M’a nase na Hulanda na 1948. E siguiente aña mi famia a muda bai São Paulo, Brazil. Mi mayornan tabata fiel baidó di misa, anto kasi tur anochi nos tabata lesa Beibel despues di kome. Na 1959 nos a bolbe muda, pero e biaha akí nos a bai Merka, pa ta mas eksakto, Massachusetts.

Nos famia tabata di ocho hende, i tata a traha duru pa perkurá pa nos. El a traha den benta, den konstrukshon di kaya i pa un aerolínea internashonal. Nos tur tabata kontentu ora ku el a haña e trabou ku e aerolínea ya ku nos por a biaha hopi.

Segun ku mi tabata bai skol, hopi biaha mi tabata puntra mi mes: ‘Kiko lo mi hasi ora mi bira grandi?’ Algun di mi amigunan a bai universidat i otronan a drenta servisio militar. Pero, ami no tabata ke drenta servisio militar pasobra mi no tabata gusta zundramentu i muchu ménos bringamentu. Pues, pa evitá di drenta servisio militar, m’a disidí di bai universidat. Pero, e kos ku mas mi tabata ke ta yuda hende. M’a pensa ku esei lo a duna mi bida sentido.

Komo ku mi tabata masha interesá enkuanto orígen di bida, na universidat m’a skohe e materia di antropologia. Einan nan a siña nos tokante evolushon, i e dosentenan tabata ke pa nos djis aseptá ku ta asina e ta. Pero pa mi algun di e splikashonnan no tabata lógiko i nan tabata ferwagt pa bo kere siegamente den nan. Tur esei tabata kontrali na e método ku siensia ta usa.

Durante e lèsnan ku m’a bai, mi no a siña nada tokante kon pa bira un mihó hende. Mas bien, a pone hopi énfasis riba kiko bo tin ku hasi pa bai dilanti den bida kueste loke kueste. Mi tabata sinti mi bon ora mi tabata bai fiesta ku mi amigunan i tabata purba diferente tipo di droga, pero e felisidat ei no a dura pa hopi tempu. Mi tabata puntra mi mes: ‘Ta asin’akí un bida ku sentido ta?’

Mientrastantu m’a muda bai Boston, i m’a bai universidat einan. Pa mi por a paga mi skol m’a tuma un fakansi djòp. Un kolega di mi tabata e promé Testigu di Yehova ku m’a papia kuné. El a mustra mi Daniel kapítulo 4 ku tabata papia di e profesia di e “shete periodo di tempu,” i el a splika mi ku nos tabata biba den tempu di fin. (Dan. 4:13-17) Mesora m’a realisá ku si mi sigui kòmbersá kuné i tuma loke nos tabata kòmbersá na serio, mi mester a kambia mi bida. Pues, m’a hasi tur loke ku mi tabata por pa evitá e kolega ei.

Na universidat m’a sigui algun kurso ku lo a prepará mi pa trabou boluntario na Suramérika. M’a pensa ku trabou humanitario lo a duna mi bida mas sentido. Pero m’a realisá ku ni esei no tabata e kaso. Tur desilushoná m’a stòp di bai universidat na fin di e semèster.

Na mei 1970 m’a muda bai Amsterdam pa bai traha pa e mesun aerolínea ku mi tata a traha p’e. E trabou akí a laga ku mi por a biaha hopi i bishitá diferente pais na Afrika, Amérika, Europa i Asia. Pero, masha lihé mes m’a realisá ku sin importá kua pais m’a bishitá, nan tur tabatin problema. A parse ku niun di e paisnan ei por a solushoná e problemanan ei. Pero ainda mi tabatin gana di logra algu den bida, pues m’a bai Merka bèk i a inskribí na e mesun universidat na Boston.

Pero, no a tarda mashá ku m’a realisá ku e lèsnan na universidat no tabata kontestá mi preguntanan tokante bida. Mi no tabata sa kiko pa hasi, pues m’a bai pidi mi profesor di antropologia pa konseho. Loke el a bisa mi a sorprendé mi: “Pakiko bo ta kansa bo kabes? Stòp for di awor nò?” E no tabatin nodi di bisa mi dos biaha. Pues, m’a kita for di universidat i nunka mas m’a bai bèk.

Bida pa mi te ainda tabata parse sin sentido. Pues, m’a disidí di djòin un grupo ku no tabata bai tras di normanan sosial i ku parse tabata promové pas i amor. Ami i algun amigu, pidiendo left, a krusa kasi ful Merka yega te Acapulco na México. Nos a biba ku hippie. Nan tabata parse di no tabatin preokupashon ku nada den bida. Pero bibando ku nan, masha lihé  m’a ripará ku nan manera di biba no tabatin ningun sentido ni no tabatin niun klase di felisidat kuné. Na lugá di esei, mi por a mira ku nan tabata desonesto i desleal na otro.

Mientrastantu, m’a kuminsá kòrda riba un soño ku mi tabatin for di tempu ku mi tabata mucha. Mi kier a subi laman, no komo nabegante pero komo kapitan. Anto e úniko manera ku mi por a hasi esei tabata si mi tabatin mi mes boto di bela. Komo ku ami i mi amigu Tom tabatin e mesun deseo, nos a disidí pa nabegá rònt di mundu huntu. Mi tabata en buska di un bunita isla tropikal, unda mi por tabata liber sin ta mará na niun regla ku tin den sosiedat.

Ami i Tom a biaha bai Arenys de Mar, serka di Barcelona, Spaña. Ei, nos a kumpra un boto di bela di 31 pia (9,4 meter) ku tabatin e nòmber Llygra. Pa hasi e boto safe, nos a drech’é. Nos no tabatin purá pa yega nos destinashon ku tabata Seychelles, Oséano Indio. P’esei, nos a saka e motor di e boto i usa e espasio ei pa warda èkstra awa. Pa maniobrá e boto den hafnan chikitu, nos a kumpra dos rema di 16 pia (5 meter). Por fin nos a subi laman rumbo pa Seychelles. Nos tabatin pensá di nabegá na kosta wèst di Afrika i pasa rondó di Cape of Good Hope, Suráfrika. Pa yuda nos nabegá den e direkshon korekto, nos a sigui strea i a usa algun mapa, buki i algun instrumènt simpel di nabegashon. Mi tabata keda sorprendí kon nos por tabata sa presis unda nos ta.

Masha lihé mes nos a realisá ku e boto bieu akí, no tabata kla pa laman. Kada ora, 6 galòn di awa (22 liter) tabata drenta e boto! Manera m’a menshoná na komienso, durante e tormenta ku a lanta, m’a haña asina tantu miedu ku m’a hasi orashon pa promé biaha despues di hopi aña. M’a primintí Dios ku si mi sobrebibí, lo mi hasi mi esfuerso pa siña konos’é mihó. E tormenta a pasa, anto pa promé biaha den mi bida m’a kumpli ku mi palabra.

Ora nos tabata riba laman, m’a kuminsá lesa Beibel. Djis imaginá bo kon dushi tabata meimei di Laman Mediteráneo, rondoná pa piská buladó, dòlfein i ku horizonte leu ayá. Anochi mi tabata keda enkantá ku e Via Láktea i m’a kuminsá bira mas konvensí ku tin un Dios ku ta interesá den hende.

Despues di algun siman riba laman, nos a yega na e haf di Alicante, Spaña. Ei, nos a pone nos boto na benta ku e idea di kumpra un mas mihó. Manera tabata di ferwagt, no tabata fásil pa bende un boto bieu, sin motor i ku tabata yena ku awa. Di otro un banda, m’a probechá di e tempu pa lesa Beibel.

Mas m’a lesa Beibel, mas m’a realisá ku e ta un buki di instrukshon ku ta yuda nos tin felisidat den bida. M’a keda impreshoná kon fásil Beibel ta splika kon pa tene un bida moralmente limpi. I m’a puntra mi mes dikon asina tantu hende ku ta yama nan mes kristian, inkluso mi mes, ta ignorá loke e ta bisa.

Mi kier a drecha mi bida. I pa logra esei, mi tabata determiná pa dal pasonan importante, i  p’esei m’a stòp di usa droga. M’a pensa ku mester tabatin hende ku ta obedesé loke Beibel ta bisa, i mi kier a topa nan. Pa di dos biaha m’a hasi orashon i m’a pidi Dios yuda mi haña nan.

Loke pa mi tabata lógiko, tabata pa analisá tur religion un pa un te ora mi haña esun berdadero. Segun ku mi tabata kana den e kayanan di Alicante, m’a mira hopi misa i iglesia. Pero, komo ku mayoria di nan tabatin imágen, mesora m’a skrap nan for di riba mi lista.

Un djadumingu atardi asina, mi tabata riba un seru ta wak e haf lesando Santiago 2:1-5 ku ta papia tokante e peliger di mustra faboritismo na hende riku. Riba kaminda bèk pa nos boto m’a pasa un edifisio ku tabata parse di ta un lugá religioso. Ariba na e entrada tabatin un bòrchi: “Salòn di Reino di Testigunan di Yehova.”

Mi tabata pia bou, tur na barba i ku djins tur kibrá. Mi di: ‘Mi ta bai wak kiko e hendenan akí ta bai hasi i kon nan ta bai trata mi.’ Pues, m’a drenta e Salòn di Reino manera mi tabata. Un ùsher a laga mi sinta banda di un señora hende grandi ku tabata masha amabel i a yuda mi buska e tekstonan ku e oradó tabata menshoná. Despues di e reunion, m’a keda sorprendí pa kon amabel tur hende a bin kumindá mi. Un hòmber a asta pidi mi pa bini na su kas pa asina nos por a sigui kòmbersá. Pero, komo ku mi no a kaba di lesa Beibel m’a bis’é ku lo mi lag’é sa ora mi ta kla. Mientrastantu m’a kuminsá bai tur reunion.

Un par di siman despues m’a bishitá e hòmber na su kas, i el a kontestá mi preguntanan tokante Beibel. I un siman despues di esei, el a duna mi un saku yen di paña nèchi. El a bisa mi ku doño di e pañanan tabata den prizòn pasobra el a obedesé e instrukshon di Beibel pa stima su próhimo i pa no siña di guera mas. (Isa. 2:4; Huan 13:34, 35) Awor sí m’a haña loke mi tabata buskando, esta, hende ku tabata obedesé loke Beibel tabata bisa tokante hiba un bida moralmente limpi. Mi meta no tabata pa buska un isla bunita mas, pero pa studia Beibel i ègt komprond’é. Pues, m’a regresá Hulanda.

A tuma mi kuater dia pa yega Groningen pidiendo left. M’a bai buska trabou na un karpinteria. Riba e formulario mi mester a yena mi religion. Pues, m’a yena “Testigu di Yehova.” Ora e doño a wak esei, m’a mira ku su kara a kambia.  El a bisa mi: “Mi ta yama bo bèk.” Pero, te awe mi ta wardando su yamada.

M’a bai na un otro karpinteria i a puntra e doño si e tabatin mester di yudansa. El a pidi mi pa diploma i karta di referensia. M’a splik’é ku m’a yega di hasi reparashon riba un boto di bela di palu. Pa mi sorpresa el bisa mi: “Bo por kuminsá traha awe tardi mes, pero bou di un kondishon. Mi no ke niun problema den mi lugá. Mi ta un Testigu di Yehova i mi ta obedes’é e prinsipionan di Beibel.” Boka habrí m’a keda wak e i a bis’é: “Mi tambe!” El mira bon bon ku mi no tabata un Testigu pasobra mi tabatin kabei largu i barba. Pues, el a bisa mi: “Awèl e ora ei lo mi studia Beibel ku bo.” Mesora m’a aseptá. Awor m’a komprondé dikon e doño di e otro karpinteria no a yama mi bèk. Yehova tabata kontestando mi orashonnan. (Sal. 37:4) Pa un aña, m’a traha na e karpinteria di e ruman. Durante e periodo ei, el a studia Beibel ku mi i na yanüari 1974 m’a batisá.

Un luna despues m’a kuminsá traha pionero, esei a duna mi masha tantu goso mes! E siguiente luna m’a muda bai Amsterdam pa bai yuda un grupo nobo na spañó. Mi tabata masha kontentu mes pa dirigí estudio na spañó i na portugues. Na mei 1975, m’a bira pionero spesial. Esta un dushi privilegio!

Un dia, Ineke, un pionero spesial a bini reunion pa introdusí su studiante di Bolivia na e grupo spañó. Ami ku Ineke a disidí di skirbi otro pa asina nos siña konosé otro mihó. Masha lihé nos a ripará ku nos tabatin e mesun metanan. Nos a kasa na 1976 i a sigui komo pionero spesial te na 1982 ora ku nos a haña invitashon pa e di 73 klas di Galaad. Nos a keda masha kontentu i sorprendí ora nos a haña e asignashon pa sirbi na e parti ost di Afrika, unda nos a sirbi pa sinku aña na Mombasa, Kenia. Na 1987, nos asignashon a kambia pa Tanzania, kaminda e obra no tabata prohibí mas. Nos a keda einan pa 26 aña, i despues nos a bolbe Kenia atrobe.

Yuda hende humilde siña e bèrdatnan di Beibel a duna nos bida berdadero sentido. Por ehèmpel, e promé hende ku m’a studia Beibel kuné na Mombasa tabata un hòmber ku m’a topa predikando na lugánan públiko. Despues ku m’a ofres’é e dos revistanan, el a puntra mi: “Ora mi kaba di lesa nan, kiko mas mi tin ku hasi?” E siguiente siman nos a kuminsá studia Beibel for di e buki Bo por biba pa semper den Paradijs riba tera ku a kaba di sali na swahili. Un aña despues el a batisá i a bira pionero regular. For di e tempu ei, e ku su kasá a yuda kasi 100 hende dediká i yega na boutismo.

Ora ku m’a komprondé e propósito di bida, m’a sinti mesun kos ku e komersiante ku a biaha i ku a haña un pèrla spesial i ku e no tabata ke pèrd’é. (Mat. 13:45, 46) Mi kier a pasa restu di mi bida yudando otro hende haña sa kiko ta e berdadero sentido di bida. Huntu ku mi kasá stimá mi por a mira ku Yehova ta yuda su pueblo hiba un bida ku tin berdadero sentido.