1-2. Kiko nos ta lesa den Beibel tokante algun di e reinan di Israel?

 DEN Beibel nos por lesa tokante mas ku 40 rei di Israel. a Beibel ta masha franko tokante e kosnan ku algun di nan a hasi. Por ehèmpel, e ta menshoná algun kos malu ku e bon reinan a hasi. Bo ta kòrda Rei David? Yehova a bisa ku su sirbidó David a sirbié di henter su kurason i semper a hasi loke tabata bon den Su bista. (1 Rei. 14:8) Pero e bon rei ei a kometé inmoralidat ku un muhé kasá i a asta plania pa laga mata e muhé su kasá den bataya.—2 Sám. 11:​4, 14, 15.

² Pero Beibel ta menshoná tambe ku tabatin hopi di e reinan malbado ku a hasi un par di kos bon. Laga nos kue e ehèmpel di Rei Rehóboam. El a “hasi loke tabata malu” den bista di Yehova. (2 Kró. 12:14) I tòg, el a obedesé ora Yehova a bis’é pa no bai bringa kontra e dies tribunan di Israel i laga nan skohe un otro rei. Tambe el a reforsá vários stat den su reino i asina protehá Dios su pueblo kontra nan enemigunan.—1 Rei. 12:​21-24; 2 Kró. 11:​5-12.

3. Ki pregunta nos por puntra nos mes, i tokante kiko nos lo papia den e artíkulo akí?

³ Awor, ora nos lesa tokante e reinan akí nos por puntra nos mes: ‘Kon Yehova ta disidí ki ora un rei ta bon òf malu den su bista?’ E kontesta di e pregunta ei ta masha importante pasobra e ta yuda nos komprondé loke Yehova ta ferwagt di kada un di nos. Den e artíkulo akí nos lo papia di  tres kos ku probablemente Yehova a tene kuenta kuné ora el a evaluá e reinan di Israel. El a wak loke nan tabatin den nan kurason, nan arepentimentu i si nan tabata ador’é na e manera korekto.

NAN A STIMA YEHOVA KU HENTER NAN KURASON

4. Menshoná un diferensia entre un rei ku tabata fiel na Yehova i un rei ku no tabata fiel na dje.

⁴ E reinan ku a agradá Yehova a sirbié ku henter nan kurason. b Rei Yehósafat “a sirbi Yehova di henter su kurason.” (2 Kró. 22:9) Papiando di Yosías, Beibel ta bisa: “Nunka tabatin un rei manera [e], ni promé kuné ni despues di dje, ku a bolbe serka Yehova i ku a sirbi Dios ku henter su kurason.” (2 Rei. 23:25) Pero awor, kiko di Sálomon, kende a hasi malu kasi na fin di su bida? Wèl, “su kurason no tabata kompletamente dediká na su Dios.” (1 Rei. 11:4) Anto tokante Rei Abíam ku tampoko no tabata fiel na Yehova, Beibel ta bisa: “Su kurason no tabata kompletamente dediká na Yehova, su Dios.”—1 Rei. 15:3.

5. Splika kiko ke men sirbi Yehova ku henter kurason.

⁵ Pero kiko ke men sirbi Yehova ku henter kurason? Un persona ku ta sirbi Yehova di henter kurason, òf ku un kurason kompleto, no ta djis sirbié pasobra e sa ku e tin ku hasi esei. Mas bien, e ta sirbi Yehova pasó e stim’é i ta respet’é mashá. Anto, e ta sigui hasi esei henter su bida.

6. Kiko nos tin ku hasi pa nos stima Yehova ku henter nos kurason? (Proverbionan 4:23; Mateo 5:​29, 30)

⁶ Kiko nos tin ku hasi pa nos stima Yehova ku henter nos kurason meskos ku e reinan fiel? Wèl, nos tin ku evitá mal influensia, esta, tur loke ku por pone nos amor pa Yehova mengua. Por ehèmpel, nos tin ku paga tinu ki nos ta wak i hasi den nos tempu liber. Nos tin ku tene kuenta tambe pa skohe amigunan korekto, pa asina nos no kuminsá pensa ku sèn ta e kos di mas importante den bida. Si nos ripará ku algu ta kuminsá pone nos amor pa Yehova mengua, mesora nos tin ku tuma akshon pa rank’é ku rais ku tur.—Lesa Proverbionan 4:23; Mateo 5:​29, 30.

7. Dikon ta importante pa nos evitá kualke kos ku por pone nos amor pa Yehova mengua?

⁷ Nos mester evitá tur kos ku por dividí nos kurason. Si nos no tene kuidou, nos por kuminsá pensa ku pasó nos ta hasi hopi pa Yehova, mal influensia lo no afektá nos. Laga nos ilustr’é. Imaginá ku ta un dia hopi kayente i bo ta pafó. Bo ta bebe mas awa pa bo freska. Pero kiko lo pasa si bo keda den solo henter dia sin buska un kaminda pa skonde pa solo? Solo lo pone ku bo ta haña set masha lihé atrobe. Kiko nos tin ku komprondé? Pa loke ta trata nos amistat ku Yehova, nos tin mester di mas ku djis un bon rutina spiritual. Meskos ku nos tin ku skonde pa solo riba un dia hopi kayente, nos tin ku protehá nos mes tambe di kualke kos ku por pone nos amor pa Yehova mengua.—Efe. 2:2.

NAN A AREPENTÍ DI NAN PIKÁNAN

8-9. Kon Rei David i Rei Ezekías a reakshoná ora nan a haña korekshon? (Wak e plachi.)

⁸ Manera ya nos a mira, Rei David a kometé un piká grave. Pero ora ku Profeta Nátan a bai papia kuné tokante loke el a hasi, David tabata humilde i a arepentí.  (2 Sám. 12:13) E palabranan ku el a skirbi na Salmo 51 ta mustra ku di bèrdat el a sinti duele pa loke el a hasi. Pues e no a hunga ròl ku el a arepentí djis pa laga Nátan kere esei ni pa skapa kastigu.—Sal. 51:​3, 4, 17, introdukshon.

⁹ Rei Ezekías tambe a peka kontra Yehova. Beibel ta bisa ku “su kurason a bira orguyoso. P’esei, Dios a rabia kuné, ku Huda i ku Herúsalèm.” (2 Kró. 32:​25, nota) Kiko a pon’é bira orguyoso? Kisas ta su rikesa, su viktoria riba e asirionan òf e echo ku Yehova a kur’é milagrosamente di un malesa. Anto kisas ta e orguyo ei a pone ku ora e babilonionan a bini serka dje, el a broma ku su rikesa. Debí na esei, Profeta Isaías a bis’é ku Yehova tabata rabiá kuné. (2 Rei. 20:​12-18) Pero meskos ku David, Ezekías tabata humilde i a arepentí. (2 Kró. 32:26) Ta p’esei, for di Yehova su punto di bista Ezekías tabata un rei fiel ku a “hasi loke tabata korekto.”—2 Rei. 18:3.

10. Kon Rei Amasías a reakshoná ora el a haña korekshon?

¹⁰ Kontrali na David i Ezekías, Rei Amasías di Huda a hasi loke tabata bon “pero su kurason no tabata kompletamente dediká na Dios.” (2 Kró. 25:2) Kiko el a hasi robes den bista di Yehova? Despues ku Yehova a yud’é derotá e edomitanan, Amasías a kuminsá bùig pa nan diosnan. c Anto ora ku un profeta di Yehova a mustra Amasías riba su fout, e no kier a skucha i a kore kuné.—2 Kró. 25:​14-16.

11. Segun 2 Korintionan 7:9 i 11, ki nos tin ku hasi pa nos haña pordon? (Wak e plachi.)

¹¹ Ki nos ta siña for di e tres ehèmpelnan akí? Ku nos mester arepentí di nos pikánan i hasi tur nos posibel pa no bolbe hasi nan. Si nos haña konseho for di e ansianonan, asta tokante un asuntu ku no parse di ta dje importante ei pa nos, no sinti ku ta rechasá e ansianonan òf Yehova a rechasá nos. Kòrda ku asta e bon reinan di Israel tabatin mester di konseho i korekshon. (Heb. 12:6) Pues ora nos haña korekshon, nos mester (1) ta humilde i aseptá e korekshon, (2) hasi e kambionan nesesario i (3) sigui sirbi Yehova ku henter nos kurason. Si nos arepentí di nos pikánan, Yehova lo pordoná nos.—Lesa 2 Korintionan 7:​9, 11.

NAN A ADORÁ YEHOVA NA E MANERA KOREKTO

12. Kiko tabata partikularmente notabel di e reinan fiel?

¹² E reinan ku Yehova a konsiderá fiel a ador’é na e manera korekto i a animá otronan pa hasi meskos. Ta bèrdat ku nan a kometé fayonan, mané nos a mira. Pero nan tabata adorá Yehova so i tabata lucha duru pa destruí tur imágen di e diosnan falsu. d

13. Dikon Yehova a husga Rei Ákab komo infiel?

¹³ Pero, kiko di e reinan ku Yehova a husga komo infiel? Ta bèrdat ku no ta malu so nan tabata hasi. Por ehèmpel, Rei Ákab a mustra un grado di humildat i duele ora el a haña sa ku nan a mata Nábòt pa su falta. (1 Rei. 21:​27-29) Tambe el a traha statnan i a gana batayanan pa Israel. (1 Rei. 20:​21, 29; 22:39) Pero Ákab  tabata hasi algu ku nunka el a arepentí di dje. Influensiá pa su kasá, e tabata promové adorashon di dios falsu.—1 Rei. 21:​25, 26.

14. (a) Dikon Yehova a konsiderá Rei Rehóboam komo infiel? (b) Kiko mayoria di e reinan infiel tabatin en komun?

¹⁴ Laga nos papia di un otro rei infiel—Rehóboam. Mané nos a bisa kaba, el a hasi hopi bon kos. Pero ora su reinado a bira stabil, el a stòp di sigui Lei di Yehova i a kuminsá adorá dios falsu. (2 Kró. 12:1) Djei padilanti, el a keda bula di adorashon berdadero pa adorashon falsu. (1 Rei. 14:​21-24) Rehóboam i Ákab no tabata e úniko reinan ku a stòp di adorá Yehova na e manera korekto. Si nos wak bon, mayoria di e reinan infiel tabata apoyá adorashon falsu di un manera òf otro. Pues ta bisto ku un faktor klave ku Yehova a usa pa determiná ku un rei ta bon òf nò tabata si e rei tabata ador’é na e manera korekto.

15. Dikon adorá Yehova na e manera korekto ta importante p’e?

¹⁵ Dikon e asuntu di adorashon tabata asina importante pa Yehova? Pasó pa di promé, el a konfia e reinan ku e responsabilidat di yuda su pueblo ador’é na e manera korekto. Anto ora e israelitanan tabata mete ku adorashon falsu, nan tabata kometé pikánan grave i trata otro malu. (Osé. 4:​1, 2) Di dos, tantu e reinan komo e israelitanan tabata dediká na Yehova. P’esei, Beibel ta kompará nan metementu ku adorashon falsu ku adulterio. (Yer. 3:​8, 9) Ora un hende kometé adulterio, e ta infiel na su kasá i ta kibra su kurason. Meskos ta pasa ora un sirbidó  dediká di Yehova mete ku adorashon falsu; e ta infiel na Yehova i ta kibra Su kurason. e—Deu. 4:​23, 24.

16. Den Yehova su bista, kiko ta diferensiá un persona hustu i un persona malbado?

¹⁶ Ki nos ta siña? Ku nos mester evitá tur loke tin di haber ku religion falsu. Pero tambe ku semper nos mester adorá Yehova na e manera korekto i keda aktivo sirbiendo e. Profeta Malakías a bisa bon kla kiko ta e diferensia entre un bon hende i un mal hende. El a splika: “Boso lo bolbe mira e diferensia entre un persona hustu i un persona malbado, entre un persona ku ta sirbi Dios i un persona ku no ta sirbi Dios.” (Mal. 3:18) P’esei no laga nada, ni sikiera nos mes imperfekshon- i erornan, desanimá nos te na e punto ku nos ta stòp di sirbi Dios. Esei riba su mes ta un piká grave.

17. Dikon nos mester pensa bon ora di skohe un kasá?

¹⁷ Bo tin pensá di kasa? Loke Malakías a bisa tokante sirbi Dios por yuda bo ora di skohe un kasá. Pensa riba esaki: un hende por tin bon kualidatnan, pero si e no ta sirbi Yehova, bo ta kere ku na e momento akí Yehova ta mir’é komo un hende hustu? (2 Kor. 6:14) Si bo kasa kuné, lo e yuda bo stima Yehova mas? Kòrda loke a pasa ku Rei Sálomon. Aunke su kasánan ku no tabata sirbi Yehova kisas tabatin bon kualidatnan, echo ta ku nan no tabata adorá Yehova i pokopoko nan a pone Sálomon kuminsá adorá diosnan falsu.—1 Rei. 11:​1, 4.

18. Kiko mayornan mester siña nan yunan?

¹⁸ Mayornan, boso por usa e relatonan  di e reinan di Israel pa yuda boso yunan haña gana di sirbi Yehova. Yuda nan komprondé ku loke a hasi un rei bon den bista di Yehova tabata si el a promové adorashon berdadero. Ku boso palabra i akshon, siña boso yunan ku aktividatnan spiritual, manera estudio di Beibel, asistensia na reunion i salimentu den sirbishi, ta e kosnan di mas importante den bida. (Mat. 6:33) Si boso no hasi esei, nan por sinti ku e úniko motibu ku nan ke sirbi Yehova ta pasó nan mayornan ta Testigu. Anto esei ta pone ku segun ku tempu ta pasa, nan por sinti ku adorashon di Yehova no ta dje importante ei òf nan por asta stòp di sirbi Yehova.

19. Tur kos a kaba pa un hende ku a stòp di sirbi Yehova? (Wak e kuadro “ Bo Por Bolbe Serka Yehova!”)

¹⁹ Si un hende a stòp di sirbi Yehova, esei ke men ku hamas lo e no por bolbe bira amigu di Yehova? Nò. Pasó e por arepentí i sirbi Yehova atrobe. P’e logra esei, e mester ta humilde i aseptá yudansa di e ansianonan. (Sant. 5:14) Kualke esfuerso ku e tin ku hasi pa bira amigu di Yehova atrobe, lo ta bale la pena!

20. Si nos imitá e reinan fiel, kon Yehova lo mira nos?

²⁰ Ki nos a siña for di e reinan di Israel? Ku nos por ta mané e reinan fiel si nos stima Yehova ku henter nos kurason. Nos mester siña di nos erornan, arepentí i hasi e kambionan nesesario. I nos tin ku keda kòrda ku ta importante pa nos adorá Yehova, e úniko Dios berdadero, na e manera korekto. Si abo ta fiel na Yehova, lo e mira abo tambe komo un hende ku ta hasi loke ta bon den su bista.