Bo Tabata Sa?
Nínive: Kiko a pasa kuné despues di e tempu di Yonas?
RÒNT di aña 670 promé ku Kristu, Asiria a bira e imperio di mas grandi na mundu. Riba un website di The British Museum nan a nota ku e imperio a kore for di Chipre, ku ta na wèst, bai te Iran, ku ta na ost. I pa algun aña el a asta inkluí Egipto. Asiria su kapital, Nínive, tabata e stat di mas grandi di mundu. E tabatin monumentonan impreshonante, hardinnan masha bunita, palasionan luhoso i bibliotekanan masha grandi. Riba e murayanan di Nínive nan a haña skirbí ku, meskos ku e otro reinan di Asiria, Rei Ashurbanipal a yama su mes “rei di mundu.” Durante su reinado, a parse ku niun pais por a konkistá Nínive ni Asiria.
E Poder Mundial di Asiria tabata e imperio di mas grandi na mundu e tempu ei
Pero ora ku Asiria a yega na e pik di su gloria, Sofonías a profetisá ku Yehova lo “destruí Asiria, i lo e hasi Nínive un desolashon, seku manera desierto.” Ademas, Nahum a profetisá: “Hòrta e plata! Hòrta e oro! . . . El a keda bashí! Sí, e ta desolá i ruiná! . . . I lo sosodé ku tur ku mira bo lo hui pa bo i bisa: ‘Nínive a keda destruí!’” (Sof. 2:13; Nah. 2:9, 10; 3:7) Hende di e tempu ei ku a skucha e profesia ei kisas lo a puntra nan mes: ‘Esei por pasa? E Imperio di Asiria por kai?’ Kisas esei a parse imposibel.
Nínive a bira un lugá desolá!
Pero, loke a parse imposibel a pasa! Poko promé ku aña 600 promé ku Kristu, Babilonia i Media a konkistá Asiria. Ku tempu, hende a stòp di biba na Nínive i a lubidá mes ku e lugá ei ta eksistí. Un publikashon di e Metropolitan Museum of Art na New York a bisa: “Ku tempu, e stat a keda tapá ku tera i e Nínive ku hende generalmente tabata sa di dje tabata esun di Beibel.” The Biblical Archaeology Society a bisa ku ya pa kuminsamentu di añanan 1800 bai ariba “niun hende no tabata ni sa si e kapital ei di Asiria tabata ègt eksistí.” Pero, na 1845 un arkeólogo ku yama Austen Henry Layard a kuminsá koba na e lugá kaminda Nínive tabata. Loke el a deskubrí a mustra ku Nínive tabata ègt un stat mahestuoso.
Delaster un detaye di e profesianan tokante Nínive a kumpli! Esei ta duna nos mas konfiansa ku e profesianan den Beibel tokante e destrukshon di e podernan polítiko di nos tempu tambe lo kumpli.—Dan. 2:44; Rev. 19:15, 19-21.
