1. Ki pregunta nos por hasi nos mes?

 BO SA ansha tin biaha ora bo pensa riba e kosnan ku ta bai pasa den futuro? Por ehèmpel, destrukshon di religion falsu, atake di Gòg di Magòg i e guera di Armagedon? Kisas bo ta puntra bo mes: ‘Ai Yehova mi Dios, lo mi por keda fiel ora tur e kosnan ei pasa?’ Si esei a yega di pasa den bo mente, loke lo yuda bo ta di analisá Hesus su palabranan ku nos ta lesa den nos teksto sentral. El a bisa su disipelnan: “No laga boso kurason bira intrankil. Pone fe den Dios.” (Huan 14:1) Un fe fuerte lo yuda nos keda kalmu sin importá kiko pasa den futuro.

2. Kon bo por fortalesé bo fe, i kiko nos lo bai wak den e artíkulo akí?

² Kon bo por fortalesé bo fe? Esei ta di analisá kon bo ta dil ku e pruebanan ku bo ta haña aworakí. E ora ei lo bira bisto ki área di bo fe ta suak i ku bo tin ku fortalesé. Kada biaha bo vense un prueba, bo fe ta bira mas fuerte i lo bo ta mihó prepará pa e pruebanan den futuro. Den e artíkulo akí, nos lo bai wak kuater situashon ku e disipelnan di Hesus a haña nan aden i ku a revelá ku nan tabatin mester di mas fe. Huntu ku esei nos ta bai wak kon nos tambe ta pasa den kosnan similar, i kon e situashonnan ei por prepará nos pa loke lo bini den futuro.

3. Kiko e palabranan di Hesus na Mateo 6:30 i 33 ta yuda nos komprondé tokante fe?

³ Ta normal ku un kabes di famia ke perkurá kuminda, paña i un kas pa su kasá i su yunan. Pero no semper esei ta fásil, spesialmente den e tempunan difísil akí. Algun di nos rumannan a pèrdè trabou anto apesar di tur nan  esfuerso, te ainda nan no a haña un otro. Otronan mester a nenga un trabou ku ta bai kontra prinsipionan di Beibel. Den tur e situashonnan ei nos mester ta konvensí ku Yehova, di un manera òf otro, lo perkurá pa e nesesidatnan di nos famia. Esei ta loke Hesus a splika su disipelnan den su Sermon Riba Seru. (Lesa Mateo 6:30, 33.) Ora nos ta kompletamente konvensí ku Yehova nunka lo laga nos na kaya, nos lo hasi tur nos esfuerso pa nos sirbishi na dje keda e kos di mas importante. Kada bes ku nos mira ku Yehova ta yuda nos ku nos nesesidatnan material, mas real e ta bira pa nos i mas fuerte nos fe lo bira.

4-5. Kiko a yuda famia Castro trata ku ansiedat tokante nan nesesidatnan básiko?

⁴ Laga nos wak kon Yehova a yuda famia Castro na Venezuela trata ku nan ansiedat tokante nan nesesidatnan básiko. Ántes, nan tabatin nan mes kunuku i por a biba for di dje. Pero, un dia un gèng armá a kore ku nan for di nan propiedat. Anto Miguel, e tata, a bisa: “Awor nos ta biba for di un pida tereno chikitu ku un hende a fia nos. E promé kos mi ta pidi Yehova tur dia ta pa perkurá loke nos tin mester pa e dia ei.” Aunke bida di famia Castro no ta fásil, nan tin pleno konfiansa ku Yehova lo perkurá pa nan nesesidatnan di tur dia, i esei ta pone ku nan ta sigui bai nan reunionnan regularmente i ta prediká. Di nan banda nan ta pone e Reino na promé lugá den nan bida, i Yehova di su banda ta perkurá loke nan tin mester.

⁵ Durante henter e tempu difísil ei, Miguel ku su kasá, Yurai, a mira kon Yehova a perkurá pa nan. Tabatin biaha ku Yehova a motivá e rumannan pa duna nan algun kos ku nan tabatin mester òf pa yuda Miguel haña trabou. I e otro biahanan Yehova a usa e sukursal pa perkurá loke nan tabatin mester. Yehova nunka a bandoná nan. Komo resultado, nan a mira kon fe di nan famia a bira mas fuerte. Despues ku nan yu mayó Yoselin a konta kon un biaha Yehova a yuda nan, el a bisa: “Ta masha animante pa mira kon Yehova a yuda nos. Mi ta mir’é komo un amigu ku semper mi por dependé riba dje.” I el a agregá: “Loke nos famia a pasa aden, a prepará nos pa pruebanan mas difísil ku lo bini den futuro.”

6. Kon bo por fortalesé bo fe si bo ta pasando den difikultat ekonómiko?

⁶ Bo ta pasando den difikultat ekonómiko? Si ta asina, bo por usa e tempu difísil akí pa fortalesé bo fe. Kon? Hasi orashon na Yehova, lesa i meditá riba Hesus su palabranan na Mateo 6:25-34. Algu tambe ku por yuda bo ta eksperensia di rumannan di nos tempu ku ta proba ku Yehova ta perkurá pa esnan ku ta keda ador’é. (1 Kor. 15:58) Esei lo  konvensé bo ku meskos ku Yehova a yuda nan, lo e yuda bo tambe. E sa kiko bo tin mester i e sa kon pa perkur’é. Kada biaha bo mira Yehova su man den bo bida, bo fe lo bira mas fuerte i asina bo por enfrentá pruebanan mas grandi den futuro.—Hab. 3:17, 18.

7. Segun Mateo 8:23-26, kon un tormenta a pone e disipelnan su fe na prueba?

⁷ Un biaha Hesus i su disipelnan tabata riba laman i diripiente un tormenta a lanta. Hesus a usa e okashon ei pa mustra nan ku nan tabatin mester di un fe mas fuerte. (Lesa Mateo 8:23-26.) Durante e tormenta, e bientu tabata asina fuerte ku e olanan tabata yena e boto ku awa, pero Hesus tabata morto na soño. Tur spantá, e disipelnan a lant’é pa pidié salba nan. Trankil asina el a puntra nan: “Pakiko boso tin tantu miedu asina, hende di poko fe?” E disipelnan mester a realisá ku Yehova tabata kompletamente kapas pa protehá Hesus i esnan ku tabata huntu kuné. Kiko ta e lès pa nos? Un fe fuerte lo yuda nos pasa dor di kualke tormenta, sea e ta literal òf nò.

8-9. Kon Anel su fe a ser poné na prueba, i kiko a yud’é?

⁸ Anel, un ruman muhé soltera di Puerto Rico, a pasa dor di un prueba hopi difísil, pero el a haña un fe hopi mas fuerte debí na esei. E tormenta ku el a hañ’é kuné tabata literal. Tur kos a kuminsá na 2017 ora ku Orkan Maria a destruí su kas. Riba dje, despues di e tormenta el a pèrdè trabou. Anel a bisa: “Durante e tempu difísil ei, m’a sinti mi hopi anshá. Pero, m’a hasi hopi orashon na Yehova, i esei a siña mi konfia den dje i no laga ansiedat paralisá mi.”

⁹ Obedensia tabata un otro kos ku a yuda Anel durante su prueba. El a bisa: “Dor di sigui guia di Yehova su organisashon, mi por a keda kalmu. M’a mira Yehova su man den e animashon ku e rumannan tabata duna mi i den e yudansa material ku mi a haña.” El a agregá: “Yehova a duna mi muchu mas di loke m’a pidi i esei a hasi mi fe hopi mas fuerte.”

10. Kiko bo tin ku hasi si bo ta pasando den un tormenta?

¹⁰ Abo ta pasando den un tormenta? Kisas debí na un desaster natural bo ta pasando den hopi difikultat. Òf, kisas bo tin un malesa serio ku ta laga bo tur desanimá sin sa kiko pa hasi. Ratu-ratu lo bo sinti bo hopi anshá. Pero, no laga e ansiedat ei stòp bo di konfia den Yehova. Hala serka dje i bis’é tur loke bo tin den bo kurason. Anto, fortalesé bo fe meditando riba tur e biahanan ku Yehova a yuda bo. (Sal. 77:11, 12) I bo por tin sigur ku hamas i nunka lo e bandoná bo.

11. Dikon nos mester ta determiná pa obedesé esnan ku ta guia nos?

 ¹¹ Manera Anel a menshoná, obedensia lo yuda nos pasa dor di prueba. Siña konfia esnan ku Yehova i Hesus ta konfia. Por sosodé ku e rumannan nombrá pa guia nos por duna nos instrukshon ku ta zona straño. Pero kòrda, Yehova ta bendishoná obedensia. Beibel i e eksperensia di sirbidónan fiel ta konfirmá ku obedensia ta salba bida. (Éks. 14:1-4; 2 Kró. 20:17) Ora bo meditá riba e ehèmpelnan ei, lo bo ta mas determiná pa, tantu awor komo den futuro, sigui guia ku ta bini di Yehova su organisashon. (Heb. 13:17) Anto e ora ei, lo bo no tin nodi di tin miedu di e tormenta di mas grandi ku ta na kaminda.—Pro. 3:25.

12. Kon Lukas 18:1-8 ta yuda nos komprondé e konekshon entre fe i perseverá inhustisia?

¹² Hesus tabata sa ku hende lo trata su disipelnan inhustamente anto ku esei lo a pone nan fe na prueba. Pa prepará nan, el a konta nan un ilustrashon ku nos por lesa den Lukas. Un biuda tabata blo bai pidi yudansa serka un hues inhustu. E tabatin sigur ku si e sigui bai serka e hues, tardi òf trempan, lo e haña yudansa. Anto, el a logra. Kiko nos ta siña? Kompará ku e hues ei, Yehova no ta inhustu. P’esei Hesus a bisa: “Akaso Dios lo no sòru pa su skohínan, ku di dia i anochi ta sklama na dje, haña hustisia?” (Lesa Lukas 18:1-8.) Djei el a agregá: “Ora e Yu di hende bini, di bèrdat lo e haña e tipo di fe akí riba tera?” Ora hende trata nos inhustamente, nos mester tin un fe fuerte manera e biuda dor di tin pasenshi i perseveransia. Ora nos hasi esei, nos por tin konfiansa ku, tardi òf trempan, Yehova lo yuda nos. Tambe, nos mester tin fe ku orashon ta yuda. Tin biaha Yehova por kontestá nos orashonnan na maneranan ku nos no a ferwagt.

13. Kon orashon a yuda un famia ku a haña nan ku inhustisia?

¹³ Wak loke a pasa ku Vero, un ruman muhé ku ta biba na Repúblika Demokrátiko di Congo. Un dia, Vero huntu ku su kasá ku no ta Testigu i nan yu muhé di 15 aña, mester a hui for di nan pueblo pasobra un grupo di sòldá a kore ku nan. Riba kaminda un otro grupo di sòldá a para nan i a menasá di mata nan. Ora Vero a kuminsá yora, su yu muhé a kuminsá hasi orashon na bos haltu pa purba di kalm’é i tabata usa Yehova su nòmber kada bes. Ora el a kaba di hasi orashon, e komandante a puntr’é: “Hobensita, ken a siña bo hasi orashon?” El a kontest’é: “Mi mama, el a usa e ehèmpel ku tin na Mateo 6:9-13.” E komandante a bis’é: “Yùfrou, abo ku bo mayornan por bai na pas, i ku Yehova boso Dios protehá boso!”

14. Kiko por pone nos fe na prueba, anto kiko lo yuda nos perseverá?

 ¹⁴ Eksperensia manera esun di Vero ta siña nos pa nunka balotá kon importante orashon ta. Pero, kiko si e kontesta pa bo orashon no bin mes lihé òf no ta impreshonante? Esei por pone bo fe na prueba. Kiko bo tin ku hasi? Hasi manera e biuda den Hesus su ilustrashon. Keda hasi orashon ku konfiansa ku Yehova no ta bai laga bo na kaya i ku, tardi òf trempan, lo e kontestá bo orashonnan di un manera òf otro. Keda rog’é pa su spiritu santu. (Flp. 4:13) I kòrda ku pronto Yehova ta bai bendishoná bo asina hopi ku ni kòrda lo bo no kòrda e kosnan ku bo a sufri den pasado. Kada prueba nos vense ku Yehova su yudansa, mas forsa nos lo haña pa enfrentá e pruebanan den futuro.—1 Ped. 1:6, 7.

15. Segun Mateo 17:19 i 20, ki opstákulo Hesus su disipelnan a haña nan kuné?

¹⁵ Hesus a siña su disipelnan ku fe lo yuda nan pasa over di opstákulonan. (Lesa Mateo 17:19, 20.) Aunke ku e disipelnan a yega di saka demoño kaba, tabatin un biaha ku nan no a logra. Dikon nò? Hesus a splika ku nan no tabatin sufisiente fe. Anto el a bisa nan ku si nan fe tabata sufisiente fuerte, nan lo por a pasa over di kualke opstákulo, asta si esei lo tabata manera un seru grandi. Awe tambe nos por haña nos ku difikultatnan ku por parse imposibel pa pasa over di nan.

16. Kon Geydi su fe a yud’é perseverá despues ku su kasá a ser asesiná?

¹⁶ Wak loke a pasa ku Geydi, un ruman muhé di Guatemala. Un dia, bayendo kas despues di reunion, su kasá Edi a ser asesiná. Kon Geydi su fe a yud’é trata ku e doló inmenso ei? El a bisa: “Mi ta tira mi karga riba Yehova den orashon, i esei ta duna mi pas. Mi ta mira kon Yehova ta kuida mi mediante mi famia i e rumannan den kongregashon. Keda okupá ku aktividatnan spiritual ta yuda aliviá mi doló i tambe ta yuda mi pa no preokupá muchu pa mañan. For di e difikultat ei, m’a siña ku sin importá ki mi haña mi kuné den futuro, mi por pasa over di nan ku yudansa di Yehova, Hesus i e organisashon.”

17. Kiko nos tin ku hasi ora nos haña nos ku un opstákulo ku ta manera un seru grandi?

¹⁷ Bo tin doló debí na morto di un ser kerí? Tuma tempu pa fortalesé bo fe lesando e relatonan den Beibel tokante resurekshon. Bo ta kibrá pasobra un famia di bo a ser ekspulsá? Hasi estudio personal pa konvensé bo mes ku e manera ku Yehova ta disipliná, semper ta mihó. Kualke problema ku bo haña bo kuné, usa e oportunidat ei pa fortalesé bo fe.  Konta Yehova eksaktamente kon bo ta sinti. No isolá bo mes, en bes di esei sera mas ku bo rumannan. (Pro. 18:1) Sigui hasi e kosnan ku lo yuda bo perseverá, asta si bo tin ku hasi nan ku awa na wowo. (Sal. 126:5, 6) Keda bai reunion, keda prediká i keda lesa bo Beibel. I keda ku bo bista fihá riba e bendishonnan ku Yehova tin pa bo. Segun ku bo ta mira Yehova su man den bo bida, bo fe den dje lo bira asta mas fuerte.

18. Kiko bo por hasi si bo ripará ku bo fe no ta dje fuerte ei manera bo a pensa?

¹⁸ Si bo pruebanan, sea ta di pasado òf awor, a saka na kla ku un sierto área di bo fe no ta dje fuerte manera bo a pensa, no desanimá. Awor ta tempu pa fortalesé bo fe. Pidi loke Hesus su disipelnan a pidi: “Duna nos mas fe.” (Luk. 17:5) Anto purba di kòrda e eksperensianan ku nos a menshoná den e artíkulo akí. Meskos ku Miguel i Yurai, kòrda tur e biahanan ku Yehova a yuda bo. Meskos ku Vero su yu muhé i Anel, hasi orashon intensamente na Yehova, spesialmente ora bo tin un problema hopi grandi. I meskos ku Geydi, realisá ku Yehova por usa bo famia- òf amigunan pa perkurá e yudansa ku abo tin mester. Ora bo permití Yehova yuda bo vense bo pruebanan, esei lo konvensé bo ku lo e yuda bo den futuro tambe ku kualke prueba ku bo enfrentá.

19. Kiko Hesus tabatin sigur di dje, i kiko nos por tin sigur di dje?

¹⁹ Hesus a yuda su disipelnan mira den ki área nan tabata falta fe. Pero e tabata sa, ku yudansa di Yehova, nan lo por enfrentá kualke pruebanan den futuro ku éksito. (Huan 14:1; 16:33) E tabatin sigur ku un multitut grandi lo sobrebibí e tribulashon grandi pasó nan tin fe fuerte. (Rev. 7:9, 14) Kiko di abo? Lo bo ta entre nan? Wèl, ku Yehova su yudansa lo bo por basta si for di aworakí bo hasi tur loke bo por pa fortalesé bo fe.—Heb. 10:39.