregashon. Kon nos por trata ku e doló ku esaki ta kousa?

¹⁸ Nos mester sigui ku nos rutina spiritual. Pa bo fortalesé bo fe, sigui lesa Beibel, prepará pa e reunionnan i asistí na nan, traha den sirbishi i pidi Yehova duna bo e forsa pa perseverá. (Hudas 20, 21) Pero kiko si bo ta sinti ku bo ta hasi e kosnan ei djis pa hasi nan? No entregá! Un bon rutina spiritual por yuda bo dominá bo pensamentu- i sintimentunan. Wak kiko a pasa ku e eskritor di Salmo 73. El a desaroyá un punto di bista robes i su pensamentu- i sintimentunan tabata molesti’é, pero el a logra kambia su manera di pensa ora el a drenta den Dios su lugá di adorashon. (Sal. 73:16, 17) Di igual manera, bo fiel adorashon na Yehova por yuda bo hasi meskos.

19. Kon bo por mustra rèspèt pa e disiplina di Yehova?

¹⁹ Nos mester respetá e disiplina di Yehova. Dios sa ku su disiplina lo benefisiá tur hende enbolbí, inkluso e persona ku a peka, maske esei ta hasi doló na promé instante. (Lesa Hebreonan 12:11.) Por ehèmpel, Yehova ta bisa nos pa “stòp di anda” ku hende ku no ke arepentí di nan pikánan. (1 Kor. 5:11-13) Apesar di nos doló di kurason, nos mester evitá tur kontakto innesesario ku un famia ekspulsá, sea ta mediante yamada òf mensahe di telefòn, karta, e-mail òf retnan sosial.

20. Ki speransa nos por tin?

²⁰ Nos no mester pèrdè speransa. Amor ta “spera tur kos,” inkluso ku e persona ku a bandoná Yehova lo bolbe serka dje. (1 Kor. 13:7) Si bo ripará ku un miembro di famia ke bolbe serka Yehova, bo por pidi Yehova pa laga Beibel yud’é haña forsa pa aseptá Yehova su invitashon pa ‘bolbe serka dje.’—Isa. 44:22.

21. Kiko bo mester hasi si bo famia ta oponé bo pasobra bo ta sigui Hesus?

²¹ Hesus a bisa ku si nos ta stima kualke hende mas kuné, nos no por agrad’é. Pero e tabatin sigur ku su disipelnan lo tin e kurashi pa keda leal na dje apesar di oposishon di famia. Si bo famia ta oponé bo pasobra bo ta sigui Hesus, konfia den Yehova pa e yuda bo trata ku e difikultatnan. (Isa. 41:10, 13) Ta un goso pa sa ku Yehova i Hesus ta kontentu ku bo i ku nan lo rekompensá bo fieldat.